| أمانة حيدر | ' باللهجة العراقية '

الفصل الحادي عشر

#أمانة حيدر
#بقلم:الراويه
#الفصل"١١"

بسم الله 🌹🕳

.

سلام..

گاعد على الكرسي و اهز برجلي بتوتر ادحگ للگاع و خطوط الفاصله للسيراميك
انتظر و الانتظار قاتل..

زفرت و رفعت راسي للي گاعد گدامي، عيونو مورمه من البچي و على بعد عنو گاعده امو الي تنوح و تبچي
گمت من مكاني و گرمزت گدامو و هو دحگلي بعيون دامعه
لزمت ايدو و طبطبت عليها و گلت بهدوء

- رائد كافي، شجاك يمعود
عمي ان شاء الله ما بي شي

- سلام انته ما شفتو شلون صار، گلت ها هي خسرت ابويه

- الو طولة العمر ان شاء الله

- سلام والله اموت اذا صارلو شي

حچاها و اجهش بالبچي، دحگتلو امو و رجعت تبچي بحرقة گلب
ما تحملت منظرو و هو يبچي على ابوه الي اصاباتو سكته قلبيه و ما نعرف هسا شنو وضعو
سحبتو و حظنتو و صوت بچيه گام يعلى
اعرف شعوره تماماً لأن عشتو بكل حذافيره، من استشهد ابويه سندي و عزوتي

- كافي رائد، اذا مو علمودك علمود امك ما تشوفها شلون صار حالها

- سلام والله مو بيدي

- اعرف والله اعرف يا خويه، مو بيدنا احنا همين
بس امك محتاجتك هسا روح عليها و خليها تهدأ

وخر عني و مسح دموعو و هو يستغفر ربه
وخرت من عندو و هو اتجاهه لامو و گعد بصفها
دحگت لساعة موبايلي چانت بال١٢ و نص زفرت و سندت نفسي على الكرسي، بحدود الربع ساعة طلع الدكتور الي اشرف على حالة عمي
كلنا وگفنا و هو تنهد و گال

- انتوا اهل المريض

تقدم رائد و هو يحچي

- اي احنا، ابويه شلون صار

- الحمدلله تعدى مرحلة الخطر، بس السكته القلبيه اثرت عليه لازم راحه و انو ياخذ ادويه بانتظام

- نگدر نشوفو ؟

حچتها مرت عمي و جاوبها الدكتور

- هسا ما تگدرون راح ننقلو للغرفة خاصه نراقب وضعه

- مشكور دكتور

دحگلي الدكتور ' مهند ' و گال بسمه بعد ما عرفني

- تسلم سلام، ما انتبهت الك
شلونك ؟

- الحمدلله

استأذن و مشى و احنا انتظرناهم يطلعون عمي من الغرفة دقائق معدوده و طلعوا على السديه،و اخذوا للغرفتو الي منعوا احد يدخلها
ظلينا ننتظر عن الباب رائد غلبوا النوم و سند راسو على كتف امو الي بقت تدعي و اني اشوفها تسبح و مره تقرا آيات

ظليت گاعد و ما غفيت، ما ردت انام اخاف يحتاجون شي
كل ساعة يدخل ممرض يشيك على وضعو و يطلع
التهيت بالموبايل و التفكير ب يُسر
الي ما اعرف شنو حالها هسا
بعدتها عن تفكيري، ماخذه كل تفكيري و همين لو مهتمه بهل الشي