| أمانة حيدر | ' باللهجة العراقية '

البارت السابع و الثلاثون ' و الأخير '

# أمانة حيدر
# بقلم:الراويه
#البارت"٣٧" ' و الأخير '

بسم الله..

.

يُسر..

صنمت بمكاني بعد ما نطق كلمته
گمت ارمش بعيوني و اني احاول استوعب كلامه
او حتى اشوف نبرة مزاح بين طيات احرفه
بس شفت الجديه بعيونه تقدم خطوتين و صار مقابل الي تماماً
غمضت عيوني و اني اسمع نبرته الخافته

- ولچ والله احبچ و من زمان..احبچ من اول  ما گالوا عمك اجته بنيه..من شفتچ تكبرين يوم ورا يوم
چنت اتمنى اخذچ جوا جناحي..متت من تزوجتي حيدر
و صار عندي امل طفيف من استشهد..بس كلشي تحطم من تزوجتي صديق اخوچ و خسرتچ، بس هسا لا اصير جبان اذا تركتچ

رجعت ليورا و اني اهز راسي ب لا
طول عمري اشوفه بمثابة جمال..صح ما عندي اي اختلاط وياه بس چنت هيچ اعتبره
فجأة  يجي گدامي و يگول الي احبچ !
هذا اكيد مو صاحي

اجا يتكلم بس اني قاطعته

- براء انته شدتحچي !
انته مو خاطب ؟

- فسخت الخطوبه..ما اريد اظلمها للبنيه ويايه
يُسر اني احبچ من زمان..و راح تفكرين ليش ما تقدمت الچ و انتي بنت عمي.. بس اني اجاوبچ
لان امي چانت رافضه..عمي مصطفى تدخل و رفض، و ايديه تربطت و ما گدرت اتقدم الچ

- براء روح منا

حچيتها واني اتجاهل نظراته و هو گال

- يُسر اگلچ احبچ تگوليلي روح منا !

- ايي روح منا براء..انته ما وصلت متاخر انما كل وصولك غلط بغلط

سكت و بقى يباوعلي ثواني قبل لا يخطي خطوة باتجاهي، توترت و نفسي اضطرب من گال بنبرة خافته

- اذا هيچ تشوفين جيتي هنا..ف اني اسف
بس تخبلت من وصلني رفضچ..يُسر اني احبچ والله

- طول عمري اشوفك بمثابة جمال، الله يخليك روح منا و لا تسبب الي احراج

هز راسه و ابتعد ليورا..تجاهلت نظراته الي بيها حزن و قهر
هو هسا تذكرني ! هسا تذكر عنده بنت عم
بلعت ريگي من گال

- اسف..و اعذريني على جيتي

حچاها و طلع و سد الباب وراه و اني بقيت واگفه بمكاني
التفتت على صوت اسمهان الي واگفه باب المطبخ و هي تگول

- منو ؟

- محد

حچيتها و اني ارجع للزوليه و گمت اغسل بيها و كلام براء باذني
شعجب سكت و تراجع و ما زاد بالكلام..
ظليت يومين عند جمال و رجعت للبيت
مرت الايام و نور كبر شويه و بدا يگعد على حيله
اجانا رمضان..و ما حسينا بطعمه و بيوم العيد ما حسينا بي گعدت الصبح و لگيت عمتي گاعده بالطرمه و تبچي..و يمها عثمان ساكت و هو يباوع بالفراغ
اجيت سلمت عليها و گعدت يمها باوعتله و هي تمسح بدموعها اخذت مني نور و باسته و گامت تبچي و هي حاضنته