♡ Playing Love Games ♡

Bet Your Heart ♡ Chapter 29 & 30

May lumabas na lalaki na naka-shades doon sa van. Kahit sino talagang naka-shades na lalaki pumopogi, ano? I laughed in my mind. Pero itong isang ito ay mukhang totoong pogi pa rin kapag tinanggal ang dark shades niya. Medyo moreno, may katangkaran, mukhang maganda ang katawan sa likod ng blue t-shirt na suot niya at lalaking-lalaki kung kumilos. In short, he's my type of guy!

Papable si kuya at sizzling hot!

Napatulala ako kay kuyang papable slash sizzling hot kaya naman nagulat ako nang pumitik sa harap ng mukha ko si Mark. Pagtingin ko sa kanya ay magkasalubong ang mga kilay niya.

Ano'ng problema ng taong ito?

"What?" tanong ko sa kanya nang hindi naman siya nagsalita. Inaabala niya ang pagtitig ko kay kuyang papable slash sizzling hot!

"Punta tayo sa park. Nakakainip dito," sabi niya at nauna na siyang maglakad papasok ng kuwarto ko.

Napasunod naman ako sa kanya. "Ano nama'ng gagawin natin doon?" tanong ko. Nakasunod lang ako sa kanya hanggang sa makalabas na kami ng bahay.

"Edi, mamasyal," sagot niya sa tonong kailangan-pa-bang-itanong-iyon. "Tsaka maghahanap ako ng chics."

Ano raw? Maghahanap siya ng chics at isasama pa talaga niya ako?! Aba't?! Buwisit na lalaki ito, ah!

Binilisan ko ang lakad ko para maabutan ko siya. Halos tumatakbo na yata ako dahil ang bilis niya maglakad at bukod pa roon ay malalaki ang hakbang niya kasi mahahaba ang legs niya. Nang naabutan ko siya, finally, ay hinatak ko ang dulo ng t-shirt niya para mapahinto siya sa paglalakad at pinilit ko siyang iharap sa akin. Ngali-ngali ko siyang batukan.

"Anong maghahanap ka ng chics?" paingos kong sabi sa kanya "At chics with 's' talaga? As in, maraming babae?! At isasama mo pa talaga ang girlfriend mo sa pambababae mo?!" Disbelief is on my pretty face.

Nasa labas na kami ngayon ng gate nila. May mga dumadaan na napapatingin sa amin pero wala akong pakialam. Pakialam din ba nila? Sila nga hindi ko pinakelaman, eh.

"Ang ingay mo!" pabulong pero madiin niyang sita sa akin.

"Bakit? Nahihiya ka na nalaman nilang babaero—hmmmp!"

Hindi ko na naituloy ang dapat na sasabihin ko dahil tinakpan niya ang bibig ko. Nagpumiglas ako at pilit tinatanggal ang kamay niya pero mahigpit ang pagkakatakip niya sa bibig ko at pagkakahawak sa isa kong braso.

Tumingin siya sa mga napapadaan na napahinto dahil sa eksenang ginawa ko.

Harassment! gusto kong isigaw para tulungan ako ng mag tao. Pero ang unggoy, ngumiti siya sa mga tao.

"Pasensiya na po," hingi niya ng dispensa sa mga ito. "Selosa lang po talaga itong girlfriend ko."

Literal na nanlaki ang mga mata ko dahil sa sinabi niya. Sino ang selosa na girlfriend? Ako?! Hah! At bakit naman ako magseselos?! May dapat bang ikaselos? Ang kapal niya talaga! Kahit ipamigay ko pa siya sa ibang babae ay ayos lang, nang mabawasan naman ang buwisit sa buhay ko!

Pero bakit ba kasi nag-react pa ako sa sinabi niya? Puwede namang hindi at kung gusto niya, tulungan ko pa siyang maghanap ng ibang babae para tigilan na niya ako.

But then I remembered that I agreed to act as his real girlfriend. Siguro dahil lang iyon soon kaya nagkakaganito ako ngayon.

"Naku, hijo," palatak ng isang ginang. "H'wag mong pinagseselos ang nobya mo kung ayaw mong maghanap siya ng kalinga sa iba. At ikaw naman, hija, h'wag kang masyadong selosa dahil d'yan madalas nasisira ang isang relasyon," pangaral niya sa aming dalawa. Ang echos lang pero sa tingin ko ay totoo ang sinabi niya.