أحلام بفخر: عتقتك منو ياكي ياكي
فراح باستها: ناري كتجي غير فالاوقات زوينين
أحلام رجعات شعرها لور بتكبر: راه ملي مبنتيش ليا لا نتي لا هو عرفتك واحلة صبرت تا قال ليا بابا كلميه و هبطت و بلعاني قلت ليه بغاتك ماماك حيت الى قالت ليه بغاك بابا ايطمر و ميتكلم تا يبغي هو
فراح بإبتسامة: واخا هكاك كون اخليتيني معاه
أحلام ضرباتها لفخضها: هايهاي على شيخة ،اجي بعدا اش فدوك لميكات
فراح مشات جبدات ليها گندورة: هاكي هادي جابها ليك سيف الدين
أحلام خداتها و بدات كتقيس فيها : ناري اختي قلت صافي نساني ملي وليتي نتي
فراح ضرباتها لراسها: راه انا و قلت نساني معنديش شي حاجة جديدة باش نمشي لمصلى ساعة جابهم
أحلام بدات كتجبد فداكشي لي فميكات :هادشي واعر خصوصا هاد جلابة ناري ناضية
فراح بتاسمات: واخا تحرمات عليا راه غير غدا لي غلبسها
أحلام بتساؤل: علاش
فراح بدات كتجمع فداكشي لي رونات أحلام: تال غدا و تعرفي
أحلام: واخا
اوى هكا داز نهارهم بقاو مجموعين كل واحد و اش كيوجد كأي عائلة مغربية فرحانين بلعيد واخا أحلام عيات طلب سيف الدين يجيبو لحوالا سيمانة قبل ولكن حلف لادخلهم لدار تال نهار لعيد و راه من حقو وهو عايش مع وحدة لي فواحد لعيد حلفات ليهم لا ضبحوه حيت ربات عليه لكبدة ومشكيلة تزادت معاهم تا وحدة خرى علماتهم فاطمة الى ناويين إضبحو جوج إيجيبو تلاتة حيت بزز منهم تخلي واحد ممضبوحش داكشي علاش قرر ما غيجيبهم تال نهار لعيد مع سلم عليه مع زرب عليه
🌞أصبحنا و أصبح الملك لله🌞
هاد نهار ماشي بحال جميع لأيام حيت هاد نهار عيد كتقام فيه سنة و مكينش لي مكيعشقش هاد لعيد و مكيتسناهش غير إمتى يجي
واقفة فراح بجلابة لي جاب ليها سيف الدين كترش فريحتها بليديها لي مزيناها لحنة و خاتم ديال زواج و ساعة شافت راسها فلمراية واش كولشي مقاد بان ليها ماسكارا مخسرة من واحد لعين قداتها ،كانت دايرة ميكاب خفيف ،قلم و ماسكارا برزو ليها عينيها لكحلين ودايرة كلوز كيبري جا مع شفايفها منفوخين
تمات خارجة و حطات تيليفونها فوق كوافوزة ماكاين لاش تديه معاها تماشات ناحية باب أدم كدق عليه
فراح : وااا أدم انا و ساليت قبل منك
حل أدم لباب كان لابس گندورة فلبيض و مخيطة بزرق و بلغة زرقة لابسها مع تقاشر بيضين و داير ساعتو و ريحتو كتشم منين و لين
نطق أدم بصوتو رجولي : راه بطبيعة لحال تسالي قبل مني و نتي ساعة و نتي كتلبسي
فراح ميقات فيه: يااك و باز
أدم طلعها و هبطها شد ليها ليديها و دورها فبلاصتها: هاي هاي على تبوگيصا
فراح بإبتسامة: بصح جاتني زوينة
أدم : و بربي تا جاتك لحطا ناضية مي الله إحفضك غير سؤال بسيط
فراح بتساؤل: سول نشوف
أدم بجدية: واش سيف الدين ايخليك تمشي هكا
فراح شافت فيه بحزن: واش لهاد درجة مزيرة
أدم بإبتسامة ماباغيهاش تقلق: وهي ماشي مزيرة غير فورمتك كتبان من طيارة
فراح تزنگات من هضرتو : ولكن راه هو لي جابها ليا
أدم هنا خرج عينيه بصدمة: مكضحكيش ياك
فراح بدات كتلعب بصباعه و كتلبد بعويناتها: دبا هانتا هو شراها ليا و ملي شافها قال ليا مزيرة غنبدلها شوية ملي صونا لمولاها ماعرت اش قال ليه جا عندي قال ليا انلبسها غير ليوم و منبعدش من ماما و خالتي
أدم كان كيسمع ليها بإهتمام: امم غيكون غير ملقاش طاي كبيرة ، مهم زيدي قبل منتعطلو و حاجة خرى حيدي داك لخلخال مافينا لسمع شي غوات على صباح
فراح حدرات راسها كتشوف رجليها نساتو ضربات راسها بخف و هبطات تحيدو: اووف كنساه
حيداتو حطاتو حدا لباب و تمو هابطين فدروج كيبانو ليها كلهم واقفين كيتسناو
أحلام لي لابسة جلابة لي كانت شرات نهار خرجو و دايرة معاه زيف فنفس لون واقفة حداها نادية لابسة جلابة فلخضر و زيف فلون لبيض و مخلط بلخضر و معاه بلغتو فلون خضر و حداها كانت فاطمة لي لابسة جلابة بيضة مع خيمارها بيض و ليگات بيضين و بلغة و تقاشر بيضين و أدم واقف حداها بگندورة فلكحل و مخيطة ببلونكاسي و عمر جالس فوق كورسي لابس فوقية بيضة مع بلغة فبلونكاسي و تقاشر بيضين
تماشات فراح و أدم كيسلمو عليهم مجموعين و كيباركو ليهم لعيد
تا نطقات فراح: ماما فين هي صفاء
فاطمة بإبتسامة: خليتها ابنتي ناعسة غنجيو دغيا بلا متعدب
نطقات نادية: بصح خليها ترتاح
أحلام وقفات حدا فراح و أدم و نطقات: فراح متأكدة سيف الدين لي جاب ليك جلابة
فراح : و الله تا هوا
أحلام بإستغراب: راه ماشي مزيرة لديك درجة مي مبينة ليك فورمة واعرة مستحيل إخليك تخرجي بيها
نطق أدم لي كان سامع حوار ديالهم حيت كان قريب ليهم: خلاها غير سكتينا
أحلام بصدمة: اوى لعجب
فراح تلفات جيهة دروج ملي شمات ريحتو لي سابقاه و مستحيل تخفى عليها لقاتو مكاينش مي بقات مقابلة دروج مكاملاش دقيقة تا كيبان ليها هابط بلبسة لي وراها لبارح لي جاتو خطيييرة مع نظاضر و مع گرميط و خاتم لي مكيخطاوش ليديه و فليد لاخرى داير ساعة و لابس بلغتو مع تقاشر بيضين قصار مهم من لخر جا ناضي
هبط وقف قدامهم سلم عليهم كلهم و بارك ليهم لعيد لي غير وصل عند فراح سلم عليها و بقا كيحقق فوجهها مزيان و هو عقدهم طلق من ليديها و نطق
سيف الدين: مشينا
عمر وقف : ياله بسم الله
كل واحد تقدم خارج و هاز صلايتو معاه بقا سيف الدين موخر و حاضي فراح من لور واش باينة معيقة مي واخا ماعرت اش دير مبينة ليها فرمتها مسح على وجهو بعصبية و جرها لعندو
هي لي كدوي مع أحلام تا كتحس براسها مجرورة شافت فيه عاقدهم عرفات ان فلموضوع نطقات متوترة: باغي شي حاجة
سيف الدين عقدهم ونطق بصوت باين فيه لعصبية : علاش دايرة داك لقلاو*ي فعينيك
وياله اتجاوبو هز صبعو بدا كيمسح ليها كلوز لي ففمها
فراح بتوتر خافت لا يشوفهم شي حد: راه خالتي لبارح قالت ليا ديري شوية قلم فعينيك باش تباني مرأة ماشي بنت
سيف الدين باقي عقدهم: اش هاد تخربيق و داك خاتم لي دايرة اش محلو من إعراب فراح متجهليش اصل مي كون شفتك قبل بربي لا خرجتي و محيدتيش هادشي من عينيك تا دبا انمشيو نخليو هاد نهار يدوز بيخير مي غير رجعو تحيدي داك لقلاو*ي من عينيك سمعتي
فراح كترعد و تقفف: هانت هاه شتي هادشي لي فشفاري نحيدو ياك مي لقلم منقدرش حيت شارية ديال 24 ساعة
نطقاتها و هي كتلعتم خافتو لايخلطها فهاد زنقة
سيف الدين نتف راسو بعصبية و جرها تمو غادين تابعينهم و كيدوي: واتي شفارك طوال لاش داك لخرى واش باغا توصليهم لحدود و تا عينيك كحلين لاش داك لقلم
فراح حسات بيه بدا كيجهد صوتو ضورات ليديها على دراعو و نطقات بصوت حنين: هانت غير بشوية راه اخر مرة نديرو صافي غير بلا متعصب
سيف الدين حاول إطمر و حيد ليديه من ليديها و عنقها بيها جات تحت ليدو كيوت كتبان: هاحنا دوزناها هاد لمرة اما مرة خرى ابنت ناس بربي لا هضرت
فراح نسات راسها فزنقة لوحم لعب عليها ريحتو عجباتها تمخشات فيه و حركات راسها بإيجاب
خارجين لبنات مع نادية و فاطمة وقفو جنب جامع كيتسناو فدراري و عمر تا كيبانو ليهم ،تمشاو ناحية ديالهم راجعين لدار و كيضحكو وصلو و دخلو كل وحدة لبيتها بدلو حوايجهم مخلين دراري و عمر جالسين فصالون خرجات أحلام بفراشة بزرق و مخيطة بلبيض تماشات لكوزينة بانت ليها واقفة فاطمة لي لابسة فراشة تاهيا بلبيض و زيفها بلبيض و حداها نادية لابسة تاهيا فراشة و لكن فلون خضر بداو كيوجدو فلفطور تا لحقات عليهم أحلام لابسة فراشة لي جاب ليها سيف الدين و رامية زيفها فوق شعرها ستغربات فلول زعما كينين اهما علاش دير زيف مي غير سمعات دقان فلباب و حلاتو بان ليها يوسف و باباه رشيد لي تعرفات عليه واحد نهار تماك عرفاتو علاش طلب منها دير زيف عفوا بغيت نقول هددها دير زيف
فراح بتاسمات و سلمات على رشيد بلوجه باركات ليه لعيد و يوسف كتافات فقط باش تسلم عليه بليد و باركات ليه تاهوا
فراح نطقات: اهلا مرحبا بيكم دخلو
نطق يوسف لي كان لابس گندورة فلخضر و مخيطة بلباج و لابس معاها بلغة بلباج : ترحب بيك لجنة
نطق رشيد لي كان لابس تاهوا فوقية بلكحل و بلغة تاهيا فنفس لون، راه ليوم عيد ليوم عالمي لگندورات: اش خبارك ابنتي فراح
فراح حلات لباب و رجعات لور: والله تا بيخير اعمي دخلو متبقاوش فلباب
دخلو و تبعاتهم فراح هما مشاو لصالون كيسلمو و هي مشات لكوزينة بانت ليها أحلام مشات حداها كتعاونها
فراح بتساؤل: وااش حبيب قلبك كيعيد معاكم
أحلام شافت فيها بتوتر: واش جا
فراح حركات راسها بإيجاب: واش كتعيدو مجموعين
أحلام بإبتسامة: اه من صغر و انا كنعقل على راسي كنعيدو مجموعين
فراح بإبتاسمات : هكاك
بقات شحال ساكتة نطقات بصوت باين عليه تردد : احم أحلام
أحلام شافت فيها لقاتها متوترة: نعام
فراح سرطات ريقها و نطقات: صراحة متفهمينيش غلاط ياكي
أحلام كتشوف فيها و شافت فعينيها لي دغيا غرغرو بدموع: اويلي مالكي
فراح بصوت مغنغن بلبكيا: صراحة ع عجبوني شفايف يوسف
غير كملات كلامها سرطات ريقها
هنا أحلام خرجات عينيها بصدمة و نطقات من تحت سنانها: لا أفراح لا كولشي توحمي عليه تال شفايف يوسف
يتبع...✏️
ليوما يقتلها سيف الدين ماشي بعيد لا مقتلاتهاش أحلام🤦🙂