The Half Blood Prince [COMPLETED]

Chapter Six

LAYCA's POV

"Grabe 'no?" tanong ni Jake sa'kin. Narito kami ngayon sa tapat ng tindahan ni Aling Andang.

Simula nang mamatay ang nanay ni Mauricius ay hindi ko na siya nakita pa. Pumunta ako sa bahay nila ngunit wala akong natagpuang Mauricius. Gusto ko na siyang makita ulit.

"Akalain mong palagi tayong hinahanap ni Maui para lang makita noon pero ngayon, nasaan siya?" humigop ito sa iniinom nitong softdrinks.

Napangalumbaba na lang ako dahil sa sinabi niya. May point siya. Kumagat ako sa kinakain kong tinapay saka ako tumingin sa bahay nila Mauricius sa 'di kalayuan kung saan walang ilaw at nakasara ang buong bahay.

Ilang buwan na rin ang nakalipas ngunit heto ako at hinihintay ang pagbabalik ni Mauricius. Gusto ko siyang makita at mayakap, pagkatapos ay masabi sa kaniya ang tunay kong nararamdaman.

Na hindi isang kaibigan ang turing ko sa kaniya dahil mahal ko na siya. Matagal na panahon na rin ang nakalipas na kasama ko siya at nang mawala siya ay doon ko lang na-realize na mahal ko na pala talaga siya.

Napabuntong-hininga ako at saka ako humigop sa iniinom kong softdrinks.

Nagsara na ang factory dahil sa hindi maipaliwanag na dahilan, isang buwan na rin ang nakakalipas nang mangyari 'yun at ngayon, kapwa kami naghahanap ni Jake ng trabaho. May mga nahahanap kami ngunit hindi kami natatanggap, may tumatanggap nga sa'kin... puro bar naman.

Binuksan ko ang cellphone ko at naghanap ng trabahong pwedeng mapasukan sa facebook group namin. Kapwa kami kasali ni Jake sa group na 'to at dito rin namin nahanap noon ang trabaho bilang factory worker sa Toy Factory Incorporated na ngayon ay nagsara na dahil daw sa pagkalugi ng kompaniya. Nakakapanghinayang.

"Oh!" agad kong ipinakita kay Jake ang post na nakita ko sa facebook.

"Makakapasok ba tayo diyan? Eh malaking kompaniya 'yan" takang tanong ni Jake sa'kin.

Tinulak ko ito palayo sa'kin, "Eh ano naman ngayon? Pwede naman akong maging secretary, ah"

"Tapos ako? Janitor?" tanong niya sa'kin, "Matatanggap ko pa ang magtrabaho bilang dishwasher sa isang fast food" sabi niya.

"Kung ayaw mo, edi 'wag" sagot ko sa kaniya saka ko siya nginusuan.

Kinabukasan ay maaga akong bumangon at talagang naligo ng matagal habang naliligo para maging maayos at mabango ako sa harap ng magi-interview sa'kin.

Matapos kong magbihis ay agad na akong lumabas ng kwarto at nagtungo sa salas para tingnan ang sarili ko sa malaking salamin na nasa gilid ng TV.

"S'an ka pupunta?" tanong ni Mama sa'kin habang naglalagay ako ng lipstick sa labi ko.

"Maga-apply ako bilang secretary, Ma" sagot ko sa kaniya saka ko siya nilingon.

"Kumain ka muna kaya"

Inilagay ko ang lipstick ko sa handbag na nakasabit sa kanang balikat ko saka ako naglakad papunta sa lagayan ng sapatos at kinuha ang 6-inches red stilleto ko na ipapares ko sa suot kong red dress. Pulang-pula rin ang lipstick na inilagay ko sa labi ko.

"Secretary ba talaga ang a-apply-an mo o ano?" takang tanong ni Mama sa'kin saka ito tumayo at nagtungo sa kusina. Makalipas ang ilang segundo ay nakarinig na ako ng mga hinuhugasang plato.

"Oo naman, Ma" sagot ko saka ako naglakad patungo sa pintuan, "Ma, alis na ho ako"

"Sige" sagot niya.

Nang makalabas ako ng gate ay natigilan ako nang may humintong kulay itim na sasakyan sa tapat ko. Bumaba ang hood ng sasakyan at nakita ang pagmumukha ni Daniel.