قعدنا كلنا ومشيت جبتا ليهم العصير باارد قدمتو ليهم سميه و ابتسام السودانيات ونوف ونجوان ومناير الاماراتيات كلهم كانوا متأنقين ولابسين حلو شدييد بصراحه عجبوني واتمنيت لو كنتا زيهم بدوا يتكلموا عن البزنس وخالتي معاهم وانا بعاين ليهم نص الكلام انجليزي ونصو عربي كنتا مبسوطه وانا براقبهم وهم بتناقشوا في مواضيع المرأة العامله ومكانتها في المجتمع قلتا في سري كيف النسوان ديل قويات وقادرات كده.. خالتي كانت من بين النسوان ديل من انا صغيره كنتا عارفه انو خالتي دي شغاله في الامارات شغل كويس وماشاء الله ارتقت بي تعليمها وعملت مكانه لي نفسها لكن ماكنتا متخيله وضعها كده.. قعدتا اراقب فيهم وانا مبتسمه كنتا بين اللحظه والتانيه بلمح نوف الكانت معجبه بي شدييد وابدت اعجابها ده من اللحظات الاولى بعد اتونسنا قمتا للمطبخ وبقيت برص الاكل في الصفره بيني وبين نفسي قارنتا بين امي وخالتي.. مرات الفرق في العيشه مابكون من الراجل بس مرات المره البتبني وتاسس زي خالتي كده و زي امي العرست بدري وجابتني وعاشت حياه بسييطه شدييد منها اتعلمتا البساطه وانك تعيشي بالموجود والقاسمو ليك الله.. ختيت الاكل وناديتهم يتفضلوا لما جريت الكرسي اقعد نوف لاحظت لي يادووب اني بعرج قالت لي بدهشه " بسم الله عليك حبييبتي ايش صابك! " قلتا ليها حادث الله يعافيك قالت لي سلامتك والله ماكنت ادري انك تعرجين الا جمالك مغطي على كلش 😘 قلتا ليها تسلملي حبييبتي.. قربت مني وسلمت علي في راسي.. بصراحه اتخلعتا من تواضعها ومن بساطتها باستني في راسي! بدون اي تعالي او ازدراء من اللحظه ديك عرفتا انو نوف مابتشبه الخليجيات لانو كنتا بسمع عنهن انهن مفتريات وشايفات روحهن.. بس نوف غير والله 😘 حتى جابت كرسيها جنبي وقعدت اكلنا كلنا سوا وبعد قمنا وغسلنا جبتا القهوه وكنتا عاملاها بالطريقه السودانيه.. بالفناجين بتاعت النجمه وبي الجبنه والفشار وعطر بت السودان والبخور بتاع التيمان واللبان.. ختيت التربيزه جنبهم وجبتها كانت اول مره يشوفوها ويشمو ريحة البن السوداني لما يتقلي ويعم البيت.. مناير قالت لي "الله الله تصدقين عاد اول مره نشم ريحة السودان.. ترى خالتك ما تعزنا ها العزوه " قبلتا لي خالتي قلتا ليها صحي؟ ماحصل مره عملتي ليهم جبنه سودانيه؟ قالت لي اي والله معدنها كابتشينو وقهوه تركيه واكل مطاعم ماحصل انا زاتي قعدتا القعده دي هنا الا لما كنتا بنزل السودان كنتا بطلبها من امك الله يرحمها.. قلتا ليها مستغربه بالجد ياخالتو! نوف قالت لي " وايش فيك! " قلتا ليها حاجه غريبه بس عشان انا متعوده اشرب القهوه بطريقتنا دي.. قالت لي قربي وصبيلنا لنشوف ايش سالفت ها القهوه.. قعدتا جنبها وبديت اكب ليهم شفتا عيونهم كلهم وهم مستمتعين بطعم القهوه وهم بقولوا لي الله ياسندس ايدك عندها طعم تااني.. اتبسطتا لانها عجبتهم ولانهم جربوها بطريقتنا نحنا واتكلتا لي ورا في المقعد وقعدنا نتونس تاني مع بعض..واحنا بنتكلم نوف بتسأل فيني درستا شنو وفي جامعة شنو وريتها قريت مختبرات طبيه في جامعة السودان واتخرجتا استغربت لاني صغيره على التخرج.. قلتا ليها اني مشيت في دراستي بدون اعاده لسنه وانو كنتا بنتبه للدراسه بس وعرفت اني شاطره من معدلي سالتني اذا اشتغلتا بشهادتي فقلتا ليها دي ما كانت رغبتي انا قريتها ترضيه للوالد الله يرحمه .. فهمت اني ابدعتا في مجال ما كانت رغبتي فيهو فكيف اذا قريت مجال انا بحبو.. طبعا جا السؤال البطرح نفسو دايما انتي مرتبطه! عاينتا لي خالتي وهي برضو كانت بتعاين لي ماعرفتا ارد اقول شنو عليها بس اتشجعتا وقلتها.. انا مطلقه لي شهر كده.. عادي عن ناس نوف العرس والطلاق مابشوفو انو ده نهاية للعالم زي السودانين وما بعيبو البت المطلقه او يحسسوها انها نكره قالت لي نوف الله يعوضك حبيبتي تدرين الجميلات دايما يتطلقن قلتا ليها كيف! خالتي قالت لي وهي بتضحك لانو الاخت نوف مطلقه بقت الجميلات هن من يتطلقن.. ضحكتا من جوه قلبي لانها ببساطه بتسهل الامور نوف دي ياخ ماعارفه نحنا هناك لما نتطلق بنسود الدنيا في وشنا.. واحنا بنتونس جا حمودي ولد خالتي جاري بي دفتري بتاع الرسم بقيت بنادي فيهو وبقول ليهو اوعك تشرطوا.. نوف لاحظت لي مهتمه بالدفتر قالت لي حمود حبييبي هاته وطوالي الولد سمع كلامها😒 طيب وسندس البتنبح زي الكلب دي مالك ما عبرتها يا كلب😒👋 جاب ليها الدفتر وفتحتو بقت بتتفرج في التصاميم وعجبوها شديد قالت لي سندس لمين التصاميم؟ قلتا ليها لي اكيد.. نططت عيونها بطريقه مدهشه وقالت لي مستحيييل! قلتا ليها والله اسالي خالتو.. قالت لي مناير ونجوان وبقية النسوان شوفو شوفو ها الموهبه سبحان الخالق انتي مبدعه 😍
يابنت مبدعه والله نجوان قالت لي تدرين والله حرام تندفنين بارضك.. خالتي قالت ليهم سندس بتصمم ازياء من هي صغيره بس كموهبه كانت بترسم وفنانه في الرسم بس مافكرت يوم تدرس المجال ده قلتا ليهم ايوه مافكرتا يوم ادرسوا لانو في السودان محدووده المجالات الممكن تبدع فيها.. نوف قالت لي خالتي وانتي ليه ما حكيتيلي عنها ! خالتي قالت ليها عن شنو بالضبط؟ سميه قالت ليها والله لو عارفه بت اختك عندها موهبه زي دي كنتا جبتها من السودان من السنه الفاتت وقطعتا ليها قرايتها زاتو ياخ موهبه زي دي مابتتكرر .. نوف قالت لي " ولي يسلمك بكره تعدين علي بالمكتب ترى والله ما اخليك تقعدين بالبيت دقيقه واحده" عاينت لي خالتي وابتسمت لي وحركت بي راسها وافقي.. قلتا ليها طيب ان شاء الله امر عليك نجوان قالت لي انا ونوف عندنا جزء من شركاتنا للملابس بننتج فيهو كل انواع الخامات وخالتك شريكتنا في الانتاج.. مديرة الشركه نوف وهي المسؤوله عن التصاميم بكره شرفينا في الشركه ونوف عندها معاك كلام..
انتهى يومنا على كده وودعناهم ومشوا وبعدها خالتي قعدت معاي في الصاله قالت لي سندس نوف حبتك شدييد وانتي مابتتخيلي المره دي صاحبة ملك قدر شنو هي متواضعه شدييد ومعاملتها راقيه حاولي اكسبيها وبكره من الصباح تمشي عليها احتمال ربنا رسلك هنا عشان يفتح ليك باب رزق والله اعلم.. انتي اجتهدي ولكل مجتهد نصيب قلتا ليها طيب ياخالتو حامشي ليها لاني بالجد ارتحتا ليها وحبيتها وماعندي مشكله اذا في شغل اشتغلوا معاها قالت لي طيب اتيسري..
الصباح🌹 قمتا اتجهزتا ولبستا اسكيرت اسود وقميص ابيض ولفيت حجابي باللون اللحمي وشلتا شنطتي المخططه بالاسود والابيض ومشيت عشان ابدا لحياه جديييدة وبيها اقدر ابني نفسي من تاني.. ركبتا مع راجل خالتي ووصلني الشركه هناك قابلتا نوف من الباب استقبلتني ورحبت بي ترحيب مبالغ فيهو ومشينا قعدنا في مكتبها عرضت علي فيديو فيهو قسم التصميم والمنتجات البصدروها وعرفتا انو خالتي مندوبه لي ماركتهم في السودان.. ما اتخيلتا حال نوف يكون كدا 😍 دي عايشه في عز ماشاء الله كنتا بتفرج في الفيديو وبصراحه تصاميمهم مابتجي شي قدام الرسم الانا راساماهو وبالرغم من كده محققه نجاح عالي فكيف لو كانت دي تصاميمي! .. سالتا نوف عن نجاح المنتجات بره وقالت لي بتعاملو بالدولار في كل البلدان يعني البلوزه، ممكن تتباع بالدولار ولا تتباع بعملة البلد العاملين فيها توكيل قلتا ليها يعني ماحصل استلمتو قروش سودانيه؟ ردها لي، كان لا قالت لي مابنستلمها لكن ممكن المعرض او المول يبيعها بالسوداني ويرفع السعر بعد كده هو وشغلو.. ورتني قسم الاطفال في الفيديو وعجبتني تصاميهم شدييد بعدها قالت لي عندنا مشوار بس اول حنفطر سوا يلا.. مشينا انا وهي لمطعم رااقي راااقي فوق الوصف اول مره اقعد في مطعم زي ده في حياتي طلبت لي نفسها سوشي لانها كانت من السيدات الراقيات المحافظات على رشاقتهن.. وانا طلبتا قولدن بلو وبصراحه الاكل كان ولاااشي بالنسبه للمطاعم هناك بعد فطرنا ركبنا عربيتها وبي سواقها نص سيدات الاعمال ما كانوا بسوقوا عربياتهم بي نفسهم بس بسواق مشينا للمصنع وبقت بتفرج فيني في الالات وفي العمال الباكستانين والهنود والسودانين.. استغربتا انو وجود الاماراتيين بسيط وسالتها عن عدم شغلهم؟ قالت لي انها بتفضل السودانين لانهم همييميين في الشغل بعد اتفرجنا في الاقسام رجعنا تاني للشركه وقعدنا في المكتب.. سألتها طيب انا مطلوب مني شنو ؟ قالت لي انا عايزه امسكك قسم التصميم في الشركه بصراحه طلبها كان مدهش بالنسبه لي قلتا ليها انا مابقدر اعمل كده قالت لا بتقدري انتي موهوبه لدرجه فوق الوصف بس عايزه شوية ايمان بنفسك.. قلتا ليها انا حاخسركم كده قالت لي لا ماتشيلي هم انتي بس عليك تصممي والباقي علينا يعني ماقلنا ليك خيطي.. زي رسمك ده بس انا حاوريك الازياء لكل فصل وحاشرح ليك طريقة الشغل.. قلتا ليها انا ماقريت تصميم دي مجرد موهبه بس ما حاقدر اشتغل.. قالت لي حتقدري انتي بس حاولي جربي وماعليك.. وبدون نقاش ياسندس وطلعت لي قرص كده قالت لي شغليهو في البيت واحضريهو.. بعدها ودعتني بابتسامه ومشيت البيت اول مادخلتا حكيت لي خالتي وهي زادت الحماس عندي وقالت لي بتقدري تنجحي انتي اي شي بتدخل فيهو يدك ببقي اخضر.. قلتا ليها حاحاول طيب مدام انك مصره زي نوف دخلتا الغرفه وشغلتا القرص وبديت احضر كان فيهو طريقة شغلهم وكيف بطرزوا الملابس وجاني الالهام اني بقدر.. قمتا على حيلي صليت ركعتين لله ودعيت ربنا يوفقني واذا الشغل ده فيهو خير لي يتسهل.. بعدها نمتا وصحيت لقيت جنبي تلفون جديد طلعتا لخالتي بنادي فيها لقيتها في المطبخ قلتا ليها ياخالتو ده تلفون منو؟ قالت لي اذا سندس حتبقى زوله شغاله وعندها مكانه واجب من خالتها تجيب ليها تلفون تقدر تشتغل بيهو.. قلتا ليها خالتو😍😍 وحضنتها شدييد حسيت بحنيتها البتشبه امي.. وطوالي دخلتا الغرفه استحميت وصليت طلعتا ليهم واتغدينا سوا بعدها رجعتا مسكتا قلمي وقلتا بسم الله.. بديت اتذكر في تفاصيل الفيديو وارسم وارسم لحدي ما جا نص الليل ونعستا وطلعتا بي فستانين بس! نمتا والصباح ضربتا لي نوف قلتا ليها انا عايزه اقابلك قالت لي منتظراك. نتغدا سوا ووصفت لي المطعم ومشيت لاقيتها اتغدينا وطلعتا ليها الدفتر قلتا ليها اها؟ عند حسن ظنك؟ ابتسمت لي ببسطه كده وقالت لي كفو حبييبي 😍 قلتا ليها الحمد لله انهم عجبوك قالت لي طبعا والعجبني اكتر انك فهمتي الشغل كيف.. بعدها سالتني بتكلم كم لغه؟ قلتا ليها بصراحه غير العربي مابعرف ولا لغه حتي انجليزني بسيط وماعلى قدر كده.. قالت لي ولا يهمك كل الناس بتبدا من الصفر
كنتا مرتاحه في تعاملي معاها لانها انسانه بسييطه جدا قالت لي طيب من بكره استعدي لانك حتنزلي كورس لغات عايزاك تتعلمي لي لغتين انجليزي وفرنسي.. حتبدي الصباح بكورس الانجليزي بعدها حتجيني الشركه هنا قسم التصميم في واحده اسمها قمر حتساعدك في الاغلاط الانتي مامنتبهه ليها وحتفهمك طريقه الشغل عايزه منك تركزي معاي الفتره دي وتنتبهي لدروسك وماتتشغلي بي حاجه تانيه عشان عندنا طلبيه حتنزل بعد سته شهور لازم نشتغل فيها هسي لانو الزمن اتاخر علينا.. ومسكت يدي وقالت لي انتي ربنا رسلك لي من السما ❤ ...
كنتا راقده في سريري وبفكر في الشغل واني حانجح ولا لا بس جاني الهام اني احاول واستمر وانا راقده اتذكرتا الليله خطوبة رندا والوقت كان متاخر شلتا تلفوني وضربتا ليها وقعدت تحكي لي عن الخطوبه وعن ماجد واهلو حلوين..باركتا ليها واتبسطتا لانها مبسوطه كده وماعارفه الوداني اسال من ابراهيم شنو؟ قلتا ليها ابراهيم جا معاهم؟ قالت لي اي جا وهو كويس قلتا ليها تمام وبعدها قفلتا ولمتا نفسي اني سالتا منو وقلتا انا لازم اتجاهلوا وانساهو نمتا على كده وبكره كان يوم مميز بالنسبه لي❤ نوف صحتني من الساعه تمنيه صباحا 💔سلمت علي وصبحت وبعد كده قالت لي ترحيل الشركه حيصلك بعد ربع ساعه اجهزي سريع وانزلي.. انا طولتا من قومة بدري وايام الجامعه ديك بس لازم اضغط عشان انجح.. قمتا جهزتا سريع وشربتا الشاي بسرعه ونزلتا لقيتو وصل.. خالتي كانت مبسووطه شدييد بي اني بديت اتعافى واطلع من حالة الحزن كانت قايلاني نسيت ابراهيم 💔ماعارفاني ما بقدر انساهو.. وصلتا المعهد وبديت اول دروس الانجليزي.. مرا علي شهر وانا بالحاله دي بمشي الكورس وبمشي الشركه بصمم وبرجع البيت متأخره بعد المغرب.. راجل خالتي ما كان معترض على تأخري وبالعكس كان بساندني معاها وبشجعني كتير بكلامو عشان اقوي نفسي من اول وجديد.. مروا علي سته شهور من شغلي مع نوف كنتا خلاص خلصتا الكورس وبقيت بتكلم ببطلاقه لاني كنتا بتكلم في البيت مع خالتي انجليزي ومع رندا ومع بتاع العماره التحت ومع ناس الشغل وقويت لغتي بي روحي براي وما كان في شي شاغلني.. بعد سته شهور كانت اول طلبيه نازله السوق والمره دي التصاميم غير ❤ المره دي التصاميم من مصممه اسمها سندس كنتا متوتره شديد والطلبيات بتتوزع ومافي الامارات بس اتوزعت على كل البلدان العربيه وعلى كل الفروع في البلدان والوكلاء ومن ضمنهم كان السودان .. مرا شهرين على التوزيع وكنتا بديت كورس الفرنسي.. نوف كعادتها بعد شهرين بتجي تشوف نسبة المبيعات نادتني للمكتب جوه وقعدتني عشان نشوف النسبه كيف والبضاعه الاتباعت كم والا تردت كم وكانت المفاجأة
يتبع....
