أجنحة بلا ريش ... طارق اللبيب

الحلقة الأخيرة

بس انا حسيت انو عمر تبلدي متجرس شديد على المراة الظاهر عندها معزة خاصة عند اخوها ..
ربك يستر .. وتبقى كويسة المراة والله .. انتو عارفين الحاصل ده كلو بي سبب البنقو؟
الله يلعن البنقو ويلعن يومو.. والناس البجيبوهو ويبيعوه .. شوف عليك الله السجارات الشربهن صالح ديل لعنتهن وصلت لي وين ؟
اها مشيت على دكاني الاصلن بقى فاضي .. وانا بادي من الصفر .. هسع ذاتو لو قالو لي تعال سوق نادية ..امشي ليهم ايد ورا وايد قدام زي الاهبل ؟
المهم يازول قضيت اليوم داك كلو وانا مترقب تلفون من نادية ..ولا ابوها مافي زول اتصل علي .. واظنهم ناسني عديل مع اللخمة الهم فيها .. اتصلت على عم عمر ..
السلام عليكم عم عمر .. قال لي عليكم السلام ورحمة الله ..
قلت ليهو اها بشر ان شاء الله الخالة كويسة ؟
قال لي والله الحمد لله هسي كويسة وجبناها البيت .. بس ماراضية تتكلم مع زول .. بس قالت لينا,,
.ليه مارقني من الموت ؟ كان اللييلة مرفتوني برضو الصبغة في .. كدي ابقو رجال ووقفو عرس نادية وراشد .. تاني بشربها ..
لكن يا شمس الدين .ماتشيل هم انت انا بقنعها ..
الصبر بس ..
اتصلت على نادية قريب المغرب.. حمدت ليها سلامة عمتها .. و قلتا ليها ابوك كلمك بي كلام عمتك ..
قالت لي ايوة وانا هسي متوترة من الموضوع ده.. وماعارفة البحصل شنو؟ قلت ليها قولى حسبي الله ونعم الوكيل .. وخلي الامور على الله .. البسويهو ربنا كلو نحن قبلانين بيهو .. واكيد ربنا ما ح يخذلنا ..
ومرت الايام وبعد تلاتة يوم جانا تلفون من واحد من الفنادق الكبيرة في البلد .. قالو لينا في واحد سعودي اسمه عايد الشمري . نزيل في الفندق .. وداير يصلكم .. دايرين زول يوصف للسواق .. قلت ليهو كويس اديني السواق .. قال لي بتصل عليك بعد شوية .. وبقيت مراقب التلفون .. لامن اتصل علي ووصفت ليهو ونحن هنا جهزنا المكان وفرشنا الديوان ..
بعد مسافة كدا العربية وقفت برة . وطلعتا لقيت واحد سوداني سايق العربية ..

والسعودي ده راكب معاهو .. زول ابيض جميل .. وشو منور .. وعندو لحية سوداء كثيفة .. وفوق راسو غترة بيضاء بدون عقال .. وسلم على سلام حار .. يديهو مللللس وباردات .. وانا ايدي خشونة وسواد وسخانة نابعة من الفلس ههه ..
ابوي جاء برضو استقبلو .. الكلام كان زي الساعة 4 عصرا .. ودخلناهو واكرمناهو بالكرم السوداني .. وجبنا ليهو صالح بي كرسي العجلة ..
ما كلمتم صالح طبعا بقى يحرك يديهو ويقعد ..بس لازم يكون مركوز من ضهرو ..
اها يازول الزول ده وكت شاف صالح قعد في الواطة وسلم عليهو ودمع .. وصالح استعجب فيهو .. قال ليهو عايد؟؟
قال ليهو نعم انا عايد يا صالح ..
قال ليهو شكلك متغير كلو كلو .. قال ليهو قصدك اللحية ياصالح ؟
الحمد لله انا التزمت بالمنهج القويم .. واتجهت الى طريق الله ربنا هداني الحمد لله ..
وقعد يحكي لينا بي سبب التزامو .. منام شافو في النوم وقصة طويلة وعريضة .. وانو رجع ديونو وحقوق الناس ..وبقى رجل بر واحسان .. ربنا يتقبل منو .. والزول السوداني المعاهو ده شكلو حتهو مرطب .. ناس بتشرب بالنز .. غايتووو!!
المهم .. الزول ده بدا يحاسب في صالح .. بالورقة والقلم .وبوريهو في حقوقو ..
وصالح مندهش لمن منطط عيونو ..
وقال ليهو يا صالح عندك حساب في البنك؟ احول ليك كل حقوقك فيهو؟
.. قال ليهو نزلا في حساب ابوي .. يازول المبلغ الله مبلغ خرافي ورقم فلكي . المهم بالاختصار ببني ليهو عمارتين ..
صالح قال ليهو جزاك الله خير ياعايد.. بس ياعايد انا ماعايز الاقامة دي .. لاني عايز اتزوج واستقر في السودان .. وزوجتي العايز اتزوجها .. عايلة البيت الوحيدة ..والبيت فيهو امها واختها بس انا عايز استقر واسكنهم التلاتة معاي في بيتي .. واكون مسؤول منهم .. مابقدر اسافر تاني .. وانت ماقصرت ..
قال ليهو .. كيف ماقصرت؟ انا اخرت ليك فلوسك كل هاذي المدة . والله اني نادم . بس اللي أبغاه انك تعفو عني من قلبك وتسامحني عسى الله يسامحنا اجمعين ..
قال ليهو السماح يا ابوعواد ربنا يكرمك .. والزول قعد معانا لغاية قريب العشاء .وقال عايز يمشي الفندق .ورفض يبيت معانا في البيت .
قال بكرة ماشي .. منطقة جبل اولياء . وماسألناهو لشنو؟
احتمال يكون ماكل ليهو زول تاني ماشي يتحلل .. ربنا يهدي الجميع ..
اول من فات ... صالح قال لي ابوي يا ابوي .. انا كان حي كان ميت
القروش الجات دي انا عندي فيها نص .
والنص التاني حق الطيب وشمس الدين .. بيناتهم بالنص ..
انا قلت ليهو ده شنو يا صالح؟ ده تعبك وشقا عمرك .. قال لي انت السويتا معاي بعد العملتو فيك؟ .. مافي راجل بسويها الا القليل ..
اسكت ساي ماتخليني ابكي .. اصلي بقيت جني بكا ..
اها يازول باكر مشيت البنك .. واتأكدت انو القروش نزلت على داير المليم .
اها يازول والله نحن عملنا كرامة قدر الليلة وباكر وجمعنا الناس ..
والناس كلها عرفو انو صالح جاتو حقوق من السعودية .. تسد عين الشمس ..
وانا والله بس الجدادة بيضت لي في حكري ..
لكن الحكاية دي كلها مسخانة علي .. ولا فائدة في قروش الدنيا كلها الا بي وجود .. ندوو المنور خدوو..
والايام بقت تتباقص .. وانا بقيت متوتر توتر غريب .. وكل شوية بضرب لي نادية ترد لي بعد سل روح ..

...اها وكت ربنا فرجها علي ضربت لي براها يوم التلاتا المغرب قالت لي عندك فرصة تجيني ياشمسي عايزاك ضروري ..
وانا اصلا كنت فاضي وزهجان مشيت ليهم لقيتهم قاعدين كلهم .. رحبو بي احسن ترحيب وانا ماعارف الفي شنو بالضبط ..
قالو لي نادية جوة عايزاك امشي ليها وتعال لينا ..
دخلت لي نادية جوة لقيتها قاعدة ..
قالت لي شمسي يانور عيوني ياحبيب قلبي تعال اقعد هنا ..
قلت ليها في شنو يابت ماتخليني اجوعر هسي ..
قالت لي الامور هانت .. وعمتي وافقت الحمد لله .. وراشد مسافر والعرس اتلغى .. قلت ليها براحة واحدة واحدة .. انا بجيني سكري ..
قالت لي طبعا اليوم داك ابوي اتكلم مع راشد .. قال ليهو ياراشد ياولدي انا بحبك زي اولادي .. ونادية دي ابعد منها .. نادية متعلقه بي زوجها الاول .. والحكاية دي بتعيشك في تعاسة .. لو سمعت كلامي .. انا بقنع ليك ليالي بتي السنة الجاية تتزوجو .. بس تعاهدني الكلام ده ما تطلعو لزول .. وراشد فرح لانو اساسا مابحلم بي ليالي اصغر منو ب 15 سنة ..
طوالي اتنصل مني .. ومشى قال لي امو انا ماعايز نادية .. امو صدمت وشربت الصبغة .. اها وكت لقوها مصرة كلموها .. والموضوع طلع .. وليالي طبعا ماعايزة راشد .. لكن نحن سكتناها لغاية مايسافر .. وبعدين ترفضو بي راحتها .. شفت ابوي ده داهية كيف؟
اها هسي ياحبيب قلبي ..قاعدين ليك برة عشان يحددو معاك يوم العقد تجي تعقد ونمشي نكمل مشوار عمرنا يا الغالي ..
والحمد لله رب العالمين . دي كانت فرحة اكتر من فرحة يوم عرسي .. وقربت اغمر ....
وبعد اسبوع بس من الكلام ده .. اشتريت بيت . في حلتنا . لا ايجار ولا شي .. وجهزتو وعقدت على حبيبتي تاني ..
والموضوع بتاع (آية) داك راح شمار في مرقة .. واستقرينا الحمد لله .. وبمرور الايام .. سالم رفيق عمري بقى نسيبي . واتزوج سرو .
وبعد تلاتة او اربعة شهور من الكلام .. انا شايل كاميرا سوني ..وبصور في صالح راكب عربيتو الاتوس .. وجاي من حلة كوكو .. في اتم الصحة .. واشترى بيت هناك ..وبعد كم شهر صالح اتزوج البت الاسمها اسماء الممرضة,, وسكنو معاهو هي وامها واختها في بيتو طابقين في حلة كوكو .. وربنا فتحها عليهم فتحأ مبينا ..
وفي النهاية بقول الله يلعن البنقو .. ضوقنا المآسي وشال ممنا اجمل ايام في حياتنا .. لكن بس ربنا دايما رحيم بي عباده ..
وشكرا" لكم .. تحت شعار (لا للمساطيل) .. وشعار اخر (الحمو الموت)

ـــــ
تحية من طارق اللبيب كاتب السطور ..
الى احبته وقراء حروفه ..
اسأل الله ان يحميكم ويحمي ذويكم من خطر المخدرات ..
ويحوطكم بالعناية والرعاية ..
بحري 2015