تعودت تفتح عينيها عليه فكل صباح، مجرد رؤيته فجنبها كيحسسها فالراحة. كانت كتبحلق فيه وكأنها مازال ماحفظت ملامح وجهه، بعيون كتبسم وقلب مرتاح أخيرا لقربه الكبير منها.
قربت منه بشوية على الفراش حتى طبعت بوسة خفيفة على خده وهي ترجع لوضعيتها وهي كتبسم، حست بيه كيتملم ولكن باقي ما فاق وهي تقرب مرة أخرى لعنده باش تعاودها. غير جات تبعد وجهها منه حتى كان هو فاق كيحيطها بيديه بزوج من ظهرها كيمنعها من انها تبعد، شهقت من غفلته قبل ما تطلق ضحكة وهي كتحاول تبعد يديه منها.
صبحت عليه وهو كيزيد يزيرها لصدره فحين عينيه مازال مغمضين:
_صباح الخير حبيبي!
فتح عين وشاف فيها:
_صباح النور وكل ما كيشبهك..
ضحكت فوجهه وبقا هو كيشوف فيها بعد ما فتح عينيه بزوج، غمزها وقال:
_مفيقاني بالبوسان على الصباح أش جرا؟
جات بغات تبعد ولكن مابغاش يطلق منها، شافت فيه هازة حجبانها:
_بغيت نشوف واش نعاسك خفيف ولا ثقيل.. دابا طلق بلا ما تندمني!
شاف فيها بخبث:
_نتي للي جبدتيني أليلى وانتي عارفة نعاسي خفيف.. دابا خليك من هاذشي وأجي لهنا يا مخدتي المريحة ...
شافت هي ناحية الباب ونطقت:
_أرييج؟!!
غير سمعها عمر حتى كان طلقها وفلتت دغيا من بين يديه ونقزت فوق منه جهة الحمام، شاف فين كانت كتشوف مابان ليه والو وهو يشد مخذة صغيرة رماها بيها وهي كتفرنس.
خرجت ليلى من الحمام وهي كتمسح وجهها بالفوطة، شافته باقي ناعس على ناموسيته متبعها بنص عين. وقفت قبالت المراية كتقول:
_عميمير نوض راه بداية سيمانة جديدة هاذي وخاصك تبداها أون فورم زعما.. أنا غنمشي نوجد الفطور على ماتوجد راسك واخا؟
شافت فيه كتسنى اجابته، ناض من الناموسية ونقز لعندها حتى درعها بيديه من لور وهي كتشوف وجهه فالمراية وقال:
_الشتا والبرد على برا والله ماسخيت نخرج من فراشي..
_إوا الشتا وقتها هاذي أعمر، نوض غسل وجهك وغيخطيك العجز..وغنوجد لك القهوة معصرة باش يالاه تفيق حيث بنتليلي اليوم نعيعيس كغير عادتك.
باس راسها من لور وطلق منها قبل مايتجه ناحية الحمام فحين هي بقات متابعاه وهي كتبسم.
3شهور الأخيرة دازت كأنها شي حلم جميل كتمنى ماتفيقش منو، كانت بحال شي بداية جديدة لحياتها وللي خلاتها تحس بالطمأنينة كثر. رجعت كتشوف حبو ليها فكل خطوة أو فعل كيصدر منو، وكتشوف التقدير والإحترام من خلال تعامله معاها واهتمامه بيها.
أما بناتها كيما ولات كتحس بيهم فيكفي أنها تشوف فيهم باش تنسى اي حاجة قلقتها فنهارها، محسسينها انها شخص مسئول قادر يقوم بمسئولية ماشي ساهلة.
***
أنت تقرأ
نبض الحب (بالدارجة)
Romanceهي عطاتها الحياة فرصة ثانية..وهو سبق ليه وتكوى بنار الفراق ..كيلاقيهم القدر بزوج فمحطة من حياتهم، فكيفاش غيكون اللقاء؟ واش غيشكلو بزوجهم خيوط قصة جديدة ولا هذيك غير محطة وغيفوتوها؟ نبض الحــــب بالدارجة المغربية❤ أكتوبر 2018 #1دارجة
