الحلقة 2:
وصلت فاتن للمعهد بقات دور وتحوس على جهة البيوت تاع الإقامة و كل واحد وين كان يدي فيها حتان لقات طفلة قاتلها بلي راهي رايحة نثم راحو كيف كيف و كي وصلو تفارقو كل وحدة راحت لبيتها
دخلت للبيت لقات ديجا كاين زوج بنات ... غير دخلت بداوي يكيلو فيها من الفوق لتحت و يتغامزو عليها حكمت سرير لقاتو فارغ رتبت أمورها و قعدت في السرير ... مامبا 3 دقايق جاتها وحدة فيهم و قاتلها
&&&: ايي اسمعي نوضي هاذي بلاستي
فاتن : بصح انا لقيتو فارغ ؟
&&& : ايه و مبعد هاذي بلاصتي نوضي ازربي
فاتن : ياك ماوش مكتوب اسمك فيه و زيد ماكيش راح تموتي كي تقدي في السرير لوخر
&&&: ( دارت عند صحبتها ) هههه شتي قتلك هاذو تاع الدوار مايفهموش .... شوفي راكي جديدة هنا طوالة اللسان هنا ماتخرجكش على خير ماكالاه تلعبي معايا فهمتي ( وتهدد بيديها)
بما انو فاتن ماتحبش المشاكل فناضت راحت للسرير الثاني بلا ما تكثر هدرة معاها و شافت فيها و تبسمتلها وحطت الكيتمان و تكسلت هاذ الشي لي زاد استفزها و حطتها في راسها
بعد مدة هبطت للمعهد تستكشف وش فيه و تحوس على كلاستها و بروغرامها ....و قرات عادي و في العشية راحت للبيت ما لقات حتى وحدة قعدت تقرا في كتاب بين ما وصل وقت العشا هبطت تعشات و رجعت عيانة بزاف نوات ترقد ديراكت بصح البنات كانو ناوين على سهرة وقصرة .... وهي نومها ثقيل فعيات ترقد حتان رقدوا هوما
الغدوة الصباح راحت للريسطو فطرت و رجعت لبست كلاسيك سروال و قمجة مع فاست طويلة شوي نوار و بلون صوندال غوج و لمت شعرها كوت شوفال جات زلة مانحكيلكمش ... هي ماكانش بيها تكون زينة بصح حبت تخلي انطباع شباب في يماتها اللولين و اما بالنسبة للماكياج فماعندهاش باسكو كان باباها صعيب و مايمدلهاش مصروفها كان عندها جوست روج خفيف كانت تحطو في المناسبات و الأعياد و كي دات الباك شرات كريون نوار ... دارت شوي برك منهم و هكا كمل اللوك نتاعها
و هي خارجة تلاقات بالمشكلجية نتاعنا ...تشوكات فيها كيفاه عادلة روحها و هي كانت حاقرتها ماتوقعتش هاذ الشي كامل يخرج منها ... فزادت غيريتها ..... فاتن كي العادة مايش معبرتها كامل و فاتتها برد ( بصح كان لازم تقرا المعوذتين و آية الكرسي –العين حق- )
دخلت للقسم نتاعها روطار شوي دقت الباب كان البروف ديجا دخل كان يشوف في البيسي نتاعو
البروف ( و عينو مازالت في البيسي) : ادخل ...( قالها بثواني دور وجهو وشاف شكون لي دخل .... و جذباتو بزاف بقى يتبع فيها بعينيه حتان حكمت بلاستها )
فاق مع روحو و رجع للبيسي نتاعو و مبعد شرحلهم القوانين نتاعو و النقطة نتاعو كيفاه يتحكم بيها ......و عيا ينحي عينو من عند فاتن
خلصت حصتو و في بالو يحكي معاها بصح ماتجرأش من النهار اللول بعد فخرج بلا ما يحكي معاها و هي فوتت نهار عادي لي يقراو معاها حبوها و باين ديما كاين لي حاقدين عليها بلا سبب(وين تروح تلقاهم هاذو) ... و عرفت وحدة تقعد معاها تفاهمو يقراو و يديرو المشاريع كيف كيف بصح هي كانت بنت العاصمة على هاذي يتفارقو بعدما يخلصو الحصص كامل
YOU ARE READING
بعدما خسرتها (كرونيك باللهجة الزائرية)
General Fictionحكاية الكرونيك دور حول شابة عانت من الظلم و الحقرة من طرف أبوها و حتى في المجتمع و تضطدم بشاب معقد من النساء و يكرهم ...و هكا حياتها تتبدل وتولي جحيم (علاه و كيفاه و ....تعرف كلش اذا تابعتو معانا الحكاية )
