سبحة و تراچي

الفصل الثالث والعشرون2

سبحة وتراچي2

من كتابات زهراءالعراقية

الفصل ال23

تعالَ نمشي معًا، وإن طال الطريق، وقصُرت الخطى، وإن حلَّ التعب، وكثُرت الأمواج، ولا تخف من الظلام، فأنا أحمل مصباحًا في يديَّ، ولا تحزن من الماضي، فأنا أحمل ممحاة..
تعالَ نمشي معًا، فالطريق بدونك مُوحِش، والأيام لصوص، وبدون أقدامك فلاة، ومع إقدامك واحة..
فتعالَ نمشي معًا...
تعالَ نمشي..
تعالْ ،الأخوة&مختار

*عبد الرحمن

بالصالة
زين يستفسر من مرته شكد جان المبلغ الي اخذه على أمل يعرف شوكت يرجع
من خلاله ميزانيته

واني افكر باجر ادز زين يدورة هناك 
  و ادز شجاع لكربلاء يدوره بالمرقدين
دك تليفوني  ، شلته من على الميز الي كدامي و ظليت اباوع على اسم ابوية
مخابراته كثرت تسأل عن خبر مختار

رديت جازع

-هلا حجي

- أخوك اجه للبيت
رجع

كمت وكفت
-مختار؟

- اي مختار اكو غيره غايب

شجاع وكف يمي
- شنو يكلك؟

-اخوكم رجع ببيت الوالد

رجعت التليفون على اذني

وسألته
-وين جان واشلونه

- بالنجف زاير اخوك وظال
بحضرة أمير المؤمنين
كول لاخوتك يشوفون اشغالهم

سد الخط

كلت
-اخوكم رجع للبيت

عروبة
- عفية شجاع اخذني وياك اله

كلت بحزم  واني اطفي بجهازي
-لا
لا تروحين ظلي اهنا
هو يجيج

-لا عفية اروح

شجاع
- لا هو يجيج لا تخافين
زاير اخوه و راج..

قاطعته وجان اسلوبي جاف وياها
- لا ترحين لو يريد
يشوفج جان رجع لهنا ما راح لبيت ابوه!

زين- عبدالرحمن ما قصده
بس هو يمكن مشتاق لابوية
يرتاح ، يرتاح  ويجي

بجت بصمت
و ابتعدت عنا بعد ما جانت واكفة كدامنا

زين
- ام علاوي جايج لا تبجين
كافي عليج الضغط
الي عشتيه بالايام الراحت

كال اخر جمله وهو يخزرني

درت وجهي عنهم
وطلعت للحديقة وشجاع ورايه يكول جاي وياك
زين- جاي وياكم اوصلكم

سمعت صوت انوثي  ينعش الروح من اسمعه يشبه صوت الوالدة وجان يصيح بأسمي.. ابو بلقبي

-ابو محمد

التفتت ولكيتها طالعة بخطواتها الثكيلة
مادة باكيت جكاير ..
وعلى وجهه ابتسامة الي

-نسيت علبة سمك كالعادة

كالتها مع ابتسامة لطيفة جنت اني واصل للباب وبينا شجاع وزين الاقرب الها الي تجاهلها و كمله مشيه لشجاع

درت وجهي مصطنع!!! اللامبلاة

-زين جيبه الي

وفتحت الباب ملتفت عليهم
وهو مد ايده الها ما اعرف شنو الايعازات الي انطتها نظرات زين الها
وخلت البنية ترفع زاوية شفتها وتنظرلة بإستقلال..

طلعت لسيارة زين الي اجينا بيها
صعد هو فتحها النا كعدت يمه وشجاع خلفنا

- أوصلكم واشوفه واروح عندي شغل

- بات اليوم يمنا

- عندي شغل متوقف

كلت بجزم
-تبات انت وشجاع اشغالكم مو اهم
من عائلتكم.

شجاع - اكلك

سكتت شجاع ما خليته يكمل من طلبت من زين جكايري
-وين الباكيت

طلعه من جيبه و شمرة عليه
لزمت ما خليته يوكع
وكلت
- خوش بنية صفاء
خسارة جبيرة ل هالغبي

شجاع- ادب واخلاق وثقافة بس
شكول لهذا الهطل والله اني ربع ساعة منوكفت وياه
ما اتحملت كتلة المغثة الي بيه

-يلا راح تطلك وتخلص
من هالعائلة

شجاع
- والله حرمات هالبنية طلعت من عائلتنا
وما اخذها زين

حل السكوت ...

ورة دقايق ما خفف السرعة زين ودخل بالمطب بكل سرعته وصل روسنا لسكف السيارة ورجعنا!!!

شجاع- انتبه
هاي عود انت السايق مالتنا
وما تعرف تسوق
دخل لفرع بيتنا

وانه اباوع اله ببتسامة هو فهم مغزاها

وكال بهدوء ..

- لا تباوعلي نظراتك ما تعجبني

اخذ الجكارة من حلكي و اخذ منها نفس..

شفنا سيارة شجاع مركونه اهنا

سالته من نزلت من سيارة  زين
- ليش ما اجيت بيها

-عفتها لعبد الله سيارته ما اجه بيها ببغداد عطلانه بالتصليح

جر زين  الباب وفتحه سلايت ،ما جان مقفول من جوة
رجعت سألت
- عبد الله وين جان
شجاع
- ويه هادي

دخلنا لكينه عبد الله كاعد وهادي يمه

سال زين - وين مختار؟

عبد الله- بغرفة ابوك
ما يقبل يحجي ويه احد

راد يتوجه زين الهم
منعه عبد الله ابوك كال لحد يدخل علينا اذا أجو اخوتك

اتعديت شجاع وزين و فتحت الباب و قفلتها علينا .

لكيت ابوي حاط كرسيه الخشب الهزاز كدام سريره الي مطروح عليه مختار بجسمه المتهالك بثوب الاسود الي مبين على اطراف الا تساخ الابيض
و لحيته الطويله الي نازلة لرگبته ..
اول ما دخلت ابوي اشر الي اطلع

- كافي بوية
عواطفك و دلالك النا حطمنا

فتح مختار على صوتي

كتفت اديه ووكفت كدامه

بلهجة عصبية
- حمدلله على سلامتك
غمض اعيونه تعب

زاد قهري وضعه لزمت حافة مسند السرير الخشبيه  وانحنيت اباوع اله

-مو كافي نوم

ابوي وكف عن هز كرسيه  وحط ايده على خده وهو يكلي
-اطلع عبد
مو وكته كلامك

- شوكت وكته
تعبنا واحنه نشوفه انسان مريض
عايزين احنه
شوكت يحس من ابنه يوعى
عليه مريض نفسي
ما يحترمه لو من مرته تعوفه وأطفاله يطشرون
الم جهال منو ومنو اني؟
مو كافي يبا كافي

جنت احجي بحركة بصوت ناصي  مثل الحفيف

خزرني ابوي وهو يشدد على كل كلمة يكولها
- اطلع عبد الرحمن

شفت مختار كعد ويباوع الي بنظرات عتب اكثر من ماهي ملامة

- اصحى على نفسك
مرتك وحدة متطلعة متعوبة
ما تقبل بأقل ما انطيتها من قبل
اليوم عيرتك  وانتفضت عليك
باجر توكف كدامك وتكلك طلكني

شفته دنك وظلل كصته بكفه و يجر النفس بنفعال

وكفلي ابوي

-روح عبد مو وكت حچيك هذا ..
توه جاي من هجة ما صدكنا يرجع
انه ايام ما نايم

اطلع
زجرني...

رحت فتحت الباب ولزمتها

-من رخصتك يبا اطلع
انت!

زجرني مرة ثانية بنظراته قبل الكلام
- اطلع انت من غرفتي قبل لا اطردك من البيت

لكيت اخوتي تسطرو رادو يدخلون

بصوت هادئ  وانه اباوع لمختار
-لحد يدخل برة كلكم
وانت يبا من رخصتك
خليني وياه خمس دقايق
وبعدها اطردني من بيتك

ظل يباوع الي ولمختار وهو يطلع دافع الولد متعديهم

زين-اريد اشوف...
قبل لا يكمل كلامه سديت الباب و قفلتها علينا

كعدت كدامه ربعت  على سرير الوالد

- الحجي الي كلته مو
تأنيب لو ترهيب
بس هذا الواقع الي راح يصير

كسر صمته
- انه فاقد لذة هالدنيا
صدكني  ما تفرق

-لا راح تفرق من تصحى وتلكى نفسك وحدك
بس بعديش
بعد الخسارة الي اتظل متحسف عليها مدى عمرك

باوعلي بعدم مبلاة

-نظراتك هاي نفسها
جنت اعبر بيها عن عدم اهتمامي
للدكتور

باعولي بعدم فهم

طلعت من باكيتي جكارة واني اتذكر ايام طويتها من وكت طويل

- بعد ما غسلت ايدي بالدم!
ظلت اطياف الارواح الي زهقتها تطاردني
سكتت لحظات متعكرة بيها  ملامحي

-ما اعتزلت مثلك
بس جنت شارد خارج حياتي
كلشي اسوي بلا روح لا جنت عايش بعلاقتي ويه زوجتي ولا حتى بشغلي
وصلت بيه ليالي احجي ويه خيال بعقلي

اشرت اله على دماغي

-شككت بنفسي من خسرت زواجي
وحاولت اصلح من حالي

مختار
-رحت لطبيب نفسي؟

بعد تنهيدة طويلة بلعت ريگي وجاوبت
بتأني
- اي
اي
خضعت للمعالجة النفسية
بالاخير كدرت اتغلب على نفسي
وانهض رغك ما زلت بلا روح
بلا حماس للحياة
بس
على الاقل  واكف

محد مدلي ايده جنت وحدي و
اتخلت عني مرتي
  ما كدرت تتحمل توحدي
همس
-ما جنت ادري

-لأنها بت حلال
يمكن الاسباب الي بوقتها كالتها غير مقنعه للأهل ، كذبت وكالت ما اتحمل الغربة 
صح صانت سري الي اودعتها بيه
بس الحقيقية هي ما اتحملتني

اخذ نفس من الجكارة واني اباوع للفراغ
وكلت
-ما الومها

ندك الباب حيل
وصياح زين المتمرد
وصلنا
-ياب افتح الباب جا هو بس اخوك
ابن ...

رفعت حاجبي واني اباوع لمختار وهو هم مستغرب ظنٍ منا راح يسب ابوي
كملها بهمس
-ابن ابوي
افتح

كلت
-كوم افتح الباب
لو تخلي اخوك الجبير يفتح

همس بصوت ضعيف
-طول عمري حاس انه اكبر منك
حتى باوع

اشر على شعري متجاهل صياح زين

مختار
-شوف شعرك وين الشيب؟

-وانه كلي شيب
من گلبي
لراسي

كلت واني اهز بوجهي
-هذا ما يمنع انك تكوم تفتح الباب.

كام واني اباوع لظله بزعل عليه..

فتحها
زين
-افه كمت يا خوي
و اتلكاه بحضن

شجاع - اشلونك ابو علي
دفع زين عنه وحضنه ..

عبد الله حاط اديه بجيوبه كأنه مسلم عليه من قبل

سألتهم عن هادي ، كالو راح...

زين - ليش ما خابرتني اهج وياك

كلت - متأكد تكدر تبات بالحضرة ليلة

شجاع -جا ليش

كلت مستفزة
- امثاله بيتهم يم الك....
ونشاز بالاماكن المقدسة

غمز زين وهو لازم كف مختار مرجعه يكعد

ورد عليه

-عفة تكول على بنات بلدك ك...
بينما الامريكيات تسميهن صديقات
لا تنكر  كاشفك ترا
جاينه شبعان

شجاع
- استغفر الله احنه بيا حال وذولة
اشلون موضوع تافه فتحوا

كوم مختار اسبح
وراح اجيبلك غيار مني

كلت اله - كوم مختار اسبح واكل ونام

انطرح ومدد رجليه عليه وكال
-تعبان عوفوني هسة

شجاع-يوه رجعنا للانعزال!

زين- والله العظيم واكص شاربي
من الوتين اذا ما تكوم تسبح الا
انه انزعك بيدي اعريك واسبحك

عبد الله
- الوتين شجابه ع اللحية
هي اللحايا بيها وتين
دمرت التشريح تدمر
انت

شجاع وهو يهز ايده ويباوع لزين
- ولك شو انت مو جنك تريد تساعده جنك تريد تغتصبه

زين بجدية ونظرات  ماكرة لمختار
- لو هذا الي يصحيه
ويخليه يوعى على حاله
اي اغتصبه

عبد الله ضحك بصوت

شجاع- خايس خليتني اتخيل

زين - ها تكوم لو أكومك اني ..
الله يعلم صارلك شكد ما سابح
كوم ارتاح

كمت و اني انزع القميص ظليت بالفانيلة

شجاع
-طلع الك العضلات الي مغتر بيهن علينا
كوم يمعود

غلس مختار عنا وانطانه ظهرة وحط اديخ جوه خده

كلت-يلا ولكم مو بس حجي
تعالو شيلو وياي

شجاع وعبد الله استنكروا
طلبي بشيله وحطه بالحمام

اخذوها بشقه ما منتبهين ما جنت اضحك واتكلم بجدية

اجه ابوي على اصوات الضحك
زين اخذ الامر بجديه

وصعد على السرير ورفع رجليه واني
حطيت اديه جوه ابطه

مختار- اخ كافي شقة
عوفوني...

اتقرب شجاع وشال وياي

نزلناه وهو يكول نزلوني

ويعافر والولد يضحكون

ابوي
-لا طلعوه هيج كدام البنات
نزلوه كافي شقه

محد سمعه
طلعناه وهو يكول
- ادخل وحدي ولكم نزلوني عيب

شافتنا جوهرة بالممر حطت ايدها على حلكها متعجبه

دخلنا وياه وسدينا الباب

وهو عصبي
يكول اطلعو

واحنه ننزع  ملابسنا!

محد سامع اله

بس عبد الله تعقل وطلع ضاحك
..

ترست الجاكوزي ماي  واحنه بس شورتات فقط ومختار لابس ثوبه بعده و يريد يطلع بس شجاع واكف كدام الباب

،،

اصواتهم واصلة للهول نصها ضحك والنص صياح مختار عليهم  لان مكعديه على طبلة بالحمام  ومربطين  اديه
واني بيدي مكينة الحلاقة المشحونة
ايد لازمه بيها من ذقنه مثبته وايد احلق بيها

مختار
-كافي
لا تخفف

كلت بهداوة
- لا تحجي لا ينكص السانك ...

ويه ما خلصته كلت اله
-يلا وغفت الك الحوض  قبل احلق الك
روح ادخل

جات بيه زين

-افيش

شجاع -يالوصخ مو الك

زين
-مستحي مني تعال مختار
لا تخاف
سكت مختار دايخ منا وحط اديه على راسه

شجاع برشاش  الماي
رشه

وهو ظل يحجي علينا نطلع ونعوفه

جاب شجاع الشامبوه و حطه على راسه

زين
-شوف هذا الخبرة بغسل الشعر
ابو النسونتين

شجاع- اكل خ... لا تجيب طاري نسواني

زين
- زعل ابو النسونتين
،

بالنهاية ظل شجاع يصيح لمرته تعززنا بالخاوليات والمناشف وملابس

طلعت وزين لابس كلبية الوالد عوزها بس ركبه تطلع منها  وهدله 

زين
- صوجي ،ما طلعت جنطتي من السيارة

واني  طلعت متوزر بخاولي
عكس مختار ما قبل يطلع الا بسيت من شجاع

طلع زين وهو يدردم
-مرتك من قله ملابسك
جابت الي مالت ابوك

رحت لغرفتي  وزين  ورايه اخذ مني ملابس

انطرحت طلع عليه تعب الايام الفاتت وزين انطرح يم دقايق واسمع خنة بأنفاسه ، مو شخير بس صوت بالانفاس

واني هم غفيت رغم وقت غده...

*شجاع

دخلت للغرفة انشف راسي

جانت جوهرة تلعب بجهازها
وكفت كدام المراية وكلت الها
-ادري ما عندي ملابس وجبتي لزين
كلبيه من ابوية

- ماعندك

- ماعندي!؟

بلهجة معاتبه ما ألفها منها

- اقصد ماعندي الك ملابس بيتية
كل ما تتواجد يمي تطلع بيها لبيتك الاول
وتجي بعد يوم لو يومين بغيرها مال طلعه
وانه ما اتجرأ وافتح كنتور اخوك عبد الرحمن
كالتها واني وكفت عن التنشيف وجنت اباوع الها وهي تنزل من الجرباية

- وين رايحه

-اصب غده

مشطت شعري وطلعت وراها ما متعود عليها وهي لابسة هذا الوجه..

لكيتها فاتحة الجدر وتصب الاكل .

ندستها على رگبتها

- اشبيه الحلو غاضب بالعيد

ردت بجفاء
- مابيه

-مختفية الضحكة الي بوجهج على الدوام

سكتت ما جاوبت

اتكأت على الكاونتر وكلت
- ابوي صلاته تطول ليش صبيتي

-على ما يخلص

-جان صليتي ؟

حطت الصحن بغضب وكالت
وهي تباوعلي بقهر..

-هذا الي مزعلني
ما أصلي!!
هم ماكو حمل هالشهر
حسيت بنبرتها المقهورة حسرة

-وشنو يعني الي يسمعج يكول
صارلنا دهر متزوجين

- مشكلة انه الي كبرت

وخايفه

تعرف انه لو ما ماخذتك احسن من احساسي بالذنب هسة

ردت ارد عليها دخلت انتصار

-السلام عليكم

استغربت جيتها

-مو كلتي اخوج الصبح ياخذج؟

-لا حبيبي ما رحت ما كدرت اطلع
واخيك ما لاكيه
خابرت ايمان انه وكالت الي رجع
كلت اجي يمكم وهم اعايد الحجي ما عايدته

اها اشلونج جوهرة اعذريني تدودهت
ما سلمت

اجت بوست جوهرة وعايدتها بينما كان رد جوهرة مختصر ورجعت تصب
عفت انتصار تريد تساعدها وطلعت

شفت زهرة تنزل وبيدها جدر..
-ديري بالج عمي
لا توكعين...

نزل وراها علي ما رحت انتظرته ينزل

جريته من اذنه كدام الدرج

-سالفة السيارة وحليناها
اياك ثم اياك تطلع بعد بالشوارع

-اي عمي ، هسة هدني

هديته  ورحت كعدت بالهول انتظر الغدة

اتعاجزت اصلي قبل الغده..

صار صوت بالبيت عرفت البنات كلهن وامهن نزلن ضايفات الحياة لأركان البيت

وسمعت صوت طفلة خضر ..
حسيت بتمني بمثل هذا الصوت لطفل الي ..
دخلت ايمان سلمت عليه وبعدها متوشحة بالسواد..
- انطينيها
-تبجي هاي الصويتيه تدوخك

اخذتها منها

بستها وظليت اهز بيها بأديه سكتت

ايمان -هههههه ترا خافت وخنست جاي تهزها حيل..

فرشوا السفرة ودخلت جوهرة وجانت عصبية كل ملامحها توحي لذلك ،

وانتصار خلفها ضاحك وسلمت على ايمان وكعدت يمي

-كومي عاوني البنية

انتصار
-البنات راح يجيبن وياها
-كوم ساعديها ميخالف البنية تعبانه

ضحكت بخفوت وهمست وهي حاطه ايدها على حلكها  حتى لا تسمع ايمان الي كاعده على الارض كدامنا وكدام السفرة ، واحنا على القنفة

انتصار
- قابل هي حبلة وتعبانه
ما شاء الله صارلها اشهر كلشي ماكو

-أنتصار...!!!
اشمدريج هالشهر مو حامل

- عرفت ههههههه

- سميتي بدنها

- لا عيني شعليه انه

نزلت يم ايمان والبنات دخلن بصواني مقبلات و دخلت جوهرة بصينية دولمة مكلوبة بشكل دائري عدل..

-مبينة مشهية عاشت الاياد جوهرتي
ندستني انتصار

جوهرة - مو انه طبختها
ايمان..

-عاشت الاياد ام زهرة

- عوافي اذا اكلتو منها او لا

اخذت الطفله مني زهرة وانطتها لامها...

دخل ابوي يصرفن ردن دشداشته..

وطلع عبد الله من الاستقبال هو ومحمد وعلي..

سأل ابوي عن الولد

جوهرة- ما ادري ما طلعوا

دزو محمد يصيحهم..

طلع مختار وكعد يم ابوي
ورجع محمد
- بابا و عمو نيام خفت اكعدهم

خزره ابوي
خلاه يعيد كلامه
-ابوي وعمي نيام

كعد يم ايمان الي ربتت على متنه وحطت صحن تمن كدامه

ما عجبه ابوي نومهم وكال لعلي يروح يكعدهم

علي اتردد يخافون من عبد الرحمن

كلت -عوفهم بوية لا تكطع راحتهم من يكعدون ياكلون

هز راسه ما عاجبه الوضع

-غير عيد ويلتمون على السفرة
هو احنه شوكت نشوفكم

سكتنا وهو كال بطريقة مؤنبة لايمان
-وانت توج نازلة
ما تسلمين ما اشوفين شريد ما اريد
كاطعة  فرد مرة

توقعتها  راح تغيم على زجر ابوي وعتابه الجاف

حجت وهي تضحك
-جا حجي مو من الليل نزلت انه
والبنات و سلمنا عليك
بس لا تغطي بعتابك على العيدية
وانه وبناتي الأربعة

كلت- اليوم زين وعبد الله يباتون
ونلتم على العشا ولا يهمك حجي..
انه هم تعبان ورة الغده اذب روحي
اعيوني تحركني من النعاس

انتصار -خوش نتغده ونروح

ما اكلت جوهرة اهواي حسيتها تعبانه اليوم

كلت لانتصار بصوت ناصي
- عزلي انت والبنات المطبخ وكمت غسلت اديه ودخلت للغرفة ما لكيتها..

رحت للمطبخ
صحت الها

-تعالي ورايه جوهرة

دخلت للغرفة وانطرحت مغمض اعيوني عطشانه للنوم الي فقدناه بسبب غياب مختار الي حتى ما كدرنا نعاتبه على تعذيبه النا ولابوه، مجرد رجعته جانت
نعمة ما نكدر نعاتبة المهم رجع سالم..
واحسه اكو نقطة ولو وحده تقدم..

دخلت جوهرة فتحت عيني عليها، شفتها سدت الباب وكالت وهي واكفه

-ها شجاع
شرايد

-اريد انام..

علت السبلت وكالت

- يلا نام ما راح ازعجك بطبتي وطلعتي
اصعد يم ايمان اذا صعدت
-تعالي نامي يمي
وعوفي ايمان اليوم

-ها!؟

-تعالي جوهرة
وطبطبت على جانب السرير ومكانها

-لا لا
حاطة الجاي على التهدير
والمطبخ مبسط ويني وين النوم

-معليج هنه يدبرن امرهن تعالي

-شنو يدبرهن  لا ما يصير عيب
اثنينهن خطار

زجرتها
-رجلج يكلج تعالي يمه
تجين
يلااا

قفلت الباب وهي ساكته سامعة الكلمة مو عنيده وهذا الطبع احبه بيها

كعدت يمي

- تدنيت مسوي الها مكان
-انزعي هالثوب وتعالي

-تريد الصدك انه صدك تعبانه..

-شفت وجهج اصفر

نزعت الحجاب والثوب ظلت بشي خفيف
ونامت ،جريتها على ايدي ، ورجليه على رجليها محاوطها من كل الصفاح ونمت قتيل....!!!

ورة مدة ما اعرف شكد نمت بس جفني بعده ثكيل ما شبعان نوم وصوت دك الباب زعجني

-عمو تكول عمه انتصار شوكت نروح

عمووو
عموو

ودك..

تصجورت جوهرة وانه رجعت غمضت عيني من راح الدك

ورة دقايق.. هم رجع علي يصيح الي دازته انتصار

صحت عصبي

-منطمر لا تجي ولك
كول الها تكعد يم ايمان
وتسكت والعصر خلي محمد يوصلها

رغم الحجي الي كلته بس ما طار النعاس
انطيت ظهري لجوهرة وكملت نوم وهي هم اصلا ما كعدت..

كعدت الساعة ٨ بالليل..

لكيت جوهرة ماكو يمي ..
كمت اغسل واكعد يم الاهل،
لكيتهم مادين سفرة العشا..

وعروبة واولادها كلهم يمنا.

كعدت يم عبد الله الي كال الي باجر من الصبح يروح..

كعد زين وكفشته نازلة على اعيونه ووجه مبلل مبين توه غاسله ومبلل كذلته
رغم هذا وجهه بيه النوم

كعد يم علي وضربه على علبته

علي- ايي راح تعميني مو زين اهنا تضربني..

انتصار بعدها!! توني انتبهت الها من دخلت وبيدها دولمه من الظهر حطتها بالسفره وهي تتخوزر وياي

حطوا العشا و اجت جوهرة تكعد يمي سبقتها انتصار بحركة الكل لاحظها وانحرجت منها.. وخلت نفسها بموقف مو حلو من سوتها..

ابوي- تعالي عمي اكعدي يمي
تدنى  سوة الها مجال كعدت يمه بصدر السفرة..

كال الها ببتسامة-اشوفج اليوم تعبانه

انتصار همست اي- شو ما يوم سأل عنا اذا نتعب
بنفس الهمس جاوبتها - لا تقارنين نفسج ويه بت اخوه

سكتت من سمعت ابوي يكول لجوهرة

- الله يجعل هذا التعب حمل

شفتها ارتبكت ودنكت

انتصار نبزت -لا وين يحسرة..

خلت البنية تباوع الها وتسكت..

ايمان - الله يرزقها على كد نيتها

همست انتصار- شوف بت عمي تصجم بيه

دخل عبد الرحمن وجان مخالف اموامر ابوي ولابس فانيلة سودة تعلاكة وحده

عبد الرحمن -ليش ما مسوين زلاطة
بسرعة كامت جوهرة وهي تكله
- ولا يهمك...

شفت مختار اكل لكمتين رضى ابوي وكام

وعروبة راحت وراه...دقايق وطلعت من غرفة ابوي ورجعت كعدت يمنا..

رحت للاستقبال بعد ما صاحت الي انتصار بالتليفون

حاط اديه خلف ظهري وواكف انتظرها تدخل

-وين جنت
شتردين

-شنو اريد تعبت واريدن اردن لبيتي

-اتفقنا نبات اهنا انه واخوتي

- وانه!؟
انت تلف مرته وتنام وانه وين اولي

- ليش ما رجعتي العصر!؟

- اجت عروبة وظليت بعد كلها التمت شعندي مكابلة الحياطين انه؟؟

-انه اوصلج بعد اشويه وارجع

-لا والله بعد هم انام وحدي

-وانه مو جنت اجيج

الايام الفاتت كلها

-شتجي بس تهبد على اخوج توصل وجه الفجر تلف راسك وتنام

- هسة اليوم وحدج وباجر يمج

- اكلك انه هاي الشغله بعد ما اتحملها
بس اليوم
بات اهنا
وبعد تجي للنهار يمها وانه بالليل
لان اخاف واستاحش من الوحدة!!!

-شنو!!!
هو اني شكعد بالنهار بالبيت حتى اخليه الها

- والله انه هم خطية وبشر
شنو اظلن وحدي والله اخاف

تقربت مني و لزمت تيشيرتي

- يرضيك الليل كله اتخيل احد يدخل عليه
حبيبي والله خوش قرار هذا وكومة زلم مسويته

بدلال اكثر

-ها شكلت

- انتصار انه الاكثر يمج
و ضميري  يعذبني ما اريد استغل طيبتها اكثر

- شنو هي مفضله عليه ترا انت رجلي بالاول
انه الي مفضله
انطيتها رجل

- ولانج اتنازلتي تحملي نص شريك
لأن اكثر من هيج حتى الله ينزل غضبه عليه

دخل علي  هو ومحمد

طلعت وعفتها..

ورة الجاي وصلتها للبيت زعلانه ووصلت عروبة وحدها  للبيت  ورديت لبيت ابوي
لكيت اخوتي ملتمين يلعبون دومنه بغرفة ابوي
ابوية و عبد الله سوة
ضد عبد الرحمن وزين

كاعدين على الكاع وحاطين خشبة على مخدات

كلت -جا ما العب وياكم

زين -حير بالنسونتين انت
مو نسوة تلاثة

خزرته بس انتبهت الحقير جاي ينطي لعبد الرحمن الي واصل اله الدور باللعب
بالرقم ٢

ضحكت وصعدت على جرباية ابوي
عبد الله وابوي ما يعرفون دروب زين مثلي

وذاك استلمها بسرعة ولعب على ايد زين
واخذو الداس

وصياحات ..

دخل الجاي عليهم بيد زهرة وراحت.

شرب ابوي الجاي وكال

-سنوية اخوكم اليوم
والليلة ذكرى وفاته

كلها سكتت وعبست الوجوه ..
- مرته ما مرتاحة يمنا دومها فوك
والطابق الثاني مو مريح

عبد الرحمن - تريد اطلع
اطلع اذا ترتاح

انه هم كلت - اذا تريد انه هم اطلع

-وليش تتطشرون بعيد عني

البنية زغيرة وانتم زلم حوك
ربوا اولاد اخوكم

زين - اشم ريحة سالفة
تعبانه

ابوي- انت بمكان ما ظال وحيد
اخذها تاني المرة سنتين واعقد عليها

زين -مو كلت تعبانه
اخذ مرة اخوي

-مو عليك  انت واحد مضيع علومك
وانه اريد اصونها مو اضيعها
انت اختها ما عرفت تحافظ عليها

سكت زين وجان غاضب ..

عبد الرحمن جان لازم دومنة وصافن عليها

-انه اقصد عبد الرحمن

صفن عبد على ابوي

- تدري اني جنت متانيك شوكت تطلب هذا الطلب!!!!
اعرفك يبا
اعرفك
حافظك
بس انت ما تعرفني طير حر ويوم ما اريد احط ، احط وحدي
مو مرة اخوي الصغير

راد يحجي ابوي كام عبد من كدام الدومنه وكال
- سد هالسالفة يبا
الي بيه كافيني..

هز ايده ابوي وكال
- جنت متوقع هو انتم حياتكم ما كادرين
ترتبوها
واحد ظال لا زواج لا خلفة
بس يالله حاير بتاج راسه

والثاني خلف هالولد وكعد سنين يلعب بلا زواج واستقرار

عفت موشح ابوي التأنيبي ورحت ادور مختار شفته مطروح على التخم وعبد كاعد كدامه بالاستقبال..

وجان نايم...

* عروبة

دخلت لغرفة عمي ورة العشا على مختار

كعدت على ركبي يم الجرباية ولزمت ايده بسرعة سحبها..

- حبيبي السموحة
والله ما تنعاد
انت بس حسك بالبيت كافي ووافي عليه

دار ظهره عليه وعكف اديه على صدره
كمت كعدت يمه وبست متنه

-حبيبي ما ترجع وياي اليوم؟
والله ما اكدر انام وانت مو بالبيت

احجي مختار

دفع ايدي بمتنه زاحها عنه

همست بيأس
- ارجع وياي
وظل شكد ما تريد زعلان

-ولي برة ما طايق كلمة منج

-مختار

-عوفي المرة المخبلة نفسها!!!

-شنوو اني هيج كايلة

والله ما كايله

التفتت عليه خزرني ورجع دار ظهره عني..

-مختار
ما اذكر كلت هيج
عنك

مختار..

ما قبل يدير وجهه وزمخ بيه اطلع..

طلعت مهمومة وحاسة دخلت بمرحلة ثانية واصعب بهواي من الي قبلها
بس مع هذا اكو راحة جزئية تسللت بداخلي
حسيت بنظرات زعله ظل مختار القديم
حسيت اكو تجاوب ويه المحيط حتى لو جان سلبي وزعل بس هم ريحتني ولو اشوية لأن اكو ردة فعل !!!

رحت للبيت خائبة ويه جهالي
انتظر اليوم الي يدخل بيه عليه بفارغ الصبر..

حتى يكعد طول العمر عايفني هم  مجرد ريحته بالبيت تكفيني ولا ساعات الانهيار الي عشتها بغيابة ايام....!!

*ايمان

ورة العيد بأيام
ما سوينا سنوية لخضر ما قبل عبد الرحمن وضجت من تصرفه حيل الصراحة  عز على اخوه تعب يوم !

دخلت للمطبخ وشفت مواعين
عزا هاي شنو مالات البارحة بالليل مجمعات ويه مالات الصبح والظهر لهسة

انه محتار بهدى ونفسيتي تعبانه لان عبالي البارحه يسون  سنوية وما يوها وعود هنه  الحقيرات ساعدني و يسون اكل مقالي
هيج مسويات  وعايفاتهن

طلعت من المطبخ
لغرفتهن مثعولة

-ولجن جايفات ليش المطبخ هيج
هذا الي يعتمد عليجن
شبيهات رهف الكلبات

زهرة -مو عليه عليهن

امل -كل يوم عليه

طيبه -لا تباوعين الي اني اكلي

صحت كومن اغسلن سوة
محد عبرتني اصلا ولا وحده تباوع الي احجي ويه الحايط
ثعولت بعد أكثر وحالفه الا هنه ينظفن اعلمهن الندارة عايزة ويطلعن بناتي وصخات

-يلا ولجن

محد كامت
-انه اربيجن ولجن

طلعتهن يتركضن بعد ما كل وحده اخذت مني كفخه

زهرة-والله نغسل ماما
بس لا تضربينا

-لا والله اكتلجن واتغسلن

حقيرات جايفات
جنت بقمة عصبيتي لان راددني قبل لا اضربهن وحركن اعصابي

شردن للدرج
نزعت النعال وصوت صياحي و توسلهن والجلبه زهرة تتمضحك وترعد خوف تريد توصل الكاع
ما نزلت نزعت النعال ما ادري عمهن يطلع من غرفة ابوه مقابيل الدرج ويوكع تك نعالي على صدر ابو محمد الي تركع بيه زهرة وتشرد

لزم النعال وانه شردت  معصبه على مفتشله همزين عاد لابسة حجاب ع شكل عصابة ما شاف شعري

دخلت للغرفة ادردم على خلفتي طلعن صوتي

صعدت جوهرة وهي تكلي
-شصاير
وتضحك لانها سامعه غلطي ع البنات

-سولفت الها الي سونه

انوب ضربت الرجال بالنعال!!!!

يلا يستاهل ليش ما يسوي سنوية للمرحوم عزه  الفلوس  والثواب عليه

-يا رجال  بس لا عمي

-لا ولج حشاه
ابو محمد

-ها ههههههه ولج
شجاع كال الي
عبد الرحمن اخذ مبلغ ومقداره ٣ مليون
بمكان الطبخ ويريد يتربع بيهن لمخيمات
النازحين بأسم خضر
بدل يكول ما نوكل ناس شبعانه
نكسي ناس محتاجة--

صفنت بكلامها وفرحت اهواي من عرفت اكو ثواب راح يطلع بأسم المرحوم..

،

ثاني يوم كعدت على خبر من صفاء
تبشرني بالطلاق مالتها ، ضجت و فرحت بنفس الوقت مشاعر دمج..!!!

بعد ضربه النعال ما نزلت ولاطلعت حسي لجوة

والرجال سافر ورة ايام هو صحفي وكثير السفر بالمحافظات الي بيها عمليات تحرير.

*جوهرة

جنت بين احضان شجاع ودك تليفون بالاحاح بس هو ما يرضى يكوم يشوفه  
،
كام عني ورة مده ، وشاف التليفون وهو كايم للحمام

اتصل ..

-ها انتصار
ليش داكه اهواي

- شنو
ما فهمت احجي عدل شكوو

منو حامل...

فتح مايك حتى يسمع واسمع صوتها يرعد بجي

-انه انه

ولك حبيبي انه حامل

يتبع

تصبحون على تدخل من الله يجعل المستحيل من احلامكم حقيقه! زهرتكم⚘