| أمانة حيدر | ' باللهجة العراقية '

الفصل العاشر

#أمانة حيدر
#بقلم:الراويه
#الفصل"١٠"

بسم الله ❤❤

.

سلام..

شگد چنت اضوج من لمياء ضجت منها بعد اكثر بعد ما سمعت حچيها ل يُسر
گوه ضبطت اعصابي و طلع كلامي بارد و ما عصبت و رگعتها براشدي الي يعدل تقاسيم وجهها

من حطوا العشا اكلت شويه و گمت انسدت نفسي و اني اشوف لمياء گاعده گبالي
اول واحد صعدت فوگ لغرفتي و ظليت گاعد و اني افكر بكل الي گاعد يصير، و اقصد بيني و بين يُسر
جريت حسرة و اني افكر بيها صح يوم عن يوم گاعد تتقبلني بس اعرف انو ما يمكن يجي يوم تحبني لو تتقبل حقيقة مشاعري الي خافيها عنها

بال١١ صعدت هيه و ابنها ظليت ادحگلها و هي تتحرك بالغرفة و هي تريد تغير ملابس حيدر

جريت حسرة و انداريت للكنتور مديت ايدي و .مت اطگطگ باصابيعي عليه
سمعتها زفرت و بسمه خفيفه انرسمت على وجهي
حبيت اتحارش بيها لذلك انداريت و گلت

- يُسر

- همم

- ابو اربعة و اربعين شكم رجل عندو ؟

دحگتلي بطرف عينها و گالت

- من گلتها اربعة و اربعين رجل

- والله زين منا ٢٢ و منا ٢٢ حتلو انگطعت رجل ما يهتم

حچيتها و اني اگعد رجعت گلت و اني ادحگلها من تمددت و سحبت الغطا عليها

- زين ليش ما يسمون القنفذ ابو البسامير  ؟
لأن يشگجچ

- سلام شبيك ؟

- ما بيه بس گاعد افكر و طلعت هاي الاسئله

رجعت گعدت و گالت بسمه خفيفه

- زين ابو بريص شنو اسمه الحقيقي ؟ بريعصي لو ابو بريص

- لمياء

انفجرت من الضحك و هي ترفع حواجبها استغراباً من كلامي
و اني على ضحكتها ابتسمت و اني اشوف غمازتها تبين على خدها اخذتني رجليه للتخت گعدت و دحگتلها شلون تضحك و گلبي احسو راح يطلع من مكانو
سكتت هي و دحگتلي و گالت بخفوت

- خطيه والله

- يا خطيه يمعوده، و بعدين مو اني الي اخترعت هذا اللقب
من هيه صغيره يصيحولها هيچ

ابتسمت و اني رجعت اردفت ب

- چان ضعيفه و طويله و يخوفون بيها الجهال

گوه كتمت ضحكتها و هي ترجع تحچي

- بس والله خطيه !يعني اكيد چانت تضوج

- لا لا تخافين ما عدها احساس و لا تضوج بالعكس تكشر عن سنونها و تلحگ الجهال و هي تعوي
اني مرة اجيت انشمر من وراها و گوه لحگوني اهلي