أريد منــك أكثر مما أريد ... !

90

خطوة (85) .. خطوة الرهبه من حلم أريد منك أكثر مما أريد

( في حبك .. تعلمت أن لا أموت ! )

حمود من وقف قباله : نعم ..!

لافي بأبتسامه هاديه : قلت جاي لك باخذ أمانتي

حمود بنرفزة : أنت كيف جيت لحد هنيا بوضعك ألي أنت فيه .. قبل يوم متواصل

مع مارتن و مع توماس وكان وضعك مايطمن ..

لافي حرك يده حتى يحك شعره من ورا أذنه ويرفع عيونه لفوق بعبث : تقدر تقول أخذت الأذن .. وطبعا بيوافقون دام أن سفرتي ماهيب للكويت

حمود بحده : على أساس ماهم مراقبينك .. ( رفع يده بوجه لافي ) شايل عقلك بيدك أنت .. وضعك ياولد ماهوب سهل .. مسجل عندهم هناك أنك متزوج وحدة يقال لها تغريد .. ومن وراهم تزوجت الغيد .. هذي أكبر ثغره راح تحذفك في سجونهم حتى لو أنت طلقت الأولى !

لافي حط يده على كتف حمود : على هونك .. وراك أشتبيت أعوذ بالله

حمود أخذ نفس ونزل يده : لاتلومني من قمت وأنا على أعصابي

لافي صغر عيونه وبيقين : هذي سوايا بنيتي .. قايل لك ولاصدقتني

حمود طارت عيونه وبأستفهام : بنتك .. بنتك من

لافي بصوت هادي : وين هي ..؟

حمود من أستوعب .. حرك راسه لجهة الديوانيه : حياك يارجال وأترك عنك هالهرج لأن شوفتها بعيده عنك

لافي تحرك يمشي ورا حمود : لا أن شاءالله الأمور طيبه ..

حمود هز راسه : ولا تسنه ضاحكن ع البنيه وحاط أنه مطلقها !!

حطيت يدي على الجدار وقلبي يدق بقوة .. يدق لدرجة قام يوجعني وخفت !

خفت أشوفه ويشدني أشياء في نفسي ماظنتي ماتت ..

بس ماقدرت وأنا أسمع ضحكته أنفجرت بصوت عالي يوم قال له عمي هالحتسي ..

وش يضحك عليه ذا الأنسان ..؟

لأنه علمني وش الندم .. ولا لأنه علمني وش أكبر تسذبه

قلتها لنفسي !

ملت براسي بحذر مابيه يلمحني وأنا أقرب وجهي من الجدار وبعين وحده شفته .. أتسعت عيني بقوة

مسرع نحف ماهوب لافي ألي أخبره .. حتى وجهه تعبان .. تعبان حيل ..!

ولا لأنه لابس ثوب تسنه مخصر على جسمه والله تقول بطنه لصق بظهره

أساسا هو ماله كرش .. من عرفته .. صرت أطالع ملامحه زين .. غترته ..

جسمه ومسرع ماعلقت عيني عليه من جديد وهو يمشي بوسط

الحديقه متوجه لقسم الرجال

.. أبعدت عن الجدار بسرعه ورجعت لورا