الحلقة22:
وصلو للسوبيرات و شراو شيبس و كوكيز و زاد شرالها نوتيلا و كريم فراش و حوايج خفاف (سقايط) و راحو للدار طيب الستاك (سكالوب) و فريت أوملات و تعشا هو وبنتو ( مراد تعلم يطيب حوايج خفاف على جال بنتو )
و كي كملو تالا راحت تفرج ميكي في الصالون و مراد دار لي كراب ...و كي كملوهم رجع الصحونا للكوزينة و رجعلها
مراد : هيا ..الرقاد
تالا: آآ لالا بابا ...نكمل ستروبيري شورت كيك
مراد : ههه ... لالا وقت الرقاد تعاوديه غدوة
تالا : بااباا تعييييش شوياا برك
مراد : تالاااا ... اني نزعف و نحيلك لاتيلي
ناضت مشنفة تكرك روحها و طلعت لبيتها و هو حكمو الضحك باسكو ستوتة تعرف تلعب بالكيوتنس نتاعها (ظريفة_لطيفة) ...كفى لاتيلي و طلعلها هي متكسلة وهو يلعبلها بشعرها يسنى فيها ترقد
تالا : بابا ؟
مراد : وي بنتي
تالا : علاه ماعنيد ماما كيما صحباتي
مراد بلع ريقو و تفاجئ وجاتو تصويرة فاتن في بالو بقى ساكت زمااان
تالا : بابااا
مراد : تالا راح الحال أرقدي ماما غدوة تنوضي بكري
تالا : حابة نشوفها ...علاه ماعندناش تصويرة ليها
مراد : تالاااا ..أرقديي
خافت ولات سكتت و هو عرف بلي ماراحش تسكت حتان تعرف لأنو تالا فضولية وتحب تعرف كلش راح تبقى تبربش حتان تصيب وش راهي تحوس
هاذ النهار رقد مراد و ذكرى فاتن ماخلاتوش يرقد هاني تفكر اللحظات الأخيرة لفاتن و بزاف حوايج
و في جيهة أخرى في نفس الوقت كانت المساعدة نتاع المعلمة في الروضة دقق الرسومات و لفت انتباهها رسمة تالا
صباح جديد و يوم جديد ....ناض مراد لبس الكوستيم نتاعو كي عوايدو وجد الفطور و نوض تالا ... فطرو و خرجو وصلها للروضة باسها و هو راح يخدم
دخلت تالا و بقات تقسر مع صحاباتها و دخلت موراهم الآنيسة (كيما يقولولها) ...بعد ماسقساتهم وش راهم و ضحكت معاهم شوي خلاتهم يلعبو بالعجينة ...وهنا دخلت المساعدة نتاعها سلمو بطبيعة الحال ...و مبعد دارت عند الولاد و سقساتهم و هي هازة ورقة
&&&: شكون لي رسم هاذي
تالا هزت راسها : أنا ( وهي هازة يدها)
راحت المساعدة قعدت معاها و حبت تحكي معاها
&&& : شابة الرسمة نتاعك ...تحبي ترسمي ؟
تالا : عادي
&&& : ملييح وسمك الزينة
تالا يدها في العجينة و دورت راسها جاوبتها :أسمي تالا
&&& : انا لجين ....اسمك شبااب كيما نتي ...شكون سماك
تالا : مانعرف
لجين : صحا ..قوليلي علاه رسمتي هاذ الرسمة
تالا : خطرت في بالي برك
لجين : وش خطر في بالك
تالا : ماما
لجين : اممم مالا تحبي ماماك عليها رصمتيها ( حكاية ارمي الغالط باه دجيب الصحيح)
تالا : ماناعرفهاش (هنا فهمت سر علامات الاستفهام ... لجين أخصائية نفسية على هاذي تحب دقق في التفاصيل )
لجين : اممم ..علاه مسافرة يعني ؟
تالا : مانعرف
لجين : أوكيي سقسيتي بابا عليها؟
تالا : اييه البارح سقسيتو
لجين : أهيه وش قالك ؟
تالا : ماجاوبنيش
لجين : صحا حنونة كملي أخدمي ذرك نولي نشوف وش خدمتي ..أوكي ؟
تالا : أوكي
وراحت شافت باقي الولاد ...
YOU ARE READING
بعدما خسرتها (كرونيك باللهجة الزائرية)
General Fictionحكاية الكرونيك دور حول شابة عانت من الظلم و الحقرة من طرف أبوها و حتى في المجتمع و تضطدم بشاب معقد من النساء و يكرهم ...و هكا حياتها تتبدل وتولي جحيم (علاه و كيفاه و ....تعرف كلش اذا تابعتو معانا الحكاية )
