اصبحنا و اصبح الملك لله
فاقت ليلى على صوت ماماها كتفيق فيها باش تمشي المدرسة (كتقرا في 6éme و وجدان الباك مي فنفس المدرسة ) ناضت بدلات و لبسات حوايجها سروال تجين و بودي ابيض و فوق منو لبسات طابلية فطرات و لبسات سبرديلة بيضة و خرجات لقات وجدان يله هابطة من دارهم حتى هي كثر منها مخنزرة مكتحملش تفيق بكري 😂😂😂 تسناتها ليلى حتى و صلات حداها و زادو
وجدان: صبحاتو لله مصبحة ثاني على داك وجه اللفتة ديال الفلسفة ثاني يخ
ليلى: افف مشتيش انا اللي داخلة عند داك المسطي ديال الماط سطاوربعين (مسمين عليه 46 حيت مكيعرفش يقولها كيقوليها سطاوربعين😂😂😂 )
وجدان: ها زيدي قرينا بكري معاهم
مشاو البنات لقيسمهم و كلها شد بلاصتهم حتى دخلوا الاساتذة ديالهم
داز الوقت و وصلت 12 و خرجو من المدرسة كيتمشاو هي و صحبتها و كيضاربو و يضحكو و يتناتفو
ليلى:حرام عليك ا صحبتي شوفي على حالة درتي.... والا شافني شي حد بهاد المنظر
وجدان:شكون هاد الحد ... درب كامل شايفك .... اممم و لا كتقصدي... (و سكتت)
ارتبكت ليلى و دوات بنبرة حادة
ليلى: اش كتقصدي بهاد الهضرة ا وجدان
وجدان وقفت و شدات ليها في دراعهها
وجدان: ليلى حبيبتي نتي راك ختي ولكن باركة ما تبقاي متعلقة في حبال دايبة و حب مراهقة مكيسواش تضيعي عمرك على قبلو وهو محاسش بيك اصلا و شايفك
لوات شفايفها بمرارة و قالت بهمس و غصة في نفس الوقت و عينين مدمعين
ليلى: عند بالك ماحاولتش (شهقت) حاولت بزاااااف و مقدرتش (غمضات عينيها و دازت دمعة كتعبر على الالم اللي كتحس بيه)
شافت فيها و جدان بحزن و مرارة على حالها و كملو طريق بسكات
وصلوا الحومة مع دخلة ليلى بان ليها اوس خارج من دراهم باينة عليه يله فايق لابس سرفيط
السيدة غي شافتو و هي ترفع و بقات غادة بلا عقل حتى عفطات على حجرة و تلوات ليها رجليها و طاحت و غوتات
ليلى: اعععععععع
دارت عندها وجدان بلهفة و خوف و تحنات عندها كتسول فيها
وجدان : ليلى....مالك..... اش واقع
ليلى ( بألم و وجع ) : رجلي رجلي هئ هئ تلوات هئ ليا هئ
و ما شفتهم ا سعدية البرگاگة و قربات منهم كتسول حتى هي على اش واااقع
السعدية : اش واقع .... مال صاحبتك نتي
و جدان : والوو غي رجليها تلوات ليها .... عاونيني نهزوها لدارهم بلا كثرة الهضرة
ناضت دغيا و جدان سندات عليها ليلى
السعدية : لدارهم الله يا بنيتي الله ركابيا معوقين و ظهري مقوس ا راسو الا مشيت تهزيتتها نتخبطو انا و ياها
خنزرت فيها وجدان : و ملي مابغاش تعاوني لاش جاية ولا باغا غي تدي تبرگيگا كي عادتك
ميقات فيها السعدية و زادت 😏
سنداتها وجدان عليها و بركاتها فدرجة ديال واحد الدار وما يتم جاي غي بايو بانتلو ليلى باركة في درجة و شادة رجليها و كتبكي و وجدان حداها كتقلب فيها تم جاي بزربة و خوف و هلع عليها تحنى حتى هو على رجليه و سولها بلهفة
بايو: ليلى مالك... قولي متخلعينيش
تجاهلاتو ليلى و متسوقاتش ليه و هي تتحرك مألمة شادة رجليها و دموعها كتطيح بزز منها
ملي شافها ماجاوبتوش شد رجليها بين يديه و حطها فوق رجليه ملي شافتو ليلى اش دار غوتات عليه رغم انها كتتوجع
ليلى: اش كدير .... بعد يديك عليا واش حماقتي..
قاطعها بايو بصوت متحشرج لاهث : ما تخافيش ا حبي ... بغيت غير نشوف ليك رجليك مالها
ولات باغا غي الفكاك منو ومن قبضة ايديه المحكمة على رجليها ملي حسات بصباعو كيقيسو خفية فوق بشرة ساقها تتلمسها بحركة بطيئة و شهوة جابت ليها الغمة و النفور منو و محملتوش شافت في و جدان بنظرة زعما عتقي و بعدي ايديه مني ساعة وجدان مافهماتهاش كيحساب ليها بللي غي موجوعة وخايفة لا يقصحها في رجليها ، و مع ذالك بقا كترطا باش يطلق رجليها و تبعد يديه اللي محملاتهمش يقيسها بيهم بديك الطريقة الحقيرة ديالو
عند اوسمان
من بعد ما خرج من دارهم مشا الحانوت ياخذ باش يفطر مع حيت سهر البارح بسبب المقاتلة فاق معطل و هو جاي كتبان ليه الجوقة في درب هز راسو بفضول بغا يعرف اش واقع و هو يشوفها جالسة في درجة و كتبكي متألمة و حداها صحبتها اللي كيشوفها ديما معها و اللي كتبكي حتى هي مألمة على حالها لكن اللي خلا دم تتبخ في عروقو و العروق يطرساو ليه في درعانو هو مللي شاف لاخر گالس تحت رجليها شادها بين يديه و كيتلمس بها بديك الطريقة الوقحة و حتى حد ما لاحظ الشي اللي خلاه بلاما يحس يتحرك و يمشي لعندهم و دفعو بقسوة بعيد عليها حتى طاح بايو لارض بجهد و هز فيه راسو بخشية و رعب مللي دوا اوس بصوتو الجوهري الخشن و هو معصب وهو معارفش علاش حس بهاد الاحساس الغريب
أوس: واش مكتمرگش ... بعد وسخك عليها
توتر بايو كيشوف فيه قايل ليه متعلثم و بصوت متقطع: م متفهمش غ غ غلاط ا خويا أوس انا ك كنت غي كنعاون فيها
تحنى عندو بغضب و مابقا ليه والوا يخشي ليه راسو مع لارض لو كان متحكمش في راسو في اخر لحظة
اوس: اش كنتي كدير ..... امممم سمعني مزال باغي نعرف ... كتعاون فيها ازاااا*ل ولا كتبسل عليها وسط العبد من تحت دف
دخلو ولاد الحومة كيفكوه و يهدنوه حيت بان ليهم غاياكلو بقوة ما تحقن دم في وجهو و عينيه حمارو و تقلبو و دفعوه لور بعيد على بايو اللي صفار وخاف ملي شاف أوس بهاد الغضب حيت عارفو الا مشا حتا تعصب زلزال ينوض في الحومة و حاضر ليه و شايف المضاربات ديالو و كيفاش كيخلي بنادم مشروط تحت منو بدق الا مشا حتا تعصب....... بنادم تم مافاهم و الوا وشي كيسول في شي على اش واقع و همهمات الحاضرين للموقف كتزاد بفضول ..... تلفت أوس ليها بشوفة قوية و كتطلق الشرر ناحيتها هي اللي جالسة و متبعة لبلان بعيون واسعة مصدومة مامتيقاش و مذهووووولة و فنفس الوقت فرحانة و قلبها كيدق و دموع وقفو من عينيها اللي كانو مركزين عليه غي هو كأنو مكاين حد من غيرو هو وياها و احاسيس مبعثرة داخلها و كتحمد الله حيت طاحت (😂😂😂) و عاشت هاد اللحظة و كتمنى طيح دايما الا كانت غتشوفو قريب ليها و كيدافع عليها و قرب لجيهتها بكل رجولة و هيبة ووقف عليها هي اللي هزااات راسها فيه و شافت فيه بدوك العينين زوينين ديالها لي عجبوه هو و بقى كيشوووف فيها و حتى هي بقات ساهية فيه حتى حسو على راسهم و قال ليها بنبرة قاصحة
اوس : ونتي كيفاش تخليييه...
و قطع هدرتو مكملهاش و زاد مكمل طريقو و هو مفاهم والوا حتى علاش دار هادشي و حاول يقنع راسو بأنه غي عاونها من داك الحمار اللي كان كيستاغل الموقف و زاد كمل طريقو لدارهم
تفرقات جوقة و وجدان عونات ليلى توقف و زادو لدارهم دقو و حلات جميلة لباب كانت يله جات من الخدمة حتى هي و شافت بنتها في ديك الحالة و هي تشهق و ضربات على صدرها
جميلة: اويييلي مالك في رجليك
وجدان: والوا اخالتي غي رجليها تلوات ليها
ليلى : ما كاين والوا ايما ما تخافيش.....واش غتخلينا واقفين في الباب راه ضروني رجليا
جميلة : دخلي دخلي
دخلو و سدات جميلة لباب و مشات كتجري الكوزينة سخنات زيت العود و جابتها و لقاتها مسرحة رجليها شدات رجليها و بدات كتمسد ليها فيها و لوات عليها باندا و زيراتها ليها و هي كتنگر
جميلة : صافي هادشي علاش كتقلبي بقيتي دوري دوري حتى علقتي رجليك....غي گولي ليا فين كان عقلك
ليلى: وصافي ا يما واش انا درتها بلعاني
يله كانو غتجاوبها جميلة و هما يسمعو لباب كيتدق مشات وجدان تحل لقاتها خالتي راضية جاية تطل على ليلى سلمات على وجدان و دخلات جميلة غي شافتها ناضت مشات لعندها سلمات عليها عاد مشات عند ليلى تطمن عليها
راضية : لاباس عليك ابنتي لاباس عليك ... غي گال ليا أوس على اللي و قع جيت نجري عندك
ليلى(باحترام و مزنگة): لهلا يخطيك عليا ا خالتي ... عارفة اللي كاين ..
راضية (بحنية وهي كطبطب ليها على شعرها عزيزة عندها ليلى ملي كانت صغيرة): كي بقيتي بعدا شوية
ليلى (بابتسامة): الحمد لله ا خالتي يسول فيك الخير
ناضت جميلة عمرات اتاي و حطات الصينية و الحلوة و المسمن و البغرير مهم تهلات
راضية: جميلة ختي مال معذبة راسك كنت ناوية غي نطل و نطمن على ليلى راك عارفة معزتها عندي قداش
جميلة (بابتسامة): الله اودي ا راضية ختي عذابك راحة ... تستاهلي كل الخير
راضية (برضى): لهلا يخطيك
و مشاو بركو يضحكو و يهدرو و مجموعين على دكة ديال اتاي و جات حتى حياة مامات وجدان بغات حتى هي تطمن على ليلى و تشوفها كي بقات بقاو على داك الحال حتى تفرق المجمع و كل غازي قصد بلدو
بعد مرور شهر
في هاد شهر ما تبدل والوا ليلى باقا كتعس على اوس في الغادية و جاية و نهار على نهار حبها ليه كيزيد يكبر و تسنى نهار اللي يكون ديالها و يبادلها حتى هو الحب😣... رجليها ولات مزيانة بفضل ماماها اللي كانت كتمسدها ليها بزيت العود سخون حتى برات ليها........ اما اوس ما جايب دنيا خبار هو كيشوفها بلي باقا صغيرة و بحال ختو و علاقتو ب يارا مزيانة و داير معاها ليوم يشوفها باش يعرفها على ماماه ........ من بعد ما تلاقا اوس ب يارا في كافي حدا البحر دموندا أوس على قهوة كحلة بلا سكر و يارا عصير ديال ليمون
يارا (بابتسامة) : مامتيقاش بلي ليوم غنشوف لبلاصة لي كبر فيها حبيبي و متشوقة نشوف ماماك
اوس تبسم ليها
يارا : واش دويتي ليها عليا
اوس : اه....راها كتسنا فينا...حتى هي باغا تشوفك
يارا تبسمت و هزت العصير و بدات كتجغم فيه
ملي سلاو ناضو حط أوس فلوس لكونسوماسيو و زادو لجيهت طونوبيل ووجهتهم لدرب...
فنفس الوقت ليلى هي و وجدان باركين قدام الباب و كياكلو زريعة و يشدو في النميمة هادي غلاظت هادي رقاقت هادي تزوجت هادي طلقت شوية بداو يضاربو و يتراشقو في بعضياتهم حتى سخفو
وجدان: ليلاتي 😍
ليلى: ممممم😒
وجدان: نطلبك طليبة صغيرة
ليلى : قولي
وجدان : غني ليا بليز
ليلى: ربي رزقني بفد عشق ..... بس هو لي فبالي ..... صار نفس مالي..... ما غيره يحلالي .... خلاني طير بلا جنح... يما شحلو عطره ...دللني كل عمره...كلي تحت امره....كلي تحت امرررره .... وين الگ مثلتش بالعمر ... يا ستري يا اجمل ستر ....فنانة بالحب و الغزل...بس هي خلاتني استقر .... معشوقتي و ما نفترگ ...دايب في حبها و محترگ.....كلش تدي قبلك تره....بس انت حبي منصدق
ليلى و هو كتغني بداك صوت اللي عطاها الله بكل احساس و روية و تأثر سادة عينيها وهي كتخيل حبيبها و شكون من غيرو سيدي أوسمان سيد رجال اللي كتحلم بيه صباح و عشية و ذايبة في عشقو حتى النخاع .... ملي سلات حلات عينيها على تصفيقات وجدان و هي كتضحك
وجدان: براااافو براااافو 👏👏👏 واواواو يا ختي راك غي ضايعة في هاد لبلاد
ليلى(بطريقة مسرحية) : شكرا شكرا ههه
و هما كيهضرو حتى كتبان ليهم طنوبيل ديال أوس جاية و بدا كيبلاصي حدا دارهم ليلى تقادات في الجلسة و قلبها بدا كيضرب بجهد و زيرت على يد وجدان أو وجدان بدورها كتطبطب عليها حتى كيبان ليها خارج و معاه مراة اخرى شهبة و زوينة .... ليلى تصدمت ...تشللت...تكسرت...تكوات....قواها خارت...تهرسات...جميع الاحاسيس الخايبة حسات بيهم في ديك اللحظة وهي كتشوفو مع مراة اخرى من غيرها ... هي عارفة بلي عمرو وعدها بشي حاجة و عمرو بين ليها شي حاجة مي كان عندها امال.....امال اللي كنت كتصبر بيه راسها بللي غيجي واحد نهار و يبغيها امال بلي غتكون معاه هي ...مراتو و مامات ولادو و لكن للاسف امالها حتى هو تهرس حتى هو تبخر ... في حين هي كانت كتحلم بيه... هو كان كيحلم بوحدة اخرى في حين هي كانت كتبغيه ...هو كان كيبغي وحدة اخرى و ما اصعب هاد الاحساس و ما يحس بيه غير لي مجربو ...... بغاتو مللي بداات كتحل عينيها البنات كيعيشو مراهقتهم... و هي شنو.... هي كتحلم بيه غير هو و بنهار اللي يبادلها فيه نفس الاحساس .... و لكن كانت غالطة هو كيبني في حياتو في جهة اخرى.... و هي حياتها كتريب بسباب حبها ليه
💔احببته رغم صغري .... فأصبح حلمي في منامي و يقظتي💔
💔و برغم علمي بأنه غراما مستحيلا... وحلما بعيدا💔
💔احببته💔.....😢 وتمنيته....💔
💔احببته و انا اعلم انه لا يراني سوى طفلة ترعرعت امام عينيه .....احببته💔
من بعد ماخرج اوس من طونوبيل و معاه يارا شد ليها في ايديها و غادي بيها جيهت دارهم اما يارا كتشوف هاد الحي لي جات كيداير بشوفات الاستهزاء و تكبر و تدور في عينيها و كتقول في خاطرها اش هاد العجب جابني ليه حل لباب بساروت و دخلو لداخل
اما صگعة ليام بقات گالسة مبلوكية مابقاتش قادرة تحرك مت بلاصتها رجليها خواو بيها و بقات متبعاهم حتى دخلوا لدار و بقات مركزة بنظرها على لباب و عينيها شلال دمعة ولات تخرج راسها بلا صوت مامتيقاش بلي حب حياتها و مرهقتها كيضيع من بين يديها و هي كتشوف ....بقات ساهية في الباب و عقلها سارح لبعيد مامديهاش في هديك اللي من صباح وهي كتزعزع فيها باش تدوي معها .... سيدة بقات جامدة مكتسمع والوا و مكتحس بوالوا من حولها سوا دقات قلبها اللي عاليين ... و كون صاب قلبها يدير رجلين و يخرج من صدرها و يجري بقوة ما عاليين .....وجدان مللي شافتها هكاك تخلعت عليها وهي ضربها بصرفيقة حتى شهقت ليلى ....مع شهقة مع يدات كتبكي بوااحد صوت يسمعو جبل يريب بقوة الالم اللي كتحس بيه ......قلبها ا عباد الله كيتذبح و لا كاين اللي يحس بيها ....قلبها كتقطع طراف طراف و لا كاين اللي داها فيها ....كتبكي بصوت مسموع...... بصوت اللي يسمعو يبكي معاها بقوة الالم اللي فيه ...... وجدان مللي شافتها بقات فيها صحبتها عنقاتها و بدااااات تبكي معاها ...و المشكيل انهم في زنقة اللي يداز يشوف فيهم .... ولكن فين العقل اللي يفكر ..راه موضر ملي شافتو شاد في وحدة اخرى و مدخلها لدارهم .... هادي هي صورة اللي تطبعات ليها في ذاكرتها
و من محاسن صدف ما تم جاية غي ماماها من الخدمة و شافت بنتها في ديك الحالة اللي تبكي لحجر ... مها لاحت الميكة اللي كانت هازة و مشات تجري عند كبدتها تشوفها مالها
جميلة (بلهفة و خوف و هلع في نفس الوقت): مالها مالها بنتي
وجدان (ببكاء): عاونيني ا خالتي ندخلوها لدار راه غتسخف
ليلى متكية على كتف وجدان و كتبكي و باركة صافي ترخات مابقاتش قادة تزيد ولا دير شي حراكة
تعاونات وجدان ماماها و دخلوها لدار و جميلة تالفة و ماعارفة بنتها مالها خصوصا مللي طاحت فالارض و بدات تغووووووت ربي اللي خلقها و تبكي و وجدان تبكي و جميلة تعدد على بنتها حتى سخفات و جابو البصلة... ريحة.... ساروت ... مخلات ما دارت لبنتها باش تفيق عاد بدات تحل في عويناتها بشوية بشوية و شافت في مها و صحبتها اللي كيبكيو عليها.....نوضوها بشوية عليها و داوها لبلاصتها و غطاتها مها .... هي لوات عليها المانطة وجمعات عندها رجليها و دارت نعسة الجنين في الكرش .....
جميلة و هي كتدوز عليها بديها على شعرها و كتبكي : مال بنتي ..مممم...اش خصر خاطرها
ليلى زادت تخشات في بعضياتها وعينيها دايزين بدموع و ماجاوبتهاش
ملي جميلة مجوباتهاش بنتها هزات عينيها لوجدان لواقفة حدا باب لبيت ديال ليلى و كتبكي .... ناضت جميلة طفات على بنتها ضو و خرجات و سدات عليها لباب .... مشات هي و وجدان لصالون وجراتها حداها باغا تعرف اش وقع لبنتها
#يتبع
مفهمتش لاش مكاينش تفاعل و القصة كتستحق حتى وليت كنقول ياكم كنخربق كنتمنى تقدرو تعب شوية و تدعمونا بنجمة و عطيونا رأيكم في القصة واش زوينة و لا لا 🙏