Metal နဲ့ Non Metal တွေမှာ ဘယ်အရာက ပိုပြီးတန်ဖိုးရှိတာလဲ။
Metal နဲ့ Non metal တွေဟာ ဂုဏ်သတ္တိလည်းမတူသလို ၊ ဖွဲ့စည်းတည်ဆောက်ပုံချင်းလည်း မတူပါဘူး။
လူတွေဟာ metal နဲ့ non metal ဆိုရင် ဘာကိုရွေးမလဲ။ ဘာကြောင့်လဲ။
ယောကျ်ားလေးတွေကရော ဘယ်လိုမိန်းကလေးကိုသဘောကျကြတာလဲ။
xxx
လူဆိုတဲ့ သတ္တဝါဟာ ကိုယ့်အကြောင်းကိုယ်သာ စိတ်မဝင်စားကြတာသူများအကြောင်းဆိုရင်တော့ အင်မတန် စိတ်ဝင်စားကြသူများဖြစ်သည်။
အခုလည်း စာသင်နှစ် တစ်ဝက်ရောက်မှ K ဆိုတဲ့ကောင်မလေး တစ်ယောက် ကျောင်းပြောင်းလာ တာကို တစ်ခန်းလုံးကစိတ်ဝင်စားနေကြသည်။ K ဟာ အတော်လေးကို ချောတဲ့သူတစ်ယောက်ဖြစ်ပြီး ကျောင်းအုပ် ဆရာမကြီးနဲ့ ဆွေမျိုး မကင်းသူ တစ်ယောက်ဖြစ်သည်ဟုလည်းကြားသိရသည်။
ထိုအရာတွေထက် ပိုပြီးစိတ်ဝင်စားဖို့ကောင်းတာက K ဟာ ဆောင်းကဗျာရဲ့ ငယ်သူငယ်ချင်းဖြစ်နေခြင်းဖြစ်သည်။ ထို့အပြင် K ဟာကျောင်းကိုပြောင်းလာလာချင်းပင် သက္ကနှင့်အလွန် ရင်းနှီးနေခြင်းဖြစ်သည်။ ကျောင်းရဲ့ နောက်ထပ် သုံးပွင့်ဆိုင် ဇာတ်လမ်းများ ပေါ်လာလေမလားဆိုပြီး အကုန်လုံးက စိတ်ဝင်စားနေကြခြင်းဖြစ်သည်။
" မေကြီး ... အဂျစ် ! "
မေ lab ခန်းထဲမှာထိုင်ရင်း နောက်အပတ် ကျောင်းပွဲ အတွက် power pointပြင်တုန်းမှာ ပုံပြင်ကလှမ်းခေါ်လိုက်သည်။
" အေး ဘာခိုင်းစရာရှိလို့လဲ "
" ခုနက ငါမေ့ခဲ့လို့ စတို ခန်းထဲမှာ Test tube လေးသွားယူခဲ့ပေးပါလား "
" အမ် .. နင်လိုက်ခဲ့ပါလား"
" ငါပုံစံကို တစ်ချက်ရှိုး "
ဟိုက်ဒရိုဂျင်ပါအောက်ဆိုဒ်တွေလက်ကို ထိမှာစိုးလို့ လက်အိတ်ကြီးစွပ်ထားပြီး မျက်နှာမှာလည်း Food colouring တွေက ပေနေသည်။ နဖူးစပ်ကနေလည်း ချွေးတွေပြန်နေပြီး ဆံပင်စည်းထားတာလည်းဖရိုဖရဲမို့ ခေါ်သွားလို့မဖြစ်တဲ့အနေအထား။
" တစ်ခြားသူရော "
" ဆောင်းနဲ့ ဝင့်လွှာက ပြဇာတ်ကျင့်တဲ့အထဲမှာ ။ ရှင်းက ခက်နဲ့ English club ထဲမှာ။ Lab ထဲမှာ ငါနဲ့နင်ပဲရှိတာ သွားပေးပါဟယ် Please ! ဟိုမှာ သရဲမခြောက် ပါဘူး။ စတိုခန်းရှေ့မှာ ခုနကတောင် လက်ရွေးစင်တွေဘောလုံးကန်နေသေးတယ် "
အခုအခြေအနေက နောက်အပတ် စျေးရောင်းပွဲနှင့်ပညာရေးပြပွဲအတွက်အကုန်လုံး အလုပ်များနေတဲ့အနေအထားဖြစ်သည်။
" အေးပါ ~အေးပါ ဒါဆိုလည်း ပြီးတာပဲ "
မေ စတိုခန်းမှာ test tube တွေသွားယူနေတုန်း
ပုံပြင်သစ် ဘေစင်မှာ Conical flask နဲ့ ဘီကာခွက် တချို့ကိုဆေးရင်း စောင့်နေလိုက်သည်။
" ပုံပြင် ! ပုံပြင် "
သွားယူတာ ဘယ်လောက်မှမကြာပဲ အပြေးအလွှားပြန်ရောက်လာလေသည်။
" ဟဲ့ အပြေးအလွှားနဲ့ဘာဖြစ်ခဲ့တာတုန်း သရဲခြောက်ခံရလို့လား "
" သရဲတောင် ဒီလောင်မလန့်ဘူး အခုသရဲထပ်ဆိုးတာနဲ့ တိုးလာလို့ "
" ဘယ်လို "
" စတိုခန်းထဲမှာဟာ သက္ကသျှံပေါ်ကို K ကတက်ထိုင်နေတာ ၊ လက်ကလည်း လည်ပင်းမှာချိတ်ထားတာ "
" အော် ! လက်စသတ်တော့ နင်ကအတွဲချောင်းလာတာကို "
" ဟဲ့ .. ငါချောင်းတာ မဟုတ်ဘူး နင်အတင်းသွားခိုင်းတာလေ "
" အေးပါဟယ် ငါ့အမှား "
" ဟဲ့ ဒါနဲ့ နင်နည်းနည်းလေးမှမအံ့သြဘူးလား။ "
" ခုနကတည်းက က အဲ့ ၂ယောက်ရှိနေတာပဲ ငါဒီလောက်ထိဖြစ်မယ်မထင်လို့ နင့်ကိုသွားခိုင်းတာ "
" နင်ငါ့ကို ဆေးထိုးတာပဲ ~~~ ဒါနဲ့လေ ငါက သက္ကကို ဆောင်းနဲ့သဘောတူထားတာ ဟာ ။ နင်သိတဲ့အတိုင်း ဆောင်းကလည်း ကြိုက်ချင်ချင်လေ"
" အေး "
" ဟဲ့ ဒါနဲ့ ငါတို့ Test tube တွေ ဘယ်လိုလုပ်မလဲ"
" သွားယူမှာပေါ့ "
" ဒါမဲ့ .. ဟို ၂ယောက်က "
" အဲ့စတိုခန်းသူတို့ပိုင်လို့လား ၊ ကဲပါသွားရအောင်
ငါလည်းလိုက်ခဲ့မယ် "
××××
" ဟဲ့ ဟိုမှာ နမ်းပါနမ်းနေကြပြီလားမသိဘူး "
စတိုခန်းရှေ့ရောက်တဲ့အခါမှာ မေ ကချောင်းကြည့်ပြီးပြောသည်။
" ဒုန်း "
" အ "
" အား "
ဒုန်း ဟူသောအသံသည် ပုံပြင်သစ်က မေ့ကို ပိတ်ထားတဲ့တံခါးပေါ်ကို တွန်းထုတ်လိုက်လို့ဖြစ်ပေါ်လာသောအသံ ... ။
အ ဟူသော အသံက မေ တံခါးနဲ့ တိုက်ခံလိုက်ရလို့ အော်သော အသံ... ။
အားဟူသောအသံသည် မေ အခန်းထဲ ဝင်လာသောအခါ သက္ကက ပေါင်ပေါ်က K ကို တွန်းချလိုက်လို့ K အော်သော အသံဖြစ်သည်။
" ဟယ် Sorry "
ဘာမှမသိသလို ကလေးရုပ်နဲ့ တောင်းပန်လာသော ပုံပြင်သစ်။
သက္ကက အခုမှပဲ ကြမ်းပြင်ပေါ်က K ကို ဆွဲထူနေလေသည်။
မေ့ ကို အင်္ကျီတွေဘာတွေခါပေးပြီး ပုံပြင်က ဆက်ပြောသည်။
" Sorry ငါတို့က တီချယ် ခိုင်းလို့ Test tube တွေလာယူတာ မေက အခန်းဝမှာပဲ ကြာနေပြီး မဝင်ရဲဖြစ်နေလို့ ငါက စိတ်တိုတာနဲ့ တွန်းထုတ်လိုက်တာ
Sorry နော် Sorry "
" အော် ... အင်း ရတယ် ယူလေ ယူ "
ကြောင်အမ်းအမ်း ဖြစ်နေသော သက္ကသျှံရဲ့အသံ။ K ကလည်း ပုံပြင်တို့ကိုမသိသလိုနဲ့ မျက်နှာကို ဟိုဖက်လှည့်ထားသည်။
မေ ကတော့ Test tube တွေယူကာ ပုံပြင် ကို မျက်စောင်းထိုးကာ ထွက်သွားတော့သည်။ ပုံပြင်သစ်လည်းလိုက်ထွက်လာပြီး တံခါးပေါက်အရောက်မှ သက္ကကို စကားလှည့်ပြောလာသည်။
" အာ .... ငါ သွားတော့မယ်နော် လုပ်စရာရှိတာဆက်လုပ် "
နှစ်ယောက်လုံးဟာ ချက်ချင်း မျက်နှာတွေ ရဲလာကြသည်။
" project ကိုပြောတာပါ နင်တို့ နှစ်ယောက်လုံး သမိုင်း club က မဟုတ်လား။ "
" အော်အင်း "
" ဒါဆို ဆက်လုပ်လေ~ နင်တို့ ကို ငါတံခါးပိတ်သွားပေးမယ်နော် "
အပြင်ရောက်တာနဲ့ ပုံပြင်သစ်ဟာ မေ့ရဲ့ အဆဲအဆိုတွေကို တရစပ် ခံရတော့သည်။
"ဘာဂါနဲ့ မာလာရှမ်းကောကျွေးမယ် မေရာ .. ငါ့ကို ဆဲ မနေနဲ့တော့ "
" ပုံပြင် ဒါနဲ့လေ သက္ကသျှံ က ဘာလို့ ဆောင်းထက် K ကိုရွေးတယ်လို့ထင်လဲ ~ တကယ်ဆို ဆောင်းက ပိုချောတာ မဟုတ်ဘူးလား "
" အင်း ~ K က နုညံ့တော့ ပုံသွင်းလို့လွယ်လို့နေမယ် "
xxxx
" ဟဲ့ မေ ဒီတစ်ခါ နင့် Project က ဘာအကြောင်းလဲ "
ဆောင်းကဗျာက မေ့ကို မေးသည်။
" အာ .. metal နဲ့ non metal တွေရဲ့ Differences တွေနဲ့ Usage တွေအကြောင်း "
" အော် "
" နင်တို့ metal နဲ့ non metal တွေဆို ဘယ်ဟာကို ပိုသဘောကျလဲ "
ရုတ်တရတ် ပုံပြင်သစ်က စကားဝိုင်းထဲဝင်လာပြီး မေးခွန်းတစ်ခုမေးသည်။
" ငါကတော့ metal ထင်တာပဲ လူတွေက ငွေတွေ ရွှေတို့ ပလက်တီနမ်တို့ကိုပဲ တန်ဖိုးထားဝတ်ကြတာလေ "
မေက စဥ်းစဥ်းစားစားပြောလိုက်သည်။
" ဟုတ်တယ် Non metal တွေထက် Metal တွေက တောက်တောက်ပြောင်ပြောင် ရှိသလားလို့ "
ဆောင်းကဗျာကလည်းဝင်ဖြေသည်။
" ငါကတော့ Non metal တွေကိုလည်းသဘောကျတယ် စိန်တို့ဘာတို့လည်းရှိတာပဲလေ"
" အေးနော့ တစ်မျိုးစီပေါ့ "
ပုံပြင်သစ်အတွေးကို မေ က ထောက်ခံလိုက်သည်။
xxxx
Metal ရော Non metal တွေရောဟာ သူ့နေရာနဲ့သူ အသုံးဝင်ပါတယ်။ သူ့နေရာနဲ့သူလူတွေကိုအကျိုးပြုကြပါတယ်။
ဒါပေမဲ့ အများအားဖြင့်လူတွေဟာ Non metal တွေထက် Metal တွေကိုပဲ ပိုသဘောကျလေ့ရှိကြပါတယ်။
ဒါဟာ အပေါ်ယံအားဖြင့်သတ်မှတ်ရရင် Metal တွေရဲ့ metallic luster (တောက်ပြောင်မှု ) ကြောင့်လို့ထင်ရပေမဲ့ တကယ်တမ်းတော့မဟုတ်ပါဘူး။
Metal တွေဟာပျော့ပြောင်းတော့ လိုသလိုပုံသွင်းလို့ရနိုင်ပြီး Non metal တွေဟာ ကြွပ်ဆပ် မာကျောတော့ လိုသလို ပုံသွင်းဖို့ရာမဖြစ်နိုင်လို့ပါ။
ယောကျ်ားလေးတွေ ဟာလည်း ထူးချွန်ထက်မြက်ပြီး လှပတဲ့ အမျိုးသမီးထက် သူတို့ပုံသွင်းလို့ရတဲ့ မိန်းကလေးတွေကိုပဲ နှစ်သက်ကြပါတယ်။