عشقني أستاذي

البارت الخامس والعشرون

زينب :- بعد ما گال مرتضى وصلنا نزلنا كلنا من السياره ومن نزلت شفت منظر يخبل.
شفت بنايه كلش ضخمه هي هاي الجامعه اللي راح أدرس بيها بقيت أباوعلها إلى أن حچه مرتضى...

مرتضى :- هاي جامعة ....... اللي راح تدرسون بيها.
أنه راح أخذ جنطكم لمكان السكن وأنتو دخلو من هاي الباب راح تلگون شخص علی الیمین گاعد بالحديقه.
هذا أستاذ وسام هو دكتور هنا بالجامعه وراح يكون المرشد ألكم ماشي

الكل :- ماشي

زينب :- مثل ما گاللنا مرتضى دخلنا من الباب الرئيس ومشينا بطريق يكون بين حديقتين وبنهاية هذا الطريق باب هو الباب اللي ندخل منه لبناية الجامعه.
صدگ على جهة اليمين چان گاعد شاب مبين من گفاه (لبسه وتسريحة شعره العاليه) توجهنا أله وأنه بگلبي أگول معقوله هو هذا الدكتور اللي گال عليه مرتضى.
من گال مرتضى دكتور تخيلته رجال چبير بالعمر وسمين وأصلع.
وصلنا أله گال واحد من الطلاب...

معاذ :- السلام عليكم

زينب :- من سلم معاذ على الدكتور دار وجهه وچانت الصدمه لكل الطلاب خاصة البنات.
شفنه وجهه طلع ولد شاب عمره تقريبا بالعشرينات حلو ونازك لون بشرته حنطيه وطويل.
من شافنا أبتسم ورد على معاذ...

وسام :- وعليكم السلام.
هلا بيكم بجامعة ...... نورتوها.
أكيد أنتو طلاب الماستر اللي جايين من العراق صح

معاذ :- بلي أستاذ

وسام :- أنه أستاذ وسام دكتور بهاي الجامعه هاي السنه الثانيه ألي هنا.
أنه راح أكون المرشد ألكم يعني أي مشكله تواجهكم لو أي شي صعب لو عدكم أي طلب تجون عليه وما راح أقصر وياكم.
راح نجتمع كل يوم سويه اثناء وبعد الدوام وناكل كلنا سوه ونتناقش بكلشي عدكم.
لا تعتبروني أستاذكم خارج أوقات الدوام أعتبروني زميل ألكم أو أخ أكبر منكم ماشي.

الكل :- ماشي أستاذ

وسام :- تعالو وياي هناك.
مشيت على طاوله چبيره بيها ٣٦ كرسي وگلتلهم يگعدون.
أثناء ما هم يگعدون شفت من بينهم طالبه سبحان الخالقها على هذا الشكل وهاي العيون بقيت صافن بيها معقوله هاي طالبة ماستر عبالك طفله اللي يشوفها يگول بالأعداديه أو المتوسطه.
بعد ما گعدو شالت عينها شافتني أباوع عليها نزلت راسها أنه هنا حسيت على نفسي شلون أباوعلها.
گلت لاطلاب....
يلا شباب كل واحد يعرف عن نفسه.
بدو الطلاب يعرفون عن نفسهم وأنه متشوق شوكت يوصل السره الها وأعرف عنها شكم معلومه.
وصل الها السره گالت....

زينب :- بعد ما عرفلنا الأستاذ عن نفسه گاللنا تعالو نگعد هناك وأخذنا لمكان من نفس الحديقه بي طاوله چبيره وكراسي لمن گعدنا طلعن على گدنا بالضبط.
گعدت على الكرسي ورفعت راسي صدفه لجهة الأستاذ لگيته صافن بوجهي أنه أستحيت بسرعه نزلت راسي.
گاللنه كلمن يعرف على نفسه وبدو الطلاب يعرفون عن نفسهم إلى أن وصل الدور ألي گلت...
أنه أسمي زينب مواليد ٢٣ سنه من السماوه كملت بكالوريوس بمعدل ٩١ وأجيت أكمل هنا الماستر

وسام :- بعد ما عرفت هاي المعلومات القليله عنها گلتلهم...
يلا خلي أخذكم جوله حتى تشوفون الجامعه.
رحت لداخل الجامعه وأخذت الطلاب ودليتهم بكل مكان بيها وأشاقه وياهم حتى ما يستغربون مني وأگر أكسب ثقتهم.
كل هذا الوقت وعيني ما نزلت من زينب أبد بقت تلاحگها بكل مكان وتدورها إذا ما شافتها.

زينب :- أخذنا أستاذ وسام للجامعه وفرنا بيها ودلانا على كل مكان هناك وشوفنا قاعاتنا اللي راح ندرس بيها.
مبين حيل حباب يضحك ويسولف أبد مو نفسيه وأن شاء الله دوم يبقه هيچ وما يتغير.
صارت الساعه ب ٥ العصر وچنا حيل تعبانين وبين التعب على وجوهنا ف گاللنا دكتور وسام...

وسام :- أسف شباب لأن تعبتكم بس چان لازم أخليكم تشوفون كل هذا اليوم لأن باچر راح نبدي خطة الدراسه.
مرتضى ينتظرنا بالبار راح نروح كلنا لشقتكم اللي راح تگعدون بيها

بارق :- كلنا راح نگعد بشقه وحده

وسام :- هي يسموها شقه بس من تدخل الها مثل الفندق بيها غرف هواي كل واحد بيكم راح ياخذ غرفه وكل غرفه بيها سرير ومفروشه وبيها صحيات.
بعض الطلاب ما يتقبلون گعدتهم بيها وعدهم أمكانيه يطلعون بشقه وحدهم وأحنه ما نمانع هذا الشي

بارق :- ماشي استاذ.
شكرا

وسام :- ولو تدلل.
يلا هسه ورايه حتى نروح للسياره

زينب :- من حچه الأستاذ على المكان اللي راح نگعد بي ارتاحيت حيل لأن الكل راح يكونون سوه وماكو شي يخوف.
أخذنا استاذ وسام للسياره صعدنا بيها وهو صعد ويانا بس چانت المسافه كلش قليله بين سكنا وبين الجامعه.
وصلنا لمكان السكن ونزلنا من السياره دخل الأستاذ ودخلنا وراه.
چان المكان يجنن أول ما ندخل من الباب حديقه كلش حلوه بيها مسقف وجواه طاوله چبيره وكومه كراسي.
البنايه كلش ضخمه وهي عباره عن ٤ أدوار كل دور بي صاله رئيسيه وداير ما دايرها ٩ غرف كل غرفه مأثثه أحسن أثاث وبيها صحيات يعني المكان كلش مريح.
أنطانه دكتور وسام مفاتيح الغرف يصيح بالأسناء وينطينا المفاتيح.
صاح بأسمي رحت عليه أنطاني مفتاحي وچان بالدور الأول والصدفه چانت غرفته هو بنفس الدور.
أخذت المفتاح والجنط مالاتي ورحت على الغرفه فتحت بابها ودخلتهن جوه وسديت الباب.

وسام :- بعد ما عرفتهم على الجامعه طلعت وأخذتهم للسياره حتى أخذهم لسكنهم يرتاحون مع أن السكن چان كلش قريب على الجامعه بس حسيتهم تعبانين.
وصلنا للسكن ودخلتهم هناك وصحت اسمائهم واحد واحد حتى أنطيهم مفاتيح غرفهم.
وصل الدور لزينب صحتها و تعمدت أنطيها غرفه بالدور الأول يم غرفتي.
أخذت المفتاح وراحت للغرفه فتحتها ودخلت الجنط الها وسدت الباب.

زينب :- بديت أستكشف الغرفه وچانت كلش حلوه عجبتني حيل لون جدرانها أبيض وديباج الچربايه أبيض ورصاصي وكنتور خانتين وچربايه وكومدي للچربايه ومرايه بيض وبيهن ورد رصاصي وفراش الأرضيه رصاصي وثلاجه صغيره بيضه وسبلت أبيض وچانن الصحيات نظيفات حيل.
ردت أرتب ملابسي وغراضي بس چنت تعبانه حيل ف رحت غسلت وبدلت لبست تراك خفيف وراسلت أهلي طمنتهم عليه وسديت الموبايل بسرعه بعدها تغطيت ونمت نوم عميق.

____________________🌸🍃

وللحكايه بقيه