رحم الوجع

الجزء 30

*** التصويت على حلقات الروايه ضعيف جدا بتمنى تتفاعلو مع التصويت في الروايات لانو ما ح اعرف اذا الروايات عاجباكم او لا الا بالتصويت .. وشكرا ***

بعد بكيت زييين كده وسكتا قلتا ليهو ابراهيم عايزه اشوفك.. قال لي هسي! قلتا ليهو ايوه هسي.. قال لي الوقت متأخر قلتا ليهو مابعرف بس عايزه اشوفك قال لي طيب.. بعد نص ساعه كده ضرب لي تلفون قال لي انا جنب البيت قلتا ليهو طيب.. لبستا عبايتي واتسحبتا برااحه طلعتا ليهو ركبتا في العربيه واتحركنا مشينا شارع النيل وقفنا العربيه ونحنا جوه فيها بقينا ساكتين برضو قال لي عايزه تقولي شنو.. انفجرتا فيهو غضب الزعله القبل اربعه سنيين قلتا ليهو ليه اتخليت عني ببساطه ليييه 😭💔 كنتا عارف اني ما بقدر اشوف غيرك وعارف اني روحي فيك عملتا كده ليه ووجعتا قلبي.. كان بإمكانك تقيف معاي قدام اختك بس ماعملتا كده وجرحتني ليه! ..خلاني كوركتا وجطتا لحدي ما سكتا وقال لي كان لازم اقيف معاها قدامك بس انتي ماكان مفروض تطلبي الطلاق سرييع كده انتي كنتي شايفه الزواج لعبه ياسندس وما راعيتي لي بالعكس وقفتي في وشي ومشيتي. انتي عارفه اني حاولتا اجيك وارجعك بس للأسف لقيتك مافي.. قلتا ليهو لي سبتني من الاول! قال لي كان لازم اعمل كده عشان رغد اختي وانتي ماعارفه اني بي وراك خاصمتها كتيير واتصالحنا بعد مده. انا ما خليت اهانتك تعدي ساي وحاسبتها حتى امي الله يرحمها الفتره ديك كانت شايله همنا انا وهي لحدي ما رجعنا تاني بعد فتره .. قلتا ليهو مافي فايده من الكلام بعد كده وسكتا.. سكت هو زاتو وعاين للساعه قال لي الوقت إتأخر انا مفروض ارجعك بعد كده قلتا ليهو مادايره ارجع قال لي ده ما وقت نتعاند فيهو لازم ترجعي بعدين انتي طلعتي متسلله زي الحراميه وكده ماصاح.. قلتا ليهو ماعايزة ارجع قلتا ليك.. سكت وزحا ايدو من الدريكسون ورجع لورا الكرسي بقى بعاين لي في مراية العربية وهو بتبسم قال لي سندس زيدتي حلا ❤ قلتا ليهو شكرا قال لي عفوا.. بعدها ختى يدو في لحيتو وبلمس فيها قبلتا عليهو وقلتا ليهو طيب ليه ما عرستا! ضحك وهو بعاين لي قال لي اسألي بوضوح بكون احسن قلتا ليهو انا هسي سألتك بوضوح قال لي وهو بضحك اي ما عرفتا بت غيرك ده جواب لي سؤالك 😂😂قلتا ليهو اصلا ماكان بخصني اذا عرفتا ولا لا دي حاجه بترجع ليك والله.. ورجعتا للكرسي وختيت يدي في حنكي زيو وبقيت بعاين ليهو بالمرايه بتاعت العربيه.. قلتا ليهو ليه قلتا لي مشتاق ليك! قال لي لأني مشتاق ليك ده شنو السؤال الغبي ده.. قلتا ليهو سؤالي عادي انت براك متحسس قال لي طيب اسكتي وبقى يعاين فيني مسااافهه بعدها سالني اها وبعد ماشفتيني شبعتي من شوفتي؟ سكتا وطنشتو تاني ردد لي السؤال لسه ما شبعتي من شوفتي.. عاينتا ليهو عسى ولعل يفهم انا مشتاقهه لعيونو قدر شنو .. بعدها سكتنا شويه عاينتا للوقت إتأخر شدييد قلتا ليهو خلينا نمشي قال لي ماعايز امشي قلتا ليهو ابراهيم! قال لي لسه ماشبعتا من شوفتك.. قلتا ليهو ابراهيم ليه نحنا بعدنا كده!، قال لي ماعارف والله ياسندس قلتا ليهو لو ماعيب علي كنتا عايزه اعمل حاجه لكن حرام عشان كده رجعني البيت سريع.. ضحك وقال لي اعملي عادي انا كنتا راجلك قبل كده 😂 قلتا ليهو ابراهيم رجعني سرييع عليك الله😡 .. رجعنا البيت ودخلتا تاني براحه براحه بدون مايحسوا بي.. شوفتو ريحتني شدييد ياخ انا محرومه منو ليه! اذا انا بحبو كده ليه ببعد منو!، نمتا وانا مرتاحه ومبسوطه.. صحيت الصباح لقيت نوف مرسلا لي الحفل كان كيف!، وحبيي القلب؟ .. عرفتا انها كانت متفقه مع ابراهيم ما استغربتا من سؤالها شلتا تلفوني وضربتا ليها قلتا ليها ليه ماقلتي لي انك بتعرفي ابراهيم! قالت لي عرفتو من عيونك الطول الوقت بتفتش عليه قلتا ليها انا ماعارفه اعمل شنو قالت لي اخدي وقت في التفكير وبعدها بتقرري براك اهم حاجه ياسندس اتخذي قرار واعي وبعد تفكير.. قفلتا منها وعارفه كلامها صح
بعدها رندا صحت وقالت لي نمشي الكوفير عشان حتعمل جلسة فيشل وكده.. بقينا بنتجارى في مواضيع العرس كل يوم وينجهز وبنحجز انا وهي وماجد.. مرات بلاقي ابراهيم في بيت ناس رندا ومرات مابلاقيهو.. كانت عيونو ملازماني الوقت كلو وبتفتش علي لحدي ماجا يوم العرس وانا مع رندا في الكوفير بنجهز فيها ونوره معاي برضو لما جا المسا جانا ماحد يستلم العروس سلمتا عليهو وباركتا ليهو كنتا لابسه فستان مورد بالاحمر والبيجي لامع من تصميمي برضو وعامله مكياج حلو شدييد.. مشينا الحفله واول مادخلنا انا ونوره قبل العروس لقيت ابراهيم واقف في الباب ويا حلات ابراهيم وهو متقيف😍 كان وسييم وسيييم شديييد اليوم داك حتى انا اتخلعتا فيهو وقلتا ماشاء الله.. نوره دخلت قدامي وانا وقفت مديت ليهو يدي قلتا ليهو مبروك لصحبك قال لي مبروك لصحبتك.. ابتسمت كده وما اتزحزت من مكاني مسكني من يدي وقال لي تعالي من الطريق الناس داخلين لانو كنتا واقفه في باب الصاله.. لما مسك يدي وجراني❤ كانوا اول مره ابراهيم يلمسني فيها حسيت بقلبي بيدق بسرعه وقفتا جنبو مبسووطه وكأني بحتمي بيهو حتى هو كل مايعاين لي يلقاني مبسوووطه بوقفتي دي ونحنا بنستقبل الناس .. لحدي ما العرسان جو وزفيناهم وبعدها رقصنا ورقصنا واتفشيينا كانت اول حفله تلمني انا وابراهيم حفلة رندا.. بعد خلصت وودعنا العرسان ومشوا الفندق ابراهيم سلم على عمي وعلى مرتو ونوره استأذنتا من عمي ارجع لي بيت ناس رندا مع امها لانو في حاجات مفروض نرتبها وسمح لي امشي.. ابراهيم الكان حيوصلني انا وام رندا مشينا وتميت باقي شنط رندا ورفعناهم ومشينا الفندق وصلنا ليها الشنط بعدها ابراهيم قال لي اوصلك البيت! قلتا ليهو وانا متردده مادايره ارجع طيب وصلني.. ونحنا في الطريق للبيت فجأة غير الشارع قلتا ليهو ابراهيم ماشي وين😳 قال لي حتعرفي هسي.. مشينا لبيتنا انا وابراهيم المكتوب باسمنا نزلني هناك ومسكني من يدي دخلني جوه البيت فتح الانوار كلها كانت اول مره اشوف البيت الكنتا مصمماهو من زمااان😍 قلتا ليهو ابراهيم😍 ماشاء الله البيت حلوو شدييد بس جينا هنا ليه! قال لي البيت حيكون حلو لما يسكنوهو اسيادو.. قلتا ليهو مافهمتك! جا قرب مني وقال لي لو مرتي رجعت تكون مرتي من جديد وجابت لي اولاد بشبهوها وحلويين زيها.. قلتا ليهو ابراهيم! قال لي القرار في ايدك بعد كده وطفى الانوار وطلعنا وصلني البيت طبعا اليوم داك ماقدرتا انوم وقعدت يوم واتنين بفكر في كلام ابراهيم.. ماقدرتا اصبر اكتر وانا دايراهو وللان بحبو ونفسي اكون ليهو.. مشست لي عمي قلتا ليهو ابراهيم داير يرجعني! قال لي وانتي؟ قلتا ليهو ماعارفه ياعمي .. قال لي ابراهيم راجل ود رجال ياسندس وللان هو دايرك كان في يدو يعرس وحده واتنين وتلاته بعد ماوضعو اترفع بس هو ما فكر يشوف غيرك.. قلتا ليهو وهو مافكر يراضيني قبل كده! قال لي كان منتظر رجعتك للسودان لانو كان عارف انك حترجعي ولو على ابراهيم ينتظرك عمر كامل ياسندس.. قلتا ليهو عايزه استخير اول مشيت صليت وجيت رقدتا في سريري وخليت امري لي الله بعد شهر جات رندا راجعه ونزلت في شقتها مشيت ازورها وكلمتها بي ابراهيم قالت لي اسمعي كلام قلبك بس! قلتا ليهر زمان كنتا قايله روحي ماحاقدر اعيش بدونو بس ربنا اختبرني فيهو وانفصلتا منو وعشتا بره من غيرو وقدرتا اقوي نفسي من غيرو.. قالت لي طيب قدرتي تشوفي غيرو! قلتا ليها ما قدرتا يارندا😭 قالت لي ده جواب لأسئلتك.. سندس انتي بتشتاقي لي شوفتو في الدقيقه مية مره
قلتا ليها اي بحبو يااخ بحبو شدييد قالت لي ومنتظره شنو.. قلتا ليها فعلا منتظره شنو اكتر من كده شلتا تلفوني وضربتا ليهو واول ماردا قال لي حبييبي اتاخرتي في الرد قلتا ليهو ماتقول لي حبييبي قال لي اقول ليك مرتي،! ضحكتا وقلتا ليهو عرفتني كيف وافقتا قال لي الاتنين عارفين اننا بنحب بعض شديييد ولو مارجعنا لي بعض حنقضي عمرنا كده.. قلتا ليهو انت عارف انا وافقتا ليه! قال لي ليه؟ قلتا ليهو لانو نفسي اجيب اولاد وبنات سمحييين شديييد زيك.. ضحك شديييد كدهه❤ وقال لي الاولاد يشبهوني والبنات يكونو مزز زيك.. بعدها قعدنا اسبوعين بنتكلم كاننا اول مره نتكلم ونتونس مع بعض .. وفي يوم السبت جا ساقني من الصباح طلعنا فطرنا واتغدينا سوا وشربنا قهوه في مشغلي.. بعدها قعدنا في الارض الاتنين قال لي انا نفسي اعمل ليك حاجه.. طوالي نططتا عيوني وقلتا ليهو ابراهيم احسن ليك😡 قال لي كدي اهدي اول واسمعيني للاخر 😂😂 انا نفسي نعمل عرس زي الناس.. واشوفك بفستان زفاف ونعمل الفرحه الاتحرمنا منها بسبب الظروف.. ابتسمتا ليهو وقلتا ليهو" من تواضع لله رفعه" نحنا رضينا بالمقسوم وربنا فتحها علي وعليك.. ربنا عوضنا يا ابراهيم الوجع العشناهو كلو قال لي ويخلق الله من رحم الوجع سُندسا قلتا ليهو بالمناسبه قصدك شنو بالجمله دي قريتها في صفحتك قال لي انتي سبب اوجاعي وانتي سبب راحتي ما بقدر اتخلى عنك ولا قدرتا اصل ليك.. قلتا ليهو وانا جنبك هسي❤ قال لي انتي كده حتخليني اغلط😂 سحبتا ييدي من يدو وضربتو في كتفو قلتا ليهو قليل ادب👋 قال لي موافقه! ابتسمتا وقلتا ليهو في وحده بترفض تلبس الابيض لحبيبها؟ ..
بدينا تجهيزات العرس من اول وجديد.. المره دي عرسنا غير دي اول مره البس فيها زفاف واعيش حلم اي بنت اخترتا الزفاف والميك اب مع رندا وجرينا في تجهيزات العرس اما الشيله 😍 صممتا الملابس انا على زوقي وخليت العمال يتضغطوا خلال تلاته شهور كانت الشيله جهزت من بيت وطلعه وتياب ومطقمه والريحه كانت جهزت من خالتي ونوف النزلوا السودان عشان يحضروا العرس.. جابوا معاهم الريحه جاااهزه😍😍 وجا يوم المنا اليوم الشفتا فيهو ابراهيم بالبدله وكانت اسمح راجل شفتو في حياتي😍 .. ماشال عيونو مني وانا داخله الصاله بالفستان والزغاريد والفرح عمى المكان.. عمي ومرتو ونوره وعثمان ورندا الكانت حامل ليها شهر وماجد وخالتي ونوف الكانت اول مره تحضر عرس سودانين في حياتها. وحتى اهل ابراهيم ابوهو ومحمد ومرتو وشذى ورغد واولادها ... وانا كانت عيوني على سيد الناس❤ ممكن اسمي اليوم ده يوم فرحي.. لاني عشتا فيهو الفرح بكل انواعو.. وسط اهلي وفي بلدي وجنب سيد ريدي.. السودان ❤ الشال ذكرياتي الحلوه رجعها لي من اول وجديد وخلاني احب البلد تااني.. انتهى العرس ورغم اننا اصحاب، ملك وعندنا امكانيات بس كان نفسنا نقضي اول اسبوع في بيتنا.. دخلنا البيت انا وابراهيم ❤ واول كلماتو كانت " بدت بينا الحكاية سلفني كتاب روايه واشعار لنزار قباني قريتها جنس قرايه😉 " خشي برجلك اليمين يا مرتي السمحه شديييد...
مرت سنتين من عرسنا وجبتا اول ولد سميناهو ماجد وبعدها جبنا تلااته بنات رهف و رندا وريم حتى ولد تاني سميناهو محمد...

🌹🌹🌹🌹🌹🌹🌹
مرات القسمه بتكون غريييبه.. بتتأخر وبتجي بعد فتره.. ما اي بعد بتكون نهايتو مره.. مرات البعد بقوي الزول زي ماقوى سندس ورجعها انسانه قويه وقادره تستحمل اي وجع يمكن فترة البعد جات هشان تثبت لي سندس انها قويه بنفسها بتقدر تعمل اي حاجه وفعلا قدرت تتحول لي مصممه قويه عملت لي نفسها عز وملك بمجهودها صنعت لي نفسها مستقبل بقوة شخصيتها الاتولدت من رحم الوجع.. احيانا الوجع بقوي الزول شديييد بس لازم يكون ايمانو قوي والا الوجع بينتهي منو.. ولانها زوله كانت مؤمنه بالقدر شديييد واستحملت كل انواع الوجع.. قدرت تتغير لوحده تانيه فترة البعد ورتها انو بتقدر تستمر من غير راجل ومن غير حب.. انها بتقدر تعيش من غير ابراهيم ومن هناك اتولدت امرآة اخرى❤رجوعها لي ابراهيم لانها بتحبو من جواها ما لانها مابتقدر تعيش من غيرو.. سندس ماعرفت المستحيل يوم باصرارها وعزيمتها قدرت تبني شخصيه قويه ..
كلنا بنقدر نستمر ونعمل اي شي محتاجين لشوية قوه وثقه بالنفس وقبل كل ده اراده وعزيمه وتوكل على الله... ورضاء بي المقسوم.. ومن تواضع لله رفعه.. ويخلق الله من رحم الوجع سندسا

دمتم بخير🌹
#Sansona