الجرم الأكبر " كامل"

الفصل الرابع

أثمر لقاءه بسائق العم شاهين الكثير، الآن لديه خطوط واضحة يمشي بحذوها ليصل لمبتغاه..!

وصل مروان توه لمكان لقاءه بغسان:
_ السلام عليكم!
رد تحيته:  وعليكم السلام ورحمة الله وبركاته، ها يامروان طمني عرفت أيه عن عمك؟

قال بعد أن جلس بمقعدٍ أمامه:
عرفت كتير ..شوف ياسيدي!
وراح يقص كل ما لديه لصديقه، الذي هتف عقبها:

_ عمك ده جبار وقادر! حياته منتهى القذارة .. توصل بيه انه بيشغل بنات لحسابه في!  وصمت بعجز عن إكمال ما يريد مستغفرا ربه:  استغفر الله العظيم.. حرامي ونصاب وقواد، وماخفي كان اعظم!

_ ماهو الخفي ده هو اللي انا هعرفه من مراته أكيد يا غسان لما اقابلها.. أكيد عندها كتير تكشفه عنه!
_على كلام سمر إن مراته كانت بتهدده بحاجة في التليفون.. يعني فعلا عندها بلاوي تكشفها..!
مروان:  بالظبط كده!
تمتم غسان بثناء: بس برافوا إنك فكرت في عم صابر!
مروان: ماهو عم صابر السواق بتاعه، وعمي لحسن الحظ مابيعرفش يسوق، ومابيتحركش غير بالعربية، وطبيعي السواق يوصله لكل مكان ويعرف كتير عنه، والحمد لله توقعي كان في محله! وعرفت إمتى بيروح لمراته التانية، واخدت عنوان البيت بتاعها..!

وواصل: وتعرف السواق لفت نظري لحاجة تخص مراته!
تسائل: إيه هي الحاجة دي؟
مروان: إن عمي بيحبها أوي، وبيعمل حساب لزعلها.! وبصراحة في دي طلع معذور!
غسان:  اشمعنى؟!
_ مراته حسناء طلعت زي اسمها، جميلة اوي، وسنها صغير فرق العمر بينها هي وشاهين حوالي 15سنة!

_ غريبة، وأيه يخلي واحدة بمواصفاتها تتجوز عجوز زي عمك! وكمان في السر..  أحسن تكون الست مش مظبوطة ولا حاجة!!

مروان بنفي قاطع: لا لا ياغسان، انا عرفت من عم صابر كل حاجة، حسناء اتجوزت شاهين من 10سنين هي من طبقة عادية جدا وعاشت مع امها على معاش ابوها اللي كان موظف في شركة حكومية!
شاهين طول عمره بيهتم بمظهره جدا، وأنا اشهد إن عمره الحقيقي مش بيبان عليه، وفي بنات كتير زي حسناء، بيعتبرو فرق السن ده وقار، وأنا بخمن إن افتقادها لوالدها، خلاها تتجوز واحد في عمر شاهين
أكيد بطريقته الناعمة اللي مش فالح غير فيها عرف يقنعها بيه لأنه حبها فعلا، زي ماقال السواق!!

وأكمل: وخد التقيلة بقى!! عمي طلع عنده منها ولد عمره 7 سنين أسمه كريم وطبعا هو ده نقطة ضعف الست دي! واللي ممكن يكون هو السبب في استمرارها معاه لحد دلوقت!

غسان مستاءً: عمك ده تعلب، مستغفل بنت عمه ومراته الأولي وواخد كل شقاها وفلوسها، وهو اصلا متجوز عليها ومخلف كمان..!
مروان:  الحمد لله أنه مش مخلف من مرات عمي!

_فعلا ربنا بيحبها.. طب وانت أيه خطوتك الجاية؟

_هحاول اقابل حسناء واكلمها، واعرفها اللي عمي عمله واوريها صوره مع البنات الزبالة اللي يعرفها، وأزاي بيشغلهم في القرف ده.. واحكي عن احتياله عليا في سرقة المعرض، واشوف عندها استعدد تساعدني وتعرفني سره وفين خاطف سمر، ولا هضطر افكر بشكل تاني!!!
_ شكل تاني يعني هتعمل أيه؟
_ لو وصل الأمر عشان اضغط عليها ، هخطف ابنها..!