#رِفان_مع_كاتبة ✍🏻🤍.
رِفان : رواية تحسي انك ظلمتيها شويه في النهاية او اختصرتي في احداثها ؟
فافي : سكك والقدر كتبت النهاية ومش راضيه عليها حسيتها ناقصة ولتوا كل مانقرا النهايات نتحسر ان مادرتهنش كيف مانبي انا .
رِفان : ليش ما كتبتيش كيف ما تبي ؟
هل الوقت ضغط عليك ؟
او حسيتي انك قعدتي تبي تنهيهن وخلاص عشان تتريحي .
فافي : الضغط كان واجد ومافيش حد يقدر انك تتعبي وعندك حياة بعيده عن عالم الروايات سوا قرايه سوا اهل او صحبات وغيره .. ف سكك كانت تبي تبدأ القرايه وكنت لازم ننهي قبل ما تبدأ مش مايعطل عليا شي ووقفت مره مانبيش نوقف فيها اخره رغم ان هذي نهايتها وماحولتش حاجه منها بس السرد كان سريع وكان من الممكن يكون احسن .. اما القدر كانت راحه اكثر من اي سبب ثاني كنت نبي نتريح منها وبس رغم حتى هيا مش ناقصه وكانت نهاية متكامله بس تعبها زاد واجد لدرجه ماحسيتش وانا نكتب ف نهايتها .
رِفان : ثنائي من ابطال رواياتك قريبين من قلبك ؟
فافي : ميرال وياسين ونضال وليالي .
رِفان : لو جاء يوم واُتيحت لك فرصة ان رواية ليك تتمثل كَ مسلسل او فيلم ، اي رواية يا ترى حَ تقترحي ؟♥️
فافي : سكك وبيت العيله بس طبعاً بعد تغيير بسيط ف سياق القصص .
رِفان : اكثر رسالة تحاولي ديما توصليها للقراء ؟
فافي : واجد بصراحه بس الاكثر ان مافيش مستحيل .. ف سكك كان الموضوع متطرف ع الدين ورد الدين اشويه وان اللي اديره ف الرخيص تلقاه ف الغالي وان الدنيا دوارة هذي رسالة للقراء من حيث سكك .. اما القدر ان مافيش شي مستحيل مهما صار ماتيأسش كيف قصة ياسين وميرال وشن كان هو يحلم وشن حصل .. شاهين .. وقصه ثانيه واللي هيا الاهل اللي يكونو ضد بناتهم ودايرينهن ان ديما غلط او ان البنات ديما غلط والشباب لا .. ف قصة بنات فريحه وبذات فرح ورغد .. واما ف بيت العيله ان مافيش شي يجي مكان العيله مهما كان شنو .
رِفان : النقد بالنسبة ليك كَ كاتبة تتقبلي فيه او لا ؟
ولو " لا " ليش ؟
فافي : النقد البناء ماحد يكرهه ان حد يقولك الشي هذا غلط صلحيه او نصيحه ماحد يكره الشي هذا بس النقد الهدام لا لان يحرحني انا ككاتبة ماعنديش مشكله ان تقولي الشي هذا ناعجبنيش بس مش بطريقه تجرحني وتخليني كأن تعبي ولا حاجه لان عندي فكرة ان اي كاتب يتعب واي كاتب عنده ضغط نفسي ف لازم يحصل كلام يرفعه مش يهبطه مش يلقا بعدها طاقة يكمل بيها .
رِفان : روايتك الجديدة اسمها " دوار الشمس "
ممكن تحكيلنا عليها شويه؟
وليش اخترتي هالأسم ؟
فافي : دوار الشمس اخترتها عشان الزهور هذي ماتعيشيش الا ع ضي الشمس واقرب وصف للروايه هو .. لأنها تحكي ع الرجل ف حياة الانثى سوا من اب او اخ او زوج وان هو كالشمس والزهور هنا النساء ..
بصفه عامه الروايه تحكي ع زواج القاصرات .. الاب المتسلط .. تحكي ع العلاقات المحرمه تحكي ع التفتح عند بعض البنات تحكي ع حاجات غلط ونحنا كبشر مفروض نصلحوها ..
رِفان : كاتبة سواء ليبيه او عالميه تحبي رواياتها ؟
فافي : اكثر من كاتبة ليبية بصراحه .. مانقدرش نحدد اسم واحد يعني الكل خير وبركة ..
اما عالمية الكاتب عمرو عبد الحميد نحب نقراله جداً وهو الكاتب الوحيد اللي ننسجم معاه .
رِفان : بطل غير ابطال رواياتك قصته مأثره فيك ؟
فافي : آية ف روايه سعادة كاتبة .. واحمد ف روايه الجوكر .. وجليلة ف روايه بقايا رماد .
رِفان : هل حَ نشوفوا فافي المسماري تكتب بالفُصحى ؟
فافي : ان شاءالله في اقرب وقت 🤍.
رِفان : انجح كاتبة من وجهة نظرك والافضل بالنسبة للجمهور ؟
فافي : مافيش ڪاتبة معينه .
رِفان : سؤال كان خاطرك ان نسأله لكِ ؟♥️♥️
فافي : مافيش والله اسألتك كلهن كانن ممتعه واستمتعت جدا معاك ❤️❤️
رِفان : واخيرًا ، كلمة لِ جمهورك ، او اي شي حابه تقوليه المساحة ليك ♥️ .
فافي : شكراً عشان انا كبرت بيكم .. ويارب يجي يوم ونكون شي كبير ونقول انا هنا بفضل ربي وفضل ناس كان لهم جميل كبير عليا مستحيل ننساه❤️
شكراً لكل حد يقول ف كلمة خير ف حقي وشكراً لكل حد يقدر فيا وشكراً لكل حد يدعم فيا❤️
وشكراً لصفحتكن اللي كان التعامل معاكن جد ممتع وان شاء الله موفقات يارب❤️❤️.
و بِـ هكِ نكونوا ڪملنا اللقاء مع الكاتبة #فافي_المسماري 🤍.
استنونا في لقاء جديد مع ڪاتبة جديدة قريبًا بعون الله 🙏🏻🤍.
#رِفان_مع_كاتبة ✍🏻🤍.