مراهقون و لكن

٢٣

"وكم أود الإعتراف بأن لفظ#حلومر ينطبق عليكِ تماما يا جميلتي الفاتنة♡ "
ـــــــــــــــــــــــــــــــــــــــــــــــ
وسن نطرت عيونها وعاينت لحنان لقتها ساكتة ومبتسمة ليها بشماتة كدا،،مسحت الدمعة الكانت عايزة تنزل منها بسرعة وجات لحنان وقالت ليها والعبرة خانقاها:للدرجة دي أنا كنت ضيفة ثقيلة عليكم؟؟ما قدرتو تستحملوني أكتر!عادي أنا كنت مقررة أني أمشي بعد كم يوم بس أنتي سبقتيني وطردتيني من البيت وبكدا قايلة نفسك إتخلصتي مني صح؟بس انتي خدمتيني خدمة كبيرة بأنك تخلي أهلي يجو يسوقوني سهلتي علي وأختصرتي لي كلام كتير بالجد ما عارفة أشكرك كيف وعلي فكرة أنا ما زعلانة منك أبدا بالعكس إنبسطت منك شديد والله،،حنان ملامح وشها إتغيرت ووشها أحتقن بالدم من الغيظ،،وسن حضنتها وقالت ليها:شكرا ليك شديد يا خالتو والله ما قصرتي،،وكانت عايزة تمشي بس بيان وقفتها وقالت ليها:بالجد أنا أسفة علي تصرف أمي الما مقبول دا وما عارفة أعتذر ليك أقول شنو بس أرجوك سامحيها أ أنا حاسة أنها قاصدة تعمل كدا عشان أهلك يجو يسوقوك أمي ما كعبة للدرجة ديك فما تأخدي عنها صورة غلط هي طيبانة والله لكن هسي أنا فرحانة ليك شديد أخيرا حترجعي بيتكم وتصلحي علاقتك مع أهلك وتعيشو مبسوطين سوى أنا حأزورك طوالي لمن تزهجو مني وتطردوني وحأتعرف علي سديم أخوك دا وأشاغلو طول الوقت وحأبقى صديقة العائلة ههههه ما عايزة أبكي والله بس ما قادرة صح أحنا إتلاقينا بالصدفة وكان عادي ممكن نفترق وننسى بعض بس القدر لمانا في بعض والحمدلله هسي بقيتي أكتر من أختي بالجد حأشتاق ليك كتير والله
_وأنا كمان حأشتاق ليك وأفقدك يا بيان أنتي وسهى وخالتو حنان وخالو عبد الرشيد شكرا ليكم كلكم والله وجبتو معاي وما قصرتو وأنا ما حأنسى معروفكم دا طول حياتي أعفو لي لازم نمشي بعد دا مش يا خالتو وعمتو؟؟
_أي يلا وسام ليهو ساعة منتظرنا بره وبكون زهج هسي
ودعوهم وطلعو لقو وسام منتظرهم في العربية،،سلم علي بيان وسهى بأدب وركب ناس أمو في العربية ودورها وفات،،بيان قبضت علي يدها وإتجهت بسرعة ناحية أمها وهي متجاهلة مناداة سهى ليها حنان كانت مسترخية علي الكنبة وفي وشها الأرتياح زي كأنو كان في سم جوا جسمها وطلع،،بيان ربعت ليها يدها وقالت وهي بتمسك في أعصابها:أمي انتي جنيتي ولا حاجة كيف تطردي بت الناس بالشكل دا هي عملت ليك شنو عشان تحقدي عليها كدا؟؟
_لأنها غلطت نفس غلطة حسنية أختي زمان وما عايزه يحصل ليها نفس الحصل لأختي ،،خالتك حسنية الله يرحمها كانت اختنا الكبيرة وأمنا التانية يشهد الله ربتنا كلنا لحدي ما كبرنا وكانت محبوبة من الكل بسبب طيبتها وأخلاقها العالية بس غلطتها الوحيدة انها حبت ليها راجل من برا فريقنا ومن برا بلدنا كان من الخرطوم،،إتلاقو في بكى إخلاص جارتنا وهي كانت عمتو المهم أعجبو ببعض وهو قرر يتزوجها بعد فترة من البكى وهي عقدت امالها عليهو وبقت مستنياهو سنة كاملة حتي فاتح اهلو في الموضوع وهم ما كان عندهم مانع بس أمي وابوي أعترضو وقالو ما عندنا بت نديها للغريب وأصلا حسنية دي ناضمين فيها دايرها الفاتح ولد أخت أمي وحسنية حلفت ستين يمين انها ما حتتزوج غيرو وفعلا أتفقت معاهو وهربت معاهو للبندر ووطت رأسنا قدام الناس ومن ساعتها ابوي إتبرى منها وحسنية كان معمي عليها وما هماها أي شئ وهناك إتزوجت ود الخرطوم وسكنت في العاصمة الكانت حلم أي بت في بلدهم وعاشت معا راجلها دا سنتين كاملات بس هو للأسف أتوفى في حادث ومات وهي دخلت في صدمة شهر كامل وبسبب اهمالها لنفسها أجهضت الطفل الكان في بطنها وأهل راجلها ديل جن جنونهم كيف تقتل طفل ولدهم الحاجة الوحيدة البتزكرهم بيهو وحسنية إتأثرت بكلامهم شديد لدرجة حست انها فعلا قتلت ولدها بيدها وفي يوم إتفاجئت بأم راجلها وأختو مطلعين ليها هدومها وحاجاتها برا وقالو ليها احنا تاني ما دايرنك في البيت دا الحاجة الوحيدة الكانت رابطاك بالبيت دا هو ولدنا وهسي مات فمافي ليك قعدة هنا حسنية إتطردت من بيت راجلها زي الكلب وما عرفت تمشي وين وتعمل شنو وهنا ياداب إتزكرت اهلها وعرفت فايدتهم شنو قطعت تذكرة وسافرت البلد لبيتنا هناك بس ما لقت الترحاب الكانت متوقعاهو أبوي طردها وقال ليها أنتي متي من زمان بالنسبة لي امشي لراجلك ود العاصمة خلي ينفعك وبقت مهمشة في البلد زي كأنها غير مرئية وشقافة الناس ما بتجي جنبها والأمهات والأباء بحذرو بناتهم انهم يتكلمو معاها بلدنا ضيقة والناس فهمها ضيق كون زول يتمرد علي الأعراف دي خطيئة كبيرة وكمان بت بعتبروها كانها شيطان ما بني أدم وبتفادوها،،حسنية قلبها ساقها ووداها للهلاك وهي ما كلفت نفسها تستخدم عقلها مشت ورا قلبها بكل بساطة وحصل مالا يحمد عقباه عارفة يا بيان أنا بقيت مقتنعة انو الحاجة الما فيها رضاء الوالدين ما حتستمر لانها ما فيها بركة ورضاء الوالدين من رضاء الله سبحانه وتعالي والبت دي لسع عندها فرصة عشان ترجع لأهلها ويسامحوها أيوا صح أنا ما بحبها بس ما بكرها برضو وما عايزة زول يضوق نفس الضاقتو اختي ولو حتى هي،،عارفة حسنية الله يسامحها ويغفر ليها حصل ليها شنو في النهاية؟؟حسنية لقت نفسها براها وماف زول معاها حتي اقرب الأقربين ليها إتخلو عنها وبقى تاني ما عندها سبب عشان تعيش بعد ما أهلها والمجتمع رفضوها بسبب غلطة كانت مفتكراها صغيرة وحتتنسى،،رمت نفسها في البحر عشان ترتاح من العذاب او بالأحرى اللعنة الأصابتها دي،،حنان العبرة خنقتها وبقت تبكي وتمسح في دموعها وتقول:الله يرحمك يا اختي ويغفرلك،،بيان بعد كلام أمها دا حست بالذنب ومشت حضنتها وأعتذرت ليها
#أما بهناك في جانب وسن.....
ثويبة طول الطريق كانت بتنبز في وسن وتنقنق فوق رأسها وكل دا ووسن ساكتة ومتحملة ،،في النهاية وسام سكتها وقال:وصلنا بيتك يا خالتو يلا مع السلامة علا بتكون قعدة براها وحتخاف،،ثويبة فهمتو وقالت ليهو:علا ما شافعة عشان تخاف والواطة صباح البخوف شنو؟قول عايزني أنزل بس بررري منك مالك كعب كدا طالع لمنو أنت أحنا ما عندنا الكلام دا،،وسام كتم ضحكتو: باين ما عندكم يا خالتو لكن بصراحة كدا انت كترتيها حرام عليك دي بت اختك في النهاية ما صح منك والله،،ثويبة الجعجاعة نزلت ولوت ليهو خشمها وقالت:الخوخة يلا يا ولدي أتوكل دربك اخضر حبيبي،،وسام أتحرك عاين بالمراية لوسن لقاها سارحة إتنهد وهمس:الله يكون في عونك يا وسن حتسمعي كلام كتير بالشكل دا،،بعد دقائق وصلو البيت وفتحت ليهم الحبشية ولقوها محضرة الفطور طوالي أكلو ووسن أبت تفطر وقالت ما جعانة وخلود ورتها الغرفة الحتقعد فيها واحدة من غرف الضيوف الكانو مجهزنها ومرتبنها ليها مسبقا،،أستحمت وغيرت هدومها وجات رقدت ما عرفت كم من الوقت مضى وهي سرحانة وبتفكر بس قدرت تسمع الإقامة بتاعت صلاة الظهر طوالي لبست إسدال الصلاة فوق هدومها ومشت إتوضت وفرشت مصلايتها وصلت بعدها حست براحة كبيرة والحبشية جابت ليها الأكل أكلت حبة بعدها بدت ترتب هدومها في الدولاب....
ـــــــــــــــــــــــــــــــــــــــــــــ
رئبال وسديم كانو راجعين من المدرسة وبتكلمو في الشارع عن موضوع لتين،،رئبال قال ليهو:يا مان والله أنا ما عارف أعمل معاها شنو وفي المدرسة اليوم كلو كنت بفكر في الموضوع دا ياااخ رأسي شطب
_يا رئبال يا ود خالي ما تعقد الموضوع زيادة عليك الله هم خياران يا أما معاها يا بلاها باختصار كدا قرر انت داير شنو بس والموضوع أنتهى
_ما هو الموضوع ما بالسهولة دي يا فالح المشكلة انو وساااام شكلو بحبها بالجد يعني أنا واخوي هسي إتدبسنا سوا
_إشططططه يا معلم أنا أديك الزيت أنت تقوم تعمل شنو ؟تجسو لو بحبها خلي يعترف ليها يمكن توافق بيهو وتنفض ليك ونتفك من الحنك العاضي دا ولو ما بحبها ودي قلة ادب منو ساي فكان الله في عونك يا صحبي أدبستا أدبستا هههههه
_يااااخ انت واحد ما عندك دم والله
_تحب أجرح ليك يدي عشان تتأكد؟؟
_سديم بضربك والله
_يعني لتين دي زاتها لو ما متخلفة تخلي أولاد المدرسة كلهم والمكسرين فيها وتجي تحبك انت الشكية لله غايتو صحي حظ القبايح
_ما وكت أم فلسفتك هسي يا سديم ياخ ساعدني أبوس يدك
_طيب طيب أديني وكت افكر ليك وإن شاء الله حاطلع ليك بحاجة
_أي ياااخ شغل مخك دا وأنككت لينا فكرة زابطة كدا
_هو مخي دا بنزبط ساي عايز ليهو حاجات زي أيسكريم عمك عبدالله كدا عشان يشتغل كويس
_لعبتها صح والله عايز تستغلني لمصالحك الشخصية ماشي يا سديم كلو يهون عشان اخلص من سنيورة جولييت دي
_البت مزة مزة أم المزة ياخ
_أرح غور قدامي عشان نتسمم
دخلو محل عمك عبدالله وشالو ليهم جردل أيسكريم وسط ونزلو فيهو ضرررب وما فكوهو إلا فاضي بعدها مشو البيت غيرو هدومهم ورقدو سلطة ونامو وماصحوهم إلا للغداء نزلو تحت وهم مدروخين لسع أول ما قعدو سديم قال انا عطشان وكورك للخدامة تجيب ليهو موية ،،مسح عينو وإتثأب لقى كباية الموية جمب وشو شربها مرة وحدة ومداها ليها وقال شكرا يا زيتون.. بس بتر جملتو لمن لقاها وسن قام من الكرسي بعصبية وقال:
دي الجابها هنا شنو؟؟ خلود قالت ليهو:أهدي يا سديم جبناها الصباح انا وثويبة من الناس الكانت قعدة معاهم وهي خلاص حتقعد معانا خلاص ما حترجع
_يكون بعلمك يا مرت خالي الزولة دي إذا قعدت هنا أنا حأمشي وما مستعد اكون معاها تحت سقف بيت واحد ومشى بسرعة وهي بتجاهل مناداة خلود ليهو،،وسن عيونها رقرقو وجرت طلعت بره بكت قدرتها ودعت الله من كل قلبها انو يحنن قلب اخوها عليها وعلاقتهم ترجع طبيعية وتكون زي الأول وأحسن....
ــــــــــــــــــــــــــــــــــــــــــــــــــــــــــــــ
#في المساء......
لتين كانت شايلة ليها شيبس بطاطس وبتأكل فيهو سمعت صوت أخوانها بقولو:والله الليلة تغلبني يا ليث أنا حأشتري ليك أيفون8 ومعاهو كفر وآير بودز كمان
_أوووبااا كده اللعبة أحلوت بس بعدين أوعى تنط لمن أغلبك يا زول
_أفووو أحنا بننط كمان انا وعدتك لكن هسي أنت حاول جيب ليك هدف عشان نتعادل قبل ما الشوط الأول ينتهي
لتين خشت ليهم لقتهم مندمجين ومنفعلين لمن عاضين التيشيرتات قعدت في نصهم وقالت ليهم: أنا عايزة ألعب معاكم طولت من البلي يخخ
لؤي ضحك وقال ليها:محمد ولد لسع بتلعبي بلاي ستيشن أنتي لسع ما بقيتي بت زي باقي البنات؟
_مالي انا هسي شايفني حالقة جنبات وداقة سيستم ولا لابسة تيشيرتات وشورتات جينز،،أنا كلي رقة وأنوثة وأتحدي أي بت تكون زيي
_ههههههههه رقة وأنوثة قلتي لي؟ سمح بتلعبي بلايستيشن لشنو لا وكورة كمان!؟
_ ه هواية ما أكتر بحب البلي من وانا صغيرة أتعودت العب معاكم يعني يا فالح الغلط منكم انتو وأنا مالي ذنب وبعدين لعب الكورة لا عيب لا حرام فما تعقد الموضوع
_أنت عارف يا لؤي لتين دي كانت بتورم لي ضهري باللبيع لمن أغلبها وتكورك وتجري لأمي تقول ليها ليث غلبني في الكورة يلا امي زهجت من الحكاية دي ومن بداية السنة شالت البلاي مننا ودستو بس الحمدلله انو حقك قاعد وما حتقدر تشيلو منك
_أي بس ما تتعودو ها أقرو قرايتكم وأنجحو بعدها في الأجازة سوو الدار تسوو
_أنا إذا نجحت في ثالث عايزة هديتي تكون أيفون9 وبلاي ستيشن 5 ما حأقبل بأقل من كدا
_سمح بس انتي هسي أنجحي وأطلعي لي من 3دي بعداك الله كريم
_أطمن يا أخوي أنا أدبي و70بتخارجني
_لا عشان انتي أدبي ما حأقبل بأقل من 90٪وإلا مافي هدية
في اللحظة دي لؤي جاب قون في ليث والشوط الأول إنتهي ،،
لتين ضحكت فيهو وقالت ليهو:قوم يا كيشة خليني أغلبو ليك ما بتخجل جايبين فيك 3أقوان في الشوط الأول أديني ألعب وأنا حأحفظ ليك باقي كرامتك الإتشتت دي
_أديها اليد خلينا نشوف أخر فصاحتها دي شنو
_هااااك بس يا ويلك لو غلبك الليلة إلا تطيري بس
_أطمن ياسيدي أنا لهاااا
وبدو يلعبو وليث خاتي يدو في قلبو خايف البتاعات تروح عليهو ولتين شغالة تطمن فيهو بس للأسف إتغلبت
وأنتهت 5-4
_أخخخخ ضيعت الهدف والله إتأخرت
في الباص كنا حنتعادل هسي أخخخ بس لؤي مد ليها يدو يعني كفك وقال ليها:والله طلعتي أشفت من ليث وما فاضية ليهو زاتو وهو شابكني ليك أنا معلم ودايما بغلب وبتاع أتاري كيسو فاضي
_هههههااااي محسوبتك خطرة جدا يا زول ها
ليث إنفجر من الغضب وقال ليها:أي أتفاصحي كويس نسيتي انا قلت ليك شنو الليلة إلا تعملي ليك ريشات وتطيري بقتلك سامعة؟
_كدي أبقى راجل أهبشها عشان أكسر البلاي ستيشن دا في رأسك لتين دي تاني بقت صحبتي وزولتي
لتين بقت تغيظ فيهو بلسانها وعارفة أنو ما حيقدر يهبشها لأنو هي بقت تحت حماية لؤي،،ليث شماهم وكره اللعب معاهم ومشى وهو بطنطن،،لتين ولؤي بقو يضحكو علي شكلو،،لؤي قال ليها:بتعرفي تلعبي ناروتو ستورم3؟
_أوووبا دي العشق الأخر عارف أنا بحب العب بالشخصيات العندها شفرات زي كيبا وأسوما والوضع بتاع ناروتو لمن أمتص طاقة الكيوبي بتاعو وبرضو بحب ألعب بروك لي وهيناتا اه اه وكيلر بي وأخوه آي برضو ظريفين
_حلووو أنا بميل لعشيرة الأوتشيها اكتر غالبا بلعب بيهم ناس مادارا وأوبيتو وساسكي وإيتاشي وبرضو الساموراي مايفوني وكيسامي ونيجي مرات بلعب بيهم
_أرح افتح الليلة سهرة للصباح

يتبع......