أجنحة بلا ريش ... طارق اللبيب

الحلقة السابع عشر

انا بقيت كلما اتذكر دموع صالح بتجيني عبرة .. وحسيت انو صالح . صالح اتعرض لي ضغوط مابعدها ضغوط .. لكن ده كلو ما ببرر.. ليهو انو يختار اسوء انواع الحرام في الدنيا ويعملا .. ونادية تلاتة يوم ماجات لي صالح .. وصالح كل يوم ماشي احسن من القبلو .. والممرضة الاسمها اسماء دي .. والله ما نقدر نجازيها .. والله شغالة معاهو كأنه اخوها ود امها وابوها .. ان شاء الله البت دي البتاكلو ينفعها .. روبنا يبارك ليها في كل البتشيلو .. علاجات ودلك .. واعشاب بلدية. يعني الزولة دي ماواقفة على علاجاتها بتاعات الطب وخلاص .. اي شي بتحس انو فيهو فايدة لي صالح بتعملو. ونحن واثقين من نواياها .. مابنعترض على اي حاجة هي بتعملا .
وكل التكاليف انا متكفل بيها ..

نادية يوم اتصلت علي قالت لي انا الليلة ماشة بيتكم .. قلت ليها بتمشي الساعة كم؟ قالت لي يعني زي الساعة 2 كدا بمشي الكلام ده يمكن بعد خمسة يوم من صالح بدا يتحسن ..
قلت ليها حاضر . بمشي معاك قالت لي لالا .. ماينفع الا تكون مراقب من حتة هو ماشايفك ..
قلت ليها جدا كويس .
قمت مشيت البيت .. وما دخلت بالصالة الفيها صالح .. دخلت بالباب الشرقي . ومشيت انتظرت نادية لامن جات .. وسلمت على ناس البيت وحمدلت السلامة للوالدة . قال لسارة . صالح راقد وين؟ . ورتها وسارة كانت مشغولة .. قالت ليها راقد في الصالة خشي ليهو .. انا مشيت وقفت جمب الصالة بي برة ب .. قيت واقف في الشباك .. .. وبعاين فيهو .. هو ماشايفني .. اول من دخلت نادية .. وقالت ليهو السلام عليكم .. صالح قفل عيونو .. وهي بقت تتكلم .. صالح انت كويس ؟ حمد لله على السلامة ..
اصلا مارد عليها .. لا بي ايجاب لا بقبول . ولا هز راسو اصلا ..
بس مغمض .. وانا متأكد ما شافها نهائي .. بمجرد من سمع صوتها قفل عيونو .. وسامعها زفاهم كلامها ..
نادية وكت لقتو مارد عليها .. ولافتح عيونو مشت . وانا بقيت واقف بعاين ليهو .. اول من طلعت نادية من جمبو .. فتح عيونو .. وبقى يعاين لي السقف واتقدا بالبكا .. نادية ماطلعت الصالة كويس لمن جات مارة بالشباك الانا واقف فيهو ..
قلت ليها تعالي تعالي عايني ليهو .. شافتو يبكي .. قالت لي دقيقة .. دخلت ليهو تاني ..
قالت ليهو صالح انت ليه ماعايز ترد علي ؟؟ ولاحت تشوفني ..
انا عملت ليك شنو؟ انا غلطانة فيك بي حاجة .. وهو يعاين للسقف ويبكي .. المرة دي ماغمض ..
يااخوانا البكا ده شنو الانشبكنا فيهو ..
ونادية تتكلم معاهو .. ياصالح انت حاسي بي الم؟ .. مارد ليها ..
ياصالح انت زعلان مني؟ مارد ليها ..
ولا عاين ليها اصلا..
جات طالعة قالت لي يا شمس الدين انا متأكدة انو صالح اتصالح مع نفسو .. بس حاسي بالندم .. وببكي من ماضيهو رايك شنو؟
قلتا ليها انا ذاتي ده راي ..
قالت لي كونو ما يعاين لي ابدا .. ده ذاتو دليل على انو الزول ده مسحني من راسو .. ورجع لي صالح الطبيعي ..
قلت ليها يعني يا نادية خلاص موضوعنا ح يمشي .. ؟؟ قالت ليك اصبر .. بس النتصرف مع ابوي .. والله انا مصرة على الموضوع اكتر منك .. بس انت ما منستر كلو كلو .. البشوفك مايقول ده شمس الدين المفتري داك ..
المهم دي اكبر عقدة والله في طريق نادية .. انا بشوف انها اتحلت .. مع اني ماقادر افسر تصرفات صالح اخوي دي يعني شنو .. يرفض يعاين ليها ويقعد يبكي .. والله ماعارف .. المهم الفيها خير ربنا يسويها ..
غايتو يازول مرت الايام .. واموري ماشة كويس .. انا في الفترة دي حاولت افصل شغلي من ابوي .. ايوة بحب اساعد ابوي واي حاجة .. لكن ما حابي اكون عايش تحت كنفو عمري كلو .. اجرت لي دكان قريب من ابوي .. وعملت فيهو محل بتاع اثاثات .. وتنجيد وكدا ..
وجبت لي صنااعية شطار .. وتابعت العمل براي .. والشغل مشى كويس شديد .. وحاسي انو ربنا فاتحها علي لاني متكفل بي علاج اخوي براي ..
وفي الفترة دي كل ما أسال نادية من موضوع ابوها .... بتقول لي اصبر بلاقيك وبوريك ..
يوم من الايام اتصلت عليها وكنت فاضي ليها بس ..
مصر علي انها تحكي لي الحصل شنو مع ابوها بالضبط؟؟
قالت لي ابوي رافض والله يا شمس الدين .. وشكلو بكازي فيني ..
قلت ليها احكي لي الحصل بالتفصيل ..
قالت لي انا قلت لي ابوي يا ابوي انا عايزة ارجع لي طليقي..
ابوي قال لي والله يابتي زمان وكت ابيتيهو مافي زول كان شايل عليك سكين .. وابيتي تتفاوضي معانا نهائي . ورفضتيهو بي الله واحد .. وانا شحدت ود عمتك شحدة عشان يسترك ..
وهو مشكور وافق .. تجي هسي تقول لي عايزة ارجع لي طليقي؟
طيب ممكن اسالك ؟ .. الشي الخلاك ترفضيهو بي كل اصرار .. وهسي زال وعايزة ترجعي ده شنو بالضبط ممكن اعرف؟ ..
قلت ليهو لا والله يا ابوي مابقدر اتكلم بيهو .. ابوي قال لي لو مابتقدري تتكلمي بيهو .. انا ما مستعد اتراجع من كلمتي .. بس عندك خيار واحد .. لو عايزاني اديك حريتك تكلميني في شنو بالضبط الخلاك تتطلقي .. ونرجعي تاني ؟؟
موش انتي بتي ؟؟ ومن حقي اعرف عنك كل حاجة ؟
وانا طبعا" ياشمس الدين سكت منو .. وماعرفت اتصرف كيف ؟ انت ياشمس الدين عندك حل للموضوع ده ؟؟ ..
قلت ليها والله راسي ربط كلو كلو .. اول حاجة ماصح نكلمو بالموضوع وهو موضوع انتهى .. وهو ما حيتفهم لينا ملابسات الحصل .. واحتمال لو كلمناهو يكون ده سبب تاني قوي .. يخليهو يرفض انك ترجعي لي .. لالا .. اوعي تكلميهو .. خليني انا بجي اتكلم معاهو بس اصبري..
يلا انا راسي بقى جايط .. ياربي اتصرف كيف واعمل شنو؟ واقول للزول ده شنو هسي؟ .. المهم بقيت لافي صينية زي 12 يوم ماقادر اتقدم خطوة ..
والحالة دي انا مسابق الزمن مايجي الزول من السعودية .. ويركبني التونسية ..
وكل مرة نادية تتصل علي .. بتقول لي اها ياشمسي عملت شنو؟ مالك لاهسي ماجيت لي ابوي؟ .. قلت ليها يا نادية والله ماعارف اجي اقول ليهو شنو؟ لكن ح اجرب .. بجيكم بعدين المساء .