Aquarius (PUBLISHED UNDER IMMAC PPH)

Chapter 3: Signs

Nang makapasok na sa kuwarto ay agad akong sumalampak sa kama at tumitig sa kisame. Bigla ulit bumalik sa isip ko 'yong nangyari. It was so awful. Ngayon lang nangyari 'yon sa 'kin tapos dahil lang pala sa make-up. Seriously? My goodness! Kung dahil lang iyon sa make-up, bakit ganoon na lang kalala? Bakit parang ibang-iba siya sa pakiramdam? Bakit parang nagdududa ako? Is it really the make-up or is it something else?

I sighed. I really don't know.

Napasipa ako sa ere at gumulong-gulong sa kama. Ayoko na! Ang sakit sa ulo! Bakit ba parati ko na lang ginagawang komplikado ang lahat? Eh, nangyari lang naman lahat ng ito dahil sa make-up. M.A.K.E.U.P! Nothing more, nothing less. Stop overthinking, Genevieve! Wala 'yan maitutulong sa 'yo. Lalo ka lang mahihirapan niyan. Sayang ng ganda mo kung ma-i-stress ka lang.

Tumigil ako sa paggulong at bumangon na. I decided to take a shower since nangangamoy na ko. Naglakad ako papunta sa banyo ngunit napatigil ako nang mahagip ng paningin ko ang malaking salamin na sakop ang buo kong katawan. I stand in front of it to examine myself.

Hinawakan ko ang mukha ko, leeg, batok, tiyan at kamay. Nababakas pa rin sa mga ito ang pamumula pero mas malala talaga sa mukha at leeg ko. I shrugged saka na tumungo sa banyo. Mawawala rin naman ito after ilang days. Maybe one or two day/s, I guess?

Ilang oras din akong nagbabad sa bathtub habang nakikinig sa music 'cause music has a soothing effect on me. After ng ilang kanta, naisipan ko nang magbihis. Pinatuyo ko muna ang buhok ko habang nagbabasa ng libro nang bigla akong mapahikab at naramdaman ko na lang ang biglaang pagbigat ng mga talukap ng mata ko.

"Doc, how is she? Is she going to be alright?"

I saw my mom crying while talking to a doctor. Kumunot ang noo ko at pinakinggan pa sila. Anong nangyayari? Bakit umiiyak si mommy? Nasaan si daddy?

"As you can see, Mrs. Hutton, it's very difficult for us to find out what is really happening to her. We can't determine her allergy. Even in medicines, hindi namin alam kung ano ba talaga ang compatible sa kanya. It's really confusing and strange. Ngayon lang ako naka-encounter ng ganito. Kaya ngayon palang, Mrs. Hutton, sinasabi ko na sainyo na hindi ito magiging madali para sa kanya. We have to run some tests. Some might be very dangerous and it can be fatal," ang doktor.

Agad ko namang naramdaman ang pagkawala ng lakas ko dahil sa mga narinig ko sa doktor. Sino ang tinutukoy niya? Is it me? But, I'm here! Hindi ba nila ako napapansin? I am just right here!

"Oh, God. Please, Doc, do everything. Save my daughter, please. Please." Napahagulhol na si mommy at parang pinupunit ang puso ko dahil sa mga nakikita ko ngayon. Ako nga talaga ang pinag-uusapan nila. Sino pa ba ang ibang anak ni mommy bukod sa akin? Ako lang naman, hindi ba? I am her only child.

May sinabi pa sa kanya ang doktor pero hindi ko na iyon inintindi at pinakinggan. Nakatutok lang ako kay mommy at hindi ko alam kung ano ang gagawin ko. Masakit sa akin na makita siyang ganito. Dahan-dahan nitong winawasak ang puso ko.

Nagsimulang maglakad si mommy kaya sinundan ko siya. Tumapat kami sa isang pinto na nakasarado. Dahan-dahan niya itong pinihit. Nakita ko agad si daddy na nakaupo malapit sa may kama habang nagpupunas ng kanyang luha. Akala ko nag-iisa lang siya sa kuwarto pero may napansin akong nakahiga sa kama kaya agad ko itong nilapitan para matingnan.

Bigla akong nanlamig at parang tumigil ang mundo ko dahil sa nakikita ko ngayon. Naramdaman ko rin ang sunod-sunod na pag-agos ng luha mula sa mga mata ko. Pakiramdam ko para na naman akong tinatakasan ng bait.

It's me. Nanginig ako. Oh, God, it's me! What am I doing there when I'm actually here?!

Ako 'yong nakahiga sa kama. Nakikita ko ang sarili ko ngayon na walang malay at maraming apparatus ang nakakabit sa buong katawan ko. It's strange kasi lahat na apparatus na nakakabit sa akin ay walang involve na tubig. Puwede ba iyon? Napansin ko rin na parang may kakaiba sa katawan ko kaya nanliit ang mga mata ko habang tinititigan ito.