أجنحة بلا ريش ... طارق اللبيب

الحلقة التاسع عشر

الايام مرت والتقول الاسبوعين الجاي فيهن ود عمتها ديل بقن لي قدر السنة .. اها ايازول غايتو وكت الاسبوعين انتهن اتصلو علينا من ابراهيم مالك.. وقالو جيبو المريض .. يعني الدكتور الالماني جا وخايب الرجا ده ماجا ..
اها يازول شلنا صالح شيل وركزناهو في الكرسي الورا في العربية ..وهو مافيهو حركة ولاكشيشة بس واعي .. وايديهو ديل بقن ناعمات زي ايدين الطفل .. وجسمو ده بقى ناير من رقاد الضل .. والبت الممرضة الاسمها اسماء دي مشت معانا بالله التقول صالح ده اخوها .. غايتو في ناس .. سبحان الله ربنا قاسم ليهم الاخلاق .. والاصالة ..
المهم وصلنا هنا .. والدكتور طلب فحوصات وتحاليل وصور وراجع كل الملفات القديمة بتاعة علاجات صالح ..
وقال الزول ده بتلزمو عملية . في النخاع الشوكي . ومحتاج يرقد بعد العملية 45 يوم .. وقال الزول ده بقوم زي الحصان .
بس العملية كانت تكلفتها 21 مليون في الزمن داك .. كانت بتودي الزول الاردن .. ونحن شفناها كتيرة شديد .. واتكلمنا مع ناس الادارة بتاعة المستشفى وبعد تلتلة خلوها لينا 19 ونص .
وما معروف تتم ولا ماتتم .. ابوي قال لي انا بدبر العشرة وانت تدبر التسعة ونص . وباقي المتطلبات الادوية وغيرو نتشاركها ..
انا طبعا وافقتا .. لو بعت البضاعة العندي على الكاش العندي يادوب ممكن تتم .. غايتو السواها فينا البنقو .. المنجل في البرسيم ماسواها .. الله يلعن البنقو ويلعن اهلو وناسو ..
ادونا مواعيد بعد 11 يوم للعملية .. ورجعنا البيت .. طبعا .. الود سالم مافارقني ولادقيقة .. وشايل معاي صالح اخوي من حتة لي حتة .. نعم الصاحب والصديق ..
توب على الجماعة الفي جبرة البمشي ليهم صالح يتسطل معاهم .. مافيهم اي زول جاهو زيارة ولا واحد اتصل عليهو .. الا اب راسين طبعا" جا في المستشفى كايس لي 700 حقتو .. وطبعا" بكون وصل ليهم خبر حادث صالح ..
انا مشيت بعت الوراي والقدامي بالرخيس .. وما مشكلة القروش بتروح وبتجي .. المهم قروشي تمت العشرة مليون وزادت
يعني زايدة من المطلوب شوية الحمد لله .
وبقينا منتظرين الحداشر يوم ..
اها يازول بعد يومين من الموضوع ده ..نادية اتصلت علي قالت لي راشد جا .. قلت ليها راشد منو يا نادية .. قالت لي راشد ود عمتي يا شمس الدين .. قلت ليها .. ايوااا .. حمدلا على السلامة ..
اها جاكم في البيت ولالا ؟؟
قالت لي ما جانا لكن بجي باكر ان شاء الله .. وانا بكون متابعة معاك بالتلفون .. وماتشيل هم ..
اها باكر قالت جاهم في البيت .. وحكت حكاية اغرب من الخيال الحكاية الفيها الشرط القالو وهو في السعودية ..
قالت اول من جا طلب انو نادية تقعد معاهو براها في البيت عايز يتفاهم معاها .. ويتفقو على نقاط معينة .. وناس البيت وافقو ليهو .. وقالو ليها امشي ليهو يا نادية ..
نادية مشت قعدت معاهو .. قال ليها قلتي لي يعني خلاص انتي وراجلك المياة رجعت لي مجاريها ؟؟
قالت ليهو ايوة الحمد لله تمام هسي ..
قال ليها وانتي عندك رغبة شديدة ترجعي ليهو .. وماعايزاني انا كلو كلو؟؟ .. قالت ليهو انت اخوي يا راشد ..
قال ليها اخوك بي وين يا الفالحة .. يعني هسي ابوك غشاني وخدعني .. ورسلك لي عشان تتخارجي مني بي طريقتك ..
وكت انتي ما دايراني ..ابوك يغشني ليه ويعشمني؟؟ .. انا طبعا موش ح أعمل مشكلة مع ابوك .. انا ح اوزع الكلام ده في الحلة وبس .
قالت ليهو انت يا راشد .. قلت لي عندي شرط لو وفيتي بيهو بديك حريتك ..
قال ليها شرطي صعب مابتقدري عليهو .. قالت ليهو بس انت قولو لي .. قال ليها بس الكلام ده سري بيني وبينك بس . لو في زول عرفو .. انا بدخلك في مشاكل لا ليها اول لا ليها اخر .. والله تكرهي اليوم الولدوك فيهو .. واقول فيك كلام لاحكى ولابقى .. قالت ليهو يالطيف . قول ياراشد النشوف .. قال ليها .. انا محتاج لي عشرة مليون عدا نقدا" ..
قالت ليهو انا لكين اجيبن ليك من وين العشرة مليون ياراشد؟ .. انا وكت احتاج البسندني منو غيرك انت ود عمتي ..
قال ليها سيبي الحنك البيش ده .. انا ما بتقسم فيني مكنة زي دي ..
زولك شغال وعندو دكان في الحتة الفلانة .. وابوك القروش دايرة تجيب لو سكري من كترتها .. شوفي لي العشرة خليني ادبر لي عرسة وامشي ..
بس ياهو ده شرطي .. سلمتيني العشرة مليون انا بمشي براي بقول لي ابوك .. انا غيرت راي وماعايز بتك .. وانتي وابوك تكونو في بر الامان .. ولو كمان دايرة تتلولوي .. انا جيت من السعودية على حسب وعد ابوك لي ..
قالت ليهو خلاص بديك العشرة مليون انت بتسافر متين ؟ قال ليها عشرين يوم بس .. قالت ليهو خلاص في الايام الجاية دي بسلمك
طبعا" نادية لمن اتصلت حكت لي الكلام ده . انا والله ختيت ايدي فوق راسي من الجبانة الوصلو ليها الناس ..
قالت لي يا شمس الدين انا مافاضية لي لقوالات وكلامات يطلعها فيني راشد بالكضب.. والزول ده والله شكلو مابخاف من الله .. ممكن يكضب فيني اي كضبة وينشرها .. بس انت لازم تدبر المبلغ ده باي طريقة لو انت عايزني فعلا" .. يعني انا بقيموني بي عشرة مليون ..
قلت ليها اسمعي يانادية .. انا زي ماحكيت ليك صالح اخوي عندو عملية بعد اسبوع.. وانا والله انتي ماعارفة انا بعت الوراي والقدامي وهسع الدكان فاضي . عشان الم لي قريشات لي عملية صالح .. ويادوبك تمت العشرة مليون يعني نديها .. لي راشد الجن ده وصالح مايلقى علاج .؟؟
قالت لي لالا .. اوعك تتصرف في قروش العملية .. لكن بس نحن نتصرف كيف؟ . قلت ليها . كدي اصبري النشوف الامور .. والله عملية صالح مهمة .. وموضوعك ده مهم .. كدي اديني تلفون الزول ده .. قالت لي ماعارفاهو الا تصبر لي للمساء .. لانو كانت بتتواصل معاهو بي رقم السعودية ..
المهم يازول اتصلت علي بالليل ادتني رقم راشد الفاسد .. اتصلت عليهو قلت ليهو انا عايز اقابلك .. قال لي تعال لي في الردمية .. في الحتة الفلانية .. الردمية دي في الحاج يوسف بحري ..
تاني يوم مشيت ليهو وقعدت معاهو قلت الزول ده اشوفو للزمان ..
سلم علي بي كل سخرية واستهتار .. وقال لي انت وكت مكسر فيها قدر ده .. وميت فوقها مطلقها مالك؟
انا خالي وعدني ووعد الحر دينا عليهو .. واهلي كلهم عارفين .. يعني لو نط من كلمتو ..تاني الناس ببيعوهو في سوق الحمير .. بعدين انا مدبر لي كلام . بعرفو اقولو بطريقتي الخاصة .. ..
عليك الله شوف الزول ده اسلوبو كيف ..
قلت ليهو انت بتتكلم عن خالك؟؟ .. قال شنو يعني خالي وبعرف ليهو شنو خالي؟؟ .. اسمع يا استاذ انا ماعندي معاكم كلام وعارف نادية حكيت ليك بشرطي الصغير والسري للغاية .. عندكم المبلغ وللا اتصرف ..
قلت ليهو تتصرف تعمل شنو .. قال لي بمش اكلم البلد كلها انو خالي غشاني بعد ماجابني من السعودية عشان اعقد على بتو رسل لي بتو وقال ليها قولي ليهو ما دايراك .. وقالت لي انا برضيك باي حاجة دايرها .. (يعني شنو اي حاجة دايرها) غايتو الزمن ده البنات بقن مامضمونات .. ده كلامي البقولو لي اهلي يا استاذ ..

انا طبعا" حيلي كلو مات من كلام الزول ده .. والظاهر نادية ماعارفة انو الزول ده ناوي يوسخ سمعتها كمان ..

انا قلت ليهو اسمع ياراشد .. طيب مافي مشكلة اقبل لينا بي خمسة مليون اساسا انت ما خسران حاجة ..
قال لي القال ليك منو ما خسران .. خسران نفسيات .. عشرة ..يعني عشرة .. ولاتعريفة ماتنقص ..
قلت ليهو طيب يا راشد ما دام دي اخلاقك ودي تربيتك .. اديني فرصة بتاعة اسبوع ادبر اموري ..
وانا اسااسا" ماعندي امور ادبرها .. ياها قروش العملية .. وماعندي غيرها .. ومابديهو قروش العملية مهما كانت النتايج ..
اتصلت على نادية وقلت ليها .. اسمعي يانادية لو ربنا كاتب لينا نتلم بنتلم .. ولو ربنا قطع العيش بيناتنا .. مافي زول بقدر يعمل حاجة ..
خلي الامور على الله .. وخليني اعمل عملية صالح .. وانتي حاولي اتنصلي من الزول ده قدر ماتقدري .. وفي النهاية الزارعها الله في الحجر بتقوم ..
نادية مشت طوالي كلمت راشد قالت ليهو اسمع .. ماعندنا ليك قروش .. اعمل الفي بالك .. انا رضيانة انفذ كلام ابوي .. ولو داير تعقد علي ماعندي مانع .. بس عشرة مليون مافي ليك .. ولو عندي مابديك ليها ..
قال ليها ايوااااا كدا كويس . وتاني يوم طوالي مشى لي ابوها قال ليهو ياحاج .. انا جيتك على حسب المواعيد وانا جاهز .. اعقد على بت خالي يوم الجمعة البعد الجاية واخد معاكم ايامي وبسافر .. وارسل ليها بعد شهر تعملو ليها الاجراءات وتجيني في السعودية ..
ابوها قال ليهو انت قابلتها؟ اتكلمت معاها؟ .. قال ليهو قابلتها وماعندها مانع نهائي .. ابوها قال نادو لي نادية .. اها وكت نادوها .. قالت ليهو يا ابوي . انا الزول ده ماعايزاهو .. ابوها قال ليها . طيب تمشي وين يانادية من وعدي الوعدتو ليهو؟؟ .. انا الزول ده اديتو كلمة .. وانا كلمتك وانتي وافقتي .. بترضى ابوك يبقى مهزلة قدام الناس؟؟ .. قالت ليهو يا ابوي انا كلمتك مستحيل اكسرها ..بس انت خليك عارف انو الزول ده انا ماعايزاهو . والكلام ده ضد رغبتي . لكن موافقة مافي مشكلة .. ابوها قال ليها . على خيرة الله مادام موافقة انا ما داير ليك زول احسن منو وماحتندمي ..

وبدو يعملو في ترتيبات العقد .. ومشى اشترى ليها حاجات .من السوق ..اساسا هو لمن جا من السعودية نهائي ما جاب معاهو حاجة ليها لانو . خاتي انو ح يستلم العشرة مليون .. ويبقى ربحان .. لكن هسي اتحصل علي البت وابوها ..
وانا سلمت اموري لله ..وبقيت شغال في ترتيبات العملية بتاعة صالح ..
يازول يوم العملية مشيت وردت القروش كلها.. على داير المليم وعمليتو كانت من الساعة 9 صباحأ لغاية الساعة واحدة .. والحمد لله قالو العملية نجحت .. والدكتور بشرنا شديد . وقال ان شاء الله اول ما يصحصح من البنج ببدأ يتكلم عادي .. وبعد شهرين بمشي بي كرعيهو زيو وزي الناس ..
الحمد لله يازول مادام القروش انا دفعتها وجابت نتيجتها لي صالح
تاني مافي مشكلة . كل شي بيد الله وانا رضيان بي قسمة ربنا ..
وابيت اكلم اي زول بخيابة الجنى الداير يعرس نادية .. حتى امي وابوي ماحكيت ليهم .. في النهاية ده سر ..ونادية حلفتني ما اقولو لي بشر .. وتانيا هو ح يبقى راجلها .. والكلام ده بشوه سمعتو وعشان نادية انا ح اسكت .. لكن والله حاسي بي مرارة في قلبي .. غايتو السواها فيني صالح اخوي . ان شاء الله ماتبقى على مسلم .. بس نقول الحمد لله ؟؟
والله هسي انا بكيت عديل والله ..
الى اللقاء ...