مراهقون و لكن

٥

"لا أدري حقا لماذا هنالك أشخاص وضيعون في هذه الحياة كلما وثقت بهم خانوك وبقدر حبك لهم كرهوك هؤلاء لا يمكن وصفهم سوى انهم مجموعة اشخاص مريضين!! "
ـــــــــــــــــــــــــــــــــــــــــــــ
عمار طلع وهو متجاهل مناداة براءة ليهو
_يوسف قوم الحق المجنون دا قبل ما يعمل حاجة   يوسف ودعهم ولحق عمار في الشارع وقف قدامو قبل ما يقول
:عمار استنى ما بتتحلى كدا كدي اهدي وروق عليك الله
_ما بهدى يا زول ماااا بهدى كان عايز تمشى معاي ارح غير كدا مع السلامة ودفرو بقوة لمن وقع وواصل طريقو يوسف جاء عليهو بسرعة واداهو بنية قوية في وشو عمار اترنح من قوة الضربة بس ما وقع مسقو من لياقة قميصو قبل ما يلزو علي الحيطة ويقول ليهو:
كلنا زعلانين زيك علي لتين بس هي هسي محتاجانا جمبها  اكتر من اي وقت عشان تقدر تواصل وتنسي الحصل فكرك لو مشيت ضربتو يعني لتين الكسر الجواها حيتصلح؟؟اكيد لااا لتين قوية وانا متأكد انها حتعدي العقبة دي بس انت خليك واثق فيها 
عمار لزاهو بقوة وصرخ:ما قادر انسى شكلها وهي كانت بتبكي بسببو الباطل دا بكي حبيبتي لتين ما حارحمو وربي اوريهو نجوم الضهر
يوسف بإستخفاف:حبيبتك بأي اساس خليتها حبيبتك؟؟ااا جاوبني
عمار صوتو بقي زي الكانو عايز يبكي: ايوا هي حبيبتي وروحي ..انا بحب لتين اكتر من نفسى حتي كلو يوم بتعلق بيها اكتر بستمتع لمن اكاويها واشوفها زعلانة مني وأبى اصالحها وفي الاخير ترجع لي براها كنت مفتكر في البداية انو دا مجرد اعجاب او انجزاب بس اتأكدت من شعوري خلاص انا متيم بيها وبحبها لدرجة الهيام
_طيب وانت مستعد تكمل باقي حياتك معاها؟؟ولا دا حب مراهقة ساي
عمار بلهفة:ايوا مستعد لتين دي الانسانة الوحيدة النفسي اعيش معاها حياتي بحلوها ومرها
اتفاجاء بيوسف وهو بمد ليهو يدو ويقول:اوعدني انك تبقى قدر كلامك دا وما تتخلى عن لتين ابدا لانو صدقني لو نزلت منها دمعة ساي ما حأرحمك فاهم يوسف طول ما عايش لتين ما حيجيها شئ ان شاء الله
عمار بثقة وهو بخت يدو في يد يوسف:اوعدك وعد رجال والراجل اذا وعد ما بخلف بوعدو ابدا
المشهد دا كلو كان متابعو ليث هز راسو باستنكار وخشى جوا حسى بانو مكانو اتسرق مفروض يكون هو مكان يوسف  مفروض هو يكون اكتر زول خايف عليها وقلقان شعر بانو مقصر  وعاجز معقولة يكون صاحبها مهتم بيها وخايف عليها اكتر منو بس هي اختو
هو اختو المجروحة والمكسورة وهو ما قادر يعمل ليها حاجة نزلت دمعة ساخنة منو بس مسحها بسرعة ومشى غرفة لتين لقاها مع ايثار وبراءة البحاولو يضحكوها ويخففو عنها حسى بطعنة في قلبو بس اتجاهلها وجاء علي لتين مسك يدها وعاين ليها في عيونها
_انا عرفت كل حاجة بس حابي اسمعها منك
لتين اترددت وبلعت ريقها بصعوبة بس نظرات ليث المصرة خلتها تتكلم: طيب انا حاحكي كل حاجة سكت مسافة بعدها قالت قبل كم شهر اتعرفت علي اياد في خطوبة يسرا اخت ايثار ما بنكر انو جذبني من اول لقاء وبقيت افكر فيهو وما قادرة اشيلو من بالي لحدي ما جاء يوم العرس كأن متأنق بالبدلة التكسيدو السوداء بعدها طلب رقمي وانا ما صدقت طوالي اديتو ليهو وانا طايرة من الفرح وسرعان ما اتطورت علاقتنا لحدي مافي يوم اعترف لي بحبو وانا بأدلتو نفس الشعور وعلاقتنا كانت زي العسل
سكتت مسافة زي كانها بتجمع في قوة عشان تقول كلامها
بس فجأة بقى بارد معاي وما بيسأل علي وانا ما ركزت معاهو بس هو اتمادى وبقا عادي يمر شهر ولا يرسل لي رسالة وبعتذر اعتذارات باردة وما مقنعة وفجاة في يوم لقيتو حاظرني من الواتس والفيس والمكالمات واي حاجة ما قدرت تحبس دموعها الاتسللت من عيونها بالقوة
اتفاجات بليث وهو بحضنها بقوة ويقول بصوت باكي:اسف يا اختي لاني ما بهتم بيك بقولو الاخ سند بس انا كنت مجرد شافع بكاي كل همو انو يمغرز اختو ويعصبها
ختت يدها علي رأسو قبل ما تبتسم من بين دموعها وتقول:كبرت يا ليث كبرت يا اخوي
براءة وايثار قعدو يبكو بصورة كوميدية اجبرت لتين علي الضحك
_ ليث تعال ادي دروس للبجم صلاح دا
_هي صحي ما سألتك صلاح عمل شنو لإستاذ الشوم داك
_يخ دا اداهو حلاة محاضرة لمن جلحاتو اتكيفت وحرم تاني ما يسألني واياد تم الناقصة انتبهت لنفسها اتنحنح وواصلت:لكن وقت رجعت الفصل قال لي دا دقني كان نجحتي في القران احييي منو الكلب
لتين ما ردت ليها
براءة قالت ليها:خلي لي انا بأدبو ليك ود الحرام دا وبعدين حتي لو سقطك ما حيفرق كتير المهم امتحان الشهادة بس
_اي اي اصلا ما شغالة بيهو انا خلي يسقط ساي
بعدها  قالو ماشين لانو الواطة حتضلم ايثار همست في اضان لتين:ما تساهري كتير اووكي؟؟عارفاك حتقضي الليل كلو بكي
لتين ابتسمت ليها وقالت:حاضر يا ستي اي اوامر تانية؟؟
_وما تسمعي اغاني حزينة لانو حتنفسني زيادة وتاني....
لتين قاطعتها:خلاص فهمنا يلا طيري امشي بيتكم
_بتطرديني من بيتكم يا لتين طيب ماشي بوريك
لتين وهي بتقفل الباب في وشها:تصبحي قردة
_وانت من اهلهم
و زي ما قالت ايثار فعلا لتين شالت الليلة كلها بكي
#في الصباح.....
ليث كان قاعد مع امو واختو في المطبخ
امو سألتو:انت اختك دي ما ماشة ولا شنو قبل شوية مشيت غرفتها لقيتها مافي في سريرها وشكلها كانت بتستحمي
_ما اظن تقدر تمشي لانها عيانة شد..
ما كمل جملتو دي لقى لتين واقفة قدام باب التلاجة وبتشيل ليها في تفاحة عاينت ليهم لقتهم بعاينو ليها بخلعة
ليث اتفاجاء واتسأل من وين جابت القوة دي كلها واتذكر كلام يوسف امبارح ابتسم بحبور قبل ما يقول:اوو اختي البطلة جاات كيفك؟؟
_تمام وانت
_بخير طالما انتي بخيير
ليان:إششششي في تطورات ملحوظة لكن
ليث:انتي اخرسي في زول سألك؟؟
حدرت ليهو وعاينت لأمها ببراءة لزوم شاكليهو لي  بس امها اتجاهلتها وقالت للتين:
انتي متأكدة يا بتي يعني بقيتي كويسة خلاص؟؟
_ايوا متأكدة
_طالما كدا كويس لكن كان حسيتي بأي شئ اتصلي لي طوالي وانا بجي بسوقك اوك
_ان شاء الله ما حيحصل
بعد فترة قصيرة الترحيل جاء وساقهم للمدرسة لتين نزلت من الباص وبقت بتفتش بعيونها علي شلتها لمحتهم واقفين هناك ومشت بهدوء من غير تحسسهم بوجودها جات ناطة في نصهم وصرخت
:سبراااااايز
_تينو اصلو ما بصدق!!!
_ما اتوقعناك بالسرعة دي لكن
_هسي كنت بقول ليهم أنك قوية وما في زول بحطمك بس هم ما مصدقين
عمار كان ساكت وبعاين للتين بهدوء
قبل ما ترد عليهم قاطعتهم المشرفة:اتكلمو بعدين هسي وقت الطابور يلا
الجرس رن والطلبة اصطفو كالعادة طابور وبرنامج الصباح الروتيني المعروف بعدها اي واحد مشى فصلو ناس لتين حصتهم الاولي كانت عربي مع استاذة ظريفة ولطيفة كدا تدعي"سلمي"قضت الحصة كلها ونسة وضحك واتعرفت واحد واحد علي ناس الفصل
اما بهناك رئبال وسديم حضرو ال٣حصص الاولي واغلبها كان مقدمة وتعارف طبعا هم بيقرو حاسوب(الحب)
حسو بالملل لانو جداد وما بعرفو زول هنا وكدا طلعو بره في الساحة اتلفتو يمين شمال لقو ليهم وكر يقعدو فيهو كان عبارة عن بينشات قاعدين فيها الطلبة وبالنسبة لوصف المدرسة
(المدرسة عبارة عن مبني ضخم جدا بيتقسم علي ثلاثة اقسام رياض واساس وثانوي وفي كل قسم في ملعب كرة قدم وحوض سباحة ومسرح بقدمو فيهو برامج وعروض كل نهاية اسبوع وحديقة صغيرة فيها بينشات بقعدو فيها الطلبة في الفسحة والارضية كلها مفروشة بنجيلة اصطناعية وفي نص الساحة كدا   واقف علم السودان بكل شموخ وفي مجسمات واشكال كدا من الفخار موزعة في ممرات المدرسة المدهونة بطلية حريرية)
لتين كانت سرحانة وماشة وهي شايلة سندوتش وعصير في يدها شقهت بخلعة لمن اطقشت بزول والعصير اتكشح فيهو
_يخ انتي ما بتشوفي قدامك عميانة??
_ اسفة ما انتبهت والله كنت سرحانة
_اسفة دي اصرفها في ياتو صيدلية انا؟؟
شوفي عملتي شنو بغبائك دا
_رئبال خلاص حصل خير البت قالت ليك ما كان قاصدة
_أنت ما خصك هي غلطانة وبتستاهل اكتر من كدا
لتين حست بالذنب مدت ليهو منديل وقالت:هاك اتفضل امسح بيهو القميص
عاين ليها بغيظ ومشي خلاها وهي مادة المنديل حست بالاحراج وهي بترجعو بعد ما سديم اعتذر ليها ولحق صحبو همست:
الله يكفينا شر الكدايس القايمة بري..الولد دا اصلو ما طبيعي الحبوب والخرشة دي ضيعونا شبابنا ياخسارة
(دمها بارد لا دي دمها بقري عديل)
_ما كان تتكلم معاها كدا دا شنو الاسلوب الرف دا؟؟
_هيي غلطت اسوي ليها شنو يعني ؟؟اشكرها ولا ارقص ليها (لئيم خلاس)
_برضو دا ما بيسوغ ليك تعمل كدا
_سديم اقطم بلاااي واقفل السيرة دي
قال جملتو الاخيرة دي وهو بعاين للزول البأشر ليهو من بعيد خت سبابتو في صدرو لزوم بتأشر لي معاي انا اومأت ليهو راسها بالايجاب وطوالي اتحرك عليها
_السلام عليكم
_وعليكم السلام
_مشكلتك شنو يا طالب??من قبيل ملاحظة ليك  زهجان وزعلان مالك
_لالا ما في اي شئ يا استاذة مشكلة بسيطة
الاستاذة وهي بتعاين لقميصو :اتشاكلت مع زول ولا شنو??
_في بت كشحت فيني العصير وقميصي اتوسخ
_بس كدا بسيطة يخخ
ومشت جابت ليهو قميص جديد وادتو ليهو:هاك امشي البس دا واجدع القميص الاتوسخ لانو خلاص باظ ان شاء الله بس يكون مقاسك
_حاضر تسلمي شديد يا استاذة...
_سلمي وانت اسمك منو(دي الاستاذة القبيل اتذكرتوها صح؟؟)
_رئبال
_رئبال امممم!!!رئبال الاسد اسمك حلو ومميز شديد
_الله ما ضراك
فجاة نطت ليهم استاذة:سلمي انتي لسع ما خليتي الونسة مع الطلبة؟؟
_ههههه لسع والله يا منال لمن اقعد مع الطلبة برتاح شديد وما بحس بنفسي
_طيب كان بتحبيهم قدر دا ما تتزوجي وتجيبي ليك اولاد
اضايقت من كلامها بس ردت باختصار:قسمتنا لسع ما جات
رئبال استأذن منهم ومشي وهو مبسوط من تصرف استاذة سلمي لكن كان جواهو فضول يعرف لي كلام الاستاذة التانية ضايقها بعدها لعن الشيطان وقال دي حاجة بتخصها وما عندي دخل فيها
مشي يفتش علي سديم الكان قاعد في بينش قريب من شجرة النيم الكبيرة رفع ليهو حاجبو لمن شافو جاي مبسوط ويتكشم زي نار القصب
_اها كيف وكيف؟؟
_جعان عايز اموووت من الجوع انت أكلت؟؟
_اي في الوقت الانت كنت بتتكلم مع الاستاذة انا اكلت واديتها ليك شيريا من خالتو انصاف وروقت المنقة
_ والله انت متين لحقت تعرف اسمها لكن علي العموم كويس
قال جملتو دي وهو بطلع قميصو الاتوسخ وبلبس الجديد ولا كأنو في ناس جمبو
_هووي هووي انت قايل نفسك في بيتكم في بنات هنا علي فكرة فما تجيب لنفسك الكبوة ساي
رئبال بعدم اهتمام:خليهم يشوفو ما عندي حاجة لزول انا وجدع القميص الاتوسخ في السلة
_دايما فاضحني هسي شوفهم بعاينو ليك كيف الليلة البنات حيفضحوك ويشرطو عينك سمعتك حتبقي لستك في المدرسة يلا خم وصر يا مان
رئبال وهو بتجاهل في كلام سديم:عان انا ماشي الكافتيريا ماشيي؟؟
_لا شكرا واقف النبق والله
شال منو الشنطة وقال
:طيب انا راجع الفصل نتلاقي فوق
_زيتون
_اسود ولا اخضر هاهاها
_اتشايلااا يخخ ما ناقص ابو ظرافتك دي هسي ولا اقول ليك قولة خليك واقف في مكانك انا الحمشي وفات خلاهو
سديم وهو برفع حاجبو بإستغراب:بني آدم غريب خلاص ما عندو حس الدعابة كلو كلو(دي ما دعابة دي اسمها دغالة) 
ـــــــــــــــــــــــــــــــــــــــــــــــــــ
#في جانب بيان...
بيان صحت من النوم متأخرة لقت امها وابوها واختها قاعدين في الصالة جرت علي ابوها حضنتو وباستو في راسو كتيير وهو كان ظاهر انو فرحان بجيتها من نبرة كلامو بعدها جات لسهى اختها الحبيبة بكت معاها وحضنتا شديد المهم بعد ربع ساعة من البكي كدا بيان قالت بزعل مصطنع
:وربي مشتاقاكم شديد يخسي عليكم ما بتضربو للزول وتسالو من اخبارو حي ولا ميت
_ما كدا والله يا بتي بس المشغوليات كتيرة وانتي عارفة براك كلو ما اقول اتصل ليك سبحان الله انسى او ما بتردي علي لكن والله يا بتي ما قصدي اهملك  كان ظاهر الزعل في كلامو اعفي لي يا بتي
_ مسامحاك يا ابوي خلاص وبأستو في يدو
قبلت علي سهي وقالت:سهويتي
_عيون سهويتك
_انا عايزة امشي بيت حسان مشتاقة لي اولادو شديد بالاخص لتين
_طيب خلاص نمشو ليهم العصر هم هسي في المدرسة
_طيب اوكي
  فطروا سوا ودقوها ونسة لحدي الضهر بعدها بيان خشت اوضتها صلت الضهر وطلبت من سهي الباسورد بتاع الراوتر ورسلت ايميل لناس مكتبها هناك في القاهرة مسكت الاوراق بتاعتها الخاصة بالقضية الجديدة المسكتهاوقعدت تقرا فيها باهتمام  عصابة خطرة وشرسة شديد بتعمل في  تجارة  العملة والاسلحة والممنوعات وبيع الاعضاء اممم حلووو
ابتسمت بإثارة وقالت:
شكلو حتكون أصعب قضية امسكها في حياتي!!

يتبع......