مراهقون و لكن

١٦

ـــــــــــــــــــــــــــــــــــــــــــــــ
لتين إتصلت لصحباتها وكلموها أنهم جاين عليها راكبين في أمجاد وحيجو يسوقوها ويمشو بيت رئبال المهم جهزت نفسها وفضلت مستنياهم بعد حكاية نص ساعة كدا سمعت بوري تحت وطوالي نزلت بعد ما ودعت كلمت البيت لقت براءة وإيثار راكبات نادوها وقالو ليها أرح سرعة ياااخ وهي إتغاتت وبقت ماشه علي أقل من مهلتها براءة زهجت ونزلت كرتها كر من مكانها ورزعتها جوة وقالت:خلصت الزفة يا عروسة ما حنستناك العصر كلو
إيثار ضحكت وقالت:ظلمتي الشوف يا برو عروسة شنو ما شايفاها لابسة أسود في أسود حتي النضارة مظللة بالاسود اها يا الحادة مالك متكمكمة بالأسود كدا عاملة لي كدا زي مزيل العرق الأسود بتاعAxe
_قولي ما شاء الله كملتيني يكمل شعرك يا حقودة
هبشت شعرها بورا وقالت بحركة درامية:أصلو شعري دا حاسدني عليهو ناس كتار اللهم لا حسد
لتين:يخسي عليكم مالكم ما جيتو سلمتو علي ماما ولؤي
إيثار:برررررري لؤي قاعد البودينا شنو أحنا
براءة:بعدين ما تنسي أنو هو خاطب وعلي وش زواج يقوم يشوفني ويفسخ خطوبتو ما عايزين نقطع نصيب البت كمان عشان كدا خلينا كدا أحسن
لتين:موهومة كمان والله دي مشكلة دي
إيثار:العرس العرس يا الله إن شاء الله كان راجل مرة يا الله
لتين خبطت جبهتها وقالت:ودي بايرة بائسة كمان أستغفرتك يا إلهي
الراجل بتاع الأمجاد كان متابعهم من البداية قبل عليهم وقال:اها خلاص إنتهيتن من العولاق البتسون فيهو دا نتحرك بعد كدي مش؟
_أسفيين يا عمو نسيناك أي يلا نتوكل بسم الله
وطول الطريق قضوهو تعليقات في الناس وقطيعة وأمور البنات ديك وعمو بتاع الأمجاد محتار فيهم قال ليهم:أنتن أصلن ما فيكن عقل الله يكملكم بيهو قولن أمييين
_أمييين كبيرة يلا هاك إتفضل وشكرا ليك
وصلو فلة تاج الدين أمام الكان وصفها ليهم فؤاد إتخلعو من كمية العساكر المحاوطين المكان وقدر ما حاولو يقنعوهم أبو يخلوهم يدخلو في النهاية لتين زهجت وقالت ليهم:عاينو طالما أنتو ما عايزين تدخلونا نادو لينا رئبال هنا وهو بعرف يتصرف معاكم قلت ليك أحنا أصحابو في المدرسة وعايزين نعزيهو بس
_يا بتنا قلت ليك جاتنا أوامر أنو ما ندخل أي غريب البيت يلا إتفضلو امشو من هنا
_أوعى تتحركو من مكانكم
دا كان صوت وسام الكان طالع بالعربية جاء للحارس وأنفصم فيهو وقال:أنت بصفتك شنو ترجع البنات ديل كدي وريني
_لكن يا أستاذ جاتنا أوامر أنو ما ندخل زول غريب
_ديل بنات صغار وبكونو قدر رئبال أخوي حيعملو شنو كان دخلو حيفجرونا مثلا أحنا ما قاعدين ندفع ليك قروش عشان تنهر في الناس وترجعهم 
_أسف يا أستاذ
_تاني ما تعيدها وقبل علي ناس لتين وقال:معليش يا بنات بس الزول دا مادينو تعليمات صارمة أنتو شكلكم كدا مع رئبال في المدرسة صح
لتين دنقرت رأسها وقالت بأسى:أيوا وجينا نعزيكم ياداب سمعنا الخبر والله البركة فيكم البقاء لله
_البركة في امة محمد فقد جلل والله الحمدلله قدر الله ماشاء فعل إتفضلو أدخلو جوه
إيثار:الله يزيد فضلك
ومشو وراهو وهم منبهرين من جمال الفلة الكبيرة والواسعة ديكورها كان فخم دخلهم بممر كدا مليان صور ومنحوتات وفي منتصفو كدا متدلية ثريا ضخمة منورة بكم لون لاحظ لتركيزهم مع الصور إبتسم قبل ما يقيف ويقولل:دي صور أجدادي وحبوباتي وبيتنا دا كان أصلا بتاع جدي الكبير اليهو أبو جدي أبو أبوي  هو كان أصلا مقيم في السويد ومن هناك إتزوج سويدية وشال الجنسية السويدية وبعد ما ولدو جدي جد أبوي جو إستقرو هنا في السودان وبنو البيت دا وإتناقلوه من جيل لي جيل يعني أنا هسي نص سويدي ونص سوداني مكس أجدادي كلهم عندهم الجنسية السويدية حتي أبوي المهم أبوي ربنا فتحها عليهو وقرر يكسر البيت البنوهو أجدادو أبدا ما كان هين عليهو أنو يكسرو لأنو الذكري الوحيدة البتربطو بأبوهو بس إضطر يعمل كدا وفعلا كسرو وبناهو أربعة طوابق الدور التحت  فوقو غرفتو هي وأمي وبنكون قاعدين فيهو أغلب وقتنا والدور التاني فوقو غرفنا أحنا+غرفتين للضيوف+صالة كبيرة والطابق الثالث والرابع دا خلاهو لينا أنو وأخوي رئبال لمن نتزوج
لتين:قصة جميلة والله يرحمو ابوك ما قصر معاكم خالص
وسام إتنهد وقال:ولا في يوم حيقصر طول عمرو خيرو مغرقنا
بعدها واصلت تجوالهم في القصر أقصد الڤلة فتح باب كدا وطلعهم علي جنينة كدا جمبها حوض سباحة كانو عاملين حلقة وقاعدين يقرو قرأن لتين أول ما شافت رئبال قلبها عمل شششحح لأول مرة تشوفو بهدوم البيت كان جزاب شديد بالرغم من الحزن الظاهر عليهو والكم يوم دي كانت كفيلة بأنها تسرق حبة من وزنو سلمو عليهم وعزوهم وعرفو ليهم نفسهم أنهم أصحاب رئبال وسديم في المدرسة خلود قالت ليهم:أي رئبال طوالي بحكي عنكم بالزات أنتي يا لتين بالمناسبة إسمك حلو زيك كدا لتين إنفجرت من الخجل وقالت:تسلمي يا خالتو كلك زوق وفي جواها فرحت أنو رئبال بحكي عنها لأمو حتقولو لي سبب التبدل المفاجئ دا شنو حأقول ليكم أنو لتين ورئبال إتصالحو وبقو فرد في الكم يوم الفاتت دي لكن أنا نسيت أكلمكم سوء التفاهم البيناتهم إتضح وزي ما بقولو"لا محبة إلا من بعد عداوة"براءة وإيثار بقو يقرصو لتين في ضهرها لمن هي صرخت وبقت تحك ضهرها وإتداركن الموقف وقالت شكلو في حاجة عضتني
خلود قالت ليها:حاجة زي شنو يا بتي
_والله ما عارفة خلاص أنسيها راحت وطبعا ديل عاملات رايحات..خلود والباقين شكروهم علي جيتهم وطلبو منهم يتفضلو وقعدو يقرو معاهم قرأن بعدها الشغالة جابت ليهم عصائر شربوها وقال يستأذنو بعدا عشان الواطة حتضلم وهم بنات براهم خلود قالت ليهم:طيب خلي وسام ورئبال يودوكم بالعربية _لالا مافي داعي يا خالتو والله أحنا حنشوف لينا أمجاد من الظلط
_دا كلام دا يا بتي كيف تركبو أمجاد وديل قاعدين كدا بزعل منكم والله يلا يا أولاد ودو أخواتكم ديل عشان أهاليهم ما يقلقو عليكم وشكرا ليكم ما قصرتو
_العفو يا خالتو دا واجبنا وودعوهم وركبو العربية وطول الطريق وسام كان بعاين للتين في المراية شكلو عجبتو وهي سافهاهو سفهة السنين ورئبال ما أتكلم كتير بس قال المدرسة كيف وياكم وتاني سرح
براءة غمزت لإيثار وقالت للتين في أضانها:شنو يا تينو الود من قبيل بعاين ليك بالمراية وما مركز مع الطريق شكلك عجبتيهو
لتين إتجاهلت كلامها وعاينت ليها بتحديرة كدا وقالت بعدين بعدين بطلي كلامك الفارغ دا شوية
براءة:ماشي الهواء بجيبك يا كيس براك بترفسي النعمة برجلك كان ما دايراهو باصيهو لي بطلي جحود وخلي أختك تنجز وتربط مع القرضة دا
_قرض اليلبخو ليك في رأسك إن شاء الله ما تفضحينا
_ااااوووف خلاص سكت نتكلم بعدين وتاني ما إتكلمو مع بعض لحدي ما وصلو البيت وودعوهم وبعد ما أي وحدة رجعوها بيتها رئبال قال لوسام:شنو يا مان شايفك مركز مع لتين عجبتك ولاشنو
_أعجب بيها شنو كمان أنا يادوب اشوفها لكن الصراحة هي جميلة وظريفة وبتتحب
_حب من أول نظرة قلت لي هه ههاي
_أسكت أسكت عشان ما أعمل بيك حادث باقي اليوم دا بلا حب بلا كلام فارغ معاك
_سكت خلاص
بهناك لتين أول ما دخلت غرفتها بقت تتذكر في رئبال لمن كانت بتعاين ليهو بالدس وهو بيقرا قرأن كان منزل رأسو وبقرا ورموشو الكثيفة خلت لتين تهمس بلا وعي:سبحان من خلقك..رجعت لواقعها و ثختت يدها في قلبها وقالت:شكلي بالجد حبيتك يا رئبال
_________________________
#في الصباح......
توقف الباص الكبير ذو اللون الأصفر الذي يحمل في مؤخرته لصاقة مكتوب عليها بخط عريض:ترحيل مدارس النخيل..كان الشارع الذي أمام المدرسة التي تزينها أشجار النخيل ال-Royal- هادئا وبه بعد المارة إلا أنه في لحظات أصبح صاخبا عندما ترجل التلاميذ بسرعة من الحافلات وكل شخص يقهقه مع صديقه ومنهم من أمسك بكتابه وأصبح يقرأ درس اليوم ويحاول فهمه في نفاق واضح منه لكي يكون نجم الفصل والأكثر إستيعابا ومشاركة اليوم..كان الجميع في حركة مستمرة إلا هو...كان يجلس وحيدا ممسكا بدفتره وقلمه في محاولة منه لرسم شئ ما قلب عيوناته ذات اليمين وذات الشمال ليجد شئ يرسمه سرعان ما وقع بصره علي فتاتان صارختا الجمال كانت أحداهن تطلي أظافرها باللون الأحمر والثانية تنظر لنفسها في المرآة الصغيرة التي تحملها تارة وتارة أخري إلي صديقتها في غرور واضح منها أنها الأجمل ظل يراقبهن بتمعن وما هي إلا لحظات حتي أمسك بقلمه وباشر في رسمهما خلسه وهما لا تدريان...أستطاع رسمهما ببراعة فائقة في دقائق معدودة..نظر إلي رسمته بفخر وقارن بينها وبين الواقع فوجدها متطابقة ولكن لدقيقة واحدة فقط لأن المرأة الجلادة(لطفي)أستطاعت إقتناص هاتين القمرتين الصناعتين وتم مصطادرة كل مستحضرات التجميل منهما ذلك بعد أن لقتنهما درسا لا تنسيانه أبدا وبعدها أمرتهما بأن تغسلا وجهيهما وتزيلا الطلاء بعد أن تأكدت من صحة كلامهما في أنه طلاء أظافر(إسلامي)تعالت إبتسامته الساخرة وهو يعدل في رسمته بعد أن رأى الحسناواتين بدون مكياج وغير ملامحهما إلي مسختين شديدتا القبح ضحك بشدة قبل أن يجعد ورقته ويرميها في السلة قائلا:أنفع رسام كاريكاتير والله هههه وذهب لفصله مباشرة بعد أن رن الجرس وأخبروهم بأن الليلة ليس هناك...(طابور صباحي) لأن هنالك أعمال طلاء وإصلاحات في الساحة الكبيرة...عندما دلف إلي صفه إستقبله ذلك المتنمر المدعو "سالم" كالعادة وبدأ في إستفزازه قائلا:أووو اللبوة جات يا هلا يا هلا بيكي لبوتنا الحلوة الفصل نور والله
ليث إتجاهلو وقعد في محلو وهو ماسك أعصابو بالعافية صحبو محمد الكان قاعد جمبو همس ليهو:أوعك تتكلم معاهو هو عايزك تغضب عشان تمد يدك وتكون الغلطان إتجاهلو ونفض ليهو ولاكأنو موجود وهو براهو حيفصلها منك ليث أكتفى بأنو هز ليهو راسو وأبتسم بسخرية لسالم الكان متابعهم بنظراتو من قبيل عشات يشوف ردة فعلو بس للأسف من حفر حفرة لأخيه وقع فيها نظرات التحدي الكانت في عيون ليث بس قدرت تستفز سالم وجاء عليهو
وقال:شنو يا لبوة مالك ساكتة كدا؟؟الكديسة أكلت لسانك ولاشنو هه هي قصدي الأسد أكل لسانك لأنك لبوة ههه هاااي
ليث خلاص الصبر غلبو وطوالي نط في سالم وقال ليهو:أنا الأسد فاهم وأنت اللبوة غصب عن عين الجابوك يا كلب ونزل فيهو ضرب مبرح خلاهو يعرف بالجد أنو أسد بس في إتنين من أصحاب سالم غدرو ليث ومسكوهو وهنا سالم جات فرصتو وسدد لكمة قوية في بطن ليث خلتو يركع في الأرض علي ركبو وهو متألم ورجع كل الأكلو وفي لحظة حسى بأنو مصارينو إتقطعت وسالم ما أكتفي بكدا بس وأداهو ليك بنيتين سريعتين في أنفو والدم نزل منو بغزارة وهنا ناس الفصل مسكو سالم وصحبينو عشان ما يضربوهو ومحمد صاحب ليث جاء ساقو معاهو برا الفصل وأثناء ما هم ماشين إتلاقو مع أستاذ كدا ووروهو أنو ليث إتشاكل مع واحد من ناس الفصل بعد ما إستفزاهو بالكلام ومحمد قال ليهو:أنا شاهد وممكن تسأل ناس الفصل حيوروك أنو سالم الكان خاطي
_طيب أنا حأمشي أشوف الحاصل وأنت ودي صحبك العيادة وبعداك قابلوني في مكتب مستر ياسر تمام؟؟
_تمام
وواصلو طريقهم للعيادة محمد سكت مسافة بعدها قال:أنا أسف لأني ما قدرت أساعدك وإتفرجت عليك بس وما إتدخلت عارف ليه؟لأني جبان وخواف وما أستاهل أكون صحبك
_أبقي راجل عيد كلامك دا تاني عشان أكسر ليك رأسك دا يا غبي عارف لييه الأسود ما بياكلو سوا في نفس الفريسة لأنو الأكل بتجيبو اللبوة لحد عندو فلييه يتقاسم فريستو مع صحبو وهو نصيبو جايهو فهمتني ولا أنا برطن ساي
_الصراحة لا أنت كلامك دا غريب جدا وبتحكي بالألغاز حتي وأنت تعبان لكن الفهمتو أنو أنا أسد
_أيوا أسد الأسود كمان يا صحبي وسالم هو اللبوة والفريسة هي الغلط علي الأخر بالبلدي كدا يعني سالم هو البجيب اللوم لنفسو ويغلط علي أنا ههه