الحلقة 3:
العشية بعد ما خلصو كامل الحصص على الزوج قدقد بقات في بلاصة تخمم في مصروفها لقات بلي مايكمللها شهر ونص هذا اذا اقتاصدت لآخر درجة فكان لازم عليها تحوس على خدمة وهذا وش دارت ... خرجت من المعهد و راحت تحوس على خدمة في كاش ريستو ولا كاش حانوت و مالقاتش .... بقات تحوس و المورال يمشي و يهبط حست روحها منحوسة حاجة ماحبت تصلحلها قاعدة تخمم بينها و بين روحها " علاه يعني زهري هكا بزاف ناس عاميينها في حياتهم و يخرجو منها كي الشعرة من العجين و انا ما آذيت حتى واحد باه نستاهل هاذ الامتحان الصعب يعني علاه غير انا لي مكتوب على جبينها نعاني ....." و هي شاردة وسط أفكارها قطعت الطريق بلا ماتشوف و دجي طوموبيل بواحد الفيتاس تغرس الواحد في سابع أرض مافاقتش حتان صونا تخطفت و ماعرفتش واش دير قلبها يخبط 200 في ساعة و كي حبت ترجع للتروطوار تعكلت و تكسرت لاصوندال نتاعها و تملمزت رجلها (قلتلكم كان لازم تقرا المعوذتين) و سي خونا فاتها رييح ماوش سامع بيها خلاص كانت سيارتو آخر طراز وباينة غالية جاو شوي دي جون ينوضو فيها
&&&: ختي راكي صفا ....
&&&: كشما يوجع فيك . ندوك للطبيب ؟
فاتن : لالا ماعليه ماصرا والو نقدر نمشي مارسي ( مع ابسامة تاع الوجاع )
راحو الناس و كاين فيهم لي شفق عليها حب يعاونها عاود راحلها واحد
&&&: ختي طوميبلتي غير هنا ...خليني نوصلك للصبيطار ولا لامجي ..ولا وين تسكني
فاتن : لالا مايشقاش خويا نقدر ندبر راسي
&&& : مانسماش راجل لوكان نخليك في الحالة هاذي .... و راني نشوف فيك عيتي تمشي تعيشي قوليلي وين رايحة نوصلك
فاتن : ماني رايحة لحتى بلاصة ....ماعلاباليش الجوايه هنا
&&& : مالا ماكيش منا ؟؟
فاتن : لالا انا هنا مقيمة و نحوس على خدمة
&&& : أوكي أصبري ......( حكم التليفون وعيط لواحد و كي خلص ...) شوفي ختي عندها محل خياطة كبير تسحق وحدة تعاونها هاني سقسيتها وقاتلي ايه ماعليه وش رايك ؟؟
فاتن ( عينيها ولاو يلمعو و رجعتلها الروح ) :منك صح ؟؟
&&& (تبسم ) : اييه بيانسور مني صح ... أيا نروحو
فاتن : أأ لالا صحا أعطيني لادراس انا نروح وحدي
&&&(فهم بلي ماحبتش تركب معاه في الطوموبيل ) : خلاص نروحو كيف كيف في البيس هكا باه تعودي تعرفي الطريق وحدك المرة الجاية
فاتن (خممت ومبع وافقت ) مشاو لللاري تاع البيس و هو توله بلي راهي تكركر في رجليها من جيهة لاصوندال تكسر الطالون نتاعو و رجلها باين توجع فيها ...وصلو للاري قالها
&&&: أقعدي ( مبعد حكم لاصوندال ) شوفي تكسرتلك نحيها خيير
فاتن (حشمت و ولات حمرة طوماطيش) : لالا وش راك ديير ... حشاك
تبسم و قالها "ذرك نجي " و راح .... و كي ولا جاب معاه بالغين (كان هز نوميرو نتاع رجلها كي نحالها لاطوندال) و بوماد و بونداج نتاع الموسكل ....(جابهم من الفارماسي)
فاتن : مارسي ربي يحفضك خويا تعبتك معايا
&&& : بلا مزية ختي مادرت غير واجبي
YOU ARE READING
بعدما خسرتها (كرونيك باللهجة الزائرية)
General Fictionحكاية الكرونيك دور حول شابة عانت من الظلم و الحقرة من طرف أبوها و حتى في المجتمع و تضطدم بشاب معقد من النساء و يكرهم ...و هكا حياتها تتبدل وتولي جحيم (علاه و كيفاه و ....تعرف كلش اذا تابعتو معانا الحكاية )
