نحنا من يوم العرس تما في حياة ابوها واديناكم بتنا كنا موصيين ابراهيم يخلي بالو منها ويختها جوه عيونو .. اساءة ابراهيم لسندس ما كان مفروض تحصل و لما الراجل يخلي مرتو تطلع بالليل براها يبقى انو ماقادر يحافظ عليها.. ابو ابراهيم قال ليهو نحنا بنعتذر عن الحصل بس ده كلو كلام حريم وحركات نسوان بس ما في داعي نكبر الامور اكتر من كده عمي قال ليهو بس زوجتك اهانت اخوي ومرتو المرحومين! وما عاملت البت اليتيمه دي كبنتها.. قال ليهو حقك علي بس ولدي كان خاتيها جوه عيونو والله قال ليهو طيب ليه ولدك ماوقف مع مرتو وعارفها ماغلطانه ابو ابراهيم قال ليهو ولدي غلط وانا بعتذر بدلو.. ابراهيم قال ليهم لا يا ابوي ماغلطتا سندس اتمادت ومدت يدها على اختي من غير اي اعتبار لي انها الكبيره وقدام الناس اهانتها.. طوالي انا اتكلمتا وقلتا ليهو وانت كنتا ويين لما امك ضربتني كف؟ قال لي دي امي يعني دايراني اضربها زي ماضربتك مثلا؟ عمي قال لينا يا اولاد كدي استهدوا بالله بعدين الامور مابتتحلا كده قلتا ليهو ياعمي انا دايره ورقتي تصلني وبس.. ابو ابراهيم قال لي ياسندس انتي ماصغيره وواعيه ماشاء الله ما ممكن في اقل مشكله دايره تطلقي الطلاق مابالبساطه دي قلتا ليهو لما الراجل ما يعرف كيف يحافظ على مرتو ويقيف معاها يبقى مافي داعي يستمروا في العلاقه الفاشله دي.. عمي قال لي سندس 😡 اسكتي وخلينا نتكلم بهداوه قلتا ليهو ابراهيم لو بقى اخر راجل في الدنيا انا ما دايراهو وانا ماحارجع لي ناس زلوني واهانو اهلي ولو بقوا احسن خلق الله.. ابراهيم وقف على حيلو وقال لي ولا انا حاقدر استمر في الزواج ده بعد كده يومين وورقتك تصلك في بيت اهلك.. وعاين لي عمي وقال ليهو ماعندي كلام اقولو اكتر من كده بتكم تخلوها عندكم لحدي ما ورقة طلاقها تصلها.. لحدي الوقت داك ما كنتا قادره اصدق ابراهيم! اتخلى عني بالبساطه دي! ابراهيم ما دايرني خلاص.. ولا فكر حتى يراضيني؟ قلتا لي عمي يلا ارح وطلعتا قدامو بدون ما اتناقش مع زول.. ابو ابراهيم قال ليهو يا ولدي ده كلام شنو البتقول فيهو ده؟ ابراهيم قال ليهو انا مادايرها بعد ده.. عمي كان غضبان شدييد من ابراهيم وقام على حيلو وقال ليهو يوميين بالكتير وتطلقها وطلع بره قال لي تاني ماعندك دخله للبيت ده.. ديل مابعرفوا يحترموا زول لا حي ولا ميت وابراهيم ما الراجل البسندك في الدنيا دي وارح قدامي يلا.. مشينا للبيت واحنا الاتنين مضايقيين من ابراهيم ومن ردت فعلوا لما وصلتا ودخلتا البيت كنتا مخلووعه وماقادره افهم كيف بين يوم وليله قدري يتقلب ويتغير وفجأة كده ننتهي في ثواني انا وابراهيم! على قدر ما اصريت علي الطلاق علي قدر ما زعلتا لما ابراهيم وافق يطلقني طوالي.. جاتني رغبه بالبكا ودموعي كانت في حافة رموشي بس برضو مانزلت ماعارفه السبب الخلاني اغالب دمعي واتصبر شنو! لما طلعنا نحنا ابو ابراهيم حاول يقنع ابراهيم يتنازل ويعتذر بس ابراهيم من يوم عرفتو كلمتو واحده مابتتغير وما بتراجع وما بتأسف ودي كانت من عيوبو.. عدو يومين علينا وجاتني ورقتي في البيت💔لما قريتها وعرفتا اني اتطلقتا منو ماقدرتا امسك دموعي اللحظه ديك بكيييت بحرقه من جوه قلبي ياخ ده حب تسعه سنيين كيف ينتهي ببساطه كده! بس حبي لاهلي كان اكبر من اني اتحمل زلة من زول حتي لو كان الزول ده ابراهيم..
حسيت بوجع غريب دخل لجوه صدري.. كان بيخنق فيني وكأنوا قلبي بقول لي كيف تصلي للمرحله دي مع زول انتي عارفه نفسك مابتقدري تستمري بدونو.. ما كنتا عارفه حال ابراهيم كيف ولا اذا زعل ولا لا وما كنتا قادره اعرف اخبارو بعد طلقني كان نفسي الاقيهو بعد الطلاق واعاتبو لي انو خذلني واتخلى ببساطه عني. اي صاح انا الطلبتا الطلاق وانا الاصريت وانا الما رضيت الزله بس برضو كنتا حاسه انو حيرفض وحيتمسك بي لكن للاسف خذلني💔خلاني اجرب نوع جديد من الخذلان ووجع طعمو تاني فيهو جزء من الحسره والندم بصراحه كان اول قرار اندم عليهو في حياتي.. حسيت اني بقطع علاقه مع زول علاقتي معاهو من انا طفله مع زول ربيت علي يدو واتعلمتا الحب منو وفيهو حسيت اني خسرتا اهلي تاني واني رجعتا وحيده وحيده شدييد💔 بس عزة نفسي الخلتني اعمل كده واتحمل الوجع ..قعدتا يومين بعد الطلاق حتى قدرتا ابكي كنتا حابسه دموعي ليه ماعارفه بس ماقدرتا استحمل اكتر من كده بكيييت بكيييت من جوووه اعماقي.. بس لسه كان جوايي غضب اتجاه ابراهيم غضب ما قدرتا اتجاهلو.. ولما تخسر الناس البحبوك وبستحملوك في الدنيا يادوووب حتجرب احساس الوحده ده العشتو بعد خسرتا ابراهيم لما سمعتا مرت عمي الكنتا معتبراها زي عمتي وبتحبني يمكن اخدتني الطيبه عشان احس انو الناس كلهم بستحملوني وبحبوني بس للاسف ما كانوا كده.. يوم الخميس الصباح بعد غسلتا وشي وجيت اشرب الشاي مع عمي ومرتو ونوره.. سمعتهم بتكلموا في الصالون براهم مرت عمي كانت بتقول لي عمي انو سندس حتقعد معانا لحدي بتين؟ كان بقول ليها دي بت اخوي تقعد ماتقعد ماليك دخل فيها نوره كانت بتقول ليها يا امي البت يتيمه عايزاها تحوم في الشوارع زي الما عندها اهل! قالت ليها قعدتها معانا ماصاح بعدين عندك اخوانك في البيت والبيت براهو شايلنا نحنا لما تجينا بلوه فوق راسنا.. لما سمعتا كلامها ماقدرتا اتمو حتى جريت دخلتا الغرفه قعدتا براي زعلانه على روحي وعلي شفقة الناس وعلي الدنيا المرمتتني اتذكرتا خالتي الفي الامارات قلتا ماعندي امل غيرها شلتا تلفوني وضربتا ليها ماردت علي.. ما كانت عارفه حاصل لي شنو بعد مسافه طويله رجعت لي واول ماسمعت صوتها سلمت علي بفرحه كبيره وسالتني من اخباري ومن ابراهيم💔 قلتا ليها خالتي نحنا انفصلنا.. الخبر كان مفاجأة بالنسبه ليها اتصالي مامتوقع وخبر طلاقي من ابراهيم ما متوقع قالت لي سندس انتي كويسه؟ " ياااه يا خالتو انتي الوحيده السألت من حالتي ومن مشاعري ولا زول فكر يسألني انتي كويسه بعد خسرتي روحك قلتا ليها الحمد لله وبكييت طوالي بقت بتسكت فيني في التلفون وبتقول لي اهدي خلاص ما تزعلي.. كلو لخيير وانتي لسه في بداية عمرك اي زول يتمناك واي زول نفسو تكوني مرتو.. كنتا عارفه انها بتطيب في روحي بس ما اكتر وبتحاول تصبر فيني قلتا ليها ياخالتي انتي قبل كده كنتي عايزه تسوقيني معاك؟ قالت لي اي وانتي رفضتي قلتر ليهر انا عايزه اجي اعيش معاك هناك ممكن؟ فرحت بطلبي ده وهي الوحيده الحسستني انها اتبسطت شديييد لما قررتا اعيش معاها قالت لي اديني اسبوع بس وحتجينا هنا وتشرفينا حبييبتي من زمان كنتا مستنيه تجي وتقعدي معاي.. قلتا ليها طيب مستنياك وقفلتا على كده بدون تفكير حاقدر اعيش كيف في بيئه مافيها ريحة ابراهيم!
بعدها مشيت لي عمي وقعدتا شربتا
معاهو الشاي وقلتا ليهو ياعمي انا ضربتا لي خالتي وطلبتا منها ترسل لس اقعد معاها فتره.. قال لي سندس كيف تقرري حاجت زي دي من غير ما تاخدي اذني؟ قلتا ليهو عارفاك حترفض لو قلتا ليك قبل كده قال لي تقومي تتصرفي من وراي؟ قلتا ليهو انا لازم اسافر وابعد ياعمي عشان نفسياتي ترتاح لاني تعبتا شديييد الفتره الاخيره دي عليك الله ماتزعل مني وتزيد همي لو سمحتا اسمح لي اسافر بدون زعل.. عاين لي بحنيه كده وشافني بترجا فيهو بدون روح 💔وجسمي خلاص فتر وارهق من الوجع المحتويهو.. ماحبا يناقشني ويزعلني وقال لي طيب سافري اذا كده بترتاحي وفي الاخر دي خالتك مازوله غريبه عنك.. مرت عمي قالت لي يعني كنا دايرينك تقعدي يا سندس معانا بتيين مالحقنا نشبع منك.. عاينتا ليها وانا مستغربه من النفاق البمثلها المره دي! بطني طمت منها وماقدرت ارد ليها زاتو بس ابتسمتا وقلتا ليها احسن كده.. نوره كانت متأثره بقراري ده جات قربت مني وضمتني شديييد وكانت عايزه تبكي بس مسكت دموعها.. حضنها كان بمثابة ياسندس ما تمشي وكأنها بتواسي وجعي بي ضمتها لي..
مر الاسبوع وانا منتظره بفارغ الصبر خالتي ترسل لي كنتا حابه اتخارج بي اسرع وقت .. خالتي رسلت لي و جهزتا من كل ناحيه ورق و شنط وحتى عمي ونوره ودعتهم وطلبتا منهم مايمشوا معاي المطار.. ماكنتا حابه اشوف دموع وداعهم لي وماكنتا دايره احس بفراقهم من البيت ودعتهم وطلعتا للمطار انتظرتا الرحله براي بدون اي زول حتي رندا ماكانت عارفه بالحصل لي ده كلو لا عارفه اني اتطلقتا ولا عارفه اني حاخلي السودان وحسافر عشان ابدا حياه جديده بعيده من اي حاجه فيها ريحة ابراهيم بس كنتا منتظره الاقلاع بفارغ الصبر.. اقلعت طيارتي وخليت السودان بكل مآسيهو وذكرياتو الموجعه وصلتا ارض الامارات عشان ابدا حياه جديدة بس في جزء من الذكريات مابنقدر نتخلص منو دايما جزء مهم شديييد وبمثل نص عمرنا العشناهو.. والجزء ده كان ابراهيم اهم جزء في حياتي ماقدرتا اتخلص منو حتى بعد سفرتي للامارات
يتبع.....
