| أمانة حيدر | ' باللهجة العراقية '

الفصل الخامس و العشرون

#أمانة حيدر
#بقلم:الراويه
#الفصل"٢٥"

بسم الله الرحمن الرحيم 🌹

.

يُسر..

گاعده گدام جمال الي يهز برجله بتوتر و هو يباوع للگاع بذهن شارد
ما اعرف شنو صار بيه من صاح بيه و هو يگول الي منو هاي البنت
انصدمت و كلش ما توقعت انو جمال يحب..
بوقتها التفتت الها و گال الها اطلعي برا
و هي لبست حذاها و طلعت، و اني بقيت مصنمه ب مكاني ما گدر اگول اي شي
فات جمال و هو يزفر و صدره يرتفع و ينزل بسرعة
ايديه يضغط عليهن بقوة و حتى شرايينه بينت من عصبيته
جمال يفقد عقله من يعصب و اني خفت لا يفقده و يتخبل عليه لو على البنيه

- جمال

نطقتها و هو رفع راسه و باوعلي و اني بنبرة حاولت تكون هادئه حتى ما استفزه

- حبيبي اهدأ

غمض عيونه و گال

- ليش خليتيها تفوت ؟

- خوماا اطردها، و اني ما اعرفها اصلاً

سكتت لحظات و رجعت احچي بصوت ناصي

- منو هاي ؟

- أيلاف

عگدت حاجبي و هو اردف ب

- زميله وياي بالشغل

- شنو تقصد ب باعتك ؟
ترا والله ما افتهمت شي

- احسن

گام من مكانه و اني وگفت و لزمته من ايده و گلتله

- جمال احچيلي منو هااي

سحب نفس قوي و فرك وجهه و گال

- وحده " چنت " احبها

- ليش تگول چنت ؟؟ اذا هي اجت تسلم عليك

- يُسر شبيچ ؟ داگلچ باعتني

- تقصد من دخلت السجن

هز راسه بلا و رجع گعد بمكانه و سكت لحظات
رجعت گدامه و صار هدوء على الغرفة، باوعت بعيونه شفت شگد اكو حزن و قهر
و هو بدا يحچي

- چنت احبها و حسبالي تحبني، و عدتها بالزواج
گلت فترة و اتقدم الها اريد احظر نفسي و ما اخلي شي ينقصني و اروح الها و نتزوج..بس هي شنو سوت ؟ وافقت على واحد خطبها.. بالليل چنت احچي وياها و الصبح اجت عليه تگلي جمال اني انخطبت
تمنيت انها تگول مجبوره بس لا.. مو مجبوره
ورا كم يوم اجت هي وياه و واحد شابك ايد الاخر
و اجت للمكتب الي اني وياها بي، حسيت گلبي طلع من مكانه، تبتسم و هي تباوعله
چان اشگراني حليوه و عنده شركات و زنگين، و هي باعتني علمود الفلوس

سكت و جر حسرة ما عرفت شنو احچي غير انو اتقدم عليه و احظنه
و هو لف ايديه و حظني هماتين، نزات دموعي على حالته، ما مصدگه انو جمال چان يحب، و گلبه انكسر من وراها