♡ Playing Love Games ♡

Bet Your Heart ♡ Chapter 15

Nang makarating kami sa tapat ng room ko, hindi niya pa din binibitawan ang kamay ko. Kaya humarap na ako sa kanya.

"Ah... Renz, salamat sa paghatid," kiming wika ko at bumaba na naman ang tingin ko sa mga kamay namin. "Uhm, a-ang kamay ko."

Ngumiti siya. "Give me the key?" Inilahad niya ang isang kamay niya na hindi nakahawak sa akin.

Kumunot ang noo ko. "Bakit? Kaya ko ng buksan ang pinto."

"Basta, ibigay mo na sa akin," giit niya habang nakalahad pa rin ang isang kamay niya at mukhang wala pa siyang balaka na bitawan ang isang kamay ko na hawak niya.

Ibinigay ko na ang susi sa kanya. Pagkabigay ko ng susi, binuksan niya na ang pinto. Pumasok kaming dalawa sa loob ng kwarto at sinara niya ulit ang pinto.

Binitawan niya lang ang kamay ko nang makapasok na kami.

Lalo naman akong nagtaka kung bakit siya pumasok sa loob ng kwarto ko. Nakatayo lang ako sa harap ng pintong nakasara habang siya naglakad papunta sa bintana at hinawi niya ang kurtina.

Napansin niya yatang nakatayo lang ako sa tapat ng pinto kaya nilingon niya ako.

"I thought, you're tired?" kunot-noong tanong niya. "Magpahinga ka na," utos niya pa sa akin.

"Ah, kasi..." Hindi ko alam kung paano ko sasabihing umalis na siya. Parang nakakahiya naman kasi na paalisin ko siya at ang rude ko yata masyado kapag ginawa ko iyon.

Ngumiti siya at lumapit sa akin.

"Don't worry, babantayan lang naman kita," wika niya at kinuha niya na naman ang kamay ko para hilahin palapit sa higaan.

Hindi ko alam kung hihiga ba ako o ano nang makalapit kami sa kama. Hindi ko din alam kung ano ba ang dapat kong sabihin at gawin.

Humarap siya sa akin nang hindi pa rin ako kumilos at tinitigan niya ako ng mataman.

"Wendy..." napapabuntong-hininga na naman niyang banggit sa pangalan ko. "Sige na, magpahinga ka muna. Doon lang ako sa tabi ng bintana. Hindi kita iistorbuhin habang nagpapahinga ka and I won't do anything but to guard you, okay?"

Tumango na lang ako at humiga ako sa kama. Kinumutan naman niya ako. Umupo pa siya sa gilid ng kama ko matapos niya akong kumutan at pagkatapos ay yumuko siya para halikan ako sa noo.

At katulad kanina nang hinawakan niya ang kamay ko, bumilis na naman ang tibok ng puso ko.

Hindi pa nga gaanong normal ang tibok nito kanina, 'tapos ngayon ang lakas at ang bilis na naman ng tibok nito.

"Close your eye and have some rest," sabi niya pa bago siya tumayo at pumunta ulit sa gilid ng bintana.

Pumikit ako katulad ng inutos niya at sinubukang matulog kahit hindi naman ako inaantok. Pero ilang minuto na akong nakapikit ay hindi ko pa din makuha ang tulog ko.

Nakiramdam ako sa paligid ko. Pinakiramdaman ko ang ginagawa niya pero wala rin akong napala. Mukhang nandoon lang talaga siya sa tabi ng bintana.

Nang hindi talaga ako makatulog, minulat ko ang mga mata ko at tiningnan si Renz. Nakatingin lang siya sa labas ng bintana na parang may malalim na iniisip.

Inalis ko ang kumot sa akin at bumangon ako paupo sa gilid ng kama. Naramdaman niya yata ang paggalaw ko kaya napalingon siya sa akin.

"Akala ko tulog ka na?" Tumayo siya at naglakad ulit palapit sa akin.

"Hindi ako makatulog, eh," sagot ko.

Pagkalapit niya sa akin ay umupo rin siya sa gilid ng kama katabi ko.