| أمانة حيدر | ' باللهجة العراقية '

الفصل التاسع

#أمانة حيدر
#بقلم:الراويه
#الفصل"٩"

بسم بالله 🌹

.

يُسر..

من حچت عمتي كلامها حسيت كل الوجوه انگلبت
و نظرات انزعاج بعيونهم
محد جاوبها و رجعت عمتي تحچي

-انتو تعرفون انو بيتهم قديم و يريدون يرممونه
سالفة شهر شهرين و يخلص، و بدال ما تتبهدل يم بيت عمها راح تجي هي و خالتكم يگعدون يمنا

- الحمدلله

حچاها سلام و وگف من مكانه باوعتله و هو يطلع من المطبخ، زين ليش هذا الانزعاج ؟
سمعت تنهيدة عمتي و وراها طلع عثمان بقينا احنا البنات
لأن حتى عمتي طلعت وراهم

صار عندي فضول أسال باوعت ل رواء و گلت بتردد

- شكلهم ضاجوا ؟

- هو منو ما يضوج من لمياء ؟

حچتها دلال بنرفزه و گامت
باوعت ل رواء و گلتلها باستغراب

- رواء شديصير ؟

- ماكو شي يُسر، بس هما يضوجون منها

- ليش ؟

گامت و بدت تلم بالسفره و اني اساعدها
الف فكرة خطرت ابالي تذكرت كلام رواء من انخطبت ل عثمان

- عثمان يضوج منها لأن ضربتچ من انخطبتي ؟

هزت راسها و اردفت

- اي لهذا السبب و سلام ما يستلطفها

شفتها ما تريد تحچي بالموضوع لذلك فضلت السكوت
اني بديت اغسل بالمواعين و هي بدت تحظر للغدا
كملت المطبخ و صعدت فوگ كنست الغرفة و طلعت الملابس الوصخه و ذبيتهن بالغساله
و اني واگفه بالممر صعد سلام لغرفة بعد ما سألني اذا المي حار

كملت الملابس و شريتهن، و دخلت للغرفة شفته واگف گدام المرايه لابس دشداشه بيضه و هو يعدل بياختها
اول مره اشوفه لابس دشداشه بس چانت راهمه اله
تحممت و گعدت على التخت و اني أنب نفسي لان باوعتله
رفعت راسي عليه و هو يرش العطر

- ترا حيدر نام يم امي

هزيت راسي بنعم، و هو نزل جوه
تنهدت و اخذت ملابسي و فتت اسبح
من كملت و نزلت جوه لگيته گاعد هو و عثمان يم عمتي
ما چان عدنا شغل لذلك گعدت يمهم
بقوا يتسولفون بمواضيع و اني ماخذه وضع الصامت بال١١ تقريباً بدت الجوامع تقرا طلع عثمان حتى يروح يتحظر و سلام گاعد بمكانه

نزل عثمان و طلعوا هما و عمتي توضت وگامت تقرا قرآن
بقيت گاعده بمكاني و ماكو شي اسويه
اخر شي قررت اروح اقره اني هماتين احسن من الگعده

بقيت اقرا لحد ما اذن صليت
كملت صلاتي و بقيت گاعده على السجاده رفعت ايدي و اني ادعي ربي انو يصلح حالي و يفرجها على اخويه
محد الي بهاي الدنيا سند من بعده