....:أه واخا دي عفا بنتي تقضيا الكوزينة أنا أنمشي لبيت نعاس نبدل فراح هزات راسها بالإيجاب و يله غتحرك تا كتحس بماماها شدات ليها وذنها
فراح:أححح أححح صافي أش درت عوتاني
طلقات منها و خنزرات فيها
....: شحال من مرة كنقوليك متبقايش دوري حفيانة افراح راه ايطلع معاك برد
بستها فحنيكاتها و نطقات
فراح:صافي ألالة كوني أعلى خاطرك هاني غلبسها
مشات لكوزينة خلات ماماها كضحك من موراها، حيدات زيفها و هو يتطلق شعرها كحل و قصير تمات غادة فالكولوار وصلات قدام بيت نعاس حلاتو و دخلات كان غالب عليه لون الحمر و البيض فيه ناموسية مدورة فالوسط و مقابل معاها تلفازة بلازمة معلقة فالحيط و فجنب لاخور كين ماريو حلاتو لبسات بيجامة بسروالها طويلة شوية فالگرونة يله كتعلق فجلابتها و هي تسمعو كيعيط
عبد الله:فاطمة و عمارت داري
تبسمات و كملات تعلاق
فاطمة: هاني جاية الحاج
(أجي نعرفكم بعائلة بطلة لي هي عائلة فاريسي، فراح عندها عام ثاني فلافاك شعبة بيولوجي بنت ضريفة بلا قياس ،حشومية و قلبها بيض و حدودية مع ناس لغرابين عليها و لكن فنفس الوقت هي ضحوكية و نية بزاااف بحكم وسط ديال أسرة ديالها مكتعرفش لتحرميات و داخلة سوق راسها كتحاول ما أمكن تبعد على صداع و مكتقدرش تهز صوتها ولا راسها على شي حد كبر منها واخا يكون فيه لافوت و دموعها على سبة حساسة بزااف مي بقدر ما دغيا كتبكي دغيا كتسامح و تنسا و بحكم هي شوية حشومية هادشي خلاها تبان لناس معقدة لدالك مكتكونش صداقات و هي من نوع لي مكتفوتش صلاتها و ديما لبسها مستور و زيف مكيفراقش شعرها فزنقة.
بدر كيقرى 6eme كيجي من أوائل فدراسة ديالو هو طويل و كيبان كبر من سن ديالو شحال من شخص كيضنوه هو كبر من فراح مكيتفارقوش هو وياها لا فدار لا فالخروج بغيتي فراح لقا بدر بغيتي بدر لقا فراح علاقة ديالهم زوينة بزاااف معلق بيها بزااف و من صغر لدرجة إلى مشافهاش قبل مينعس مكيجيهش نعاس و فراح هي بئر أسرارو و تا هو صلاة ميفوتهاش حيت هادشي لي علموهم واليديهم.
صفاء كتقرى فثالت تاهيا قرايتها متفوقة فيها كتشبه لباباها و بدر.
فاطمة هي أم ديالهم إمرأة لي حنينة بزااف و ضريفة بحال بنتها متسمعش منها كلمة العيب و لي تعرف عليها كيرتاح ليها بزااف
حاج عبد الله هو بصح ماشي حاج مي كبير و صغير كيعيطو ليه الحاج عندو محال كيبيع حوايج الرجال فدرب سلطان بحكم فيه الرواج و قضية محركة و كيما دكرت هو عندو لحية و هادشي دال على ان راجل عارف بينو بين الله ديما صلاة و الدين و دغيا كيسامح و علاقتو بولادو زوينة بزااف و مفيهاش الحدود يعني كيضحكو و يهضرو مجموعين عادي و مولفينو دراري ديما كيتغزل فماماهم قدامهم.
عائلة فراح ساكنين فحي شعبي بإمتياز من نهار تزادت فراح و هي كتعقل على ديك دار فيها جوج طوابق طابق سفلي ساكنين فيه عبارة عن 2 بيوت و صالون و كوزينة و طواليط و حمام و طابق تاني ساكن فيه خو عبد الله و هادي هي عائلة الفاريسي)
في مكان أخر✨🌞.
حدا لافاك و بضبط لافاك ديال العلوم فرانات طوموبيل clio رمادية تحل باب أمامي و تحطات رجل لابسة سبارديلة بيضة هو يهبط شاب طويل و عضلاتو بارزين فأواخير عشرين فعمرو 29 سنة لابس تيشورط بيض مزير ليه على فورمة ديالو وسروال تجين أزرق مقطع من جيهت ركبة شعرو كحل و رطب كيضرب فيه ريح و عندو لحية
سد الباب لوطو و قاد ساعة لي فيدو ليسرية حيد نظاضر و بانو عينيه قهويين تمشى بخطوات واتقة و على وجهو إبتسامة تم داخل لافاك
......:أستاذ أدم واحد دقيقة إلى سمحتي
على إثر الجملة تلفت و إبتسامة باقا على فمو
أدم:مرحبا
فدولة خرى و بضبط قطر🌎✨
قدام احد أعظم شريكة فقطر كتميز بمنافسة ديالها فسوق و أي صفقة كتربحها خارج شاب فعمرو 26 سنة طويل و عضلات بارزين و كتافو عراض لابس قميجة بيضة و كوستيم بكحل و سباط كحل هاز شكارة ديال بيسي كحلة كيتمشى بخطوات واتقة شعرو كحل و رطب كيلعب فيه ريح عاقد حجبانو كتاف و كحلين و مخنزر بعينيه كحلين بحال سواد ظلام مخلي عندو هالة رعب اي شخص شافو مكيقدرش اطول فيه شوفة مسح على لحيتو مطراسية بعصبية لقا راسو وصل لعمارة تنهد و دخل ليها تمشى عدة خطوات و دخل لأسانسور ورك على رقم 11 و بقا طالع بيه وصل لطابق 11 تفتح باب أسانسور و خرج بخطواتو لمعتادة و غير مخنزر وصل باب شقة ديالو يله حل لباب كيسمع تيلي ديالو كيصوني سد باب بعصبية
تم داخل شعل ضو تا كتبان جمالية شقة لي كبيرة مفرشة بطريقة عصرية فيها 2 غرف و صالة كبيرة مدورة بليفوتوي و كوزينة مفتوحة كتشوف اونفاص لصالة فيها صالة مونجي لاح شكارة فوق فوتوي و خلا تيلي كيصوني و تم غادي جيهت واحد لبيت حلو و دخل كان بيت نعاس غالب عليه رمادي فيه ناموسية مدورة مفرشة برمادي مشا جيهت دريسينغ حط حوايجو بقا ببوكسور عاد بانو عضلاتو بارزين كتر و كتقدر تميز لوشام لي شاد ليه ليد ليسرية كولها و واحد أخور على شكل وجه ذئب فجنبو ليمن خرج من بيت و دخل لحمام لي كان فيه دوش و جاكوزي و لاشاص مطرفة مشا ديريكت دوش طلق لماء و دخل تحت منو تكا بيديه على لحيط و غمض عينيه
بقا هكاك لمدة 5 دقايق حل عينيه دوش دغيا و طفا الماء دور على نصو فوطة و خرج مشا ديريكت لبيت هز لافيست ديالو جبد منو تيلي و لاحها و مشا تكا فوق نموسية و دوز نمرة لي صونات ليه كبيلة حطو على ودنو غمض عينيه و دار يدو فوق منهم كيدوزهم من فوق حجبانو لعلا و عسى يدوزو صداع
نرجعو المغرب✨🔥
گالس شاب فعمرو 27 سنة عاقد حجبانو كحلين كيقلب فالوراق لي قدامو و بيرو ديالو منظم مرة مرة كيتنهد تا كيسمع صوت تيلي ماطا يديه لجيهت تيلي هزو غير شاف شكون كحل بالعما و عينيه قهويين دغيا ولاو حمرين جاوب و حط تيلي على ودنو وبدا كيغوت
......:تا مال مك 100 ألف مرة و أنا نصوني ديك ساعة جاوب قول ليا تامن بعد
مبعد تيلي من وذنو بفعل غوات لي ضرو فراسو
....:دوا بصوت رجولي و فيه بحة و بهدوء ساليتي مالك فارع ليا كر*ي
شخص لاخوى عاد ماتعصب من هدوء ديالو
.....:خاص مي الحبس لي كنصوني ليك أنا
....:يوسف بلا متمرض عدو ربي بغيتي شي حاجة
يوسف شافو من طريقة هضرتو معصب بدل موضوع
يوسف: تا راه والو غير توحشناك و بغيت غير نسول فيك مابقا حد إسول فعشيرو
....:ممممم (سكت شوية و كمل كلامو )أصلا مابقا والو و تشوفني
يوسف هز حاجبو و كمش عينيه بطريقة شك:كفاش زعما
....:دفعت إستقالة، من هنا يوماين أنهبط عندكم
يوسف سمع هضرتو جاتو صدمة ثلاتية الأبعاد
يوسف: تا واش مريض فكر*ك أش هاد خصاير ديال زوا**مل
سكت تسنى شي جواب من عندو مي كون تسنى فلسطين تحرر كون تحررات شاف أنه مغاديش إيجاوبو و كمل هضرتو: و صاحبي عرفناك كتكره تخدم مقيد ولا عند شي حد ومكتبغيش ضغط حيت كتحقد مي إلى بقيتي على هاد حال قلاو*ي لغادي تلقا ماشي خدامي
كان كيسمع ليه و عاقد غوباشتو تسناه تا سالا و خصر عليه جوج كلمات
....:أنا علمتك ماشي كنتشاور معاك
قطع عليه حط تيلي فوق كوافوزة و غمض عينيه
يوسف:سيف الدين هانت أسمع ألو ألو
شاف فتيلي لقاه قطع غمض عينيه بعصبية و نطق من تحت سنانو غادي تندم على هدشي وبزاف
سالا جملة ديالو و محاولش إعاود إيصوني ليه حيت عارفو إلى قال شي حاجة لا نقاش فيها و بلا مايعاودها جمع دوك لوراق و وقف و هي تبان البنية ديالو كتاف و عضلات بارزين شعرو قهوي لابس قميجة فلكحل و سروال كحل و سبرديلة نايك بيضة وفيها كحل تمشا بخطوات موزونة حال باب ديال بيرو و هو يبان طبيعة العمل ديالو سد باب و فيما يدوز من حدا شي شخص كيعطيه تحية و علاش لا و هو ضابط شرطة خرج من قسم شرطة توجه لوطو ديالو clio كحلة كسيرا بسرعة لوجهة مجهولة
يتبع...✏️