((( بقلم الكاتبة رفل )))
( سولفلي على روحك يابعد هالروح )
رزان : منووو .
فاطمة : سمعي هذا واحد ابن جيرانه عنده طليان
جاي يدور على مره كتله عندي الك خوش مره تحب الطليان ف كلي شوفيها بلكت تقبل ومدام راح نزوج احمد كلت هم نزوجج نكسب بيج ثواب .
رزان : فتحت حلكي وباوعتلها بستغراب صدككك تحجين خاله وكايله لرجال عندي مره الك .
شهد : اي مابيها شي خاله كوليله موافقه واني اقنعها .
رزان : ولجج رعنه انجبي معليج ااذا تردي هسه اخلي خاله تجيبه الج بس اني لادخلوني بهيج مواضيع والله اكول لبابا.
فاطمة : وجع حته وجع هسه انتي شعرفتي منه ورفضتي .
رزان : يااا والله ما اخذه ولا اريد اعرف ماما احجي شي اشبيج
مريم : يااا خيه شمالج ويا رورو بنتي ماتزوج اذا ماشخص تحبه وتعيش قصة حب ويا بس بعد الخطبه طبعا مو اروح اجيبلها ابن جيرانكم واذبها هيج ذبه جني منطيه فرخ دجاجه .
فاطمة : كبرر يصحلجن هيج عريس وتتعزعزن صدك الكال الصاحله زوج كال اعور .
رزان : اشكر اهتمامج خالتي العزيزة وبعد لادوريلي
اني من اريد اعيش هاي التجربه ادور وحاليا مامستعده .
شهد : اممم ولاتكعد راحه خايبه دكومي منا .
صدك خاله تعرفين ابو الغاز ،
فاطمة : وهي تعدل شالها وانتي وين تعرفي .
شهد : عدلت كعدتي وخليت المخده الخاصه بالتخم بحضني باوعت لخاله فاطمة وحجيت ها ها خاله شو جنج غرتي .
فاطمة : خايبه نطبي لاهفج بالستكان شنو غرت بس جاي اكلج وين تعرفي .
شهد : الشهاده لله اني ماعرفه بس سمعت من الجيران جاي يدور على زوجه صالحه ف كلت ليش مانخطبه لخالتي فاطمة احسن من صالحه .
رزان : هههههههههه اي والله خوش فكره .
فاطمة : اخذت الورده من الطاوله وضربت شهد
ياطايحت الحض اني لو اريد اتزوج اخذلي دكتور
مهندس نائب شسوي بابو الغاز ياملعونه .
مريم : اي والله معليج بيها خيه هاي ماتعرف شتحجي بعدها طفله .
شهد : لا يوم عاد اني ماحجيت شي غلط بس خالتي تطرب ع الغريب .
اخذتنا السوالف وماحسينا غير ع اذان المغرب .
عاد راحت خاله فاطمة واحنه فتنه توضينه وصلينه مغرب .
مريم : تعاي يمه رزان .
رزان : ها يوم بيج شي حجت وهي ترتب مكان يم امها تكعد
مريم : بنيتي اني ربيتج واعرف ترباتي واعرفج رافعه راسنا دوم واعرف اخلاقج وادبج لاكن اليوم حسيت عمتج هديه تضوج من تجي سيرتج واحسها تلمح الي حته ابعدج عن مهيوب .
بنتي انتي عندج شي وي ابنها فرح موصله حجي لام مهيوب انتي صدك كايله لفرح راح اخذه منج .
رزان : فتحت حلكها وبان الاستغراب على وجها حجت يوم اني ماعندي شي وي مهيوب واصلا انتي دشوفين احنه كل مانلتقي نتعارك بس ذاك اليوم لمن
عزمونه بيت خالوا ابو عمر هي اجت وكلتلي ابعدي عن مهيوب واني ممكربه صوبه ف بس ردت استفزها
كلت بمانو يغثج وجودي وي مهيوب راح احطه براسي .
وغير هيج ماحجيت انتي تعرفيني عدل ماعندي هيج شغلات
مريم : الله يرضى عليج بنتي ابتعدي عن فرح وخالتها لانو راح تعبين اذا تحديتيهن
رزان : لايوم تحدي شنو هذا كلام عابر بس هي واضح عقلها صغير وماعدها شخصيه .
مريم : وهي تحضن رزان وتبوسها براسها حبيبتي انتي يلا نكوم نسوي العشا لابوج واخونج .
رزان : صار يابعد رويحتي ربي لايحرمني منج .
طلعت للمطبخ شفت شهد جاي تلعب بتلفون ابوي ومن شافاتني ضمته وارتبكت رفعت الها حاجب بمعنى شكوو .
شهد : ماكو شي جاي اللعب .
رزان : شنو جاي تلعبين شوفيني ممرتاحتلج صايره تختفين هواي
شهد : اهووووو رزان شعليج بيه كتلج ماكو شي .
رزان : طايحت الحض لصيحين واحجي شعندج بتلفون لاصيح بابا ولولد .
شهد : عمر .
رزان : اشبي عمر شجابه لتكولين جاي تتواصلين ويا عمر
شهد : اششش بليل احجيلج كلشي والله بس سكتي اجت ماما .
رزان : يصير خير اني اعلمج ادبسز بعدج مفاقسه من البيضه كاعده تتمعشكين .
مريم : اشبيكم بنات .
شهد : ماكو شي حبيبتي رزان جاي تسألني شنو
نسوي عشا . باوعت لرزان بنضرة توسل حته تسكت وفعلا سكتت لانو رزان كانت مثامة أم الي خاصه
لمن امي جابت نازك قل اهتمامها ومتابعتها الي بس رزان كانت يمي خطوة بخطوة .
وكفنه نسوي عشا سويت مخلمه ورزان سوت طماطه قلي وشوربه وخليت فواكه ولبن وصبينه وهاي كلها ورزان تريد تنفجر تباوعلي وكأنها تكول اليوم اخذ روحج .
نقلنه الاكل واشرتلي ع الغرفة .
رحت وراها
خالد : ها وين بويه تعالو تعشوو .
رزان : عوافي يابه تعشينه بالمطبخ و شهد عدها دراسه .
خالد : بالعافية بويا شهد اذا عندج شي صعب جيبي احله الج.
شهد : لا بابا حفظ .
خالد : لعد يلا بويا ارفعي راسي اريدج من المتفوقين
شهد : ان شاء الله بابا اابتسمتله ولحكت رزان فتت
اشرتلي بمعنى سدي الباب .
رزان : يلا ست شهد احجي شعندج ويا عمر شنو هذا الي سمعته .
شهد : هسه لو مخليتني اتعشه وبعدين احجي خوما
راح اطير .
رزان : تزهزئين حظرتج لو شنو داكلج احجي .
شهد : بالمختصر اني احب عمر وهو يحبني
رزان : شلون شلون شنو ومن شوكت وليش مكتيلي وشنو هالصلافه تحجين من تلفون بابا بلكي شافج حس بيج بلكي طلع عمر يظحك عليج شلون ق
ثقين بيه مصارلج شهر تعرفتي عليه .
شهد : لا ميظحك عليه اصلا كل يوم يوصلني للمدرسه ويرجعني
رزان : جلطيني بعد بعد وجج شلون تقبلين يوصصلج شلوون عقلج وين .
شهد : رزان كتلج هوو يحبني ومستحيل يفكر يظحك عليه لضلين عقده شوفي الحياة من غير ناحية حبي اطلعي تونسي انتي لان باقيه بالبيت صارت بيج حاله نفسيه .
رزان : يا ادبسززز وربي اذا ما مشيتي عدل اكوول لبابا وللولد عليج احنه هيج تربينه حته نطلع ونطب ونحب ونتمعشك الي يحب يدك الباب لايتختل وي بنات العالم .
شهد ' وهوو كذالك راح يجي يخطب حته امه تعرف بيه يحبني بس يخطب احمد هوو يتقدم .
رزان : شوفي شهد وربج اذا سمعت بيج طالعه ويي عمر او مراسلته او واكفه ويا لاتلومين الا حالج بذيج الساعه اكول لبابا واخلي يذبحج .
شهد : لاتهددين ولاشي اصلا عمر ميقبل نوكف او نفتر مجرد يوصلني للمدرسه ومابيها شي اني بت عمته .. ردت رزان حذرتج شهد ويا وياويلج اسمع متواصله ويا منا لمن يجي يخطبج
طلعت وسدت الباب قوي ...
هففف مو وكتها شون اكول لعمر بعد منتواصل واني ماكدر بلا ماشوفه دعيت ربي يحلها بلا مشاكل .
هديه : صباح الخير يمه مهيوب تعال ريوك جاهز
مهيوب : صباح النور حجيه عاشت ايدج .
هديه: الف عافيه يمه اكلك يمه عندي شغله وياك .
مهيوب : وهو يشرب جاي كولي يمه محتاجه شي .
هديه : وليدي البارحه اجن عماتك مريم وفاطمة وتغدن يمنه .
مهيوب : اي هلا بيهن
هديه : دسمع يمه عمتك مريم خطبت أمل لاحمد .
مهيوب : ترك الكلاص شنوو امل .
هديه : اي يمه أمل
مهيوب : وشنو كتيلها ..
هديه : وليدي احمد خوش ولد وماناقصه شي وهم اختك ااذا صارت عد عمتها تنسعد وترتاح واتخلص من مشاكل كوثر ورجلها اني كتلها الشور الاول والاخير لاخوانها والها .
مهيوب : هسه اني عندي شغل ارجع ونحجي بالموضوع ..
هديه : الله وياك وليدي يحفظك الرحمن ، باس راس امه وطلع .