أجنحة بلا ريش ... طارق اللبيب

الحلقة التاسعة

اول من صالح جا داخل وغضبان شديد .. ابوي قال لينا اوعا واحد فيكم يتحرك .. قام ابوي طلع برة وقفل علينا الباب .. ونحن الاتنين جوة .. الصالون قفلو من برة ..
ونحن الاتنين ما اتحركنا من مكانا .. حسب تعليمات الوالد .. بنسمع فيهو يتكلم مع صالح برة .. قال ليهو صالح؟ .. مالك الحاصل شنو ؟ضربت الباب ده شديد كدا؟ ..
صالح قال ليهو يعني ماعارف مالي؟ .. عامل لي فيها رايح؟ ..
وينهم اولادك؟ الدايرين يدقوني ويكتفوني؟ .. قال ليهو القال ليك كدا منو؟
في زول بدق اخوهو الكبير ويكتفو؟ .. مستحيل يكونو قالو كلام زي ده .. بس هم كانو بتكلمو عن زول تاني .. وسارة خطفت الكلام جابتو ليك قبل ما تتاكد..
بس نحن فعلا دايرين نتكلم معاك كلام .. ممكن تهدأ وتسمعنا؟ ..
قال ليهو بس هم وين هسي؟ انا عايز اشوفهم بي عيني دي .. ابوي قال ليهو دقيقة خليك واقف قبلك . قاعدين جوة اناديهم ..
ابوي فتح الباب وجانا جوه .. قال لينا زي ما اتفقنا مافي واحد فيكم يتحرك اي حركة. وخلوني انا بتكلم ..
نحن طبعا" مابنكسر كلام ابوي ابدا .لا أنا ولا الطيب اخوي .. ابوي ده عندنا خط احمر ..
قال ليهو ادخل ياصالح تعال .. اتفضل اقعد .. قوم يا الطيب جيب لي اخوك موية شراب .. الطيب قام طلع وصالح يعاين ليهو وصاري وشو صرة غريبة .. وانا متغايظ من نظرتو دي .قلبي يقول لي قوم اتفو قدام ابوي .. لكن ماسك اعصابي ..
عليك الله شوف الاهبل ده ..هو قايل نفسو شنو؟ لكن احسن الصبر غايتو ..
نحن كلنا ساكتين وهو ينافس زي الزول الكان جاري مسافة 10 كيلو بدون توقف .. طبعا شكلو اتغير كلو كلو .. وشو بقى اسود وعيونو ديل مهضلمات موقادر يفتحن زي الناس ..
الطيب جا داخل مدا ليهو الموية ..شال من الموية وهو بعاين ليهو في وشيهو .. وقال ليهو قلتو دايرين تدقوني موش كدا؟؟
الطيب ما ردليهو نهائي .. ومشى قعد في الكرسي الاخير .. الطيب ذاتو ماهين ..كان قام على جنو بطقطقو زي الماحصل شي .. لكن ابوي موقفنا ..
هنا ابوي قال ليهو اسمع يا صالح .. انت طبعا عارف انو نحن اسرة لينا سمعتنا ولينا وضعنا في المجتمع .. والناس وكت يجيبو سيرة ابوك في مجمتع .. الناس كلها بتسكت احترام ومعزة ..
انا والله ما دايرك تبقى وصمة عار في جبين العائلة .. اعمامك واولاد اعمامك كلهم رجال يسدو عين الشمس .. ماتخليني انا اسب اليوم الولدتك فيهو وبقيت ابوك ..
صالح قال ليهو في شنو ياحاج؟ انت بتنقنق وما داير توريني السبب .. انا غلبتني القعدة ..ودمي فار من اسلوبو مع ابوهو .. داير اقوم عليهو ابوي ثبتني من كتفي ..
صالح قال ليهو خليهو يقوم. النشوفو داير يسوي شنو؟ عشان اشرطو .. قلت ليهو ياصالح لو سمحت اتكلم بي ادب مع ابوك. ما تخلينا نغلط معاك ..
قال لي ابيت ما بتكلم .اغلط قوم النشوفك داير تسوي شنو .انت ياود فرحان ولاشنو ؟
ابوي عاين لي كدا وقال لي شمس الدين تاني لو فتحت خشمك ده انا مابرحمك .. ماتدافع عني .انا براي مالي ابكم؟؟ خليهو يتكلم معاي بالاسلوب البعجبو ..
قال ليهو ياصالح انت بتشرب البنقو وبتلعب القمار ؟ قال ليهو ايوة
كمان هسي جاي من القعدة .. رايكم شنو ؟ عندكم اعتراض . فيكم زول معرسني ؟ فيكم زول خلقني عشان يدخلني النار؟
ابوي قال ليهو هي الحكاية ما حكاية افترا وقلة ادب .. الحكاية مفاهمة .. احسن تسمع الكلام بي هداوة ..
قال ليهو ايوة ياحاج بشرب وبلعب .. ده موش سؤالك وانا جاوبت ..
قال ليهو ياصالح انا دايرك تبطل الحكاية دي والناس ديل تاني ماتمشي ليهم اها بتعصى اوامري ؟
صالح قام على حيلو وقال لي ابوي .. ربنا يهدينا ياحاج .. خير ان شاء الله .. تصبح على خير .. وجا ماشي على الباب التاني البدخل على الحمام ..وكت جا فايت جمب الطيب .. عاين لي الطيب كدا. وقال ليهو والله هسي الزول يكشك بونية يجيب اجلك .. الطيب يعاين ليهو ساي .اصلا ما رد عليهو .. وهو مشى دخل الحمام ..
انا قلت لي ابوي يا ابوي الموضوع ده ما اتحلا ..
ابوي قال لي الزول ده هسي زعلان من الكلام النقلتو ليهو سارة اختك.. نديهو فرصة يوم يومين ونتكلم معاهو تاني.. ونشوف البحصل شنو؟
وفي النهاية الخيارات كلها متاحة في يدينا ..
قلت ليهو المهم انا الفترة دي لازم اكون قاعد معاكم في البيت.الزول ده بقى ماطبيعي .. والزول وكت يبقى يشرب بنقو. ماعندو فرق من المجنون وتصرفاتو ما محسوبة .. هسي ماشفتو قال لي الطيب شنو؟
ابوي قال لي مافي مشكلة في قعدتك في البيت معانا .. بس ليمتين يعني؟ .. تقعد هنا وتخلي مراتك مع اهلها ..
قلت ليهو مرتي دايرة تقعد مع اهلها شوية ..لامن تقنع وتقول ماشة بيتها انا بمشي .. واتفقنا على كدا ..
طبعا بالليل جا رقد معاي في حوش الصالون ..خشمو ما فتحو معاي
راقد على قفاهو وشغال بالتلفون رسايل مع منو ماعارف ..
كل بعد شوية تلفونو تيت تيت .. رسالة .. انا نمت قريب الساعة واحدة
خليتو صاحي برسل وبستقبل .. الزول ده شكلو بحب .. لكن الغريبة ماعندو اي علاقة مع بت .. انا ماعارف ليهو علاقة نهائي الا حاجة جات جديدة مع التغييرات دي .. طبعا" مابتكلم معاي نهائي وكان سلمت عليهو مابرد لي السلام ..
مرت الايام وهو يطلع الصباح ويجي بالليل .يترمي ينوم ويقوم باكر .ماعندو اي جاز مع ناس البيت .. وماعارف بجيب مصاريفو من وين وحق المواصلات ذاتها من وين . وابوي لاهسي ما تكلم معاهو في موضوع المخدرات .. وصالح اخوي كل يوم ماشي اسوء من اليوم القبلو ..
وانا خلاص زهجت من القعدة في بيت ابوي .. والمدة ماشة طايلة بيني وبين نادية .. وماقادر اتصل عليها ..
وبقيت مشتاق ليها شديد وماعارف اعمل شنو؟
اها يوم قررت امشي ليهم في البيت ..بعد ما خلاص تعبت وغلبني الصبر قلت لازم انا احسم الموضوع ده .. وابقى على بينة ..
مشيت ليهم في البيت يوم بعد المغرب واستقبلوني كويس .. ابوها واخوانها قعدو معاي شكلهم عندهم خبر بي انها طالبة الطللاق .. لانهم بتعاملو معاي بي رسمية شديدة .. الحاجات الزي دي انا بحسها احساس .. بعد شربنا الشاي .. ابوها قال لي انت ياشمس الدين .. صحي بينك وبين نادية في اختلاف .. وهي طالبة الانفصال؟
قلت ليهو ابدا مابينا اي اختلاف. نحن سمن على عسل .. القال منو ؟
قال لي طيب هي جات هنا لي شنو؟
قلت ليهو والله على حسب كلامها هي قالت لي وديني بيتنا انا ماعايزاك .. وطالبة الطلاق .. وانا ما مقتنع بالكلام ده .لانها ماعندها سبب معين يخليها تطلب الطلاق .وانا لايمكن اوافق الا اعرف السبب البيهو طلبت الطلاق ..
انا قلت احتمال حركات حريم ساي .. لكن مادام كلمتم معناها جادة في الموضوع .
ابوها قال لي ايوة جادة .. ومصرة اصرار شديد والله ..
انا قلت ليهو طيب ماقالت ليكم السبب شنو؟ قال لي والله مانضمت باي سبب خشمها مافتحتو فيك بي عيب ..
سألناها في مشكلة بيناتكم قالت لا .. انتي عندك على شمس الدين اي مأخذ ؟ قالت لا ؟؟
قلناليها . حياتك في بيتك مريحاك؟؟ قالت مرتاحة جدا..
قلناليها . الزول ه مقصر فيك في حاجة ؟؟ قالت لا ..
قلنا ليها طيب . ليه طلبتي الطلاق؟ .. قالت انا رغبت فيهو واتزوجتو بي ارادتي.. وهسي .. رغبتي اني اسيبو بي ارادتي بدون اي اسباب..
وماقدرنا تاني نقول ليها اي كلام .. لكن الشي المستغربين فيهو .. انو انت ماجيت نهائي عشان تشوف الحاصل .ونتناقش معاك في الموضوع .. يعني نحن حسينا انك انت كمان قنعان منها ..
وصراحة ياشمس الدين .. ما دام البت رفضتك بالطريقة دي انا مابقدر اجبرها على حاجة هي ماعاوزاها .. وده دوري انا كأب .
فاحسن حاجة ليك ولينا .. وعشان العشرة والجيرة البينا .. عايزك باكر بعد باكر تجيب ليها الورقة عشان تكسب زمنها .. ربما ربنا يقسم ليها ود حلال ..
قلت ليهو طيب ياعمي انا والله اكتر حاجة محيراني عدم كلامها بالسبب ..ممكن تناديها لي ياعمي بس كلمتين وامشي ..
ابوها قال لاخوها نادي اختك ياولد ..
جات ومعاها امها .. اول زول بدا الكلام امها .. قالت لي يا شمس الدين بتي دي مالا ؟ سويت ليها شنو .. خليتها اتغيرت كدي .. البت مما جات تبكي ومابية الاكل والشراب .. بس تقول انا شمس الدين تاني ماعايزاهو .. مابرجع ليهو .. انا شمس الدين ماعايزاهو تاني مابرجع ليهو ..
وقدر ما سألنها مالو سوا ليك شنو؟ تقول ماسوا لي اي حاجة .. ماعندي عليهو اي سبب .. انا بس براي ماعايزاهو .. انا مستحيل اعيش معاهو تاني ..
ونحن كل مرة ياولدي بنقول انت تجينا تفهمنا الحاصل شنو. وانت ماجيت ونحن ماضربنا لك .. قلنا يمكن انت برضك قنعان منها ..
قلت ليها ابدا والله ياحاجة انا ذاتي ماقايلها جادة في كلامها قدر ده
بس اموت واعرف السبب والغلط الانا عملتو فيها ..
اتلفتا عليها قلت ليها يانادية الله يخليك ريحينا بي فد كلمة. انت ليه ماعايزاني .. انا لو غلطت فيك بي اي حاجة مستعد اعتذر واطلب العفو والسماح ..
امها قالت والله ياولدي ده ياهو الظن الظنيتو فيك .. من ما انت صغير ولدة رضاء وطيب وود حلال .. علا بس ياولدي عين اصابت بتي ..
اها نادية نضمت قالت لي ياشمس الدين انت سألتني قبل ما اجي هنا .. وانا قلت ليك مافي سبب .. بس ماعايزاك وخلاص .. اجيب ليكم سبب بالكضب من راسي ولا شنو يعني؟ .. الحكاية دي رغبة .. ودي حياة يعني مايوم ويومين ..
والزول لازم يعيش حياتو مع انسان برتاح معاهو نفسيا ووجدانيا .. انا ما عايزاااااااك كلامي ده عايز ليهو توضيح؟؟
ابوها قال لي ياشمس الدين ياولدي .. البيت بنزل من السماء يوم العرس .. وبرتفع زي عمر الزول البنتهي يوم الطلاق ..
ان شاء الله ربنا يقسم ليك اخير منها .. رسل ليها الورقة وخلاص ..
كلم ابوك قول ليهو البت طالبة الطلاق براها .واهلها مارضيانين منها .. لكن مابنقدر نجبرها على حاجة هي ما دايراها ..
قلت ليهو خير يا عمي . انا مافي يدي حاجة تانية بقدر اعملها كل البقدر عليهو عملتو .. بس والله كنت بتمنى اعرف السبب ..
وقمت طوالي منهم رجعت البيت.. وناديت ابوي وامي واخواتي والطيب .. صالح طبعا مافي .. وحكيت ليهم القصة كلها .. واعتذرت ليهم اني ما وريتهم انها طالبة الطلاق لاني قايلها ماجادة ..
المهم يا ابوي ويا امي .. الزولة دي طالبة الطلاق ومصره عليهو اصرار شديد .. وابت توريني السبب اللهي طالبة بيهو الطلاق ..
وابوها وامها واهلها مارضيانين منها لكن انا قررتا اديها ورقتها وخلاص ده الشرع ..
الى اللقاء ..