مراهقون و لكن

٢٠

"للثورة سحر غريب تجعلك مهووساً بها وليس في قلبك غيرها،، تجعل بالك مشغول دائما بقضاياها وأخبارها وليس لك وقت للتي في يوما ما ملكت قلبك وكيانك،،أجل لقد تخطت الثورة مرحلة كبيرة وأصبحت كالمتلازمة لك،،حتى هي أصبحت تغار لأنك تحب الوطن أكثر منها،،فإياك أن تخذل آين منهما يوما فهما يستحقان كل نضالك من أجلهما هل تفهم...!!؟؟ "
ــــــــــــــــــــــــــــــــــــــــــــــ
يوم السبت كان يوم عادي علي أبطالنا ما حصل فيهو شئ يذكر،،وفي يوم الأحد...
بيان كانت نايمة بعمق في غرفتها،،سهى جات تقومها جرت منها البطانية وقفلت المكيف وفتحت الشباك عشان الشمس تدخل للغرفة،،بيان إنزعجت من ضوء الشمس الشديد الكان علي وشها وفتحت عيونها وطبعا أخدت ساعة عشان تصحى وتستوعب الحواليها،،قالت وهي بتتثأب:في شنو يا سهى مصحياني بدري كدا لييه؟؟خير
_يا بت الساعة ماشة علي ١٠صباح شنو؟
بيان وهي بترجع تنوم:ظابط طيب كدي زحي خليني أنوم لمن الفطور يطلع تعالي صحيني
_تطلع روحك إن شاء الله كدي قومي وصحصحي معاي بطلي لتاخة ياخ،،قامت ليها وهي مطرمة وخاتة يدينها في خدها زي الشفع:أووفففف يااااخ طيرتي النوم اها أحكي يلا مالك؟؟
_شوفي يا ستي النت قاطع من يوم فض الأعتصام صح؟؟يعني ليهو تقريبا ٢٧يوم و٩٠٪ من الشعب السوداني ما قادر يستخدم النت ويشوف الحصل شنو وكانت الراوترات والأسلاك شغالة لفترة بس فصلوها وبقت حكر علي الشركات والمؤسسات الحكومية يعني حاليا القادرين يخشو النت كلهم كيزان أو جداد ونسبة الناشطين بسيطة شديد،،لاحظي أنو المليونية دي أتعملت بدون نت وبدون أعلام وصحافة،،الفكرة طرحها د.عبدالله جعفر والناس إتفاعلت معاهو وبدو ينظمو ليها ويمكن لحدي اللحظة دي في ناس ما عارفة موكب الليلة،،يلا أنا عندي فكرة عشان نضمن نجاح المليونية دي ويمكن في كتار زيي فكرو نفس فكرتي دي وطبقوها بس احنا حنعمل العلينا وحننشر أكتر ونعلن عنها ،،أنا عملت قصاصات ورق صغيرة فيها أعلان للمليونية،،زمنها،،مكانها وأهدافها وكل شئ يلا أحنا حنمشي نوزعها علي أكبر كمية من الناس نلقاها أوكي؟؟
_حلوووو طيب خليني أمش أتدوش وأسوك ونجي نتفاهم في التفاصيل تمام يا جميل؟
_طيب انا ماشة أطفح لي حاجة علي بين ما تطلعي وحأعمل ليك سندوتشات ظريفة كدا تأكليها عشان بعدين ما نتأخر،،بيان وهي بتخش حمام غرفتها:أوكييييه،،سهى نزلت تحت لقت وسن قاعدة في المطبخ وياداب بتشرب في الشاي صبحت عليها وقعدو يتونسو سوا،،سهي وهي بتفتح الثلاجة وبتشيل ليها جبنة وزيتون وتاكلهم:طبعا أنا وبيان طالعين موكب الليلة وهسي حنمشي نوزع أعلانات الموكب للناس في الشارع،،بالرغم من أنو المجلس قاطع النت بس قدرنا ننظم مليونية برانا وبإذن الله حننتصر ونجيبا مدنية
_موفقين إن شاء الله كان نفسي أمشي معاكم بس للأسف ما بقدر لكن حأستني منكم الصور والفيديوهات تمام
_ههههه كويس حأصور ليك وحتتغاظي ياخ جو المواكب دا زيو مافي بداوي العيان ههه لكن أمانة ما بعدين رجولك دي الا تختيها في موية حارة
_هههه صحي؟عارفة أنا ولا مرة ما طلعت لي موكب ولا شفت القيادة الا في التلفون كنت كلو يوم بتمنى أمشى هناك وأشوف القيادة ولو مرة بس مافي نصيب
_حبيبي لي خير إن شاء الله ما تزعلي أوكي؟؟هزت ليها رأسها بالإيجاب وقالت:بيان صحت؟
_أيوا وقاعدة تستحمي اخخخ صح زكرتيني أعمل ليها السندوتشات
_طيب انا حاخلط ليكم منقة باردة تشربوها وتمشو
_حبيبي شكرا ليك يااااخ
_العفو ما عملت حاجة والله،،غسلت كبايتها وختتها وأي وحدة بقت تسوي حاجتها،،بعد ساعة بيان كان جاهزة نزلت ولقت سهى مجهزة ليها الأكل ومعاها كباية منقة،،صفرت بإعجاب وقالت:أوووباااا عملتي لي عصير المنقة البحبو ثانكس يخخخ،،سهى قالت ليها:عملتو ليك وسن ما أنا وبعدين دي شنو حركات الأولاد دي صفارة يا بيان؟؟صفارة!!خليتي شنو للأولاد الصايعين والبنات الما كويسات
_ريلاكس يا بيب الموضوع ما خطير علي فكرة كلها صفارة يعني الدنيا ما خربت
_حتجلطيني أنت في يوم
_هه مصر؟؟أنت عبيطة آ بت؟؟ دا زمن يمشو فيهو مصر ويخلو الوطن براهو وبعدين كلامك دا يعني طرد لي صح؟؟لحقتو تزهجو مني بالسرعة دي هو انتو لاقيني وين؟؟في البداية أنا جيت عشان لي3سنة ما جيت السودان وشفتكم ومنها طلعت لي مهمة هنا فقررت أضرب عصفورين بحجر بعد ما رفعت تقرير ليهم عن العصابة وفشلهم هم طبعا إتكيفو مني وأنا طبعا إنتهزت الفرصة وطلبت إجازة ٣شهور والحمدلله بعد تحانيس أخدتها وأهووو يا بيبي أنا قاعدة ومتحكرة ليكم هنا زي الهم علي القلب
_أحسن حاجة عملتيها يلا خلصي عصيرك دا وخلينا نمشي،،بيان خلصت العصير وإنطلقو طوالي بعد ما بصعوبة قدرو يغشو علي أمهم ويوهموها أنهم ماشين السوق عشان يشترو حاجات،،وبما أن محمد راجل سهى جاي بعد أسبوع حنان صدقتهم وخلتهم يمشو وجدو عبدالرشيد طبعا ما عندو مانع،،سهى قالت لبيان:الصباح كلمت الود يغسل ليك عربيتك بتكون هسي جاهزة
_تمام أساسا كنت عايزة أغسلها أمبارح بس إتكسلت،،لمن وصلو وشافو العربية بيان إتفحصتها كويس وقالت:صوفيتي بقت عسسسسل ،،بعدها ركبو وبيان مسكت الدركسون وقالت:
وااااي يا سهي أنا خايفة ياخ يقومو يعتقلونا ولا يعملو فينا حاجة برررري أنا لسع ما عرست ولا شفت للدنيا دي شئ وااي يا أمي لاااااععععع أنا خايفة شديد والله
_أنا حأخليك وأمشي علي فكرة لو قعدتي تعملي كدا
_لا خلاص سكت والله
_شلتي الكمامات وفتايل الخل والخميرة معاك للإحتياط
_أيوا كل حاجة جاهزة
_تمام يلا عايني أصلا المواكب دي حتتحرك علي منازل الشهداء وأحنا طبعا في الخرطوم صح؟؟عشان كدا حنتحرك علي منزل الشهيد محجوب التاج وهو قريب من شارع عبيد ختف الناس حتتجمع هناك ومنها حنتحرك علي بيت الشهيد أوكي
_طيب يلا بسرعة نمشي نوزع الأوراق دي..عشقت العربية وقالت ليها بحماس:أربطي حزام الأمان لأنو يمكن تطيري من العربية،،سهى بلعت ريقها بتوتر لمن بيان فرملت وأنطلقت بسرعة البرق،،كانت بتتخطى العربات بسرعة وبتقطع الإشارة لدرجة سمعت كمية من النبز من سواقين العربات علي شاكلة غبية وما بتعرف تسوق..أصلو إنطلاقة النسوان بتسوي كدا...مستعجلة علي موتك ولاشنو؟؟ ،،سهى ختت يدها في قلبها وقالت ليها:خففي السرعة يا بيان كدا حتجيبي أجلنا في حادث قبل الموكب والله،،بيان أبتسمت وهي بتعاين بالمراية للشرطي الكان متابعهم بعربيتو وبضرب بوري بطريقة مزعجة،،زادت السرعة وهي بتقول:ما حتقدر تحصلني لو نططت،،سهي ياداب إنتبهت ليهو لطمت خدها وقالت:سجمي الشرطي دا ملاحقنا عايز يقبضنا بيان الله يخليك أقيفي ليهو وخلينا نعتذر ليهو ركوب رأسك كدا ما حيحلنا،،بيان كسرت ملف لمن اللساتك عملت صوت قبلت عليها وقالت ليها:لا ما حأقيف ما عندنا زمن ليهو يقوم يشبكنا مخالفات ويودينا القسم وموضوع طويل ما ليهو اخر أفضل أزوق منو كدا لمن يزهج،،سهى وهي بتقرب تبكي:خلاص ركزي في الطريق أبوس يدك حتروحينا يا شيخة انا زاتي البركبني معاك شنو كرعليااا عان بسبب شلاقتك دي جبتينا مول الواحة،،بيان ضغطت فرامل قوي وقالت ليها:صحي؟؟سهى خلاص فاض بيها نزلت من العربية وهي بتشيل في أنفاسها بالعافية،،عاينت للناس البعاينو ليهم بإستغراب وجرت عليهم وقالت بصوت عالي:البت دي مجنونة كانت حتكتلني بعدين قولو للشرطي أنا ما معاها ولا بعرفها زاتو وفوووو وقعت من طولها،،بيان جرت عليها وهي بتقول:سهى مالك،،في ولد ضحك وقال ليها:شكلها داخت من الصدمة قالت كنتي حتكتليها والشرطي ما يقبض عليها ولا حاجة كدا،،بيان قالت ليهو:دي أختي وأحنا كنا زايغين من شرطي عشان أنا زدت السرعة حبتين هههه،،الولد شالها ووداها في أقرب ضل وجاب ليهو موية ورشاها أبت تصحى،،بيان قالت ليهو بخوف:لييه أبت تصحى اختي مالها وبقت تهز فيها الولد قال ليها:أهدي هسي حتصحى ما جاتها حاجة كويسة والله،،في بت معاهو قالت ليهو:أحمد أنت مش شايل معاك عطرك داك شممو ليها يمكن تصحى،،قال ليها:أي والله دا يصحي الميت وبسرعة جابو وبخ منو حبة في يدو وشممها ليك،،بيان بقت تضربها في خدها بخفة وتنده بإسمها سهى صحصحت ولقت كمية من الناس واقفين فوقها،،بيان ضحكت وقالت ليها:يا خوافة ما كنت قايلاك جبانة للدرجة دي قاعدة تمشي المواكب كيف أنتي؟
سهى قامت علي حيلها وشاكلتها ليها كويس:أنتي لو عايزة تموتي موتي براك يختتي انا عندي بيت وراجل وطلبة أقريهم ،،الولد الأسمو أحمد قال ليها:اليشوفك هسي ما بشوفك وكت غمرانة ههه لكن النصيحة يا أختها تفحيطتك الفحطتيها ديك ولا فين ديزل ما يقدر يسويها عجبتيني والله،،سهى إتجاهلتو وعاينت لبيان وقالت:الشرطي وينو؟؟مستنيني لمن أصحى ولا عفى عننا خلاص،،بيان قالت ليها:الشرطي هسي بكون نايم في بيتو ومشخرر في سابع نومة يا بت طلع أنو هو ما كان ساكينا كل الحكاية انو كنا في شارع بيتو وقرر يلعب معانا شوية لكن خوفنا خوف ود اللذينااا ههههه،،الولد تاني ضحك وقال لبيان:قلتي لي عمك الشرطي ركب فيكم شريحة وقرأأأها بعدها صيعكم ومشى هههههاااي،،بيان قالت ليهو:أي والله الله يجازيهو المرض،،سهى عاينت للولد بطرف عينها وقالت لبيان:دا منو الظريف دا كمان؟؟بيان قالت ليها:أخخخ نسيت أعرفكم علي بعض دا أحمد يا سهى ودي أختي سهى يا أحمد وأنا طبعا بيان،،أحمد مد يدو وقال ليها:إتشرفنا يا خالتو سهى الخوافة،،سهى سلمت عليهو بطرف يدها بس،،بيان قالت ليهو:أوعى تقول ليها خالتو بتدقك ما كرهتا إلا كلمة خالتو دي
_وي وي دقست معناتو أسفين يا سهى ساي كدا ههه
_هههههه المهم يا سهى أحمد دا ود طيب وظريف شديد هو القومك من الدوخة وساعدني كتير،،سهى قالت ليهو:وربي مافي حاجة صحتني إلا ريحة العطر البشعة الشميتها،،البت المع أحمد ضحكت وقالت ليهو:مش قلت ليك يا احمد غير عطرك دا لأنو شاذ وريحتو ترمى الطير أنت ما عايز تسمعنى،،أحمد حكى رأسو وقال بإستهبال:في النهاية لو ما ريحة عطري البشعة دي خالتو أقصد سهى ما كانت صحت بالمناسبة يا بيان وسهى أنا زاتي نسيت أعرفكم بأختي الصغيرة إسراء،،إسراء سلمت عليهم ببشاشة وقالت:هااي كيفكم يا بنات إتشرفنا،،البت كانت ظريفة وإتونست معاهم زي كانها بتعرفهم من زمن وهم حبوها شديد وهي بالمناسبة عمرها 20سنة وأحمد عمرو 23سنة،،سهى عاينت لساعتها وقالت لبيان:يلا نوزع الورق لأنو الزمن قرب خلاص،،بيان قالت ليها:أوكي يلا ،،مشت علي العربية وشالت ليها ورقتين كدا ولحقت أحمد وإسراء وأدتهم ليهم،،أحمد قرأها وقال ليها:أنتو بتعلنو لمليونية الليلة؟؟فكرة حلوة والله،،بيان قالت ليهو: بما أنو النت قاطع وأغلب الناس بتكون ما عارفة قلنا نعمل اعلان عشان أكبر كمية من الناس تجي وبي لخمت الشرطي سبحان الله لقينا نفسنا هنا،،إسراء قالت ليها:المكان دا أفضل موقع تعلنو فيهو والله زيين ما عملتو،،أحمد عاين لأختو وقال:طيب أحنا ممكن نساعدكم في توزيع الأوراق إذا ممكن،،بيان قالت ليهو:أكيد ممكن وشكرا ليكم والله ساعدتوني كتير ياخ،،إسراء قالت ليها:ولو العفو يا بيبي أصلا أحنا فاضين وكنا حنمشي البيت وحنقعد ساي علي حس انو النت قاطع وكدا مافي موضوع لكن انت هسي جبتي لينا موضوع حلو هههه،،قسمو الورق بيناتهم وأي واحد مشى علي جهة وبدو يوزعو للناس ولمن أي واحد يشيل ليهو ورقة كانو بقولو ليهو كلم معاك أكبر عدد من معارفك عشان يجو لمليونية الليلة،،وأحمد طبع ليهو ورقة كان كاتب فيها(مواكبنا الليلة الساعة 1ظهر حتتحرك علي منازل الشهداء أبقوو كتااار)،،في ناس كتيرة وقفت وإتصورت معاهو،،وإسراء بيان إتصورو مرة معاهو مرة براهم مرة معاهم سهى وبيان ماسكة الورقة في نصهم ومرة صورة جماعية المهم بعد ساعة كانو وزعو كل الورق العندهم،،بيان قالت لسهى:طيب ونعمل شنو في عربيتي دي لو مشينا بيها مشكلة وأحنا كذبنا علي أمي وقلنا ليها ماشين السوق وأحنا ماشين الموكب حنرجع البيت ويدينا فاضية،،إسراء قالت ليها:أنا عندي فكرة نودي العربية الباركينغ  تحت بتاع المول وتمشو الموكب وترجعو هنا وتشترو ليكم كم حاجة من هنا عشان تصدق انو انتو مشيتو السوق وتجو تسوقو العربية وترجعو البيت كأنو ما حصل حاجة تكونو كدا ضربتو عصفورين بحجر منها مشيتو الموكب وضمنتو سلامة العربية ومنها إشتريتو ليكم هدوم وما كذبتو علي أمكم،،بيان قالت ليها: فكرة سمحة والله شكرا ليك يا إسراء ياخ،،إسراء قالت ليها: العفو يا بيبي وإتشرفت بمعرفتكم شديد،،شالو أرقام بعض وإسراء وأحمد ودعوهم ومشو وبيان وسهى بركنو العربية ولقو ليهم عربية فيها لوحة تاكسي طوالي ركبوها ومشو،،في الطريق بيان كانت بتحكى لي سهى عن منظرها وهي دايخة ضحكت وهي بتحاكي فيها:لو الشرطي جاء قولو ليها أنا ما معاها ههههههه والله موتيني ضحك وكلو شوية أحمد يقول لي بوظتي أعصاب البت الله يجازيك،،سهى لوت خشمها وقالت ليها:بسسسس أصلو ما ردتو الولد دا قايل روحو ظريف لكن هو موهوم ساي
_يخسي عليك والله ظريف وطيب ما تظلميهو
_برررري ما حبيتو لكن اختو عسل بس أصلها ما بتشبهو
_أي أي إسراء دي سكر ماشاء الله عليها
بعد شوية لقو الطريق مقفول ومافي مجال للدخول،،سيد العربية قال ليهم:ما بقدر أمشى أكتر من كدا والله الشوارع إتملت ناس جهاز ودعم سريع والكباري إتقفلت تاني الجوا جوا والبرا برا،،سهى قالت لبيان:أرح أنزلي نمشي كداري أصلا قربنا والتجمع حيكون في محطة البلابل،،نزلو بعد ما حاسبو بتاع الترحال ومشو لحدي ما وصلو البلابل حبة كدا لقو كمية مهولة من الناس متجمعين وخلاص كانو متحركين،،لبسو كماماتهم وبقو يهتفو مع الناس(شهدائنا ما ماتو عايشين مع الثوار المات ضمير خاين حالفين نجيب التار) و(الدم قصاد الدم ما بنقبل الدية)،،كان في كنداكة لابسة أبيض وبتقول بصوت عالي:يا جماعة يمكن معظمكم ما بتعرفو حاجة عن الشهيد محجوب ولا شوفتوهو إلا في فيديوهاتو وصورو في الفيس أنا حأحكي ليكم عنو شوية طيب أولا أسمو محجوب التاج محجوب أبراهيم ساكن الصحافة شرق أمو إسمها وداد عثمان عندو أخ واحد وأخت واحدة وهو طالب طب سنة تانية في جامعة الرازي عمرو20سنة إستشهد يوم 24 يناير بسبب صعقة كهربائية أدت لنزيف داخلي،،البت صوتها إتبح وهي بتقول:محجوب الود الكان ضحكتو ما بتفارقو هسي مدفون في مقابر الصحافة،،كان بدافع بكل شجاعة عن صحباتو قدام الجامعة والكجر دقوهو بوحشية وضربوهو بالسلاح علي رأسو لمن وقع وهو ما بتحرك لا وكمان ما أكتفو بكدا صعقوهو كهرباء وهو ميت متخيلين معاي؟؟حرقو حشا أمو وكسرو ضهر أخوانو ووجعو قلبو أبوهو الكان برا البلد وجاء لقى ولدو جنازة،،أنا كنت وحدة من الناس الشفتو وهو بموت ما قادرة أنسى شكل الراجل وهو بقول للمعاهو:أضربوهو كهرباء شوفوهو حي ولا ميت،،البت ما قدرت تواصل وقعدت تبكي بطريقة خلت مجموعة من الناس تبكي معاها،،لمن وصلو شارع محمد نجيب وقربو يصلو بيت محجوب الكجر حاصرهم من كل مكان وفي وحدين نزلو بي بسطوناتهم وبدو يدقو في البنات والناس الكبار بس الشباب والأطفال فلعوهم بالحجار وإتصدو ليهم ورجعو مهزومين،،وقبل ما يتحركو مسافة خمسة أمتار في بكاسي كتيرة جات مفحطة من جوة الحلة و
فكو فيهم بمبان كثيف بيان بقت تقحقح وعيونها ديل ما قادرة تفتحهم مسكت سهى قوي وقالت ليها:واااي يا سهى شطة بس ما قادرة أشوف حاجة،،سهى لمحت ليها فرع نيمة واقع في الواطة رفعتو وقالت لبيان:هاك أمسكي شمى دا حيخفف ليك حبة،،بيان شمتو وقالت ليها:يعععع ريحتو عفنة ياخ دغ شنو،،سهى قالت ليها:دا نيم ما وكت عبطك هسي دا لو ما عاجبك أرميهو وشمي ريحة البمبان الزكية،،البمبان لمن بدى يخف في رجال لابسين مدني نزلو من البوكس وبدو يضربو في الناس ويعتقلوهم من طرف،،في جزء بدى يجري خوف من الضرب والإعتقال لكن في مرة وقفت في النص وقالت ليهم بدون ما تخاف:ما تجرو منهم البطالي ديل أقيفو ليهم أحنا عاملين موكب سلمي ومتجهين علي منزل شهيد يفكونا بالبمبان ويعتقلونا حسبي الله ونعم الوكيل فيكم يا كلاب،،في واحد قال ليها:أسكتي وأمشي من هنا يا خالة ما عايزين نغلط معاك أنت قدر أمي،،المرت تفت في الواطة وعاينت ليهو بحقد وقالت:يخلخل ضروسك يا عواليق أمك والدة مع النسوان هي؟؟كان اخير ليها لو أجهضت ونزلتك دم بدل ما تجيبك أنت يا باطل يا نجس هسي انت راجل مع الرجال فلاحتك تكتل في أولاد الناس أنا واقفة هنا وما متحركة من مكاني ولدي الوحيد وكتلتوهو تاني ما خايفة من زول انا نفس الرصاصة الحرمتني من ولدي هسي أنا عايزاها توديني ليهو أقتلوني ما دا البتعرفو ليهو يا جنجويد يا كلاب،،الراجل جنونو قام ومسك عصايتو وكان جاي عليها بس في واحد معاهو مسكو وقال ليهو:ياخ دي مرة مجنونة ومخرفة ساي ما تشتغل بيها ركز في شغلك وأعتقل لي الشباب العاملين فيها أسود ديل،،بيان شافت المرة واقفة براها قدام الرجال ما قدرت تخليها كدا إتشجعت وجرت عليها وقالت ليها:يا أمي أنت مجنونة ذالناس دي حتكتلك طوالي وكدا حتكوني أستفدتي شنو قدرتي ترجعي حق ولدك؟؟طيب وأولاد الناس الماتو يوم فض الأعتصام الغرقوهم في النيل وربطوهم واللحدي هسي مفقودين وما باين ليهم خبر؟؟أحنا طالعين عشانهم وحنجيب حقهم يلا تعالي معاي عليك الله يا أمي،،المرة سمعت كلامها ومشت معاها،،سهي جاتها وقالت ليها:بيان خوفتيني عليك ياخي وين كنتي الكجر ديل جاين ورا كتار وقبضو كمية من الناس غايتو الله يستر بس،،في جماعة كانو جاين من ورا لقو ناس بيان واقفين قالو ليهم:واقفين تسو شنو أجرو يلا الجماعة ديل جاين ورا جيش،،مشو قدام لقو الشارع فاضي بس في أصوات طلق نار في السماء،،بيان خافت وقالت لسهى:سجمى في رصاص عديل واااي حيكتلونا الليلة ،،في أولاد كانو قدام براقبو في الأوضاع نادوهم ودخلوهم بيت كدا كانو زي 5بنات بالإضافة للمرة ديك دخلو جوة وقفلو الباب وفجأة أصوات الرصاص إختفت وسمعو هتافات بي برا بتقول شهدائنا ما ماتو عايشين مع الثوار،،
في جماعة كانو عايزين يطلعو بس في ولدين قالو ليهم:ديل ما ناسنا الحركات دي عملوها لينا زمان حتي بعد سقوط رقاصهم داك برضو ما بطلو حركاتهم المكشوفة قايلين نفسهم حيغشونا كم مرة،،في بت قالت ليهم:سمعت انو في ولد إضرب بالرصاص في رجلو و الشباب ودوهو اقرب مركز عشان يسعفوهو وهسى كنا سامعين صوت رصاص إن شاء الله يكونو بخير بس والله بقينا ما قادرين نتحمل خسارة واحد مننا تاني حرفيا أكتفينا وجع من الكيزان ومن العسكر ومن بقايا النظام السابق المازالت قاعدة ومتحكرة في مكانها،،في ولد بقى بتاوق بالحيطة همس وقال ليهم: الكجر محاوطين المنطقة كلها والدعامة متوزعين في الشارع البودي لمنزل الشهيد محجوب لو طلعنا من هنا حيقبضونا أكيد ماف طريقة للطلوع مستحيل،،بيان بقت تبكي وتقول لسهى:حيعتقلونا وحيعذبونا واااي يا سهى لاااا أنا عايزة أرجع البيت،،سهى قالت ليها:هسس ولا كلمة أنتي براك اصريتي انك تمشي معاي الموكب دا أشربي يلا،،في ولد ضحك وقال:الكنداكة دي ظاهر عليها أول مرة تطلع موكب كنتي وين يا بتنا الشهور الفاتت جاية تتطالبي بحق أخوانا هسي ولا قايلاها لعبة غميضة دا مووت عارفة يعني شنو موت لو ما قدرو ما كان تجي من البداية وتجي تباكي لينا هنا،،بيان قالت ليهو:كون أنا أول مرة أحضر موكب أفتكر دي ما حاجة بتضحك للدرجة دي وأنا أكد ليك أنو أنت أول يوم طلعتو كنت خايف وبترجف فما تعمل فيها راجل،،
في ولد قال ليهم:خلاص يا جماعة أهدو وألعنو الكوز دخل بيناتكم ما تنسو قضيتنا واحدة أياااا كان،،
فجأة كدا الباب بقى يدق شديد جماعتنا بقو يطاقشو وكلهم بربطة المعلم جرو إتدسو جوه المرة ست البيت مشت فتحت الباب لقتو راجلها خش سرعة وقال ليها:خشى يا مرة وأقفلي الباب دت برا في جوطة شديدة بمبان وضرب وإعتقالات غايتو البلد دي الله يكفينا شرها بس يلا ندخل جوه،،المرة سبقتو ودخلت وقالت بصوت عالى:أطلعو يا أولادي دا راجلي الكان في الباب،،راجلها عاين ليها بخلعة وقال ليها:أولاد شنو يا مرة أنتي البمبان دا شميتوهو كتير وضرب ليك مخك من متين احنا عندنا أولاد في البيت فجأة سكت وعيونو ما تشوف إلا النور دستة شباب واقفين قدامو رجع لورا ونطر عيونو وقال:
أنتو الدخلكم منو هنا أطلعو من بيتي سرعة يلا
في ولد قال ليهو:أسفين يا عمنا والله بس احنا إتدسينا هنا من الكجر ومرتك الله يديها العافية هي الدخلتنا هنا،،الراجل عاين لمرتو بغضب وقال ليها:صحي الكلام دا يا فوزية انتي الدخلتي كوتة الشباب ديل بيتنا؟؟
_أي يا الطيب قلت النلمهم في البيت احسن ما يقبضوهم ولايسو فيهم حاجة
_وأحنا مالنا ومالهم يموتو ولا يولعو بجاز أصلهم صايعين وشماسة ساي،،في ولد قال ليهو:الصايعين ديل نفسهم هم القدرو يسقطو رئيسين في يومين لو نسيت أذكرك،،
الراجل بقا يضحك:قلتو لي فرحانين سقطتو رئيسين مش هههههاااي والله أنتو شباب مساكين عورة وأغبياء كيف دي حركات من الكيزان ساي عشان يسرقو منكم ثورتكم زي الحصل في مصر تماما يا جاهلين قال سقطنا قال
في بت قالت ليهو:بس نحن ما حنسمح لدا يحصل أبدا وحنجيب حق أخوانا الماتو ولساها الثورة مستمرة وحنتمسك بسلميتنا حتي النصر
الولد إبتسم وعاين لجماعتو وقال:الراجل دا كوز مندس شكلو أرح نفضى ليهو البيت قبل ما يجيب لينا الجماعة ديل هنا دا،،في أولاد قالو ليهو:طيب وحنطلع كيف والأوضاع برا جايطة كدا
الولد أبتسم وقال للمرة ست البيت:أحنا في مربع كم يا خالة هسي؟قالت ليهو:في مربع ٣٢يا ولدي
—حلووو طيب أحنا حننطط في البيوت لحدي ما نصل بيت الشهيد محجوب
_أنت مجنون كيف حنقدر نعمل كدا بدون ما نعمل شوشرة والدعامة يشوفونا
_حبة حبة وحنتحرك بإنتظام وحذر لحدي ما نقدر نصل
وفعلا بدو ينططو البنات واحدة ورا التانية والأولاد ماشاء الله ما قصرو تب وبعد ساعة بالضبط قدرو يصلو بيت الشهيد محجوب التاج وكان في كمية مهولة من الناس هناك وفي وحدين كانو ماسكين مصاحف وبقرو قرأن وجماعة بتهتف وفي وسطهم كانت أم الشهيد محجوب بيان لمن شافت الموقف دا  حست بأنها خاينة للوطن وما عملت عشانو شئ أي زول في الثورة دي شارك بالبقدر عليهو وفي أمهات فقدو أولادهم في سبيل الوطن،،في اللحظة ديك إستصغرت نفسها شديد وحست بأنها ما بتسوي شئ أيوا نعم هي صحفية بس ما أفادت الوطن في حاجة لثلاثين سنة كنا بنعاني من أعلام كلابي وميت شديد ما بتناول أحوال البلد ولا حتي أثارو ومناطقو السياحية والمناظر الخلابة أعلامنا كان بعكس مدى ضعفنا وعقم تفكيرنا يمكن للحظة دي في ناس ما عارفة بأنو في بلد إسمها السودان بالرغم من أننا بنستاهل أنو سيرتنا تكون علي أي لسان عربي كان أو أعجمي بس الأعلام ما فاضى للحاجات دي ودي أكبر مشكلة،،قررت بأنها حتكتب عن الثورة وتخلي العالم يكتشفنا ويعرف أكتر عن بلدنا وما حتفوت موكب وحتصور لقطات حلوة ومحزنة وتاريخية للزمن،،هي يمكن لسع ما أتاخرت أيوا هو البشير سقط والإعتصام إتفض بس لسع الثورة جواتنا وما حنوقف إلا نجيبها مدنية ونرجع حق أخوانا الشهداء يا حكومة مدنية يا ثورة أبدية(مدنياااااوووو)،،زي الساعة4عصر الشوارع فضت من الدعامة وناس الجهاز والكباري إتفتحت والناس بقت ماشة في الشوارع عادي،،
بيان رجعت البيت وكرعينها مورمات من النطيط والمشي وعلي العليهو البميان لسع باقي في عينها أول ما وصلو البيت ورو أمهم الهدوم الأشتروها عشان تصدقهم بس حنان لاحظت أنو بنطلون بيان مغبر ومشروط شرطة كبيرة قالت ليها:دا شنو دا لييه بنطلونك وسخانك ومغبر كدا يا بيان
_أمي ياخ مافي شئ حاجة بسيطة وقعت في السوق وبنطلوني إتشرط بس،سهى قالت ليها:اي يا أمي والله بيان وقعت وبنطلونها إتشرط
_أنا تعبانة ماشي إتدوش وأغير هدومي يلا يا سهى،،سهى عاينت لأمها الكانت بتحدر ليهم وما مصدقة كلامهم وجرت ورا بيان،،أول ما وصلو غرفتهم إتنفسو الصعداء،،بيان قعدت في السرير وهي بتشيل في أنفاسها قالت لسهى:الحمدلله قدرنا ننفد من أمي وإلا الليلة كان عرفتنا وكلمت لينا ابوي وحسان
_ماشاء الله عليها ملاحظتها قوية بسرعة لاحظت الشرطة في البنطلون ما أسحرها والله تبارك الله
_هههههههه لكن الموكب كان خرافي يا بت أحيييي ندمت أني
أيام القيادة واااي يا سهى قلبي وجعني لكن النصيحة رمضان هنا عندكم سمح والسنة دي كان احلي في القيادة
_يا بت ها أنتي ما شفتي مواكب زمان ياخ كنا بنعمل عمايل مرة كدا أنا كنت طالعة من بيت لاقوني ليك إتنين من شفع الدعم السريع ما عارفاهم سكرانين ومدروخين كدا في واحد قال للتاني:شوف الكنداكة دي ضايعة من الموكب بتاعها تعال نساعدها ونوديها ليهم التاني قال ليهو:اي كويس يلا نوديها وأنا سامعاهم قلت ليهم أبيت ما ماشة معاكم يا بهايم حميدتي وفكيت الجرية ولا صعاليك الجاهلية زاتهم زمن ياخ
_واااي كنتو بتعانو مع الكجر ولا شنو ديل ما عارف قبيل وسط البمبان والدخان داك في ود لزينا شمطني ليك خرطوش طططقق في نص رأسي أنا لمن قربت أدوخ لكن عاد كان كوركت كدا ياهو الياداب السكاني سكت وبلعتها في حناني شكيتو لي الله الكلب وهو لمن لقاني ساكتة قال لي:ما تتكلمي يا بت الحرام أظن غاظتو سكتتي دي
_هههههه واااي يا بيان كويس أنك ما جيتي أيام القيادة كنتي حتترعبي أنت هسي زمنك زمن خير يعني مافي بلاوة كتيرة زي زمان
_بررررري أحسن لي كان أجي والله
_أنا عايزة أفتح التلفزيون وأشوف كضباشي دا الليلة قال شنو اكيد حيشبكنا ويقول مليونية الليلة كان حاميها المجلس والدعامة وما سمحو للمتفلتين والمخربين يعملو شئ وماف زول أتقتل أو إتصاب او إتخدش حتى وأحنا ما فضينا الأعتصام ولا قتلنا زول ديل المتفلتين عملو كدا وحدس ما حدس غياااااظ ياخي الراجل دا
_ههههههه عسسسل أنا ماشة أستحمى بعدين وريني حيقول شنو كضباشي دا كويس؟
_ههههههه كويس
ـــــــــــــــــــــــــــــــــــــــــــــــــ
#في ثانوية النخيل قبل ساعتين...
إيثار وكورولو كانو قاعدين سوا وبتناقشو كأي بت وولد أوتاكو (مراهقييين)
_أمبارح حضرت yaksuko neverland رهيييب ياااخ كسرني كسيير ولا العجب نورمان اللهم الثبات بس أنا الليل كلو قعدت أبكي علي موتو
_يااااه الأنمي دا زابط والله قالو الجزء التاني حيجيبو في2020 حأنتظرو بفارغ الصبر
_أنا ما حأحضرو ما قادرة أتخيل الأنمي بدون نورمان والله لااااع ما بقدر وربي بموووت من القهر
_بطلي أوفر أنا حاسي أنو ما مات وحيظهر في الجزء التاني وحيبقي ماما بس طيبة وحتنقذ باقي أطفال المصانع ههه،،إيثار لبعتو في ضهرو وقالت:ماما في عينك يا كلب أي شئ ولا نورمان دا
_أحيييه أبقى نورمان أنا ولا راي
_بطل ثقالة
_طيب طيب بتعرفي أنميfairy tail
إيثار أبتسمت ودنقرت رأسها بخجل:حضرت ال٣ أجزاء كمان لكن زعلت علي زيريف الظريف ياخ أتخيل يوم الحفل بتاعت تكريم لوسي أتولد من جديد وبقا كاتب روايات زي لوسي لا وكمان قال أنا عايز أبقى زي لوسي سينسي(يعني معلم/تي) غايتو موتوني بالغيظ راحت أم هيبتو والله
_ههههههاااايييي غايتو حنك هزيمتهم لأكنولوغيا دا ما راكب لي رأسي لكن نقول شنو شداقة شداقة قوة الشداقة(ماحيفهمومها الإ الناس الحضرت الأنمي دا)
_فعلا الأنمي كلو كدا ههههههه لكن عارف أكتر حاجة قاعدة تضحكني أنو ناس البيت قايلني بطلت أحضر أنمي خلاص وأنا لسع بحضر وكلو يوم كمان
_كييييف لكن مستر ياسر شال منكم التلفونات وأمك أخدت اللاب توب بتاعك يبقى بتحضري أنمي وين في قناة beur؟؟
_الأكستيرنال حقي قاعد ومليان أنميشن لحلقو ولمن أكون عايزة أحضر بركب السطوح وبسرق لاب توب اختي بليل وبقعد أحضر للصباح
_وعشان كدا انا أقول الهالات السوداء التحت عيونك دي من شنو افتكرت انو انتي تبتي خلاص وبتساهري في القراية بس عمرك ما حتتغيري وأحب أقول ليك بطريقتك دي مبروك عليك حتعيدي السنة معاي ههه
_واثق أنك حتعيد يعني
_الثقة أهم شئ يا زولة
_حسن
_عيونو؟
_عارف أنا أشتقت لأصحابي شديد من ساعة ما عمار خلانا بسبب رفض لتين ليهو،،كلنا كنا عارفين انو بحبها بس الوحيدة الما كانت قادرة تشوف الحب دا هي لتين عارف أنا هسي كارهاها عمى لأنها السبب في ضياعنا وتفككنا،،أكتر زول واجع قلبي هو يوسف أضطر يختار بين رفيق دربو وصحبتو البريدها شديد ما كانو هاينين عليهو أبدا أما يختار عمار ويخسر لتين أو يختار لتين ويخسر عمار،،ما كان عندو رفاهية أختيارهم الإتنين فعشان كدا قرر يخسرهم الأتنين وبقا ضايع وساكت أغلب الوقت وبراءة أنا لحدي هسي ما قادرة أفهم موقفها شنو هي مع منو وضد منو لأول مرة أحتار في براءة كدا حتى رئبال وسديم النزلو الليلة المدرسة كانو مستغربين من الحصل فجأة وشتتنا كدا كلو ما يسألو واحد فينا ما بيلقو عندو جواب مقنع مساكين كانو متوقعين أنو لمن يرجعو لينا هنا أحنا حنكون معاهم وحنسندهم ونخفف عنهم بس هسي هم بقو يخففو عنا بدون ما يفهمو حاجة،،أنا حذرت رئبال انو ما يمشي للتين أو عمار يسألهم من حاجة لأنو ما حيحصل خير بس هو عنيد وأكيد حيمشي عشان يسمع منهم وفؤاد الوحيد العاقل فينا أختار يكون معاهم الأتنين ويرجعهم لبعض أصحاب تاني بس تاني الرجوع صعب هو حتى كان رجعو ما حيكونو زي زمان،،حتتبني حواجز بيناتهم وعلاقتهم حتستمر كأسم بس،،ما عارفة لي حصل دا كلو بسرعة ولخبط أي شئ حاليا أنا بقيت وحيدة وضعيفة شديد،،كورولو عينو لمعت وقال ليها:بس أنا قاعد نسيتيني؟؟أنتي ما براك يا إيثار أنا معاك وحأكون دائما معاك لأنك نص التاني الكان ضايع مني ولقيتو إيثار أنا عارف أنو حأفاجئك ويمكن حيحصل لعلاقتنا نفس الحصل لعمار ولتين بس أنا حأقول الجواي وأخلص إيثار أنا..أنا بحبك
_هااا ما سمعتك قلت شنو؟؟
_طيب أنا مستعد اقولها ليك بكل لغات العالم عاين ليها في عيونها وقال ليها:بحبكككك،،ilove you،،دايسكي،،
_ما عارفة اقوليك شنو والله حيرتني
_ما تقولي حاجة ولا أنا عايز أسمع منك حاجة بس كل الكنت عايزو أنو أسمعك كلمة بحبك دي بس،،إيثار ضحكت من جوه قلبها وقالت ليهو:مجنون أنت يلا
_مجنون بيك أنا ياااخ
ضحكو بصوت عالي بعدها واصلو ونستهم عادي وكلو واحد كان مبسوط من جواهو أنو الله أداهو زول بشبه روحو
ــــــــــــــــــــــــــــــــــــــــــــــــــــ
سامر خبط الباب براحة جاهو صوت أختو من جوا:إتفضل،،دخل ليها ولقاها راقدة في السرير ووشها ظاهر عليهو الإرهاق قعد جنبها في السرير وقال ليها بحنان الأخ الكبير:سلامتك حبيبي مالك الحاصل عليك شنو؟؟
سهام أشرت علي بطنها وقالت:عندي جرثومة في المعدة ما عارفة أكلت شنو
_سلامتك ما تشوفي شر إن شاء الله
_أي حاجة بأكلها برجعها طوالي والدكتور كتب لي أدوية بلعتها وما سوت لي أي حاجة
_دي جرثومة ما حتتعالجي منها في يوم بسرعة كدا لكن أنا عندي ليك علاج فعال جدا وحيقتل أبو الجرثومة في دقائق بس ههههههه
_قول أقسم العلاج شنو؟
_أمممممم تدفعي كم؟؟ رقرقت ليهو عيونها وقالت بدلع:يرضيك يا سمورتي أختك الشعنونة الحلوة تبهدلها جرثومة زي دي
_طيب خلاص حنيت عليك علاجك يا ستي عشبي وطبيعي مية في المية واليهو فخامة السيد الرئيس (الكول)
_يعععععع أنت جادي كول ما بريدو ياخ أنا حاربت صحبتي بسبب أنها بتأكلو تجي تقول لي أكليهو عشان إتعالج  الكريات الحمراء والبيضااء قصرت مني في شنو لمن أمشي أكل كول عشان أبيد بيهو الجرثومة المسكينة دي
_هههههه أنا زاتي كنت ما بريدو لمن كان مشينا مأمورية في الغرب جابو لينا الكول وأنا طبعا رفضت بس هم وروني فوايدو وإتشجعت وأكلتو بالرغم من أنو ريحتو بتوقع الطير بس هو مفيد شديد وبعالج كم مرض زي الجرثومة البغيضة العندك وسمعت برضو أنو بمنع السحر والعمل والله أعلم
_طيب وروك هو شنو وبعملوهو كيف؟؟
_أفوووو يا بت نسيتي الكان بجهجه الأساتذة في المدرسة زمان هي انت الزمن داك ما مولودة ههههه المهم سألتهم عن كل صغيرة وكبيرة فيهو
أولا هو ممكن يستعمل كبهار يعني زي الشطة كدا وتاني بتعمل ملاح من شجرة أسمها أم الكول بتطلع أزهار صفراء بعدين بدفنوها في الأرض لمن تتعفن وبعدين بطلعوها وبجو بطحنوها ولازم يختوها في مكان بعيد عن الذباب لأنو واحد من الحاجات البتفسد الكول هو الذباب،،أكلاتنا السودانية البلدية دي حلوة حلا خاصة ملاحات الغرب تأكل ما تدي الجنبك والله أنا في شغلي دا جربت أكلات أنتي يمكن ماسمعتيها بيها أو شفتيها في حياتك أفضل ما أوريك ليها عشان ما تقرفي مني ههههه
_ههههه معلومة جديدة والله يا سمورتي شغلك كلو أدفنشرز وتجارب بختك ساي آ زول
_أها أمشي أجيبو ليك من السوق؟؟
_لا لا أنا كويسة جرثومة شنو كمان البترقدني السرير،،حاولت تقوم بس رأسها لفه وبطنها وجعتها شديد بلعت ريقها وقالت ليهو:طيب جيبو بس مافي زول يعرف انو أكلت البتاع دا عشان إتعالج أوكي؟؟
_هههههه كويس ومشى وهو بقح من كترت الضحك

يتبع.......