مراهقون و لكن

٨

" اسواء شعور في هذه الحياة ٲن تمتلك وجه ليس لك...ٲن تكون في مكان وبيئة غير مناسبان لك...ٲن تعاني كل يوم من ٳتهام الناس لك...ٲن يعايروك بما ليس في يدك ولا يدهم...لايسعني حقا سوى أن أقول تبا لهذا العالم الغبي!! "
ــــــــــــــــــــــــــــــــــــــــــــ
#في مدرسة النخيل....
سديم كان قاعد كالعادة بشرب ليهو في شيريا بمزاج جاهو رئبال وهو شايل كتاب الحاسوب في يدو قعد جمبو بشقاوة قبل مايشيل منو كباية الشيريا بسرعة ويشفطها ليك في جغمة وحدة بعدها قبل علي سديم الكان زي الصبت فيهو مطرة وبقى مركز في نقطة واحدة بس
_هوووي هااا مسهي وين أنت
قالها رئبال وهو بيأشر بيدينو قدام عيون سديم لزوم ينتبه ليهو
سديم وشو بقى جامد ومخيف وقال ليهو بنبرة جافة:الش..ش شيريا حقتي شربتها لي؟؟(بالنسبه للناس الما بتعرف الشيريا دي شنو...الشيريا دي عبارة عن كركدي مغلي وعلي فكرة بنفع في القحة مفيد شديد نصيحة جربيهو)
رئبال لاوز منو لكن ثبت وقال بغضب:يشروك في سلك عريان  شاحد الله عليك هسي عامل الدراما الرخيصه دي كلها عشان شربت الشيريا حقتك
سديم وهو بنتفض من مكانو:نعم نعم!!؟؟حبيبي الشيريا دي عشق لا ينتهي فاهم
وبعدين تعال هنا دا أنت بتجيب الكلام دا من وين؟؟
_من لنى اليوم كلو شغالة تدعي علي التقول كاتل ليها زول بتحبو
_ما لكن أنت ما مخليها في حالها تهبشها ع الطالعة والمارقة والمشكلة أنك بتتشاكل بيدك وهي بتتشاكل بلسانها
رئبال وهو برفع كتفو:بي حقي
_غايتو لكن قعد تضحكوني ضحك أنتو الأتنين
رئبال صره ليهو وشو وقال:شايفنا أرقوزات قدامك أنا وأختي؟
_اهاا خلاص قلبت الوش التاني
رئبال وهو بفرك يدينو بحماس:خلاص خلاص الوقت للعمل يلا يا مان أنا درس قبيل بتاع الgates(البوابات)داك ما فهمتو كويس ممكن تشرحو لي??
سديم عينو لمعت وأبتسم بخبث:امممم تمام حأشرح ليك لكن كل شئ بي حقو
رئبال وهو بقفل كتاب الحاسوب بزهج:عايزني أجيب ليك الزفت الشيريا حقتك دي صح
سديم أبتسم إبتسامه عريضة وأردف:أيوووون
_حاضر يا سيدي حأجيب ليك الزفت بتاعك دا وبعدها طوالي تشرح لي ومشي وهو بطنطن:هو ليهو ٣يوم ياداب بشرب فيها قال عشق لا ينتهي قال يتعشق واقف ان شاء الله الحمار..وصل جمبة خالتو إنصاف قعد في الكرسي قبل ما يقوليها
:واحد شيريا يا خالة لو سمحتي
_حاااضر من عيوني يا ولدي وبدت تسوي فيها
رئبال وهو بعاين ليها وهي بتغلي الكركدي وتخت ليها نعناع فوقو:عايزها سفري عليك الله
_عاد تمام مافي أي كلام
بعد ٥دقائق كانت الشيريا جاهزة شكرها قبل ما  يحاسبها ويمشي..
وهو راجع بالجابس كدا شم كباية الشيريا بطريقة درامية وقال:والله شكلو المرة دي خاتا ليها خرشة ولا مصيبة زمان في البتاع دا شوف بالله الأولاد متكبين فيها كيف غايتو البلد دي بقت ما مضمونة خالص
وصل عند سديم الكان ماسك الكتاب وبقرا فيهو بإهتمام قعد جمبو قبل ما يخت الكباية ويقول ليهو بتهكم
:هاك اتفضل اتخرررش يا حمار
_أسلوبك يا شاب نسيت أنو مستقبلك في يدي هسي
_والله أنت مستقبلك الحيضيع بالبلاوي البتشربها دي
_محسسني أني بشرب في فودكا ولا ويسكي أستغفر الله العظيم بس
_هسي الضمنك شنو أنو تكون ما خاتا ليها خرشه ولا بلوه فيها
_يا ديييين النبي رئبال ما عندك غرض بي لو فيها سم الليله برضو حأشربها تمام
_أقول ليك شئ ما تشرح لي زاتو والشيريا دي أعتبرها صدقة مني ولفى عايز يمشي
سديم وقفو:تعال تعال ماشي وين أنا بهظر معاك وربي...قعدو في البينش وقال ليهو:
أنت مش شربتها حسيت بي حاجة ما ياها؟؟
مط شفتو وقال:الصراحة لا ما حسيت بحاجة أبدا
_طيب مالك جايط من قبيل ما تظلم المرة المسكينة دي ساي خاف الله فيها ياااخي
سكت مسافه بعدها أستطرد:أنا أسف
_ولا يهمك حصل خير
_طيب ممكن نبدا الشرح هسي؟؟
_ايوا ومسك الكتاب وبدا يشرح ليهو:طيب يا سيدي أول شئ عندك بوابتين مهمتين شديدAnd وor يعني و وأو في المنطق الرياضي +جمع"×ضرب"بالجبر ٧ و ٨ بالمكافئ المنطقي أو المنطق الجبري كلو ماشي تمام معاك يلا عندك قاعدتين للحفظ مهمات شديد و٤قوانين برضو لازم تنتبه ليهم
(لخبطت رأسكم صح??ما حيفهموها الا ناس حاسوب) المهم بعد ساعة حتن فهم وأستوعب الدرس كويس
رئبال وهو بقفل الكتاب وببتسم بحبور:والله وقعت لي ررررب تسلم يا فردة ما نعدمك ان شاء الله
_اللهم أمييين ياااخ الله يسلمك آ ود الخال
(قلبو بلدي)
#أما بهناك في جانب لتين وشلتها....
إيثار كانت قاعدة وبتتثأب قدرتها عيونها مورمات وفي هالات سوداء تحت عيونها نتيجة للسهر
يوسف انتبه ليها وقال:أمبارح ما نمتي ولا شنو مالم عيونك ديل وارمات كدا??ردت ليهو وهي بتفرك في عيونها بنعاس:اي والله أمبارح كنت مساهرة بردم في البلينكس والاكسواز الكلاب
عمار رفع ليها حاجبو وقال بسخرية:وحات اسم الله ما جادة تساهري عشان الحراحر ديل أنتي الله دا ما أداك عقل تفكري بيهو زي باقي الناس؟؟هسي شوفي نفسك بقيتي عاملة كدا زي الباندا🐼
إيثار بنفاذ صبر:يا ربي يا مثثثثببببت العععععققققل والديييييين..عمار أختااااااني ما ناقصاك هسي أنا
عمار وهو بدسى ورا يوسف:خلاص أنا أسف ما تزعلي
براءة:ما تسيبيهو الا ينط من كلامو المعفن دا وقبلت عليهو:هوي يا عمار انت عارفني ما برضى في  راره دي مش؟؟ أتلمى عشان ما أوريك شعاع عمار بزهج:اها خلاص نطيت أرتحتي كدا ؟؟لتين حدرت ليهو قبل ما تضحك وتقول:عالم ما بتجي الا بالهرش إيثار إبتسمت وواصلت كلامها:بغض النظر عن  راره دي طبعا اي أرميز اصلي يعني عن حق وحقيقة بكره البلينكس والاكسواز الهم اصحاب اصلا والاكسواز بكرهونا فلازم يعني ادافع عن فرقتي ولا ما كدا يا وداد...هيي اقصد ولا ما كدا يا شباب(مغرزة علي الطاير)
علت أصوات ضحكاتهم البتدل علي شماتتهم في فلانه
كانت في عيون مراقباهم من بعيد علي بعد كم متر منهم عيون مليانة حقد وحسد تجاه الشله الجميله دي الا واحد منهم كانت بتكن ليهو كل مشاعر الحب والإعجاب أبتسمت بشررر قبل ما تمشي وتقول في قرارة نفسها:قرييا حتبقي ملكي براي وأشوف أصحابك ديل حيعملو شنو(دي كمان طلعت لينا من وين يا ربي)
يوسف وهو بدعي أنو مهتم ومركز معاها:طيب وكان جيت سألتك البلينكس والاكسواز ولا شنو ما بعرف ديل اصحاب لشنو مادام بكرهوكم يعني؟؟
براءة ردت ليهو:عدو عدوك صديقك ولاشنو
_ لا ما كدا لكن في وحدة في البلاك بينكس اسمها جيني وواحد من الاكسو اسمو كاي جيني وكاي كانو بيتواعدو والعياذ بالله عشان كدا بعتبرو بعض زي عائلة وكدا يعني
براءة:أيوا كلام عجيب لكن
عمار:ما علينا بيهم دا كلام كفار ساي
أثناء ما المله الظريفة دي قاعدين كدا في مزة قاطعة جات أشرت لي يوسف وقالت ليهو تعال لحظة بس يوسف أستأذن منهم ومشي ليها وهو سامع تعليقات أصحابو وكاتم الضحكة
عمار:أووبااا دي شنو الصاروخ دي أحييي أنا يا أرض أحفظي ما عليك
براءة وهي بتدقق النظر وتخت سبابتها وإبهامها في حنكها وتقول بإستهبال:طويلة حبتين لكن نصيحه لله قرضة
إيثار:ووووب أنضف من نيتي أقسم بالله(أصلا عارفين نيتك يا السمحه)
براءة:عاااد ما بسألك لكن يا يوسف شغل نضيييف حددها مع أوربي زاتو(هووي يا برو جابت ليها تريقه كمان)
عمار وهو بضرب فخذو بغيظ:ود الذين دا حنكها كييف يا ربي وربط معاها احييي الكلب أتاري الموية ماشه بي تحتنا وأحنا ما جايبين خبر
لتين:ما شايفاها سمحة شديد ما تبالغو كمان عادية بس عشان نضيفه
_غيره وروح شريره
_أغير منها ليشنو أحلي مني ولا أحسن مني؟؟
عمار عاين ليها جوه عيونها وقال بإبتسامه حاول يخفي فيها مشاعرو:طبعا ما أحلي منك هو في بت في الدنيا دي جميله زي جمالك دا قمر ماشي علي الأرض بسم الله ماشاء الله
لتين خجلت ودنقرت رأسها في الأرض وهمست:أصلا ما خجلانه
براءة لبعتو في ضهرو وقالت ليهو:أي أقعد بكش ليها كويس لمن ترفع لينا سعر
إيثار وهي مركزه معا عصافير الحب:خليكم من دا شوفو أدت ليوسف شنو شكلها هدية
براءة:يشيلني السيل أنا كر علي لا حبيب لا أنيس قاعدة كدا زي دسته الكبابي الجديدة
#عن يوسف وجكسويتو....
يوسف وهو بمسك الكيس ويعاين للأحم بإعجاب:تسلمي شديد يا بيبي مافي داعي كان تتعبي نفسك وتجيبي دا كلو
_تعبك راحه حبيبي عجبتك؟؟
_شدييييد وربي زوقك حلو وراقي زيك كدا(طبعا الهديه كانت عبارة عن جزمه نايك بيضاء وعطر باريسي فخم وساعة رجاليه سوداء وأنا لحد هسي شراب ما أدوني ليهو مااااشي يا دنيا)
الجكسويه خجلت وضربت كتفو بخفة:هههههه خجلتني يا ود
يوسف غمز ليها وقال:أصلو الجميل طبعو الخجل (حنكك سنين لكن)
أتلخبطت وبقت تتمتم:احم اا انا......يلا بااااي ومشت بسرعه قبل ما تسمع  صوتو بقول ليهاcall me أول ما تطلعي من المدرسه قبلت عليهو وإبتسامتها حصلت جبهتها وقالت:طيب حاضر حبيبي وتابعت مشيها
يوسف ضحك قبل ما يهز راسو ويمشي لشلتو الكانو منتظرنو وفي وشوشهم نظرات مريبه
براءة:شنو يا مان حنك النمل الما بعضي دا كلو أسبوع حابي ليك بت جديدة ما عرفنا دا قلب ولا لوري شطه
_الله أكبر عليك يا شيخه بعدين أنا قلبي كبير وبتسع للجميع 
_زير بنات وعينك زايغة وكمان بتتفلسف محححن
إيثار:لكن المرة دي الإستايل ما عجيب حنكتها كييف يا مجرم
يوسف ضحك ضحكة مرحة كدا بعدها قال:أصلا هي بت خالة صحبة أختي
عمار:ششششت يااااا
إيثار:يعني أيييه يا باشا؟؟
يوسف ضحك وواصل:كانت بتجي بيتنا مره مره مع صحبة أختي سماهر وأنا كنت بسلم بس وبطلع ومرات ما بسلم زاتو لكن هي كان لمن تشوفني بتتكبكب ما تقولو لي كيف لانو لو كنتو معاي برضو حتقولو نفسي كلامي دا وبلاحظ ليها بتجي متشيكه ومتظبطه ولمن أجي أسلم هاك يا ظرافه وونسه معاي المهم في يوم جات بيتنا وقيلت معانا ووقت كانت ماشه عملت حنك البنات داك علي قول براءة حنك النمل الما بعضي قال شنو تلفونها ما لاقياهو وضايع منها وشالت تلفوني عشان تتصل منو لجوالها  وأنا طبعا نقشت الحنك لكن عملت غمران وتاني اللصقة الياها رسائل اليوم كلو ولمن ما أرد عليها بتزعل ومرات بتتجرأ وتتصل لي المهم أنا زهجت منها وقلت أختصر ليها السكه ورسلت ليها مسج جس نبض كدا قلت ليها " علي فكرة ما غايب علي حركاتك وتليمحاتك وكلامك مع أختي عني ومن الأخر كدا إنتي عايزه شنو يا بت الناس مني؟؟"إتخيلو قالت لي شنو قالت لي"عايزاك أنت وبس"هنا كانت الصدمه الفي بالي طلع صح وأنا إتدبست وقلت أحسمو معاها وما أعشمها فيني ساي لكن ما قدرت أكسرها لأنها بالجد ظاهر أنها بتحبني وفي الأخر مشيت ورا قلبي العاطل وبقينا حبايب يعني ما عارف بتفكر كيف المخلوقة دي فهمها أنو أنا خلاص حبيبها معناتو أتفرغ ليها هي بس واليوم كلو أتكلم معاها وبقت لمن أتاخر في الرد او تتصل لي وتلقاني مشغول بتطلع أحلام مستغانمي الجواها وتشبكني ليك أنت خاين وواطي أصلا كل الرجال كذابين وخاينين زيك كدا يا خاين ياغشاش وتقعد تبكي لي اليوم كلو تتصل لي وتبكي تاني تهدي حبة وتشرب ليها موية وتبكي بس شغالة لي زي الماسورة المحلوجة غايتو شكيتك لي الله يا بت مستغانمي الخليتي بناتنا هايفات وشكاكات كدا علاقتنا عباره عن مسجات حب ومكالمات وشكل وشك وغيرة دا كلو كوم ولمن تقوم علي جنها كوم تاني ما بتنقدر نهائي مرة إتشاكلت معاها وأسبوع ما أتكلمت ولا رسلت وهي تعجبكم في البرود ما عبرتني ولا حتي برسالة قلت خلاص دي فرصتي عشان أتفكى من الويكة دي وقلت ليها لازم ننفصل وشكلو مافي نصيب بيناتنا وبتلقي الأحسن مني ويسعدك ردت علي ببرود وقالت لي طيب يا سيدي مدام أنت شايف كدا خلاص ننفصل مالو الإنفصال عيب؟!لكن علي شرط ترجع لي الهدايا الأديتها ليك كلها علي داير مليم مسكتني من يدي البتوجعني بت التيت وسكت وما عرفت أقول ليها شنو بعد قلبتها في رأسي قلت يا يوسف ما تشيل يدك وتطبظ بيها عينك أصبر عليها شوية وبكرا تزهج منك وتفكك أتخيلو هي بقت الطرف الأقوي وأنا الأضعف يا حليلك يا يوسف المكسر نص بنات المدرسة بت تذلك بالشكل دا المهم فصلت وجريت واطي قلت ليها هههه حبيبتي بهظر معاك والله قالت ليها هظار ثقيل زي دا تاني ما ينعاد مفهوم قلت ليها حاضر ومن اليوم داك ماشي معاها زي السوط عرفت تجيبي الكلبة لكن خايف يجي اليوم الننفصل فيهو تجيب لستة الهدايا الأدتني ليها وتقعد تحاسبني بالمليم..خلاص تاني مافي حاجة حكيت ليكم معاناتي كلها خشمي وجعني ياخ لازم تجيبو لي شي بارد بعد  حكوتي دي كلها ما تم جملتو دي
إلا وأنفجرت ضحكات أصحابو ياخ ضحكو ضحك لمن دمعو وعمار دا وقع في الأرض وبقى يدردك من الضحك وأي زول يشوفهم يقول ليهم بتضحكو كدا مالكم عمار بقول ليهم يوسف حكي لينا نكتة مضحكة تسمعوها؟؟وهم طوالي بعاينو ليهم كدا وبمشو 
براءة وهي بتمسح دمعتها:عاد طلعت ما هينة
إيثار:ألبببببس إدبست يا معلم
براءة: يلا عاان أنت أرفض الهدايا بطريقه مهذبة عشان تقلل من خسايرك بعدين
عمار وهو بتفرج علي الهدية ويصفر بإعجاب:زوقها خرافي لكن ياخ لازم أجيبها تختار لي ملابسي وحاجاتي البت دي
براءة فكت الضحكة:الليلة سجمك يا يوسف عمار شكلو البت عجبتو وحيقص ليك
إيثار بقت تغني وتضحك:الفي ريدو فرط دقس بجي غيرو يعمل مقص✂ههههاااي
يوسف وهو بعاين لي عمار ويغمز ليهو:والله حيكون ريحني من أكبر خازوق وبكون خدمني وخدم البشريه كلها وظلم نفسو (خلاص بشيلها وأتخوزق أنا ماهو شنو؟؟الأصحاب لبعضيهووم ) لكن أحب اطمنكم عمار بي حقتو
براءة بصدمة:وي وي مرتبط يعني الجزمة؟؟اه يا خاين يا غشاش عامل لينا فيها الحمل الوديع وأنت أتاريك لاعب بالحجر والبيضة
إيثار:لا تعليييييق
عمار:كدي دقيقه اهدو وروقو أنا لسع ما اعترفت ليها بمشاعري
إيثار:نان طيب ما تعترف ليها منتظر شنو؟!
_خايف تكون ما بتحبني أو خاتاني في مقام صاحبها وأخوها وكدا حأخسرها للأبد..أنا ما بقدر إستحمل ثانيه من دون ما أشوفها وأسمع صوتها
براءة:أوباااا طيب وتطلع مييين تعيسه الحظ دي
سكت مسافه بعدها قال ليها وهو برمق لتين بنظرات ما قدرت تفسرها هي شنو:كل شئ في وقتو حلو قريبا حتعرفو كل حاجه
إيثار:أشعر بالشمار ياخ 
براءة:شوقتني أعرف الشخصية دي منووو
لتين:...................(مسهيه)
عمار كان مركز مع لتين السرحانه خت يدو في كتفها قبل ما يسمع شهقتها ويقول ليها:لتين مالك ساكته كدا وصانه ملاحظ ليك الايامات دي بقيتي صامته ما زي لتين الزمان المجنونه الكنا متعودين عليها
أبتسمت ليهو بالغصب وأردفت:بقيت بحب أسمع أكتر من أتكلم
إيثار:لتين أنتي متأكده أنك كويسة إياد الحقير رجع عمل حركات تاني؟؟
_لا ولو سمحتو تاني ما تجيبو سيرة إياد دي أنا خلاص نسيتو وبقى من الماضي
يوسف:أنتي بت قوية يا لتين أوعى تسمحي لي زول في يوم يكسرك ويضعفك مهما كان ولو وقعتي إتذكري أنو وراك رجال ما حيخلوك براك...لتين في قرارة نفسها قررت تنسي الماضي وتعيش حياتها وحتطوي صفحة إياد للأبد كلام أصحابها صح أياد ما بيستاهل حزن لتين عليهو لانو كلب وواطي وحيجي الأحسن منو إن شاء الله(تمشي باته وتجي جزمة بي رباطه )
*****************************
الجرس رن وأي واحد رجع فصلو:
عن ناس لتين الحصة الرابعة كانت فاضيه أستاذها عيان ما جاء المهم الطلاب أستغلو الفرصة دي وبقو علي راحتهم يلا البتكلم تلفون والنائم والقاعد ساكت والبتونس مع الجمبو ويضحك بأعلي صوتو
عمار ولتين حبو يعملو موضوع شوية قامو شغلوDJوبقو يتراقصو زي المجانين بعد شوية الفصل كلو هاج وبقى يرقص معاهم صوت الدي جي بقى عالي ويعمل دففففف ددددففففف ددددففف يلا ناس تحت سمعو الجوطة دي وطبعا ما عاجبهم الكلام البحصل دا طوالي رسلو ليهم زول يحسم الفارغة دي
أما جماعتنا ناس الأدبي ما جايبين للدنيا خبر عايشين في عالم تاني خالص أثناء ما هم مندمجين  كدا ومنداحييين علي الأخر في طالب بيقرا معاهم جاء من برا وهو خايف قال ليهم بسرعة:لطفي جايه اقفلو البتاع دا سريع
في ثواني بس قفلو الموسيقي واي واحد نطى مقعدو وقطعو الحركة صصصصننن بعدها جات داخله ليهم المشرفة السغيلة "إلطاف"لكن دي ما عندها اي علاقة باللطافة غايتو السماها كدا دا أصلو ما إستخار دقيقة النوصفها ليكم ...(مرة عاتية كدا وشحمانه بتلبس تياب وعبايات من القرن التاسع عشر وبتلف ليها طرحة٣متر عندها صوت مزلزل تحلف تقول حنفي بتاع الورنيش ودايما صاره وشها ونافخة جضومها ما عارف لكن أظن ولدوها كدا بعاهه مستديمة أستغفر الله اللهم لا أعتراض في حكمك يلا هي ما عندها اي ذره انوثة عشان كدا
بنادوها لطفي وهي عارفة بالإسم دا لكن أبقى راجل/مره قولو قدامها والله الا تقرى علي نفسك الفاتحة)
مطت تلاليشها(دي ما ينفع يقولو ليها شفاه أو شلوفه) قبل ما تضرب الباب بكل قوتها وتجلجل الفصل بصوتها الجهور وتقول:في شنو يا طالب مالكم جايطين كدا؟؟عمار قال ليها بهدوء:مافي شئ يا مس إلطاف (اي اي اتمسكن )
_لا والله يعني الجوطه دي كلها وماف شئ قايلني عبيطة ولا شنو قطع كلامها صوت تلفونها قالت بهمس:دا المدير عايز شنو يا ربي ردت بإسلوب مهذب عكس إسلوبها الرف:ايوا نعم يا سيادة المدير..حاضر حاضر هسي بنزلهم ليك..خلاص تمام وقفلت الخط بعدها أدت الفصل حدرة وقالت بإبتسامه شريرة كدا: عمار إبراهيم ولتين حسان المدير عايزكم تحت حالا يلا وراي
لتين خافت وقالت ليها:عملنا شنو لكن احنا يا مس؟!
لطفي جات عليها بطريقة مرعبة ودنقرت:لا والله(كلمتها المشهورة) يعني ما عارفة عملتي شنو يا شاطرة؟؟
لتين ببراءة:لالا
لطفي بنهرة:يلولو مصارينك جابت ليها أستهبال وقلة أدب كمان أنزلي تحت يلا تنزل الموية من حلقك بركة الله
لتين بلعت ريقها ورجعت لي ورا عاينت لي زملاءها كانو كلهم بعاين ليهم بحزن وإشفاق زي كانو عايزين يعدموهم المهم نزلو معاها تحت ويدينهم في قلوبهم
عمار همس لي لتين:وقعنا ومافي زول سمى علينا يا صحبتي
_الله يجيب العواقب سليمة يا رب
وصلو مكتب المدير البارد والفخم جدا قعدو في الكراسي وهو ببلعو في ريقهم بصعوبة ووراهم لطفي بنظرات جهنمية إتنحنحت لزوم مستر ياسر ينتبه لوجودهم لأنو كان براجع في أوراق قدامو بإهتمام اعتدل في قعدتو وصلح نضارتو قبل ما يعاين ليهم ويقول:أنتو عارفين أنا جبتكم هنا عشان شنو؟؟
ردو الإتنين في وقت واحد:لا
_طيب هسي بتعرفو أي واحد يطلع تلفونو قدامو يلا سرعة
عمار ببلاهة:عايز بتلفوناتنا شنو لكن يا مستر؟؟
_عايز أعرضها ليكم في سوق دوت كوم
يعني حأكون عايز بيها شنو طلع قلت ليك يا طالب
_لا أرجوك أنا ما بقدر أستغنى عنو دا زي ولدي أنت فاهمني؟؟
مستر ياسر:لا ما فاهم حتجيب التلفون ولا أجي أشيلو منك بالقوة؟؟
_لا خلاص هاك ليهو
قبل علي لتين وقال ليها:اها وأنتي برضو حتعاندي زيو
_لا وأدتو ليهو وجرت طلعت من المكتب ودمعتها في عينها أما بهناك في الفصل
إيثار كان خاته السماعات في إضنينها وبتسمع في أغنية لي بتسBTS ومغمضه عيونها ورافعه كرعينها في الدرج ومندمجة بي كلو بس الساعة التسمع ليك طاااااااااخ في الدرج التلفون لمن طار من يدها وكان حيطق الواطه ويمشي لي الله لكن أنقذتو السماعة  أيثار نطرت عيونها لمن لقت لطفي واقفه قدامها وفي يدها بترينه بتاعت تلفونات
ملصقاها بلصاق
قالت بخلعه:في شنو تاني يا مس؟؟
_يمسك جن يمعط ليك شعرك إن شاء الله أنتي قايله نفسك قاعدة في بيتكم دي شنو قلة الأدب دي مش قلنا ممنوع التلفون في المدرسه
أقفليهو وجيبيهو سرعه يلا وحسابي معاك بعدين
إيثار:أرجوك يا مس لا ما تشيليهو بس دقيقة أشوف أخر صورة نزلت للبويز في الإنستا
لطفي ولا أشتغلت بيها قلعت منها التلفون وخلتها بتجعر(شالت منها فلذة كبدها الله يجازيك يا لطفي البقرة )
لتين وعمار رجعو الفصل ووشهم قالب ألوان دخل عليهم أستاذ التاريخ وبدا يدرس والوقت كان ماشي براحة والحصص مملة لدرجة البياخة وأخيرا جرس الحصة الأخيرة ضرب وجماعتنا ما فهمو للحصص حاجة وإنتهي اليوم الدراسي الأسواء في حياة أي منتحر اليوم اليشيلو منو تلفونو
براءة:هووي بعدين ما تنسو ماشين لي فؤاد
عمار:دسيس نتلاقى هناك
لتين:تمام يلا باااااي
إيثار:مع السلامة
ودعو بعض وأي زول مشي بيتو بعد ما أتفقو يتلاقو العصر في بيت فؤاد صحبهم
******************
بيان مشت مع أبوها عشان تختار ليها عربيه وبعد ساعات من اللف والدوران أختارت ليها عربية SPORTAGE جميلة(راقيه يا بيبو )قعدو إتغدو ليهم في مطعم ظريف كداوأشترت ليها كم حاجة كدا بيساعدوها في شغلها أخدت كم لفه كدا بالحديدة الجديدة بعدها رجعت بيتهم وإتكلمت مع صحبتها في الشغل حبه(طبعا هي شغاله في القاهرة في جريدة إسمها الحدث الأكيد)قررت أنها حتبدا مهمتها من بكرا رقدت في السرير وهي بتفكر في القضية المعقدة اللبست فيها دي وسرعان ما غطت في نوم عميييق !!

يتبع.....