لوقت الغدا كده رندا كانت ماشه قلتا ليها اقعدي معاي نتغدا واطلعي قالت لي مابقدر لازم ارجع بدري عندنا عرس وماجهزتا لي حاجه البسها قلتا ليها تمام طيب نتلاقى.. حضنتني وقالت لي المره الجايه بجيب الفرن معاي شوفي راي ابراهيم شنو وكلمني ياسكره يلا خلي بالك من روحك قلتا ليها وانتي كمان.. طلعت وبعدها جا. داخل ابراهيم استغربتا انو جا بدري الليله مالو قلتا ليهو ابراهيم مالك خير ان شاء الله قال لي والله تعبان شويه خليت السوق قلتا اجي ارتاح قلتا ليهو يعني تاني ماطالع😍قال لي ومالك مبسووطه كده قلتا ليهو عشان طولنا ماقعدنا سوا في البيت قال لي طيب اخد لي دوش واطلع اصلي العصر القاك جهزتي لي الغداء يامرتي😉 قلتا ليهو تأمر ياخ انت بس.. مشيت بهناك اخت ليهو ياكل وبديت ارص في الصحانه جاتني امو قالت لي ابراهيم جا ولا شنو؟ قلتا ليها اي جا هسي داخل قالت لي لما يتغدا قولي ليهو امك راجياك.. قلتا ليها. طيب يا امي وختيت الغدا ومشيت بهناك لقيتو بصلي. في البرنده ختيت الصينيه في التربيزه وبقيت بعاين ليهو وهو بصلي😍 بعد سلم قلتا ليهو حرما قال لي. جمعا يارب الغدا جهز؟ قلتا ليهو ايوه تعال سمي بالله واقعد جا وقعد وجضمني كده قال لي سكره.. ابتسمتا ليهو وبدينا ناكل قلتا ليهو ابراهيم عندي موضوع عايزه اخد اذنك فيهو قال لي اتفضلي قولي
- ابراهيم الليله جاتني رندا واختك شذى كانت معاي هنا فطروا معاي الاتنين والله
ابراهيم: بالجد كويس. طيب ماكنتا عارف شذى جايه
- بصراحه اخترعوا لي فكره وانا حبيتها عشان بسيطه وساهله وبتسليني بدل قعاد البيت
ابراهيم: فكرة شنو! مالك بتطقطقي في اصابعك كده.. قولي ماتتوتري
- عشان انت رافض فكرة الشغل
ابراهيم: ايواا يعني الموضوع شغل؟
- اي يا ابراهيم بس والله في البيت ومامتعب وماحيرهقني
ابراهيم: والشغل شنو؟
- اعمل خبيز مشكل وابيعو ورندا قالت لي حاجيب ليك الفرن مني بس خلي ابراهيم يديك راس المال للمواد وكده وتبدي تبيعي الجرادل للمناسبات وكده وشذى قالت لي اول وحده حاخد منك انا واشجعك.. الموضوع عجبني بصراحه والله ومافيهو ارهاق وفي البيت يا حبيبي
ابراهيم: سندس انا منقصك حاجه؟
- لا طبعا حاشاك
ابراهيم: عارف اني ما موفر ليك الراحه الكافيه بس بحاول وانتي شايفه كده وعارفه تفاصيل اي شي
- ابراهيم ماقصدتا حاجه انا والله ماقصدي انك محوجني بس انا كنتا عايزه اساعدك عشان نكون نفسنا سوا ونبني مستقبلنا.. فيها شنو اذا انا ساعدتك برضو دي في النهايه حياتنا يا ابراهيم سوا وبرضو اذا انت ما موافق انا ماحاعمل كده الا برضاك
ابراهيم: ورندا ليه تقول ليك حاجيب ليك الفرن؟ انا ماحاقدر عليه؟
- لا يا ابراهيم ماتفكر كده عليك الله.. انت عارفها عفويه وبعدين هي القالت الفكره واتحمست وانا ما حبيت اكسفها لما قالت كده
ابراهيم: سندس انسي فكره الموضوع ده كلو من البدايه
- تأمر يا ابراهيم طيب اكل
ابراهيم : حاضر
- على فكره امك قالت عايزه تشوفك بعد تتغدا تمشي ليها
ابراهيم: طيب بشوفها مالها
" بقينا بناكل ونحنا ساكتين اي واحد بعاين للتاني ماكنتا بحب اكسر كلمة ابراهيم عشان حيقول النقص منو طوالي سكتا ونسيت الفكره بعد اتغدينا مشيت غسلتا العده وهو لما جا لي امو قلتا ليهو انا عملتا شاي بنعناع منتظراك لما تخلص تعالي قال لي تمام.. مشيت بعدة الشاي والبخور ختيتهم ودخلتا استحميت وفكيت شعري كنتا حابه اغيرو ومافي طريقه امشي الكوفير جبتا بيبسي وكبيتو في شعري وبعد كده فركتو لحدي مابقى كيرلي شلتا زيت لوز حبه كنتا خاته جواهو ريحان عشان بيدي ريحه حلووه للشعر ومسحتا منو حبه.. لبستا فستان قصير وردي وعملتا ميك اب حلوو.. ابراهيم سلم على امو وقعد معاها قالت ليهو يعني بقيت خلاص فارز عيشتك من غيرنا وما بتستشير زول في حاجه ولا الناس خلاص بقت ماعندها كلمه عليك قال ليها يا امي انتي بتقولي هسي كده ليه في شنو حاصل قالت ليهو مبروك والله ارصكم الفي بحري قال ليها الله يبارك فيك منو الكلمك قالت ليهو شذى اختك لو ما مرتك ورتها ماكان عرفنا قال ليها امي استعجلت شذى بس انا كنتا حاكلمك احنا يادوب استلمنا شهادة البحث ويادوب امبارح جانا خبرها يعني مافي زول عرف بس سندس بالونسه بتكون ورت شذى يعني ده ماموضوع نكبرو قالت ليهو هسي انا بقيت بكبر الموضوع انت بقيت مباري مرتك في اي موضوع قال ليها يا امي لزومو شنو هسي الكلام ده قالت ليهو طبعا ماطايق تسمع مني كلمه فيها بعدين انا عارفاها غتيييته بتكون قاصده توريني بفوق انو ولدك ما بكلمك عشان كده ورت اختك شذى عشان عارفاها حتوريني قصدها تفهمني انو ولدي بقى ماعندو ولي قال ليها امي الله يخليك ماتظلمي بت الناس ساي اكيد مافكرت في القصه دي قبل ماتكلم بتك سندس عفويه يعني انا بعرفها من الليله ولا من امبارح.. قالت ليهو لا طبعا عارفنك قضيت الجامعه حواامه مع السنيوره بتاعتك وخليتها تلعب بيك وتختك زي الخاتم في اصبعها قال ليها امي انتي بتعرفيني كويس مافي زول بمشي كلمتو علي بس انتي بتظلمي سندس كتير والله وهي ماعندها اي شي اتجاهك انا شايفها كيف بتحترمك وبتتحمل كلامك رغم انو حار بس بتسكت انا ماواقف مع وحده فيكم بس انتي ما كل مره تشكي لي منها..قالت ليهو يعني انا الظالمها دايما صح! شذى جات داخله لقتهم بتناقشو وعرفت الموضوع سندس قالت ليها امي ابراهيم كلامو صاح انتي خلي بت الناس دي في حالها مع راجلها وما تدخلي فيهم وتعملوا لينا مشاكل.. قال ليها شذى بصراحه سندس حصل اتكلمت ليك في امي ولا جابت سيرتها ولا شكت ليك عنها؟ قالت ليهو لا والله لامه خشمها عليها وساكته الوقت كلو وامك مابتقصر دايما مدياها كلام كل ماتجي بجاي.. قالت ليها يابت ماتنسي اني امك انتي وهو ومن قبيل بتتمادوا قال ليها امي عليك الله حاولي اتقربي منها مش انا ولدك البتعزيهو دي مرتي وانتي عارفه كويس انها ما مرتي بس هي صحبتي وحبيبتي ورفيقتي ماتخليني اقيف في النص بينك وبينها حاولي اتقربي منها وحبيها وشوفيها هي حنينه كيف وحتلين ليك طوالي يا امي بس انتي الصاداها منك.. شذى قالت ليهو ايوااا ورينا يارومانسي انت قلتا لي حبيبتك😉 قال ليها شذى اسكتي هسي مش شايفاني بتكلم مع ست الناس قالت ليهو والله انت اكبر مستهبل شفتو يا اخوي😂 .. قام على حيلو وباسها في راسها وقال ليها انتي امي وروحي ومافي زول بشيل محبتك مني غاليتي.. وطلع منهم لكن كان زهجان وظاهر في وشو جا دخل ورزع وراهو الباب عرفتو زهجان من حاجه حتى ماعاين لي بعد التعب التعبتو ده قال لي كبي لي شاي.. اتغظتا منو شدييد لانو ماشافني بقيت حلوه يعني 😡 قلتا ليهو كب براك انا طالعه بره.. استغرب من ردي ولما رفع راسو عشان يشوفني لقاني طلعتا البرنده بره شال صينية الشاي وجا طالع بره ويادوووب شافني😍 الزهجه طوالي راحت بس انا كنتا مكشره منو.. جرا التربيزه وجا قعد جنبي وختا الصينيه وكبا لي شاي وليهو كمان .. وانا بعاين ليهو من طرف عيني وساكته قال لي اشربي من كبايتي حبه عشان تطعميهو ياسكر😉 طوالي اتبسمتا والصره راحت من وشي وقبلتا عليهو قلتا ليهو ابراهيم قال لي عيونو 😘 قلتا ليهو تتذكر لما بنشرب القهوه في الجامعة كنتا بتقول لي اشربي عشان تطعميهو لي قال لي بتذكر اي😂 وكنتي بتصدقي وبتشربي.. قلتا ليهو ثقيل خلاص😏 انت مالك جايي زهجان كده.. قال لي من العلي قلتا ليهو والعليك شنو بالله عاين لي في عيوني وابتسم مساافه كده وقال لي
" عشق البنات حرام في مدينتنا.. عشق البنات طريق للغوايات.. اياك ان تلتقي يوما بامرأة.. اياك اياك ان تغزي الحبيبات.. ان الصبابة عار في مدينتنا فكيف لو كان حبي للأميرات "
بعد سمعتا الشعر قلتا ليهو حبييبي دي قصيدة انا وليلى صاح الغناها كاظم الساهر.. قال لي ايواا تتذكريها ايام الثانوي لما كنتا بقولها ليك طواالي.. قلتا ليهو بتذكر لما سألتك عنها وقلتا ليك انت ليه بتناديني ليلى قلتا لي عشان اصحابي سألوني منك وقلتا ليهم اسمها ليلى وبقوا يلاقوك في الشارع ومن وراي بشاغلوك ليلى ياليلى ياليلى.. قلتا ليهو ايواا يا كلب غتييت خلاص انت 😏 قال لي لازم كان احافظ عليك منهم ومافي طريقه بتمنعهم الا الكذب.. تصدقي لحدي مادخلنا اولى جامعه حتى عرفوا اسمك سندس 😂😂 كنتا سايقهم سوااقه 😂😂قلتا ليهو اي عارفاك لما تجي تتغاتت مافي زول بلحقك.. ماكفايه انك اول الدفعه 😏 قال لي وانتي مستاءه مالك يا حبيبي.. قلتا ليهو لانك ضيعتا علي عرسان بي اسم ليلى ده قال لي يعني لو عرفوا اسمك سندس كان حيتقدموا ليك 😂 قلتا ليهو اي لانو اسم ليلى ده ماجااي مع بت زي قال لي انتي عارفه بحبك كده ليه قلتا ليهو ليييه قال لي لأنك وااثقه من روحك شدييد قلتا ليهو انت لازماك وحده تكون واثقه يا بتاع ليلى 😏 قال لي على فكره شعرك حلو 😉 قلتا ليهو يعني عجبك 😍 قال لي عجبني انا وليلى😂😂 قمتا منو تاني قعدني جنبو قال لي بهظر ياخ.. بعدين انتي في حاجه ماعارفاها قلتا ليهو شنو قال لي ليلى كانت.. طوالي حمرتا ليهو😒 قال لي اصبري اتم ليك يا ام شفقه تعالي.. رقدتا على كتفو وبقى بهبش في شعري الكان عاجبو شديد وهو بحكي لي في قصة الاغنية انا وليلى .. قال لي ليلى دي اسم كناية لحبيبة الشاعر قلتا ليهو اسمها منو طيب الانسه قال لي اسمها سندس 😘 افتكرتو بهظر وماصدقتو قلتا ليهو هاهاهاها مستحيل طبعا قال لي والله اسمها سندس من منطقه اسمها كركوك في بغداد.. حسن المرواني ده شاب من منطقة الزعفرانيه من بغداد دخل الجامعه كلية الآداب وعجبتو سندس دي❤ حباها شدييد وقلبو اتعلق بيها كانت جميلة شدييد و عاجبه ناس الكليه كلهم بس مافي زول غير حسن ده حباها شدييد ومن جوه قلبو كده.. قمتا من كتفو عاينتا ليهو بحبو وابتسمتا رجعتا لكتفو تاني وقلتا ليهو كمل 😘 تاني مسك شعري وهو بحكي وبمرر اصابعو في خصل شعري قال لي بعد كده حسن اتشجع ومشى صارحها انو بحبها بس هي كانت شايفه روحها شويه وقالت ليهو حبك مرفوض.. قعد سنتين وهم في نفس القاعه بشوفها كل يوم وحبو بزيد كانت حاجه حاره يشوفها من بعيد وهو من جواهو دايرها تكون حقتو براهو تاني مشى
قال ليها انا برييدك ياسندس وتاني صدتو.. من اليوم داك بقى بكتب شعر من جواهو من قلب مجروح وطلع كلمات ما عندها شبيه الناس اتخلعو من القصيده الكتبها لانها كانت فريده.. سندس اتقدم ليها شاب ما من نفس الكليه لكن شاب ومتعلم وشكلوا مرطب واتخطبت ليهو.. لما نزلت الجامعه وحسن شافها مخطوبه القصيده اكتملت وهو من البدايه ما كتبها باسم سندس بس باسم ليلى عشان يحافظ عليها بعد سندس جات القاعه والناس باركوا ليها وقف حسن فوق والقى القصيده وعيونو مليانه دموع بقاوم فيها.. طبعا سندس عرفت انها البت المقصوده فما قدرت تستحمل منظروا وقلبو مكسور كده وطلعت بتبكي جاريه من القاعه هو لما شافها بكت وقف طوالي والناس اتبهروا من الكلمات طلبوا منو يعيدها فقال ليهم طيب لكن بشرط سندس تسكت وترجع للقاعه وفعلا زملائها طلعوا هدوها واقنعوها ترجع عشان يلقي القصيده والقاها تاني..
بعد خلص ابراهيم رفع راسي وقال لي لكن سندسي انا حافظت عليها وما خليتها تبقى حقت زول غيري... انتي عارفه لو كان حصل كده لاقدر الله انا ماكنتا حاعرس بنت غيرك
يتبع.....
