Sharps Or Flats

Chapter 4

IT'S around 10 o'clock in the evening pero hindi pa kami nakakaalis sa parking lot nitong club. Nasa labas ang driver namin, e. Baka ini-inform niya sila mom na pauwi na kami.

"What's taking him so long ba?" tanong ni Eunice habang nakasandal sa headrest ang ulo niya at nakaawang nang kaunti ang mga mata.

Bakas sa hitsura niya ang pagkaantok at ubos na enerhiya dahil na rin sa kalikutan niya kanina sa loob. Hindi ba naman magpaawat tumili kanina, e.

"Matulog ka na kung inaantok ka na. Gigisingin naman kita kapag nandoon na tayo sa inyo,"

"No, I can't sleep! I have freaking deadlines." Mapait na sagot nito.

Umiling na lang ako saka napagdesisyunan bumaba ng kotse. Sinalubong ako ng malamig at sariwang hangin. 'Di hamak na mas malamig ang hangin dito sa labas kumpara sa loob. Anong oras na rin kasi.

"May problema po ba?" tanong ko kay Manong pagkalabas ko ng sasakyan.

Umalis sa pagkakayuko si Manong saka ako nginitian. "Din-double check ko lang po ang sasakyan natin, Ma'am," sagot nito.

"Girl, coffee," ani Eunice na nakadungaw na sa may passenger's seat.

"Manong, pupunta lang po ako saglit sa convenience store. Babalik din po ako agad," pagpapaalam ko.

"Ma'am -"

Bakas ang pagtutol sa boses niya kaya agad ko siyang pinutol sa pagsasalita. "Babalik po ako agad," pag-uulit ko.

Kamot niya ang ulo niya bago ko siya talikuran. Halata naman na ayaw niya pumayag, pero wala naman siyang magagawa.

At saka hindi ko naman hinihingi ang pag-apruba niya. Ipinapaalam ko lang sa kaniya na aalis ako saglit.

Naglakad na ako papunta sa isang convenience store na malapit lang sa parking lot nitong club.

Itinulak ko ang malamig na handle upang mabigyan ako nito ng daan papasok. Sumalubong ang malakas na hangin na nanggagaling sa air conditioner ng convenience store.

Nakita ko ang hindi gaano kahabang pila na nasa harap ng cashier. Sana mamaya ay wala na sila. Hindi ko kayang maghintay nang matagal para magpakuwenta ng binili ko.

Inilibot ko ang paningin ko upang maghanap kung saan nakakabili ng hinihingi ng bruha na 'yon. Nagsimula na rin ako maglakad papunta sa may drinks and beverages section.

'Do they sell coffee here?'

"Sss, never mind. Kahit ano na lang basta kape," bulong ko sa sarili ko.

Tinignan ko ang mga naka-display na beverages sa harap ko. See through naman ito dahil salamin ang nagsisilbing pinto ng chiller.

Binuksan ko ang chiller na nasa harap ko saka kumuha ng tatlong bote ng napili ko na inumin. Hindi ko mapigilan lamigin nang tumama sa balat ko ang lamig na nanggaling doon.

Isinara ko ang chiller para pumunta na sa stall kung saan maraming chips. Saktong pagpihit ko ay nakita ko ang isang pamilyar na bulto na kilalang-kilala ko.

Nakakunot ang noo nito habang nakatingin sa dala ko.

"'Oy, gabi na, a. Para saan 'yan?" tanong ni Lamuel.

"Ah, naghahabol kasi sa deadline ang nagpapabili nito. Wala yata siyang balak matulog," sagot ko saka sinundan ng pilit na ngiti. Pasimple ko itinagilid ang ulo ko upang tignan kung may kasama pa ba siya.

Hindi pa ba sila nakakauwi? Bakit nandito pa ang isang 'to?

Nasaan naman kaya siya?

"What are you doing? May hinahanap ka ba?" Lumingon siya sa likod niya upang siguraduhin kung may tao ba sa likod niya.