قصص عراقية حقيقية بقلم ابو بغداد سائق التكسي

فلان المهندس

الي اتذكره بالضبط قليل و مشهد بسيط ... الاشخاص الحاضرين بي جانو هواي .. يجوز اتذكر منهم كم واحد .. لان كلهم ملتمين و واكفين يم باب بيتنا ..
بيتنا جان مشتمل صغير .. الباب مالته طلاكة وحدة .. و بي ممر طويل يودي كبل للمطبخ .. من جينا اني واختي وكالعادة لازم ايدها بيدي و نمشي بالشارع لان امي جانت تكول ديربالك تعوف ايد اختك من باب المدرسة لباب البيت .. واني اول ما اطلع من الصف بنهاية الدوام .. اتمشى يم الصف مالتها و بس يطلعون كل الطلاب .. هي خطية تعوف صديقاتها وتجي ركض تلزم ايدي ..
جنت ثالث ابتدائي وهي اول ابتدائي ..
و رجعنا للبيت بذاك اليوم ..
الناس ملتمة بباب بيتنا و عمامي ثنينهم وعمتي و خوالي هم موجودين ..
كلهم يبجون .. بس شافونا جينا اتلكونا الجوارين و رادو ياخذونا يمهم بس عمي الصغير ما قبل و ركبنا بالسيارة و اخذنا لبيت جدي ..
احنا خفنا وبقينا نسأل على ابونا وامنا وهو يكول ماكو شي طالعين بس كل شوية يمسح دموعة بالقميص اللابسة و يكمل سواقة ..
اني مجنت مفتهم شكو بس حسيت اكو شي جبير صاير و بين الخايف و بين الي اقنع نفسي ماكو شي ..
وصلنا لبيت جدي وجان البيت فارغ ما بي احد .. عمي راح لجوارينهم صاح امهم وجابها بقت يمنا وهو ركب سيارته وراح ..
و من يومها مشفنا أمي بعد .. اختفت و صارت مجرد صور قديمة موجود بالالبومات مال الصور .. صارت مجرد اسم ينذكر و ينتهي بألله يرحمها جانت طيبة .. صارت مجرد اسم يحلفونا بي اني واختي اذا نحجي حجاية والحجاية مبالغ بيها (بروح امكم صدك هالحجي؟؟؟) ..
راحت أمنا و بدت رحلتنا بالحياة الجديدة .. حياة مابيها حنان الام و خوف الام .. حياة بيها اب ميعرف شيسوي .. يشتغل من صفحة لو يربينا من صفحة لو يطلعنا من صفحة لو يونسنا من صفحة لو يودينا للمدرسة من صفحة لو يبدلنا من صفحة لو يحير بأكلنا و شربنا ..
اني الي ربيت اختي .. جنت اني امشطلها الصبح شعرها و خطية بالبداية جنت ااذيها لان ماعرف بس بعدين شوية شوية كامت ايدي تتعلم و كامت اول متكعد من النوم تجي مغمضة عليا و اكوم اغسل وجهها وبعدين يله اغسل وجهي ..
اختي اني ربيتها اكثر من ابوية .. صارت روحي من الدنيا و صارت نقطة الضعف الوحيدة بحياتي الي اخاف عليها اكثر من روحي ..
جنت اني اسويلها اكل بس خفيف خفيف لان ما اعرف اطبخ ..
يعني زبد من هذا العراقي القديم الي عليه سلفون ذهبي و شيشة مال دبس لو شيشة مال راشي واحنا اصلا جنا نحب هاي السوالف اكثر من الطبخ ..
ابوية جان يحب امي و اصلا سالفة زواج ابوية من امي قصة لوحدها .. لان بيت جدي اهل امي مجانو قابلين بس هي مقبلت تتزوج غيرة و جانت تحبة لان جانت موظفة وياة .. و بعدين اهلها قبلو بي بس مغصوبين .. و بطلت من الوظيفة وكعدت بالبيت من جابتني ..
الحاصل خالتي اخت امي جانت تجي بين فترة وفترة (بس هالحجي قبل متتزوج) جانت تجي تطبخ كمية جبيرة و تعوفها .. ودائما جانت المجمدة متروسة جياسة مال كبب و كباب و هالسوالف حتى سهلة على ابوية هم ..
اول خمس سنوات من وفاة امي ابوية متزوج لان جان يحبها وقافل على موضوع يتزوج غيرها ..
.. بس مكدر يدبرها لان تعب كلش ..
اخر شي تزوج .. الي تزوجها جانت تحبنا و بصراحة اني احبها واعتبرها أمي الثانية .. بس المشكلة اختي الصغيرة
.. ابد ما حبتها ماعرف ليش و بدت تكره حتى ابوية بعد متزوج .. و مجانت ترتاح بس يمي و كل شي يضوجها او تزعل من عنده او اي مشكلة تواجهها تعوف ابوية ومرة ابوية وتجي عليا ركض ..
زوجة ابوية صار عدها جهال ثنين من ابوية .. اخوتي يعني و شاهد الله ابد ماكو تفرقة من قبل ابوية و حتى مرة ابوية بكلشي .. بكلشي ..
بس اختي مثل مكلت كل متكبر تكبر مشاكلها وي ابوية و وي مرة ابوية .. اني جنت دائما اطبك وياها حتى لو اعرف بيها غلطانة ...
و كبرنا كلنا و هي كبرت بس حياتها عبارة عن غرفتها و دراستها واني ..
وبس ..
يعني تداوم ترجع من دوامها تفوت للغرفة متطلع ابد .. بس تسمع صوت باب المطبخ انفتح و تعرف اني جيت تنزل ركض جوى و تبقى يمي و تسألني شسويت مسويت .. والله العظيم ما فد يوم جيت للبيت ما شفتها ملهوفة عليا عبالك جنت مسافر عشرين سنة وهسة راجع .. تخاف عليا و المشكلة وي اخوتي الباقين متاخذ وتنطي حتى كعدة وياهم متكعد ..
شكد حاولت و عالجت ردت احسن علاقتها بأبوية لو بمرة ابوية لو بأخوتي تسمع بس متطبق و دائما نهاية الحجي ينتهي بجي .. زين ليش تبجين ؟
ما اعرف ..
زين اذوج بشي (لا) لعد ليش ياعيني ..
ما اعرف ..
زين حاولي شوية تكعدين يمهم .. ما اريد ..
عالعموم اني هم جنت اعوفها على راحتها وما اضغط عليها وحتى ابوية خطية الرجال ابد ميحجي عليها و من ماتت امنا لليوم ابد ما عيط علينا لو مد ايده علينا لا هو ولا زوجته .. بس والله العظيم ..
لو غير زوجة اب تسوي بيها اختي الي سوته .. يمكن جان كرهتها و حتى ضرب ضربتها .. بس مرة ابوي جانت كلش طيبة ولحد اليوم كلش طيبة بالتعامل ويانا ..
عالعموم كبرنا و اختي داومت بكلية واني داومت بكلية .. اختي هلكد متحجي بيا كدام الطلاب وياها .. كامو يتمنون يشوفوني ..
لان خطية شخصيتها كلش مرتبطة بيا .. حتى مرة رحت للكلية صديقتها كالت تدري اني عبالي ابوك وامك ميتين ..
كلتلها لا بس امي الله يخلي ابوية .. كالت مو اختك متجيب طاري ابوك ابد بس تحجي بيك دائما ..
كلتلها اي مو تحبني ..
يعني خطية تعلقت بيا لدرجة متشوف غيري بعينها الله يحفظها اليا يارب ..
عالعموم .. اجتني فد يوم كالت اريد احجيلك شي بس خايفة منك .. كلتلها باعي اهم شي ممسوية شي غلط ؟
كالت لا والله ..
كلتلها كولي ..
كالت اكو ولد يريد يخطبني و هو طالب ويانا وامكانيتهم زينة و اهله ناس معروفين ..
كلتلها يعني حجيتي وياه ؟
كالت لا وداعة امي محجيت وياه بس اخته ويانا بالقسم وهو بغير قسم و حاجي لاخته والولد يريد يفوت من الباب ولو نيته سوء ميدز اخته حتى ياخذ موعد ..
كلتلها زين ليش مكلتي لأبوية .. من كلتلها هيج عقجت وجهها وكالت انت ابوية و روح كله انته ..
ضحكت كلتلها لج بابا كافي مو كبرتي لاتصيرين هيج خطية ابوية .. كالت الله يخليك سد الموضوع هسة اني حجيتلك و انت حاجي ..
وحاجيت ابوية و ابوية ما حجى شي خطية و جوي اهل الولد وطلعو صدك ناس طيبين و خطبوها و تزوجت بعد فترة ..
و راحت لبيت رجلها .. زين انتي هسة تزوجتي وصار عندج بيت .. يعني اي واحد بهل الدنيا اهله يجوه زيارة للبيت و يريدون يشوفوه ولو ميحبوه ميجون اصلا ..
ابوية وزوجته يروحولها يريدون يشوفوها متفتحلهم الباب و علساس هي مموجودة .. وحتى رجلها خطية كام يتصل بيا يكلي شبيها فلانة وي ابوك ومرة ابوك ؟
اكله مابيها شي .. انوب الولد كام يتعارك وياها يكلها بابا هذولة اهلج شنو لاتفتح الباب ..
واشتغلت المشاكل .. ابوية ومرته كالو هاي مريضة و مخبله لان ممعقولة صارت هالكبرها وتزوجت و هيج تكرهنا واصلا احنا ممسويلها شي ..
واني صرت ربط الوصل بينها وبينهم ..
متفتح الباب اذا مو اني وياهم .. واني شكيت بيها شي البنية لان رجلها يكول .. من يجون اهلك تصعد فوك تباع من البردة تشوف منو بالسيارة .. اذا انت ماكو متفتح الباب وتكلي علساس طالعين .. بس اذا انت وياهم تفتح الباب ..
اني هم صار عندي شك البنية بيها خيط .. لان كلش زادت السالفة .. تلفون متجاوبهم و حجي متحجي وياهم ..
لحد ما اخر مرة رحت تعاركت وياها عركة جبيرة و كلتلها مدام هيج تسوين حتى اني بيتج محرم عليا واصير انكس من القندرة (مكرم القارئ) اذا افوتله بعد .. وجان تشيل نفسها وتضربها بالكاع و ركضت للمطبخ جرت سجينة من الكاونتر وحطتها على ايدها تكول اذا تسويها صدك هسة اكتل روحي ..
كمت ابجي من شفتها هيج وعرفت صدك البنية مو طبيعية .. كلتلها لج بابا اشاقى وياج و سويت نفسي اضحك وي البجي لان خفت و رئسا جتي براسي صورة امي ..
كالت مو عبالك اني بعدني ذيج الزعطوطة الي تلزمني من ايدي و تمشطلي شعري .. ما اصدكك اذا متحلف بروح ماما تجيني و متزعل لان ما اريد اشوفهم (تقصد على ابوية وزوجته) .. كلتلها وروح امي خلص يروحون فدوة لتراب رجلج بس وخري السجينة ..
وخرت السجينة وحضنتها و كمت ابجي و هي كامت تبجي وكالت لك والله مو بيدي و الله مو بيدي اكرههم ..
رجلها من شافها هيج وكف مقابيلي بس هي متشوفه واشرلي على راسه يعني بيها خيط اختك ..
اني غمزتله و عدت السالفة على خير .. طلعنا بره وكال خلص عوفها على راحتها يمعود هاي مو صاحية ..
كلتله اي والله ..
و لليوم متفوت لا ابوية ولا زوجته للبيت اذا اني مو وياهم .. و اخوتي كطعت علاقتها بيهم نهائيا لا تلفون و لا تشوفهم ولا حتى تسأل عليهم ..
و ابوية هم من حجيتله الي صار كال خلص عوفها و عفناها هيج ..
و هسة صار الحمدلله عدها جهال ثنين واحد سمته على اسمي والثاني على اسم ابو رجلها .. وعايشة وسعيدة وي رجلها و وي جهالها واني هم تزوجت و الحمدلله عايش مرتاح .. بس اذا اسبوع شنو اسبوع ..
اذا اسبوع سبع ايام ما رحت عليها للبيت زيارة .. اهووووووووووووووو تنكلب الدنيا و تصير مشكلة وتجي للبيت تتعارك حتى وي زوجتي تكلها انتي متخلي يجي ..
و فوك الظيم مرتين تطلعلي سالفة سفر علمود شغل و خوش رزق بس من وراها اخاف اسافر لاتسوي مشكلة .. يكولون مريضة نفسيه .. و يكولون متعلقة بيك لان انت ربيتها ..
بس الي اعرفه هي اختي وحبيبتي واحن واطيب كلب بالكون ..
الله يحفظها اليا يارب و يخليلها جهالها ورجلها و يحنن كلبها على ابوية وزوجته واخوتي لان خطية المساكين ممسويلها شي ..
انتهى
( فلان المهندس )
اخوكم ابو بغداد سايق التكسي
#ابو_بغداد