🌹ساعة تشير الى 21:00🌹
حل باب ديال دار و تم داخل ياله أيطلع لفوق تا كيسمعو نطق
عمر: ولدي نهار الجمعة من مورا لمغرب اتكون خطبة و تركاب لخواتم
أدم بلا ميتلفت ليه نطق: ان شاء الله
غير سالا جملة ديالو طلع لدار فحالاتو بلا ميتلفت مخلي موراه عمر قلبو مكسور
عمر: ماشي غير 4 لقلوب لي تهرسو راه 5
سالا تاهوا هضرتو و دخل لبيت نعاس إتكا
🌹عند سيف الدين🌹
مجبد فوق ناموسية گعما جايب خبار لدنيا قرر هاد 3 ايام إريح دماغو ما باغيش إرجع لدار و يتلاقا بواليديه و يقول ليهم شي حاجة كتجرح داكشي لاش قضا واحد لغراض صباح و من بعد جا خدا غرفة ففندق و تيليفونو دار ليه موداڤيون ما باغي تاحد إصدعو كيما كان نوعو
ناض من بلاصتو و تمشا لجيهة تيليفون أرضي لي كاين فلغرفة حل تيليفون ديالو قيد واحد نمرة و صونا ليها
نطق بصوت باح: الو، اه غدا نتلاقاو مع 12، صافي فلوسك واجدين، اه نتلاقاو فنفس بلاصة ديال ليوم ، اوكي
سالا هضرتو قطع تيلي و مشا جيهة لباركو شعل گارو ديالو و بدا كيكمي و تصويرة وحدة لي فبالو هي تصويرة فراح
نطق بتملك: نتي ديالي
🌞أصبحنا و أصبح لملك لله🌞
فاقت على ليدين ماماها لفيقاتها صبحات عليها و مشات قضات روتينها صباحي و توضات و جات تصلي كطلب من ربي إسمح ليها حيت فوتات صلاة فجر غير سالات لحقات على ماماها كيوجدو لفطور لي غير سلاوه مشات فراح تفيق أدم و صفاء و تا سعد
فاقو و تجمعو على طبلة كياكلو تا نطقات
صفاء: ختي فرااح مزاال بابا مغيجيجش
على إتر هاد لكلمة فراح حطات خبزها و شافت فصفاء : صفاء حبيبتي بابا مبقاش غيجي
صفاء دلات شفايفها و نطقات: وعلاش. واش مبقاش كيحملنا
فراح عينيها غرغرو: لا احبيبتي هو كيبغينا و بزاااف مي مشا لواحد لبلاصة خرى زويينة
صفاء: وعلاش مداناش معاه
فراح : امم عرفتي لجنة لي كان كيعاود لينا عليها بابا
صفاء بلهفة: اااه ديك لبلاصة لي زوينة لي كان كيقول لينا بابا لي كيموت كيمشي ليها
فراح مسحات دمعتها: ايه هاديك راه دبا بابانا مات و مشا ليها تماك
صفاء نطقات بحزن: و علاش مداناش معاه
فراح: بغيتي تلاقاي بيه تماك
صفاء لمعو عينيه: اه حيت توحشتو بزااف
فراح: هانتي متبقايش تبكي و لا تكدبي و ماديريش ليبيتيز و فيما قلنا بابا و لا قلتيها نتي قولي الله إرحمو صافي
صفاء بتساؤل: و إلى درت هادشي كامل انتلاقا مع بابا تماك زعما بابا الله إرحمو
فراح بتأكيد: اه نهار نموتو انتلاقاو معاه تماك
صفاء : صافي اندير هادشي كلو لي قلتي ليا
فراح: بنت شطورة
مع سلاو هضرتهم ناضت فاطمة كتبكي لبيتها ياله ايتبعها سعد تا وقفات فراح
فراح: اخليك انا انشوفها
تبعاتها فراح وصلات لبيت سمعات شهقات دياولها دقات و دخلات بانت ليها هازة تصويرة ديال عبد الله معنقاها و كتبكي
دخلات و سدات لباب و جلسات حداها: ماما فبلاصة لبكا ترحمي عليه
فاطمة كتبكي بحرقة: مقدرتش على فراقو ابنتي فخبارك هاد لبيت كرهت نعس فيه من نهار مشا
فراح عنقاتها: الله بغاه اميمتي معندنا ما نديرو سوى صبر
فاطمة عنقاتها تاهيا : نعم بالله
بقاو هكاك مدة تا بعدو على بعضياتهم ملي سمعو دقان
فراح كتمسح دموع ماماها: ياله نوضي غسلي وجهك انشوف شكون
فاطمة: الله إرضي عليك
فراح باست ليها راسها: امين
ناضت فراح خارجة و كتمسح دموعها تا كتلمح أحلام جاية و من موراها بدر
وصلات لعندها سلمات عليها و نطقات
أحلام: ما فوت والو ياكي
فراح: لا مزال مدرنا والو غير دخلي
دخلات هي وياها سلمات على سعد و صفاء تا جات فاطمة تا هي سلمات عليها
فاطمة : بنتي فراح خصنا نوجدو ناس جايين غدا
فراح : واخا اميمتي هاني نايضة
ناضت فراح كتجمع طبلة هي و أحلام لي هاد أخيرة غير وصلات لكوزينا حيدات جلابتها بقات ببيجامة خفيفة تحت من ركبة
غسلو لماعن و رجعو عند فاطمة جالسين فلبيت سعد و بدر مشاو لبيت لاخور
فاطمة: خاصنا نصيبو لحلوة هي لولة
فراح بإستسلام: شحال من شكل
فاطمة: 6 اش بان ليك
أحلام خرجات عينيها: ويلي على 6 مالكي على حالتك اخالتي باركة غير 4
فاطمة خرجات عينيها: وعلا هاد لهضرة انديو 7
فراح شافت فأحلام شوفة ديال اش داك نتي تهضري گاع
أحلام : لي بان ليك اخالتي
فراح : انكتب داكشي لي خاص هنا باش يجيبهم بدر من حانوت
فاطمة: واخا قيضي
بدات فراح كتقيض تا عمرات لورقة نيت ،غير سالات عيطات لبدر لي جا وقف عليها
بدر: اش باغين
فراح: هيهيهي والو احبيبي غير شي صخرة
بدر: ماغاديش
فاطمة: عافا ولدي
بدر : واخا اميمتي اش خاص
فراح مدات ليه لورقة لي غير شافها خرج عينيه
بدر: اويلي مالكم على هادشي كلو معرسين
فاطمة: لا بلعما غير كينة خطبة
بدر حك راسو: هيهيهي نسيت، واخا اري لفلوس
ياله اتنوض فاطمة تجيب لفلوس تا كانت سبقاتها أحلام هزات لفلوس من ساكها وقفات حدا بدر شدات لفلوس حيدات منهم 300 درهم و لباقي عطاتهم لفاطمة
أحلام: هكا باش تقضا و هادو خوديهم نتي أخالتي
فاطمة حلفات لا خداتهم: اويلي اش هادشي رجعي لفلوس و الله لا خديهم
و تا أحلام ماشي من عاگزين خداتهم ومشات حلات لماريو حطاتهم فيه و رجعات جلسات
أحلام: معندي مندير ليك عطاهم ليا ادم قال ليا مترجعيهمش ليا
فاطمة: ولكن ابنتي
أحلام : ماكاين ما ولكن نوضو جمعو نوضا باش منتعطلوش
و داكشي لي دارو بدر خرج إجيب صخرة و هما ناضو لكوزينا و احلام تابعاهم و رجعات بيها داكرة لور
🌹فلاش باك🌹
خارجة من بيتها لابسة جلابة مشات لكوزينا طلات على نادية
أحلام: ماما هاني مشيت
نادية: واخا سيري
أحلام مع خارجة من كوزينا سمعات سميتها تلفتات بان ليه أدم هابط من دروج تسناتو تا وصل لعندها
أدم: فين غادية
أحلام: عند فراح نعاونهم على قبل لخطبة
جمع قبضة ليديه و نطق: تسنايني برى هاني جاي
أحلام: واخا
و داكشي لي دارت خرجات برة كتسناه تا بان ليها سد باب دار و خرج
هو لي طلع جاب لفلوس و هبط: هاكي عطيهم هاد لبراكة اباش اعاونو و عنداك ترجعيها ليا
أحلام خداتها من عندو و محسباتهاش حدها دارتها فساكها: كون هاني
تحركات و نطقات ياله بسلامة
🌹اند باك🌹
فاقت من سهوة ديالها ملي جاب ليهم بدر صخرة لي غير تحطات قالو بسم الله و بداو بلحلوة هي لولة
نطقات أحلام: و أخيرا سالينا ناري ضهري تقسم
فراح: و كون تشوفي أنا
أحلام ياله جات تجاوب تا كتسمع تيليفونها كيصوني: ناري تيليفوني
سمحات فيها و مشات هزات تيلي لي غير شافت شكون سدات عليها لباب و جوبات
أحلام: الو
يوسف : فين كنتي
أحلام عرفاتو ايبدا يتعصب حيت لبارح ملي جاوباتو معطل اش دار ليها: راه كنت فلكوزينا
يوسف طمر: و اش كديري فلكوزينا
أحلام: كنوجد مع فرااح داكشي لي غيخصهم غدا
يوسف بتساؤل: على اش كاين غدا
أحلام صغرات عينيها بحال الى كيشوفها: مافخباركش
يوسف: لا اش كاين
أحلام بحزن: خطبة ديال فراح
يوسف بشك: من سيف الدين ياك
أحلام: لا من أدم
يوسف توتر: ناري ايقتلهم مافيهاش ، واش فخبار سيف الدين
أحلام: لا موحال حيت لبارح مجاش لدار
يوسف: اوكي قطعي دبا تال من بعد و ندوي معاك
أحلام: واخا بسلامة
هو قطع معاه و صونا لسيف الدين تا عيا مي كيلقا تيلي طافي
عند أحلام لي خرجات من بيت و لقات فراح كتستف لحلوة فسطولة
أحلام: كتستفي
فراح: اه اجي عونيني
أحلام جابت كورسي و بدات تا هي كتعاون
فراح: واش ماماك لي صونات
أحلام بنفي: لا غير يوسف
فراح: اه عند بالي ماماك
بقاو كيستفو فلحلوة تا جات عندهم فاطمة
فاطمة: ساليتو
أحلام: بقات أخالتي غير هاد شكل و نساليو تستاف
فاطمة: اه غير خليوه تا ديرو كاسكروط و جيو كملو
أحلام: لا اخالتي تا نساليو حيت منين اناكلو انخرجو نشوفو مالبسو غدا
فاطمة ضربات راسها: اه نسيت هاد لبلان
فراح: انلبس غير بيجامتي حسن
أحلام قرصاتها و شافت ففاطمة: مامقرصة والو اخالتي فاطمة
فاطمة: نههه هانتي تشوفي ابنتي
فراح كتحك فلقرصة: ناري ليديك مسمومة
أحلام: تا سناني تبغي تجربي
فراح بعدات: نتي في عار الله
بقاو كيضحكو غير سالاو داكشي مشاو ياكلو و من بعد مشات أحلام تلبس حوايجها و تا فراح بعد ما قنعات بدر إمشي معاهم
خرجو من دار هي كانت لابسة كسوة فلبني و زيف فلبيض و سندالة تا هي فنفس لون و بدر لابس شورط تجين و تيشورط مخطط بلبيض و گري و صفر و لكحل و سندالة ديال صبع
ياله سدو لباب تا كتبان ليهم أحلام جاية و لابسة سروال سورفيط و تريكو ديالو كم فلگري و سبارديلا تاهي نفس لون و شعرها مخلياه على خطرو
تسالمو مع بعضياتهم و نطالقو ، مخلاوش شي بلاصة مامشاوش ليها و تاحاجة معجباتهم او بالأحرى معجبات أحلام اما تا فراح ادايرة ليها لخاطر ، بدر هو لي نقد موقف ملي غوت عليهم حيت طولو و فالأخير رجعو عند محال لول خداو من عندو داكشي لي بغاو و رجعو بعد ما فراح تقدات شي حوايج بغاتهم ماماها
رجعو لدار و مع لعيا طاحو كلهم دودة نعسو بلا عشا
🌞اصبحنا و أصبح لملك لله🌞
فاقت لفجر مابغاتش ضيعو تا هاد نهار صلاتو و رجعات تكات فبلاصتها واحد شوية عاد ناضت ملي سمعات تا ماماها فاقت خرجات و لقاتها واقفة فلكوزينة عنقاتها من لور
فراح بحب: صباح نور انوارة ديال دار
فاطمة بتاسمات بلطف حيت هاد نوارة كان كيقولها ليها لمرحوم تا علمها ليهم كلهم: صباح لورد
فراح: مالكي فايقة بكري
فاطمة: خاصني احبيبتي نخمل صالون
فراح بحزن: وعلاش مافيقتينيش
فاطمة من نبرتها عرفاتها تقلقات ضارت لعندها و شدات ليها وجهها: نتي عيتي لبارح ومبغيتش نبرزطك ليوم
فراح بنفي : لا متقوليش هكا
بعدات منها و جمعات شعرها شفنجة فوق باش ميعدبهاش: مهم انا انمشي نبدا ولا عرفتي شنو بدر لي غيفكها ليا
فاطمة بنفي: لا افراح ناري و تفيقيه دبا والله لا فكيتكم
فراح بشر: هههه لا متخافيش
خلاتها فلكوزينا و عودات دخلات لبيت تماشات ناحية بدر و بدات كتحرك فيه
فراح بحنان: بدر حبيبي وا بدر
والو واش بغا يفيق حدو تحرك شوية و هي فيها متغوت ليه فودنو مي باغا حاجتها عودات حركاتو بشوية و كتحرك ليه فشعرو
فراح: وا بدر تا فيق
بدر حل عويناتو غير شوية و كيشوف فيه : اش بغيتي
فراح: راه اصاحبي 11 هادي نوض
بدر بشك: متأكدة
فراح حركات عوينات ببراءة: اه
بدر بلا مايزيد لهضرة مشا لحمام إغسل وجهو و فرااح كضحك بشر حيت مردش لبال لساعة، هي و بدر فيهم واحد قاعدة الى مشاو تا فاقو مكيبقاش إجيهم نعاس خصوصا الى غسلو وجههم
وقفات عليه فم لباب غير حلو شافها
بدر: اش باغا واش كولشي باقي ناعس
فراح بدات كتلعب بصباعها: دبا هانت و بلا متعصب ياك راه باقا ياله 8
بدر وسع عينيه على وسعهم: كفاااش و فراااح ما بلان ما تا قل
غير شافها خرجات عينيها بدل لكلمة: ماتا حلوة
يتبع...✏️