مراهقون و لكن

٣١

" صوت أرتطام مزعج ، أنفاس تعلو وتهبط ، شئ يجثم على صدره ويسحب منه روحه ببطء ، النار تأكل كل مافي المكان ، صوت أنين خافت ينبعث ، حشرات عملاقة تنتشر في الأرض ، العالم يتلاشي الظلام يغطي كل شئ ، الأوكسجين ينعدم في الجو ، أمواج البحر تسبح في الفراغ ، تخرج منها إمرأة حسناء بشعر أصفر مسدول بحجم الفضاء ، تلفه حول ذلك المجهول ثم تهمس له كفحيح الأفاعي: تعال معي ولا تخف!! "
ــــــــــــــــــــــــــــــــــــــــــــــــــــــــــــــــــــ

سلطان عيونو لمعت وأبتسم بخبث لمن سمع جواب أحمد ، ربت علي كتفو في نفاق واضح وهو بقول: بطططل دا ود أخوي الشجاع الأنا بعرفو خليك جاهز العصر علشان عندنا مشوار ضروري تمام؟
_حاااضر يا سلطان التطلبو حأسويهو ليك بس هسي ممكن تسوق زبونك وتمشو من هنا علشان الدنيا صباح لسع وما ناقصين وجع رأس واسئلة من الجيران؟
_المرة دي حاتغاضى عن تعاملك الناشف دا معاي يا ابوحميد لأنو انت زول مسافر لحرب ويمكن ما ترجع فعلشان كدا ما حأشيل معاك وش القباحة يلا سلام

أحمد كبح بركان الغضب الاتفجر جواهو وشد علي يدو عشان ما يتهور وقال جوا نفسو "هه سلام !! هو بكون في سلام في حضرتك يا سلطان الدمار أنت "

سلطان ركب مع الزبون في عربيتو و قبل ما يتحركو رمق أحمد بنظرة بغيضة كدا خلتو يزفر بضيق ويقفل الباب ، بس اول ما قبل وراهو لقى إسراء وفاطمة واقفات ومكتفات يدينهم ، أبتسم ليهم وقال: هههه مالكم واقفين كدا خلاص مشو وما حيجو تاني وعد ، فاطمة قالت ليهو بنبرة ترجي: لو انا عندي معزة عندك وخاتيني في مقام امك الله يرحمها يا أحمد ما توافق علي شرط سلطان الكلب دا  وأعلى مافي خيلو خليهو يركبو
_خالتو صدقيني ما بيدي شئ انا لازم أعمل كدا علشان ما نتشرد في الشوارع احنا ما عندنا اهل يسندونا ويستقبلونا في بيوتهم الحاجة الوحيدة الماسكانا وساترانا هي بيتنا دا وما ينفع يروح من يدنا مهما كان
_لكن يا ولدي ذنبك شنو تدفع تمن غلط عمك الأناني دا لييه دايما انت الضحية وأنت الشايل الليلة براك ليييه بس؟؟
_انا واثق في قضاء ربنا وحكمتو وعسي ان تكرهو شيئا وهو خير لكم الأية دي هي المصبراني علي دا كلو يا امي وعمي سلطان دا الله يهديهو بس انتي اعفي لي
_ربنا يجبر بخاطرك ويرزقك ببت الحلال التسعدك إن شاء الله يا قادر يا كريم عافية منك ليوم الدين يا أحمدي وتاج رأسي
_امي فاطمة انتي الربيتيني وكبرتيني لحدي ما بقيت كدا ممنون ليك طول حياتي وربي وفخور بيك شديد الغالية ست قلبي أنا ، حضنها وباسها في رأسها ، فاطمة باست يدو ودخلت المطبخ تسوي الشاي ، بعدها قبل علي إسراء وقال ليها:مالك ساكتة كدا يا إسراء؟
_هاا؟؟ لا مافي حاجة بس متضايقة شوية
_متضايقة من شنو؟
..............._
_سرو مالك ياااخ متضايقة لييه؟
_يعني ما عارف انا متضايقة لييه؟؟
_لو عارف كان سألتك؟
_لو مهتم كان عرفت براك!
_انا مهتم لكن ما عرفت براي ممكن تحكي لي؟
_متضايقة منك يا أحمد متضايقة شديد شديد لدرجة ما بتتخيلها والله
_متضايقة مني أنا لييه؟؟ عملت حاجة زعلتك لا سمح الله؟ او قلت ليك حاجة بدون قصد وجرحتك؟
_لا
_كنتي محتاجاني جنبك وما لقيتيني ولا طلبتي مني شئ وما جبتو ليك؟
_برضو لا
_طيب في شنو يا إسراء حيرتيني معاك والله
_انا بكرهك شديد انت لييه يا أحمد عملت كدا وقبلت انك تبيع وطنك وتنضم للجنجويد ديل ما اتوقعتك تضعف بالسهولة دي وتوافق علي عرض سلطان عارف يا أحمد منظرك وانت لابس كاكي الدعم السريع حيكون مقرف جدا بالنسبة لي وحتسقط من نظري لأنك انت العلمتني احب وطني وافديهو بدمي فما منطق بعد المواكب والهتافات والمواقف الأليمة الحصلت لينا معاهم تبقى زيهم وتنسى العملو في أخوانا الفي القيادة لا يا أحمد احسن نتشرد ونموت بالجوع ولا أخجل لمن يقولو لي أخوك بقا دعامي ومشى اليمن عشان يحارب الي جانب عربي ضد عربي زيو ، سكتت لمن شافت أحمد دموعو نزلت بغزارة ، حست انها زودتها حبتين وما كان لازم تقول ليهو كدا نزلت رأسها وقالت ليهو بإحراج:انا أسفة لو كلامي كان جارح بالنسبة ليك ، احمد سكت وما عرف يرد ليها بشنو لانو كل حرف قالتو صحيح مية المية ، بس أكتفى بأنو يمسح دموعو بسرعة ويقول ليها: كلها 3 شهور وحتعدي بسرعة بإذن الله بس انتو خلو بالكم من نفسكم كويس لحدي ما أرجع ، اتجنب يعاين ليها في عيونها علشان ما ينهار واتظاهر بالقوة بس في جواهو الوهن اتملكو ، ما لقى حل يهرب بيهو غير انو يرقد في السرير ويتغطي ويحاول ينوم عسى ولعل يصحى ويلقي دا كلو مجرد حلم وانتهى.
ـــــــــــــــــــــــــــــــــــــــــــــــــــــــــــــــــــــ
#في غرفة مظلمة في أحدي السجون....