صحينا الصباح سوا لقينا الوقت متأخر والضهر قرب قلتا لي ابراهيم الضهر قرب نحنا نمنا كتير والصبح ما صليتو قال لي حبييبي انا صليت الصبح لكن لقيتك نااايمه قلتا اخليك تصحي براك وجيت نمتا اول مره انوم طوالي بعد الصبح تصدقي قلتا ليهو اي شي حيبقى بشبهني في البيت ده قال لي ياريت لو اي شي يبقى زيك ده يوم العيد قومي يلا ياعروسه اتجهزي وصلي وانا حاعمل فطور خفيف لينا تمام😘 قلتا ليهو طيب حبيبي قايمه ومشيت استحميت وصليت الضهر كان اذن لكن كنتا جعانه ونفسي في شاي ابراهيم لقيتو نضف الغرفه وجاب صينية الفطور وختاها وانتظرني لما جيت قال لي عايزه نفطر طوالي ولا نصلي اول قلتا ليهو نفطر لأني جعانه كنتا بتكلم معاه وهو مقبل على الصينيه لحدي ما قربتا منو واتلفت لقاني جنبو لابسه فستان كوبي ليهو حزام من النص بالأبيض ورافعه شعري ومنزله خصل وعامله كحل وقلوس وبدره خفيفه ومتعطره بعطري لانو ماعندي ريحة سودانيه لما شافني ابتسم من الفرحه قال لي حبييبي انتي كل يوم بتبقي احلى من القبلو قلتا ليهو ماتخجلني ياخ قال لي انتي حلوه كده ليه ياخ كل ما اشوفك بحس انو دي اول مره بشوفك فيها تعالي قربي.. قربتا منو شال يديني الاتنين ومسكهم ضماهم بي يدينو الاكبر مني بشوويه وقال لي من اول يوم نزلتي ليهو الجامعه وبقيتي بت كبيره وواعيه كان نفسي تكوني مرتي وما اتمنيت وحده غيرك اصلا ولا يوم ياحبيبتي قلتا ليهو طيب يا حبيبي مرتك حتمووت من الجوع خليها تاكل وبعداك اتفرج فيها زي ماعايز ماهي اصلا حقتك براك.. ضحك وقال لي طيب اتفضلي ياحلوه وانا الحأكلك بنفسي عاينتا للصينيه لقيتو محضر لي جبنة بوك البحبها ونوتيلا وجبنة مضفره وزيتون ومارتديلا وعيش رجيم لأني كنتا بحب العيش ده شدييد و عصير ماذا قلتا ليهو ابراهيم 😍 بتين جبتا الحاجات دي قال لي لما انتي يا استاذه قعدتي سنتين في الحمام قلتا ليهو يا سخيف😒 انا عروسه بعدين طبيعي اقعد في الحمام واجهز روحي عشان حضرتك تتخلع لما تشوف جمالي.. قال لي انتي مالك هسي زعلانه كده 😂😂💔خلاص اسف ياعروستي اقعدي سنيين في الحمام وما حأسألك تاني.. قلتا ليهو اسكت مني يلا قال لي سندس انتي ليه مابتلبسي حجل؟ قلتا ليهو حجل شنو هسي! لبستي دي مامحتاجه اي حجل.. قال لي تتذكري الحجل اللبستيهو اليوم داك في الجامعه؟ قلتا ليهو اي قاعد معاي مالو؟ قال لي وين خاتاهو؟ قلتا ليهو في الرف الفوق قال لي دقيقه طيب.. مشى جاب الحجل وقعد في الارض ورفع رجلي البعتر بيها في رجلينو ولبسني ليهو وقال لي لما لبستيهو في الجامعه عجبني شدييد بس ابيت اظهر ليك كده لأنك لبستيهو للناس كلها حسيت انو دي حاجه بتخصني براي ومامفروض زول يشوفك ليهو غيري بعدين عايني حلو كيف في رجلك الحلوه.. قلتا ليهو ابراهيم ❤انت العيونك حلوه عشان كده بتشوفني حلوه الوقت كلو بجد انا محظوظه بيك والله قام على حيلو وقعد جنبي واكلنا فطورنا ولقمه مني ليهو ولقمه منو لي وبعدها قمنا طلعتا الحجل واتوضيت وصليت وراهو زي كل مره وجيت لبستا الحجل تاني وقعدتا.. ابراهيم كان طالع للشغل وجهز و جا ودعني ومشى، قعدتا شويه كده بحضر في اللابتوب تلفوني ضرب رديت لقيتها دي رندا..
_ حبييبتي والله اشتقتا لييك
رندا: اسكتي يا كلبه ياخاينه انا مش قلتا ليك حتتغيري معاي بعد العرس
_ رندا ما تقولي كده حبييبتي
رندا: مادايره كلام معاك لقيتي ابراهيم ونسيتي الدنيا صحي اللي لقا احبابو نسى اصحابو
_ يا بني بطلي كلامك ده هسي وطمنيني انتي كيفك؟
رندا: يعني هاماك شدييد صح.. اقسم بالله لو ما عشرتنا ما كان جيتك افتحي باب الشارع يا زفته انا بره
_ بره 😍 يعني جيتيني حبييبتي دقايق بس البس توبي وافتح ليك..
" اول ما فتحتا الباب ليها نست الشكله والزعل واخدتني بالاحضان صحبتي سندي البتريدني سلمت علي وابت تفكني من حضنها بتذكر اخر مرت اتلاقينا قبل شهر واخبارنا اتقطعت حتى بالتلفون.. سلمت علي ودخلنا بيتي جوه طبعا هو صغير ومابقدر ادخلها الغرفه قعدتها بره في البرنده بتاعتي وقلتا ليها دقيقه اجيب ليك مويه حبيبتي مشيت بهناك البيت مافيهو غير ام ابراهيم ورغد دخلتا المطبخ لقيت رغد بتعمل في مكرونه بالجبنه قلتا ليها رغد ازيك قالت لي كويسه الحمد لله و سكتت مشيت التلاجه كبيت مويه بارده في كبايه وكبيت مويه بارده عشان اعمل عصير ليمون شلتا ليمونه وقطعتتها رغد كانت بتعاين لي بطرف عينها ولما قطعتها قالت لي انتي عارفه الليمون بقى بكم؟ قلتا ليها بكم؟ قالت لي لو كنتي بتصرفي في البيت ده كان عرفتي قلتا ليها نعم؟ قالت لي ما كل دقيقه تفتحي التلاجه وتشيلي براحتك دي ما تلاجة ابوك.. عاينتا ليها وسكتا وكتمتها جواي كبيت السكر ودموعي في عيوني وشلتا العصير والمويه لي رندا وطبعا لاحظت لي خلقتي اتقلبت قالت لي مالك يابت في شنو قلتا ليها مافي حاجه ودموعي في عيوني.. قالت لي سندس! قلتا ليها مافي شي يارندا انتي اخبارك شنو والحاصل ليك احكي لي؟ قالت لي والله مع الخدمه الوطنيه وجرجرتها الكتيره قلتا ليها واها مافي عريس؟ قالت لي سندس ده الجيت اقولوا ليك تتذكري صاحب ابراهيم اللاقيتو في عقدك قلتا ليها ايوا ماجد اظنو؟ قالت لي بس ياهو زاتو 😍 طبعا نحنا ربطنا من الوقت داك ياسندس وامورنا ماشه كويسه والحمد لله بنتكلم وبنتعارف على بعض بس عايزه اعرفو اكتر من ابراهيم قلتا ليها ايواا يعني من وراي عايشه حياتك مش قالت لي مش لما تفضي لي انتي بالأول يا استاذه.. كم مره كنتا بدق في رقمك ومابتردي ومرات بتصل على ابراهيم وبكون بره البيت صحي هو كيف يابتي؟ قلتا ليها تمام والله لكن مشغول شديد اغلب الوقت بكون قاعده براي قالت لي ليه بتقعدي براك ياسندس وفي ناس عمك؟ قلتا ليها ماحابه امشي البيت هناك قالت لي طيب ونسابتك؟ قلتا ليها نسابتي ديل خليهم براهم عليك الله قالت لي يعني ما كويسين صح؟ قلتا ليها والله بحاول اتجنبهم قدر ما اقدر لكن لازم تحصل نقاشات و كلامات بعدين ام ابراهيم صعبه يارندا شديييد قالت لي اوعا تكون غلطت معاك؟ قلتا ليها هي ام ابراهيم في الاخر انا ماحاقدر اعمل ليها شي بس ماعارفه هي شاماني كده ليه! قالت لي احتمال بتغير وده شي طبيعي انو ولدها واخر العنقود وكده قلتا ليها طيب دي فهمناها رغد دي مالها ناشفه معاي ومعاملتها سيئه ولازم تعاين لي بعين حقاره بتقتلني من جوه قالت لي سندس خوفتيني عليك حبيبتي قلتا ليها ماتقلقي ابراهيم معاي وفي اي شي بسندني وانا عشانو حاستحمل اي شي والله قالت لي برضو ماتخليك مسكينه عشان اهل ابراهيم مايحقروا بيك يا سندس 😢 ماعايزاهم يأذوك.. قلتا ليها ماتخافي مافي شي بجيني بعدين انا مابخلي زول يغلط معاي ويتمادى.. قالت لي اها وابراهيم علاقتو كويسه معاك بعد العرس ولا اتغير قلتا ليها بالعكس يا رندا العرس حلو بالمناسبه ماتخافي من الحاجه دي وماتقلقي ابراهيم هو زاتو وبالعكس دلعو لي زاد.. عموما انتي عارفه اني ما البت النقناقه ديك والبتجيب الهم والنكد وحتى بعد العرس ماكنتا المره الكعبه الجنها مشاكل بالعكس والله دايما كنتا بحب اهظر واتونس معاهو حتى تصدقي للان ماجبتا ليهو سيره بي حركات امو واختو.. قالت لي طيب شذى موقعها شنو! قلتا ليها شذووويه دي صحبتي الجديده الشالتني منك 😛 قالت لي سندس😡انا كده بغير انتي صحبتي برااي بعدين مافي زول بجي محلي يا بت احسن ليك قلتا ليها انتي منو الزييك يا سكرتي تعالي ابوسك حبييبتي 😘😘 قالت لي والله بحبك شدييد ومابرضى فيك ولا بحب زعلك انتي اختي ياسندس في اي وقت حتلقيني جنبك بعدين انتي قايله ابراهيم براهو البعزك لا ياستي انا بعزك واكتر منو لانك حبيبة قساي.. حضنتها شدييد وحسيت بي ريحة اهلي في رندا من طيبتها وعفويتها وقلبها الابيض حسيت اني عايزت ابكي من غير سبب في حضنها بس مسكتا روحي عشان تطمن علي وماتقلق.. قعدنا اتونسنا وبقت بتحكي لي عن ماجد واخبارو وبعمل شنو وسمعتها وانا مبسوطه الزوله دي مر اتغيرت معاي من عرفتها اربعه سنين وهي على نفس الحال والطيبه
لحدي العصر كده صلينا سوا وكان لازم اخت ليها تتغدا معاي حتى تطلع ما كنتا دايره امشي المطبخ تاني خصوصا بعد السمعتو من رغد شلتا تلفوني ودخلتا الغرفه ضربتا لي ابراهيم قلتا ليهو حبيبي انا دايره قروش ضروري قال لي طيب امشي الدولاب ووصف لي مكان القى القروش وين قلتا لي رندا دقيقت البس ونمشي نتغدا بره هنا جنبنا مطعم بعمل كبسه رههيييبه مره ابراهيم جاب لي منهم قالت لي طيب.. قلتا ليها اي عشان اغير جو من قعدت البيت اتحججتا بي كده عشان ما تتحسس ولبسنا وطلعنا اتغدينا وجيت راجعه فتحتا الباب وقعدتا جوه اقلب في الفيسبوك بتاعي لاقاني بوست كنتا كاتباهو من سنتين " ولما يبدا صباحك بي اعز الناس على قلبك ربنا يخليكم نعمه دايمه حبايب قلبي التلاته " قبلتا على الحيطه بعد قريت البوست وبكييت لاني اتذكرتا اهلي بقيت ببكي وببكي من جوه قلبي لما انهرتا براي.. الوقت داك جا ابراهيم دقا الباب ما قدرتا افتح ليهو فتحو بالمفتاح وجا داخل لقاني ضامه نفسي زي الاطفال ومدمدمه بالتوب وببكي وبعض في يدي.. اتخلع لما شافني كده رمى تلفونو في السرير وجا قعد جنبي وبسأل فيني سندس مالك؟ حصل شنو حبييبي؟ قلتا ليهو ابراهيم اناتعبانه قال لي متعبك شنو حبيبتي كدي قومي تعالي في حضني ضماني وقلتا ليهو اتذكرتهم عرفني قاصده اهلي ضماني بشده وقال لي اهدي ياغاليتي اهدي يا حياتي انتي
يتبع.....
