اتحركت من مكاني داك مشيت لي ناس نادية لقيت البيت فاضي .. بس نادية ومعاها اختها الصغيرة (ليالي) 18 سنة ..
قلت ليها يانادية مالك في شنو ناس البيت وين؟
قالت لي عمتي يا شمسي ..
عمتي الوحيدة البتريدنا وبنريدا .. عمتي ام راشد .. شربت الصبغة ..
قلت ليها ليه شربت الصبغة؟ ..
عليك الله يانادية اهدي شوية واحكي لي برواقة عشان افهم .. هدات كدا..
وقالت لي امبارح ابوي اتكلم مع راشد الليل كلو بتكلم معاهو ماعارفة قال ليهو شنو؟ وراشد اقتنع براهو جا قال لي نحن يا نادية ما بننفع مع بعض ..
وانا فرحت شديد .. هسي الليلة الصباح مشى كلم امه ..
قال ليها انا ماعايز نادية .. خلاص خليتا .. امو طوالي دخلت المطبخ وفورت الصبغة في النار وشربت كباية كاملة وهسي ناس ابوي .. مشو ليها .. في الحاج يوسف .. انا خايفة شديد يا شمسي لو عمتي حصل ليها شي ابوي بجن عديل .. ماعندو اخت غيرا ..
قلت ليها .. ان شاء الله ربنا ينجيها .. ياربي ده شنو الحاصل علينا ده ..
قالت لي المراة دي يا شمس الدين الوحيدة الممكن تفركش موضوعي معاك .. لانها عندها كلمة في كل العائلة ..
قلت ليها وكت عندها كلمة في كل العايلة ..
مالا ماربت ولدها على الاخلاق الفاضلة ..
اعمل اي حاجة انا ماقادرة اتصرف .. انا مشلولة انا ما جا زول في راسي اضرب ليهو الا انت حبيبي .. واااي انا لو كان عمتي ماتت ياشمس الدين ..
انا طول عمري بكون شومه وهقيتة ..
قلت ليها النصبر نشوف البحصل شنو؟
انتي بس خليك هادية .. وطبيعية .. وما تتحركي من البيت ده لامن يجو الناس ديل من الحاج يوسف ويورونا الحاصل .. قالت لالا مابكونو في الحاج يوسف .هسي احتمال يكونو ودوها الدكتور ..
انت عارف ياشمسي والله عمتي دي فرحانة بي..
اني ح اكون مراة ولدها فرح ..
انا اصلا كنت خايفة من ردة فعلها دي ..
قلت ليها بس ابوك قال لي راشد شنو خلاهو يقتنع كدا ..
قالت لي والله ما كلمني .. ابوي اصلا بشتغل صامت .. وهسع امي مشت معاهو طبعا . ماعارفة في الشارع تسأله لو سألته وكلمها بتكلمني ..
قلت ليها طيب يا نادية انا ممكن ادق ليهم تلفون.. اشوفهم وين امشي ليهم .. قالت لي لالا اوعك .. والله مما يشوفوك ح يقولو يهودا البقى سبب في موتها .. واحتمال يسمعوك كلام ماياهو في الظروف دي . وانا مابقبل زول يقول فيك كلمة او يزعلك ..
انا عاينت ليها كدا في عيونها .. وعيوني اتملن .. فعلا والله نادية عمرها كلو ساعية لرضاي .. نادية ضحت بي حياتها وبي بيتها عشان انا ما افقد اخوي .. ولا اخوي ياذيني او أذيهو .. نادية فضلت انها تتفضح في الحلة.. وراشد يقول عنها الاكاذيب .. ولا أنا اتذل واتهان قدام ابوها واطلع كذاب ..
غايتو انا كانت عندي نعمة من الله ..بس ما كنت حاسي بيها .. وقالو اصلا الزول البتكون عندو نعمة من الله ..ومايحس بيها ويشكرها ربنا بشيلا منو .. ده كلو كلام بقول فيهو بجواي .. وانا بعاين في عيونها الفتاكة .. واحمرارها من البكا وبلل الدموع ذادها جمال ..
قلت بصوت مسموع (ربي ما حرمني منك يانادية) .. قالت لي قلت شنو ياشمسي؟ .. قلت ليها لالا بتكلم براي ..
المهم طلعت منها وحسيت انو من الواجب اني اتصل على الجماعة ديل .. حتى لو ما مشيت ليهم .. على الاقل اكفر ليهم ..
وفعلا انا في الشارع بعد طلعت من نادية دقيت تلفون عمك عمر تبلدي .. رد لي ..
قلت ليهو الف سلامة ياعم عمر ..
قال شمس الدين؟.. الله يسلمك ياخي تكرم .. قلت ليهو انتو؟ وين؟ هسي انا جاييكم .. قال لي لالا ماف داعي .. نحن مشينا مشتشفى خاص .. وهسي بعملو ليها في افراغ وغسيل . بس داخلة في اغماء .. مافي مشكلة ياشمس الدين ..
بس تطلع ونشوف الحاصل وبديك خبر .. مافي داعي يا ولدي ..
أنت تقرأ
أجنحة بلا ريش ... طارق اللبيب
General Fictionتدور أحداث القصة بلسان شمس الدين احمد الذي يبلغ من العمر 28 سنة .. تحصل على شهادة بكلوريوس من اداب الاسلامية . يعيش مه زوجته نادية في منزل مستقل عن أسرته .. تدور احداث القصة من السابع من عام 2002م .. و زي ما قال شمس الدين نحن كنا عايشين في احسن حا...
