Sharps Or Flats

Chapter 1

Napapitlag ako nang makaramdam ako ng mahinang tampal sa bisig ko. Dahilan kung bakit naalis ako sa pagkakapalumbaba. Agad ko naman siyang nilingon para maipakita ang interes ko. "Hoy, ayos ka lang ba?" tanong ni Eunice sa akin.

Pero masakit 'yon ah! Napakasadista talaga nitong babaeng 'to. Kaya walang jowa eh.

"Huh? May sinasabi ka ba?" tanong ko sa kaniya.

Nag-space out yata ako habang dinadaldal niya 'ko. Iniisip ko kasi 'yong mga gagawin ko this week.

Pinitik naman niya ang noo ko. "Bruha ka talaga. Bakit ba wala rito sa Earth 'yang utak mo?" ramdam ko ang gigil sa pananalita niya nang ibulong niya sa akin 'yon.

Bigla siyang napaayos ng upo at humawak sa libro niya at saka itinuon doon ang pansin na akala mo ay nagbabasa. Tumingin ako sa librarian na masama ang tingin sa 'min.

Napakaingay kasi!

"Hindi ka magkakaroon ng jowa kung palagi mo 'kong inaaway." Bulong ko sa kaniya saka inilipat ang atensyon sa libro ko.

Mas mabuti pa siguro na simulan ko ang pag-review. Malapit na rin kasi ang preliminary exams namin.

"Mababaog ka kapag nagkatotoo 'yan," sabi niya naman. Ayaw niya rin talagang magpatalo! "Kapag hindi naging kami ni Lamuel, mawawala ka sa mundong 'to!" dagdag pa niya.

Pakiramdam ko ay nanggigigil na siya sa 'kin. Binibiro lang eh. Tsk.

"Hi, girls," sabay kaming napatingin sa bagong dating. Umupo ito sa vacant seat na nasa harap namin saka inilapag ang libro na feeling ko ay props lang naman niya. Bitbit nito ang isang napakalaking ngiti. Halos hindi na nga makita ang mata niya sa sobrang lawak ng pagkakangiti niya.

Oh, no! Bakit ngayon ka pa dumating, Lamuel? At sa lugar na ito pa? Baka!

"Aw!" Napaaray ako nang suntukin ako ni Eunice sa hita. Nakatago sa ilalim ng lamesa ang kamao niya kaya hindi 'yon makikita ng kung sino.

Lamuel naman kasi eh! Bakit ngayon ka pa sumulpot. Dito pa talaga sa library? Sana alam mo kung paano patigilin sa pagkilig itong kaibigan ko. Baka matuwa pa ako.

"Quiet!" Napakagat ako ng labi nang sawayin ako ng librarian. Masama ang tingin nito sa akin na parang nakasira ako ng isang History book. Parang may weekly menstruation pa naman ang mga librarian dito.

"So . . . "

Sinamaan ko ng tingin si Eunice na tuwang-tuwa sa pakikipag-usap kay Lamuel. Ngiting-ngiti ito habang pinagmamasdan ang crush niya. Palagay ko nga ay nagd-daydream na siya sa magiging kasal nila.

Bruhilda ka, kakalbuhin kita mamaya.

Absentmindedly, inilibot ko ang tingin ko rito sa loob ng library. Mawawari mo na may hinahanap akong isang tao.

Kung nandito si Lamuel, malamang ay nandito rin siya.

At agad iyon huminto sa lalaking nakasandal sa amba ng pintuan. Nakakrus ang braso nito sa tapat ng kaniyang dibdib. Talaga nga namang malakas ang dating nito. Halos lahat din ng babae rito sa library ay nakuha ang atensyon niya. Napansin ko na nakatingin siya sa puwesto kung nasaan kami ni Eunice.

Johan Caleb.

Itinaas nito ang kanang kamay para bumati. Agad ko namang iniwas ang mukha ko upang itago ang pagkapula nito.

For your information lang, ha? 'Di ako kinikilig. Hindi rin ako in denial.

Period. Periodically. Periodic table!