يوجد فراغ ، بعثرة ، غصة قوية ، ها هنا تحديدا في "داخلي"
….
بعد مرور أسبوع
كاعدة بالليل بفراشي واحجي ويا ريما
_ وشنسوي هسة
_كنت متوقعة يدخل علية ويطلب نطلع او حتى يدز مسج بس ماكو
_وشحسوين
_رح اروح اشوفه
_وين للشركة
_لا لا الكافيه احنا نعرف الوقت الي يروح يكعد بي فاروح عادي مو دا اشوفه
_زين خاف ميعبرج
_هو هذا هم احتمال الصراحة بس نحاول
_زين اني هم اجي لو لا
_ هو اذا انتي موجودة احسن علمود ميحس انو جاية علموده بس لا ماريد ادخلج بالموضوع ويعرفون شكلج
_عادي اني ماعندي مانع اروح
_لا متجين اني ادبرها
_زين شوكت
_باجر اروح
....
العصر بعد ما كعدت من النوم
بدلت وخليت مكياج ولبست عدساتي وطلعت
متوجهة الكافيه الي يروحله ونفسه الي وداني اله هذاك اليوم
وصلت للمكان ودخلت
كنظرة اولية من دخلت كان ماكو
رحت كعدت بوحدة من الطاولات الي مفتوحة تبين المطعم كله
باوعت مرة ثانية للمكان كان صدك مموجود بقيت انتظر شوية وشفته دخل راسا درت وجهي للجهة الثانية ومبينت انو دا اشوفه
وبديت اباوعله بنظرات خاطفة كل شوية بدون مينتبه
ورا شوية باوعلي بنظرة سريعة عادية بعدين رجع نظره علي مثل الي تذكر انو هو شايفني بدأ يركز نظره علية علمود يتأكد لان هذيج المرة محطيت مكياج قوي كان عادي
ورا شوية كام من طاولته ومشى بأتجاهي اني لزمت تلفوني وعساس دا اقلب بي
إلى أن وكف يم طاولتي _مساء الخير
رفعت راسي متفاجأة وابتسمت لما شفته _مساء النور
_اكدر اكعد لو منتظرة احد
_لا تفضل
كعد بالكرسي الي قبالي
_شعجب جاية وحدج
_كنت انتظر صديقتي بس مكدرت تجي باخر لحظة اجوا اقربائهم
_لما شفتج من بعيد متصورت انتي كلت احتمال غلطان بس لما ركزت تأكدت انتي
ابتسمتلة _وانت شعحب وحدك هنا
_اني متعود دائما اجي وحدي هنا
هذيج المرة مصارت النا فرصة نتعرف زين
_صح متعرفنا مكانت الظروف تساعد
ابتسملي_بس اليوم لازم نتعرف اكثر
مكتيلي غيرتي رأيج بخصوص الوظيفة
_لا بعدني على نفس رأيي
_واضح متحبين تشتغلين
_ لا احب بس ادور على شي يناسبني ويعجبني ماحب اشتغل شي ماحبه
_تردين الصراحة اني هم ماحب شغلي بس الظروف هي الي جبرتني عليه
_شنو طبيعة شغلكم
بدأ يحجيلي عن شغله
_زين ليش ممرتاح بي
_مكان هذا حلمي حبيت ابدي شغلي الخاص بيه وصدك بديته ونجحت بي بس الظروف جبرتني اعوفه وارجع
_ليش الشغل مكان هنا
_لا مو هنا برا
_زين اذا هيج حاب شغلك ليش عفته ورجعت
_الظروف كانت اقوى مني ورجعت بس مدا اكدر اتأقلم بسهولة حياتي هناك كانت احلى ونظمتها على اساس ابقى هناك بس للاسف مصارت
_صار شكد سافرت
_مصار هواية يعني مو سنين طويلة من رحت كنت شاب خلصت جامعة واشتغلت فترة وية اهلي وصديقي وبعدها رحت بقيت تقريبا ٤ سنين او اكثر رجعت قبل سنتين هيج
_زين وشغلك هناك شصار علي
_خليته بأيد اصدقاء أثق بيهم مردت اعوفه وانهي كلشي لان تعبت بي
_بعدك تريد ترجع
_اذا الظروف تسمح ارجع بس ماكدر
_مرتاح هنا مثل هناك
_لا مدا اتعود بسهولة مع انو من طلعت من هنا مكمل جامعتي واشتغلت شكم سنة وية صديقي وأخوية الة سافرت بس من رجعت مدا اتأقلم بسهولة
ابتسمتلة _احتمال عايف شخص مهم هناك لهذا ضايج
ضحك _لا لا مو الي ببالج كله للي هناك صديقات فقط
_والي هنا
_هنا ماكو اصلا ماعندي تعامل وياهم غير بالشغل وبس يختلفون عن هناك جانوا يتصرفون بعفوية وماكو تكلفة بالتعامل
_هاي طبيعية حياتنا فأكيد هيج يتعاملون
اصدقاء هنا ماعندك
_عندي اصدقاء قبل موجودين وصديقي الي استغل ويا هم بس سنين اني بعيد عنهم تغيرت اشياء مبقينا مثل قبل كل شخص بيهم صارت عنده حياة خاصة مدا نجتمع مثل قبل
_صح كل واحد تبدي تشغله ظروفه وحياته
_محجيتيلي عنج احب اسمع عن حياتج
_حياتي عادية حالي حال اي بنية عايشة هنا تخرجت ودخلت جامعة كملت وكعدت بالبيت لان ملكيت شغل
_لتكذبين انتي متردين تشتغلين مو اني جبتلج شغل ورفضتي
ضحكت _مو كتلك احب اشتغل بشي احبه
_زين حياتج العاطفية شلونها
ضحكت _ماكو ممرتبطة حياتي عبارة عن اهلي وصديقاتي
_شعجب
_بعدني ممستعدة لهاي الخطوة بعد وقت عليها
_ماكدر اكلج لا مو بعد وقت لان اني هم لا خاطب ولا مزوج ولا حتى مرتبط
صدك شنو تأكلين مسألتج اخذتنا السوالف
_لا شكرا مجوعانة
_ماشي اذا مجوعانة نحلي عدهم كيك مو طبيعي هنا لازم تضوكي
طلبلنا كيك وعصير
_ها طيبة كولي الحقيقية
_صدك طيبة عجبتني
ورا شوية
_اني لازم اروح تأخرت
_على راحتج
كام وياية
_لا لا ابقى اذا حاب
_ لا اني هم ارجع للبيت عندي شغل لازم ادققه
طلعنا من المطعم وكل واحد توجه لسيارته
اندار علية وابتسم _اتمنى نكررها
رديتلة الابتسامة _ان شاءالله
رجعت للبيت
شفت ماما كاعدة بالصالة
_ها حبيبتي وين كنتي
_كنت يم ريما شوية طلعنا غيرنا جو
صعدت لغرفتي
بدلت اخذت الفون اتصل بريما
_هلو ريوم
_شصار بشريني
_مثل ماتوقعت اجى كعد يمي لما شافني وبقينا نسولف كان الكلام أكثر عن حياته عرفت شكم معلومة عنه بس مو كلش مهمة
_خوما حسيتي شاك بشي
_لا محسيت
_صدك نسيت اكلج المهر احتمال نسوي أسبوع الجاي
_صدك هاهية اتفقتوا
_يي اليوم امه خابرت ماما واتفقوا فلهذا اريد همتج وياية ورانا كومة شغل وتجهيز ولازم اشتري البدلة هم
_ماعندي شي من باجر اذا تردين نبدي نطلع نجهز
اتفقت ويا ريما على باجر
ونزلت جوا رحت يم ماما بالمطبخ
_ها ماما محتاجة شي
_اذا ماعندج شي سوي السلطة
سويت السلطة
_ماما ترى ريما مهرها أسبوع الجاي وحنبدي نجهز اني وياها للحفلة
_الف مبروك الله يسعدهم يستاهلون
يي حبيبتي لازم توكفين وية صديقتج وتجهزيها واني هم استفسر من خالتج عن المكانات الي اشتروا منها ترتيبات مهر عذراء تذكرين كان كلش حلو
_يي صح كان كلش مرتب
تعشيت ويا اهلي وصعدت فوك
....
رحت لشغلي ومر اليوم عادي مصار شي مهم
من رجعت للبيت تغديت ونمت شوية وراها كعدت بدلت وجهزت نفسي علمود اطلع ويا ريما
اتصلت بيها _ها اطلع من البيت
_يي طلعي ونلتقي هناك
وصلت للمكان كان محل كبير يبيع فساتين وبدلات الأعراس والمناسبات
دخلت وبديت اتفرج على القطع
دخلت ريما ورا شوية
_ها حلوة الشغلات هنا
_يي اكو قطع حلوة
شوفتها وحدة _شوفي هاي عجبتني الج احسها تكعد على جسمج وتصير تجنن كومي قيسيها
طبت لغرفة القياس واني بقيت برا ادور بالمحل
شوية ورجعتلها للغرفة _يلا فتحي الباب
دخلت للغرفة _واو يجنن عليج ترى
_اني هم عجبني بس اشو محبيت اللون
_بدلي وخل نطلع نشوف اذا اكو غير لون
سألت صاحب المحل _هاي البدلة اكو منها غير لون
_للاسف كانت موجودة وخلصت
_تتوفر مرة ثانية
_يي تقريبا منا لأسبوع او اكثر
رجعت لريما كانت مبدلة_ أسبوع أو أكثر يرجعون يجيبون الوانها البقية
عبست _اوف شوف الحظ
_امشي ندور هسة نلكي احلى
بقينا ندور وريما ميعجبها شي هذا يضعف وهذا يسمن هذا موديله محلو هذا لون معجبني
آخر شي طلعنا ومشترينا شي
_وهسة شنسوي
_شسوين يعني مبية حيل افتر بعد
_ولا اني بية حيل بس تعبت من الفرة امشي نتعشى
باوعت الساعة _لا تأخر الوقت نرجع احسن
باوعتلي بتوسل _منتأخر بس نأكل بسرعة ونرجع
_امري لله اكو مطعم قريب هنا
_يي اصور بهذاك الشارع
رحنا تعشينا ورجعنا كل وحدة لبيتها
من طبيت شفت ماما وبابا كاعدين بالصالة سلمت عليهم
_ها جوج اشتريتوا
_لا والله ماما لكينا بس معجبوا ريما كلش
_اكو اكل بالفرن بقيتلج
_لا ماريد تعشيت برا
صعدت لغرفتي سبحت وطلعت
فتحت الفون شفت مسج منه كاتبلي
_تدرين افتقدتج اليوم صارلي هواية مكاعد ويا شخص ومسولف عن نفسي وحياتي بعفوية
_شكرا لانو أعطيتني ثقة انو تحجيلي عن نفسك
رحت الفراش تمددت
ورا شوية وصل اشعار مسج
_بس انتي معطيتيني الثقة انو تحجيلي عن نفسك
_يمكن لان ماكو شي احجي
_يمكن بس حاب اتعرف عليج أكثر ونلتقي أكثر
_ان شاءالله اذا كدرت
سديت الفون ونمت
....
ثاني يوم هم طلعنا اني وريما بس شوية من وقت علمود منتأخر واتفقنا ويا بنية تكون مسؤولة عن ديكور الميز بيوم المهر
وراها رحنا هم ندور بدلات
اشرتلي ريما على وحدة _هاي حلوة
باوعتلها_هي حلوة بس ماتصور ترهم على جسمج
أثناء ماندور عجبني فستان حلو
_حروح اكدر هذا
رحت قستها جاية علي مضبوط
شوفته لريما _يجنن عليج
اخذته وطلعت من غرفة التبديل
وراها بقينا ندور لريما وهم معجبنا شي ومشترينا بس اني اشتريت الفستان
رجعت للبيت
بدلت ونزلت اكلت ويا اهلي وصعدت فوك
قلبت بفوني شفت مسج منا
_اكدر اشوفج باجر
_شوكت بالضبط
_نفس هذيج المرة اذا ناسبج
_يي مناسب الوقت
....
العصر بعد ماكعدت بديت اجهز نفسي الطلعة
بدلت وطلعت متوجهة للكافيه
بطريق افكر شلون رح اتحمله لهذا لغوي هواية مو مثل احمد هم ياريت كلام يفيد كله مستفاديت منه شكلي رح اتعب وياه
وصلت للمكان
دخلت شفته كاعد على نفس الطاولة مال هذيج المرة
توجهت علي
ابتسملي وبادلته الابتسامة _مساء الخير
_مساء النور عليج
_خوما صار هواية كاعد
_لا مصار هواية من اجيت
هذا الشاب خوما تعرضلج مرة ثانية
هزيت رأسي بالنفي _لا مشفته بعد
بعدها كلي _تدرين انتي اول وحدة تصير صديقتي بعد مارجعت ماعرف اذا معتبرتني صديق او شخص عابر بحياتج بس اني اعتبرج صديقة
ابتسمتلة _اتشرف بصداقتك
أثناء كلامنا
_تدرين لهسة مدا اتأقلم هنا أصعب شعور انو الانسان يحس بغربة بداخل وطنه
باوعتله وهزيت رأسي بالنفي _لا هذا مو اصعب شعور
_شنو الاصعب منه
باوعتله بنظرة غريبة _الاصعب انو الانسان يعيش بغربة بداخل حياته يعيش حياة ناس فرضوها عليه بسبب أفعالهم يسوي اشياء ممفكر بحياته يسويها هاي الغربة الحقيقة غربة الانسان عن نفسه
باوعلي بتفكير وهو رأسه _صح كلامج الله يساعد الناس الي ديعيشون هالحياة صعب هالشعور انو الانسان يكوم ميعرف نفسه
_ماعندك صديق مقرب هنا
_عندي شريكي بالشغل هو صديقي المقرب من الطفولة كانوا آبائنا شركاء وبعدها احنا استلمنا الشغل
_مكتلي ليش سافرت ورحت منا
_علمود ابدي شغلي الخاص وهم علمود اهرب من ذكريات محاوطتني واذتني
_شنو هالذكريات
باوعلي باوعلي بأستغراب وابتسامة_هواي سألتي اليوم
ضحكت بتوتر _لا بس حابة اعرف أكثر عن حياتك
_واني لهسة ماعرف عنج غير اسمج وشمخلصة وبس ليش هيج كتومة انتي
_ مو كتومة بس هي هاي كل حياتي
بهالاثناء دك فونه ورفضه
_عادي تكدر تجاوب على الفون
دك الفون مرة ثانية وشاله
_لا مو بالبيت
طالعة بشغلة
ماشي من ارجع أكملها
سد الفون
_اذا عندك شغل مهم تكدر تروح
_لا ممستعجل بس اذا تردين تخلصين مني اكوم
ضحكت _لا بالعكس مستمتعة بالكعدة وياك
ورا نص ساعة طلعنا من الكافيه
رجعت للبيت
بالليل اتصلت بريما
_ها شسويتي اليوم
_كلشي مسويت
_تشاقين مو كتلج طلعي وحدج ترى ماعدنا وقت
_مالي واهس اطلب بدونج
_ماشي باجر نطلع من وقت علمود نلحك بعد عدنا كومة شغلات
....
تقريبا خلصنا تجهيز اني وريما بقى بس بدلتها الي ليهسة مدا نلكي شي يعجبها
بالليل كاعدة بسريري شفته دازلي مسج
_دا اشتاقلج وكلش كاره هالشعور
_ليش
_ ماريد اتعلق بيج
_ليش انت متعلق بية هسة
_بديت
سكتت مجاوبته
_اريد اشوفج
_هسة كتلي متريد تتعلق بية وهسة تريد تشوفني
_ههههههه متناقض مو
_هواية متناقض
_اتحمليني
_ححاول
_هسة مكتيلي اريد اشوفج شوكت عندج وقت
_مو باجر ماكدر
_عكبة
_مبدئياً يي
بنفس المكان مو
_لا اخذج لغير مكان
_زين بالضبط دزلي العنوان
_لا انتظرج بمكان وتمشين وراية بسيارتج
_وين حنروح
_حتعرفين من تجين
_ماشي
سديت التلفون
اوف ياربي يعني هذا شكله حيطول واني مطايقة حتى اباوع بوجهة اريد اخلص منه بسرعة بس شلون واني ماعرف عنه شي
….
العصر هم طلعنا اني وريما علمود نكمل كلشي يخصها
_اسمعيني ترى هاي اخر يوم باجر متطلعين لازم ترتاحين
_لج شلون واني لهسة ملكيت البدلة
_ليش دنرجع لأول محل بلكي جاب باقي الالوان
_بس مصار أسبوع
_نشوف بلكي
رحنا للمحل وصدك طلع جايب باقي الالوان اختارينا وحدة وطلعنا
وراها رحنا نتعشى اني وريما
_شخبارج ويا لهذا الكلب
_باجر حطلع ويا
_وين نفس كل مرة
_لا مكال وين نروح كال باجر تعرفين
_عزة شلون تأمنين تروحين ويا ومتعرفين وين
_اني بسيارتي وهو بسيارته واذا حسيت ديوديني لمكان غريب او معزول راسا اغير طريقي وارجع
_مادري خايفة
_لتخافين بعدين بس يفكر يسوي شي سكينتي وياية والله انحره نحر
_شتفقنا احنا مو كتلج لتفكرين بهاي السالفة
_يعني عادي عندج اذا هم رادوا يقتلوني بس من اكلج ادافع عن نفسي واقتلهم تتخبلين
_طبعا اخاف اذا انلزمتي متكدرين تثبتين اي شي عليهم ويصير مصيرج بالسجن يعجبج هيج
_طبعا لا ولتتشائمين هو اصلا معرفني
_ماشي دربالج على روحج
تريدين باحر الحكج اني هم
_لا ميحتاج بس ابقي بالبيت وخليج جاهزة خاف يصير شي علمود رأسا تجيني
هزت رأسها _ماشي
رجعنا كل وحدة لبيتها
صعدت فوك بدلت ملابسي
بالليل فتحت فوني شفت دازلي مسج
_هاهية متفقين على باجر
_يي متفقين بس مرح تكولي وين حنروح
_لتصيرين فضولية باجر تعرفين
اتفقت ويا على الوقت ووين انتظره باجر
مخايفة لان ماتوقع هو يعرف اني منو بلكي بهاي الخطوة اعرف اشياء عنه تفيدني واعرف نقطة ضعفه بعدني محتاجة هواية معلومات عنه لهسة اغلب الي اعرفه ميفيدني لازم اعرف معلومات قوية عنه تكدر تحطمه واستفاد منها زين بدون اخطاء وبدون ميحس بية ابد
توجهت لفراشي واني افكر شنو الي حسوي بالأيام القادمة
....
توقعاتكم للقادم
وين رح يروحون
شنو حتسوي جمانة بالأيام القادمة
البارتات القادمة حماس
....
تفاعلكم بالمشاهدات والتصويت والتعليقات
ياريت يكثر تفاعلكم علمود اتشجع أكثر وحاولوا تنشرون القصة لصديقاتكم
ابد لتنسون التصويت
أنت تقرأ
انتقام
Mystery / Thrillerاشتعلت نار الانتقام في قلوب لم تعرف الانتقام يوما امرأة خسرت 6 سنوات من حياتها وهي تقرر الانتقام ياترى من من ولماذا
