سولفلي على روحك يابعد هالروح

البارت الرابع عشر

                 بقلم ((( الكاتبة رفل )))

          ( سولفلي على روحك يابعد هالروح )

رزان : فتت للمطبخ صباح الخير ،،

هديه : صباح النور يمه تعالي تريكي ويا هدى ،،

رزان : لعد اهلي وين ردت عمه هديه راحوا للبيت كعدوج بس ماكعدتي اخذو رحمه وراحوا ،،

ضجت كلش حسيت نفسي غريبه وامل ماكو ف كلت
لعمه هديه اريد اروح للبيت شلون ،،

هديه : مادري بلكت احد يجي عليج من اهلج تركي بنتي بين مايجون

رزان : كعدت اكل بدون نفس وعمه هديه تباوعلي.بنضرات ماعرف افسرها  كملت ووشلت الصنينه عزلت الريوك وغسلت المواعين وعمتي هديه كاعده تلكط خضره وتباوعلي حجيت لعد كوثر وين وامل ،،

هديه : كوثر راحت لااهلها وخلت هدى هنا وامل طلعت لبيت خالج ابو عمر هسه تجي ،،

رزان : هاا تمام شنو حسوون غدا اذا تحبين اساعدج

هديه : ليش هم تعررفين اطبخين ،،

رزان : هسه هاي اشبيها يربي تحجي من ورا خشمها
رديت اي كلشي اعرف تحبين اساعدج بشي قبل  ما اروح ،،

هديه : خوش دامج رايده ساعديني راح تجي اختي اخلاص وبنتها فرح ع الغده اريد اسوي فاصوليه ع لحم وتمن وسمج ،، شتعرفين منهم ،،

رزان : تمام هاي الفاصوليه ع نار راح اكملها واطبخ تممن بس سمج شون ،،

هديه : هسه اخابر مهيوب يجيب سمجتين ويا من يرجع  ،

عفتها  تكلب بالموبايل حته تخابر ورحت كملت الفاصوليه ،،

مهيوب : جنت طالع  ويا وفد نشوف البضاعه سمعت تلفوني يرن اترخصت منهم ورحت على جها رديت الووو يمه الله يساعدج،،

هديه : ويساعدك وليدي ارريدلي سمتجين للغده يمه من تجي جيب وتعال من وكت خالتك غداها يمنه ،،

مهيوب : ياستار ذاك الاسبوع جانت يمنه ،،

هديه : هاا يمه شلك بهالحجي واذا جانت عدنه بعدين هاي بحسبة امك خالتك وليدي لاضيك عينك على خالاتك،،

مهيوب : يمه فهمتيني غلط كل الهلا بيها بأي وقت بس عبالي صاير وياهم شي تدللين حجيه حته كباب راح اجيبلج ،،

هديه / الله  يرزقك وليدي ،،

مهيوب /أمين حجيه يلا مشغوول ترا مع سلامه ،،

هديه : مع سلامة بحفظه وليدي ،،

رزان : كملت الفاصوليه  وحجيت عمه اطبك التمن لو بعد وكت...

هديه : هسه اني اطبكه روحي عزلي الصاله بنتي الله يرضى عليج هذا شغل رحمه وليوم راحت ويا اهلج ،