الحلقة17:
مراد مالقاش وش يدير غير أنو يخرج معاها و يبردلها قلبها ...دارو الدنيا كامل كانو كلشي مقفول
فاتن : أحبببس أحبسسس ( و تخبطلو في يدو )
مراد : وش بيكي هبلتيي لوكان درت أكسيدون
حطاتو في الثقيل و خرجت من الطموبيل
مراد : وين رايحة أصبري ...
دخلت لباتيسري و قاتلو : حابة شيكولا بالبانان و الفراز
مول الباتيسري : مدام مانبيعوش الشيكولا و البانان و الفراز نبيعي غير الباتيسري
فاتن : عند البانان ؟
م.ب : ايه
فاتن : والفراز ؟
م.ب : ايه
فاتن : أيي خلاص خلطهملي مع شيكولا و صاي
م.ب: بصح مادام ....( و قاطعو مراد)
مراد : تخدمو لي كراب ؟؟
م.ب : ايه نخدموهم
مراد : خلاص جيبلها كراب بالفراز و البانان (ودار عند فاتن ) ..هكا ملييح ؟
فاتن : المهم شيكولا و بانان و فراز
قعدو في طابلة و يسناو و فاتن كانت تحرك رجلها عيات تصبر و مراد يشوف فيها و حاكمو الضحك جابلهم ...فاتن حلاتو و
فاتن : ماكانش البنان خلاص مداير زوج حبات ( و هي كانت نورمال )
مراد : يا بنتي بزايدي بهادل ..كولي واسكتي
فاتن : ماناكلش ...حتان يزيد البانان
هز الصحن و راح قولو
مراد : اسمحلنا خويا زيدلها البانان و نسلكك الدوبل ..الله غالب المراا تتوحم
م.ب : آآ لالا نورماال (وزادلو)
جابهولها و حطو قدامها
مراد : هاكي يا لالة كولي ذرك
بدات تاكل تبان جامي كلات و دير في الأصوات (أمممم ...) تبان مانعرف وش راهي تاكل و هاذ المرا مراد ماقدرش يحكم الضحكة
فاتن : ماتضحكش عليا
مراد : هههه لوكان نقدر هاني درتلك فيديو .... غدوة تتفرجيه و قوليلي ماتضحكيش
تبسمتلو وكملت تاكل .... و هو بقا يشوف فيها و يتبسم عاجبو الحال .....مراد نادرا مايضحك تقدرو جامي ضحك أو تبسم ....كانت هاذي أول مرة يتبسم فيها
رجعوللدار و كانت عيانة بزاف و نعسانة وصلها لبيتها غطاها و بقا يشوف فيها زمان حتانرقدت خلاص و باسلها راسها و خرج و قفل الباب موراه
YOU ARE READING
بعدما خسرتها (كرونيك باللهجة الزائرية)
General Fictionحكاية الكرونيك دور حول شابة عانت من الظلم و الحقرة من طرف أبوها و حتى في المجتمع و تضطدم بشاب معقد من النساء و يكرهم ...و هكا حياتها تتبدل وتولي جحيم (علاه و كيفاه و ....تعرف كلش اذا تابعتو معانا الحكاية )
