♡ Playing Love Games ♡

She Played Her Part ♡ Chapter 29 & 30

Umamba akong babatukan siya.

"Sige, batok pa!" sindak niya sa akin.

Napahinto naman sa ere ang kamay ko at ibinaba ko rin iyon agad.

Tumingin siya sa mga tao sa canteen. "Nakikita mo 'yang mga babae na 'yan?" Tinuro niya pa ang mga sinasabi niyang babae.

Ako naman itong si utu-tuo na tumingin nga sa mga tinuro niya.

"Kapag nakita nilang dumapo ni dulo ng daliri mo sa dulo ng buhok ko, dudumugin ka nila—"

Hindi ko na siya pinatapos at itinuloy ko na ang naudlot kong pagbatok sa kanya.

"Ouch!"

"Asa, Lawrence John!" Kumapit ako sa braso niya at hinarap ko siya sa stall ng nagtitinda ng hotdog.

Hindi ko na siya inutusang bumili ng hotdog. Nagkusa na siya. Takot lang niyang mapahiya sa mga babaeng sinasabi niyang dudumog sa akin kung sakaling kantiin ko siya.

Pagkatapos naming bumili ng limang hotdog—tatlo ang sa akin at dalawa ang kanya—umupo kami sa table na madalas naming puwestuhan kapag kumakain dito sa canteen.

"Ang takaw mo pa rin, Best," puna niya habang nag-uumpisa na akong lumamon. "Hindi ko na tuloy maintindihan kung bakit ako na-in love sa 'yo dati," dagdag pa niya.

Tiningnan ko siya ng masama. Nag-iwas naman siya ng tingin na parang wala siyang sinabi. Kumain na lang ulit ako kesa pansinin ko siya. Hindi niya dapat binabanggit sa harap ko na na-in love siya sa akin dati dahil nakakasuka! Sayang namang itong hotdog na kinakain ko.

Ang tagal ko kayang hindi nakatikim ng libre niya. Dati hindi ako gumagastos kapag lunch at meryenda kasi kasabay namin siya lagi ng mga bruha kumain at nililibre niya ako palagi.

And speaking of those bruhas, nakikita ko na silang papalapit. At si Faye, sa sobrang excited, tumakbo na!

"Papa Renz! Bakit ngayon ka lang nagpakita sa'min? ang tagal ka naming hina-hunt, huh?!" 'Tapos bumeso pa siya sa magkabilang pisngi ni Renz.

Pati si Renz hina-hunt nila these days? Bakit hindi ko alam iyon?

Bumeso rin sa kanya ang dalawa pang haliparot pagkalapit sa amin. At ang impakto ko namang best friend, tuwang-tuwa na nilalandi siya ng tatlo.

Parang bigla akong naumay sa hotdog na kinakain ko dahil sa ginagawa nila sa harap ko. Ang sarap na lang isuka lahat ng kinain ko pati na ang bituka ko.

Umupo silang tatlo sa table namin.

"Kamusta naman ang buhay, papa Renz?" malambing na tanong ni Tracy.

Ngumiti na naman ng wagas si Renz. Ewan ko kung bakit ganyan siya makangiti ngayon. Hindi ko malaman kung ngiting manyak ba o ngiting nanglalandi lang talaga. O baka naman ngiting in love?

Tsss! Lalo akong nasususka sa huling naiisip ko.

"Heto... in love," sagot ni Renz at inilagay niya pa ang dalawang kamay niya sa likod ng ulo niya.

Nasamid naman ako sa sinabi niya. Inubo ako. Feeling ko nalunok ko ang kalahati ng hotdog na nasa bibig ko.

Inabutan naman ako ni Myleen ng bottled water niyang dala. Tinungga ko naman kaagad iyon.

"Mamigay ka kasi!" sabi pa niya sa akin 'tapos kinuha ang isang hotdog ko.

"Oo nga, mamigay ka." 'Tapos kinuha rin ni Tracy ang isa ko pang hotdog.

Si Faye naman, walang pasabing kinuha iyong isang hotdog sa lalagyan ni Renz.

Napasimangot ako. Sakto pala ang nabili naming hotdogs para sa aming lima. Ang leche lang ng mga babaeng 'to... gutom kaya ako at para sa akin iyon binili ni Renz!