مافي حاجه والله واقفين ساي .. طيب ملصوقه في الحيطه كده مالك ؟ قلتا ليهو ما في شي والله زي مابقول ليك .. حسى بي في حاجه وقال لي طيب تمام ومشى ..
رندا: نحنا حنعمل شنو هسي !
_ مابعرف والله اتصرفي بس
رندا: طيب امشي قدامي وانا بضاريك اقفل ليك الخطوة بالدبابيس لحدي ما نصل الاستراحه وبعدها بنحلها
_ طيب😭
" مشينا لحدي الاستراحه بخطة رندا وهناك بدت تفتش لينا على خيط وابرة من ناس المكتبات لحدي مالقت عند خاله بتبيع حاجات بنات في واحده من الاستراحات بتاعت الجامعه وجات خيطت لي الخطوة لحدي الاخر .. بسبب الموضوع ده اتأخرنا في الطلعه ومافي مواصلات بعد المغرب .. اتشرينا في العربي 😭 لحسن حظي انو ابراهيم وعمار جو الاستاد يركبو وشافنا عمار من بعيد .. قال ليهو ابراهيم ديك مش سندس😳 المقعدها لحدي هسي شنو؟
ابراهيم: اي والله ياها .. مابعرفهم مالهم الليله من الصباح كدي ارح عليهم نشوفهم
رندا: سندس ابراهيم جايي علينا
_ اعملي رايحه اوعك تتلفتي😒
رندا: لو سألنا لي اتاخرنا نقول شنو
_ قولي ليهو كان عندنا لاب طويل بس
رندا: طيب خلاص قرب علينا
ابراهيم: يا بنات الموقفكم شنو بالليل براكم .. اتأخرتو في الطلعه ليه؟
رندا: كنا في ..
_ كنا في اللاب يا ابراهيم
عمار: سندس ازييك رندا كييفك؟
رندا: تمام الحمد لله
_ كويسه ياعمار انت كيفك ؟
عمار: تمام والله .. رندا انتي ساكنه وين ؟!
رندا: ساكنه العمارات ..
عمار: طيب كويس في طريقي ارح اوصلك معاي هنا ما حتلقي مواصلات بالليل اذا ماعندك مانع
رندا: ماانع .. نهااائي ماعندي مانع في زول بلقى ليهو عربيه وبتشرا مع السكارى باليل ده
ابراهيم: 😂😂😂 البت دي واااضحه خلاص
_ رندا😂😂 اتقلي شويه
عمار: خلوها يا جماعه عارفه مصلحتها ويين 😂💔 طيب يلا عشان ما تتأخري اكتر وتقلقي ناس بيتكم ..
ابراهيم': يلا مع السلامه
" مشوا وخلونا برانا وانا وابراهيم اولاد حله واحده وبنركب نفس المواصلات بقينا واقفين وساكتين وهو بعاين لي كأنو اول مره يشوفني .. "
ابراهيم: ما طلعتي الحجل !
_ ما حاجه بتخصك
ابراهيم: تمام قفلتا خشمي خلاص
_ احسن برضو
طلع تلفونو ولا كأني واقفه وبقى بتكلم بالواتساب شميتو شديد😒 لكن انا البديت بالمساخه وهو تماها لي وما قصر .. لما الموضوع اكل معاي جنبه قلتا ليهو على فكره حركه بايخه لما تكون واقف مع بنت وتطلع تلفونك
ابراهيم: اجي! انتي مش سكتيني هسي 😳 انتي عندك انغصام شخصيه يابت 😂💔
_ اااي عندي 😒 انفصام اسكيرتي
ابراهيم: قلتي شنو !
_ ولا شي ولا اااي شي ..
ابراهيم: ارح نتقدم طيب للحافلات
" نحنا ماشيين كده تلفونو ضرب "
ابراهيم: يا سكره مساء الخير
رنا: مساء النور
ابراهيم : وصلتي البيت؟
رنا: ايوه وانت وين !
ابراهيم : في الاستاد لسه عايز اوصل وحده للمواصلات لانها واقفه براها
_ وحده😳😳 عاين الولد الحيوان ده😒👋
ابراهيم : طيب برجع ليك لما اصل
_ انت ليه ماقلتا للبنت البتتكلم معاها انك حتوصل سندس
ابراهيم: وسندس دي تطلع منو !
_ ابراهيم 😡 انت واحد حيوان
ابراهيم: يلا الحافله جات اركبي
" الطريق كلو ساكته ومغبونه من جواي ماكنتا عارفه البنت دي رنا المهم سمعتا صوت بنت .. اتخيلتا انو ابراهيم ارتبط بي وحده تانيه خلاص ، وصلنا البيت ولما وصلني لحدي بدتية الشارع سلم علي وقال لي امشي وانا بعاين ليك لما تدخلي جوه مسكلي لي بس عشان اعرفك .. قلنا ليهو بغيظ رقمك ممسوح من تلفوني 😒 ضحك لانو عارفني حافظاهو زي اسمي وقال لي طيب انا بتصل يلا امشي عشان اهلك حيكونو مقلقين .. مشيت سرييع ووصلتا وهو فعلا اتصل وسألني خلاص الأمانه وصلت ؟
قلتا ليهو بزعل لأني كنتا محروقه ياخ منو ومن حركاتو .. ان شاء الله الأمانه تصل السماء سريع .. طوالي نهرني سندس😡 ده شنو الكلام الفارغ ده .. ولا رديت عليهو قفلتا الخط في وشو ودخلتا الصالون لقيت امي وابوي ومعاهم نوره بتغدو .. سلموا علي وابوي سألني : سندس اتأخرتي مالك ؟ قلتا ليهو طولنا في شغل المشروع شويه والله .. قال لي طيب لقيتي مواصلات طوالي؟ قلتا ليهو لا والله وقفتا كتير وكانت معاي رندا .. امي : طيب تعالي اتغدي عايني وشك ده بقى اسود من الشمس وضعفتي وروحك بقت طالعه .. قلتا ليها ماعندي نفس والله .. نوره عاينت لي وهي كانت عارفه انو في كذب حاصل .. كملت غداها وجاتني جوه في غرفتنا لقتني لابسه بجامتي ورافعه رجل في الحيطه ورجل في السرير ومسرحه كعكتين وحده فاكاها وبلف فيها وانا راقده في السرير .. قربت وقعدت جنبي وقالت لي بتفكري في شنو يا سندس ؟
_ انا خسرتا ابراهيم !
نوره: حصل شنو ؟ الخلاك تقولي كده شنو ! مالكم
_ كانت في وحده بتتكلم معاه بالتلفون ماعارفاها منو
نوره: وحده ! منو دي ؟
" حسيت بيها اتكبكت وتمتمت كلامها كانها بتعرف حاجه عنو "
_ ماعارفه يانوره .. صوت بنت بس نوره انتي عارفه حاجه داساها مني
نوره: انا 😳 اناا لالا لا ماعارفه
_ طيب مالك اتوترتي كده ؟
نوره: استغربتا ابراهيم يهرف كيف وحده وهو بحبك ؟
_ ماعارفه والله افكاري مشوشه
نوره: ده احساس ساي بدون ادله
_ نوره لو شاف غيري! 😭 انا حاعمل شنو ؟
نوره: سندس انتي مفروض ترضي بالقسمه بعد ده لأنو موضوعكم منتهي ياسندس وماعندك حل
_ ماقادره ياخ انا بحبوو ودايراهو
" قعدتا ابكي وقامت مسكتني حضنتني .. ابوي كان واقف ورا الباب وسمع كلامنا كلو وكورك بصوت عالي يانوره يانوره "
_ ده ابوي😳 مايكون سمعنا😳
نوره: لالا ما تخافي ماسمع .. ااي ياعمي جايه .. كدي خليني اشوفو مالو وارجع ليك
ابوي: تعالي دايرك .. " مشى معاها الصالون وقعدها وقال ليها كلامي ده تمشي تفهميهو لي اختك دي كووويس انا ما بديها للولد ده ولا تحلم تعرسو ..لاني ما راضي عنها اذا عاندتني وقعدت ترفض في الناس عشانو .. انا اديتها لي ولد اخوي هيثم ..
نوره: هيثم اخوي😳
ابوي: اي انا اتكلمتا معاهو الصباح بخصوص العرس وقال لي موافق وهو من زمان دايرها وهيثم راجل مابتعوض .. كلمتا امها وخاته راسها بي راس بتها وقالت مابتفاتحها بموضوع زي ده وهي قربت تتخرج .. بعد تتخرج قالت بتوريها لكن بما انو سندس مصرره تعمل كده عشان الصايع داك ما خلت لي حل غير اني اعقد ليها في العيد من هيثم .. امشي وريها انو باقي ليها بس شهر رمضان للعرس وبعدها تكمل تخريجها في بيتكم واصلا فاصلانا حيطه وكده حتكون قريبه من امها وبراها وحيده ماعايزين نديها لي زول غريب ولا بعيد مننا
نوره: عمي 😳 ابوي عارف ؟
_ ابوي : طبعا عارف لينا كم يوم اتناقشنا التلاته في السيره دي ..
نوره: طيب ياعمي بكلمها انا ، بس يوم تاني لانها الليله تعبانه خليها ترتاح شويه من الجامعه ..
بعد يومين نوره قررت تفتح معاي الموضوع جابتني في الغرفه وقفلتها وقعدت قالت لي : سندس عمي دايرك لي هيثم اخوي
_ نعم😳 قلتي شنو 😳😳
نوره: سندس انا مابهظر ابوك جادي والله والاسره كلها عارفه الا انتي
_ مستحيل ابوي يعمل كده
نوره: ابوك ممكن يغصبك على العرس بس مايعرسك لي ابراهيم
" اللحظه ديك الغضب اعماني وطلعتا كوالي مشيت لي ابوي في الصالون قلتا ليهو اذا عايز تقتلني انا قدامك بس انا ما حاعرس واحد ما دايراهو انا دايره ابراهيم يا ابوي ما تجبرني على حاجه ما دايراها كنتا بكورك وببكي وحروقه وهو قاعد في الكرسي بعاين لي وامي بكت لما شافتني منهاره .. بقيت بصرخ وبقول ليهم انا مااادااايره والله اموت حراام عليكم البتعملوهو فيني ده والله حرااام 😭😭 ربنا بسألكم من حقي انتو ظلمتوووني وكرهتوني حياتي😭 .. ابوي قام على حيلو واداني كف حااار ودي كانت اول مره يمد يدو علي .. لأني اتماديت بالكلام بس انا كنتا منهاره وماعارفه بقول في شنو .. بس بصرخ وببكي ،بعد الكف قال لي : لو تموتي او تحيي انا حاعرسك لي هيثم بس وانتهينا وطلع من الصالون .. وانا في الارض واقعه وببكي جات امي حضنتني شدييييد وبكت وقالت لي الله يرضى عليك ما تقطعي قلبي .. ماتحرقي روحي خلاص اسكتي الله يهديك .. بتذكر اني نمتا زي الشافعه في حضنها ولسا ماخليت عادتي لما ابكي وابكي وانوم في حضن امي💓 ابوي ما اهتم بي وطلع غضبان مني نمتا وصحيت بعد المغرب لقيت امي جايه علي وفي يدها كباية ليمون لي شربتني ليها وقالت لي بقيتي كيف! قلتا ليها بقيت احسن .. قعدت جنبي وقالت لي سندس ما تعصي ابوك انتي عارفاهو عندو سكري وما ناقص ..
_ حاضر يا امي
امي: برضاي عليك ماتشوفي ابراهيم او تحاولي ترجعي ليهو
_ حاضر يا امي😭
امي: الله يرضى عليك
_ امي انا ماحاعرس هيثم .. نا حاعرسو لو اموت
امي: ماتقولي كده الحاجات دي قسم انتي ماعارفه قسمتك وين ..
" طلعت مني وبعد شفتا كلامها كده حسيت بيهم حيجبروني على العرس من ولد عمي .. الزعل كان كتيير علي غبتا من الجامعه ومستواي اتدهور بسبب الغياب الكتير بس مرضتا 💔 كنتا بقوم من السرير وبقع طوالي .. اسبوعين انا على الحال ده لحدس ما ناس البيت خافو وقالو دي حاجه ما طبيعيه ودوني المستشفى وفحصوا لي .. وكانت الصدمه لي ابوي لما الدكتور قال ليهو للأسف عندها سكري .. امي زعلت وبكت وقالت ليهو بنتي صغيره كيف يجيها كده .. قال ليها مرات بكون بسبب الضغوطات النفسيه البتتعرض ليها او اذا مرت بفترة ضغط كتير ورا بعض .. ممكن يظهر لفتره ويختفي وممكن يستمر طول حياتها وعموما الوالد عندو سكري ممكن يكون ورثها ليهو .. ابوي حسى بي انو السبب والزعل كان ظاهر عليهو طلعوني من المستشفى للبيت .. الفتره دي ابراهيم كان بتكلم مع نوره وبيسألها عني وعن احوالي وليه غيابي كتر الفتره دي وكانت بس بتقول ليهو كويسه الحمد لله .. عدت تلاته ايام بعد المستشفى ابوي كان بهام بي اكلي وشرابي شديييد وكأنو حاسس بالذنب اتجاهي . ماخلا لي فاكهه ولا حاجه وما جابها لي وبجي يأكلني بنفسو ويشربني وما كان بفتح معاي سيرة موضوع لابخصوص عرس ولا بخصوص حاجه تانيه .. يعد فترة النقاهة دي وجيت نازله الجامعه قيل ما امشي الصباح جا قعد جنبي وقال لي انتي كويسهه وقادرة تمشي؟ قلتا ليهو اي يا ابوي الحمد لله كويسه.. قال لي عايز اقول ليك حاجه اسمعيني قلتا ليهو اتفضل يا ابوي سامعاك .. قال لي انتي بنتي وحبيبتي وروحي ونور عيوني وانا ما عندي اغلى منك في الدنيا دي انتي زعلانه مني في حاجه ياسندس؟
_ لا يا ابوي مافي زعل بيناتنا
ابوي: دايراهو مش؟
_ منو يا ابوي ؟!
ابوي: ماتتذاكي لي وتعملي فيها نسيتيهو وانتي نايمه بتهضربي بي اسمو منو يعني غيرو . الشاغل بالك الصايع داك
_ ابراهيم 😂
ابوي: اي ياهو .. دايراهو للان؟
_ ابوي ماتحرجني بي الأسئله
ابوي: انتي كان بتعرقي الخجل كان وقفتي وكوركتي وقلتي بي اعلى حس دايراهو عرسو لي
_ابوووووي😂😂😂
ابوي: شنو ابوي ابوي .. يا نجاة تعالي هنا لبنتك دي
امي: اي مالكم انتو الاتنين
ابوي: بسأل فيها مادايره تجاوب لي عامله فيها بتخجل
امي: يابت مابك بتتزاوقي .. احتمال ما دايراهو ياحاج ماتغصبها عليهو😆
_اممممي😳 كيف يعني ما دايراهو ياخ انا بحبووو شدييد
ابوي: شوفي بتك الما بتستحي دي
_ انا رديت ليكم على أسئلتكم ياجماعت ما تحرجوني كده
ابوي: طيب اضربي للصايع بتاعك ده وقولي ليهو ابوي منتظرك بكره المغرب انتي وابوك واخوك قعدة رجال المره دي
_ ابوي😳 ماقادرة اصدق😳 ابووي😳😳
امي: 😂😂 اضربي قبل ابوك يغير رايو هسي
_ ايوووووي يووووي💃 ابوي انا بحبك بحبك بحبك يااخ بححححححبك
" قمتا عليهو وحضنتو وبقيت ببوس فيهو في راسو وشيبو وانا مبسووووطه شديييد وبعدها مسكتا امي وحضنتها برضو .. كانوا بضحكو فيني لأنو منظري كان زي الشافعه الجابو ليها هديه .. طوالي جرييت ولا كضبتا شلتا تلفوني وضربتا لي ابراهيم مره ومرتين ماردا .. ضربتا لي عمار وقلتا ليهو ابراهيم لو جنبك اديني ليهو سريييع 😍 .. مدا ليهو التلفون وداك عامل لي فيها تقيل وبرد بكل برود .. قلتا ليهو ابراهييييم ده ما وقت ثقااالتك اسمعني.
ابراهيم: في شنو مالك بتكوركي وتضاحكي .. خيير؟
_ ابرااهيييم ابوووي وااافق واااافق
ابراهيم: وافق على شنو ! انتي مالك غيابك كتر من الجامعه في شنو حاصل ليك خير؟
_ خليك مني ياغبي .. ابوي قال ليك جيب اهلك بكره وتعال المغرب 😍
ابراهيم: انتي بتهظري صاح ؟
_ لا والله اخييييرا 😍
ابراهيم: سندس ما قادر اصدقك
_ايييك فايتك كتيييير ياحبييبي المهم اننا اخيييرا حنتخطب لي بعض
ابراهيم: حبيبي☺ انتي عارفه اشتقتا للكلمه دي منك قدر شنو
_ وانا والله يا ابراهيم اشتقتا ليها وليك . ابراهيم انا بريييدك شدييد
" وبكيت من دون ما احس😭"
ابراهيم: خلاص حبيبي خلاص ماتبكي الله كريم ياسندس
_ ده دعائي الكتيير عشان الله يجمعني بيك حبييبي😭
ابراهيم: ما انتي براك .. انا الفترة دي كلها كنتا بدعي الله يديني ليك
_ بس نحنا كيف نتخطب قبل رمضان بي اسبوع 😂😂
ابراهيم: ان شاء الله قبل يوم المهم تبقي حقتي
_ مستعجل قلتا لي😂
ابراهيم: مازي استعجالك ياخفيفه
_ ابراهيم😒 احسن ليك 👋
ابراهيم:😂😂😂 بتبسط لما ازهجك كده
_حيوان وكريه يلا اقفل الخط ده
ابراهيم: ماجايه الليله اشوفك؟
_ لأ .. اتشووق اتشووق لسا يا روحي بالله
ابراهيم: اذكرك تاني اني شفتا النظره الشرعيه في الشقه وده بفضل عوارتك اليوم داك😂💔
_ واااي منك لما تمسك لي حاجه بتمووت في الزله😂💔
" قفلتا الخط منو وجريت طوالي لي نوره اكلمها بي انو ابوي وافق ، ضربتا باب شارعهم لما قرب يتكسر جاتني عي جاريه .. في شنو مالك يا سندس 😳 خيير مالك 😳 قربتي تقلعي الباب 😳
_ نوره زحي لي كده احضنك ياخ انا مبسووووطه😍😍
نوره: في شنو مالك ؟
_ ابراهيم ياخ 😍 حيجونا بكره ، نوره ابوي وافق خلاااص ياسلاام ..ماقادره اوصف ليك شعوري كيف الحممد لله الحمممد لله .. جيتك انتي لأنك اختي وحبيبتي ولازم تعرفي قبل الكل ولأنك شاهده على ريدتنا من نحنا صغار .. واااي يانوره ماقادره اصدق
" لاحظتا ليها ساكته واقفه متبلده ما ادتني اي ردت فعل غير ابتسامه صغيره وقالت لي ايواا مبرووك ليكم ياخ تتهنو .. ده الزاد شكي انو نوره بتعرف حاجه عن ابراهيم مادايؤه تقولها لي .. عملتا فيها رايحه واني ما لاحظت لي انو وشها اتغير وقلتا ليها انا ماشه اضرب لي رندا واكلمها تجيني بعد الجامعه بكره بدري عشان تساعدني .. بس لما طلعتا منها بقيت بفكر نوره دي بتعرف شنو عن ابراهيم وداساهو مني ياربي ؟!
يتبع.....
