The Paramount Code (The Odd Ones, Book 1)

017. The Guardian

Huminga nang malalim si Leia at niyakap ang bag na dala. "Wala rin naman ako sa landas mo, hindi ba? Sa Paramount Building ako nakatira, kaya hindi naman na tayo nagkakasama."

Isang naiinis na ngisi ang sumilay sa mukha ni Sandy. "Ang yabang mo na ngayon ah... Porke kasali ka sa Paramount Class... Akala mo ba deserving ka? Kung umasta ka parang akala mo ang galing-galing mo..."

Napalunok si Leia, at agad na sinagot ang stepsister niya. "Bahala ka kung iisipin mo na hindi ako deserving o hindi ako magaling... Ang punto lang naman, ako ang kasali sa Paramount at hindi ikaw. Wala ring silbi 'yang mga sinasabi mo dahil hindi ikaw ang may suot ng badge..."

Nagsalubong ang mga kilay ni Sandy dahil sa narinig mula sa kapatid kaya pinandilatan niya ito. "Nahahawa ka na talaga dun sa bestfriend mong matalas ang dila, ano?" Lumapit si Sandy sa kanya at pinagmasdan ang badge na nakakabit sa uniporme niya, "Dahil lang dito, sobrang yabang mo na... Paano kaya kung mawala 'to?"

Bago pa man makapagsalita si Leia, hinablot na ni Sandy ang badge at itinapon ito sa malayo. Sinundan ni Leia ng tingin ang badge na tumilapon na para sana makuha niya ito mamaya kung saan ito mahuhulog, pero naramdaman niya na lamang ang paghapdi ng anit niya. Wala siyang kaalam-alam na sinasabunutan na pala siya ng kapatid na halatang gigil na gigil sa kanya.

"Sandy, ano ba! Huwag mong hilahin ang buhok ko..." ani Leia habang nagpupumiglas at pilit na itinutulak ang stepsister niya.

Pero hinawakan ni Sandy ang isang kamay niya at pinihit ito papunta sa likod niya para hindi siya makagalaw. Ramdam ni Leia ang sakit sa braso niya dahil sa ginagawa ng kapatid, pero wala siyang magawa dahil natatakot siyang lumaban dito. Kahit pa mas malaki siya, ni wala siyang magawa dahil wala siyang tiwala na matatapatan niya ito.

Hindi na napigilan pa ni Leia ang pagtulo ng luha niya habang sinisigawan at sinasaktan siya ni Sandy. Walang katao-tao sa lugar na iyon, kaya walang dadaan na pwedeng umawat sa kanila o pwedeng tumulong na makalayo siya sa kapatid. Gusto niyang humingi ng tulong para makawala sa pananakit ng kasama, pero wala siyang magagawa.

Pero sa kalagitnaan ng ginagawang pagpapasakit sa kanya ni Sandy ay bigla na lamang itong bumitaw sa buhok at kamay niya at napaungol sa sakit.

Nang lingunin ni Leia ang kapatid, nakita niya ang isang pusa na nasa paanan niya. Galit na galit ang pusa na mukha kinalmot ang binti ni Sandy.

Kumuha ng nakakalat na sanga ng kahoy si Sandy at ginamit ito para sundutin ang pusa habang pinapaalis ito. "Umalis ka dito... Shoo..."

Hindi umalis ang pusa na nagsisitayuan pa rin ang balahibo dahil sa galit. Maya-maya pa ay pumwesto ang pusa sa harap ni Leia, at nang mapatingin sa kanya si Sandy ay unti-unti itong umatras.

Nagtaka si Leia sa inaasal ng kapatid, lalo na't naghahalo ang takot at pagkalito sa mukha nito. Hindi rin ito nakatingin sa kanya, ngunit sa bandang likuran niya.

Napalunok si Leia nang makarinig siya ng kung anong mga tunog at kaluskos mula sa likuran, at nang lumingon siya ay hindi niya rin mapigilan ang matakot nang makita ang napakaraming mga ligaw na aso at pusa na papalapit sa kanila. Pati mga ibon ay nagsimulang naglabas ng malalakas na huni habang dumadapo ito sa mga sanga ng puno kung saan nakatayo sa ilalim si Leia.

Pumwesto ang mga ligaw na aso at pusa sa harap ni Leia na parang hinaharangan nila si Sandy na makalapit sa kanya. Every animal is on alert, ready to bite and growl as they focused their furious eyes on Sandy. Anumang sandali ay aatake at handang manakit ang mga hayop na nakapalibot kay Leia, na para bang hindi sila papayag na makalapit si Sandy sa kanya.

Dahil sa nangyayari ay wala nang nagawa pa ang takot na takot na stepsister ni Leia na tumakbo na lamang palayo.

Habang sinusundan ni Leia ng tingin ang palayo niyang kapatid, unti-unti nang nagsialisan ang mga ligaw na hayop na kanina ay nakapwesto sa harap niya na para bang pinoprotektahan siya.