ميمونة قالت لي والله ياشمس الدين اخوي قال .. البيت الوصفتوهو ده بيت سيدو واحد من الناس الباقين اذي للحي .. بجيب الناس بلعبو القمار في البيت .. واخر الليل الناس بشمو ريحة البنقو اخوي ..قال ليك لو اخوك بجي للناس ديل.. احسن تحصلو تمنعو منهم ..
لانهم كل شهرين تلاتة عاملين فضيحة في الحلة .
والله ميمونة بتحكي لي ..انا حسيت بالواطة دي داير تنفج وتبلعني .. وماعارف اتضايق من شنو؟ وللا شنو؟ مرتي الفاتت ودايرة الطلاق ومادايرة تتفاهم . ولا اخوي الطلع ظني فيهو زي ماهو .. ايوة طبعا" انا حسيت من فترة ..انو صالح اخوي اتغير تغيير توتلي . واتمسخ لي شخص تاني تماما .. صالح الكان مابفوت وكت بقى يسب الدين . وكرعيهو مخرخرات التقول بايل فوقن حمار .. وبقى زول اصلا ماتمام .. مستحيل يكون التغيير ده ساي كدي . انا عرفت بكون ده البنقو الملعون .. الله يلعن البنقو ويلعن الناس الببيعيو ..
والزي ديل كمان بكونو بستعملو حبوب الهلوسة عشان الريحة ماتضرب في الحلة ..
المهم يازول انا عديت اليوم داك كلو مضايق وقرفان ..وبعد الدوام مباشرة مشيت على ناس بيتنا ..وكلمت الوالدة قلت ليها . نادية مشت بيتهم . وما كلمتها انها طلبت الطلاق . قلت اصبر شوية امكن الامور تهدأ . دايما قالو الزول قدر مايتمهل اخير ..
سألتها قلت ليها يا امي صالح جاء هنا .. قالت لي ماجاء لكن قال بجي بالليل ..
قلت ليها يا امي الزول ده بمشي جبرة ..لي ناس بتاعين مخدرات وقمار . انتي من متين ماشفتيهو؟
قالت لي من يومو المرق معاك تاني الابضرب لي تلفون بس.. وماحصل ضرب لي ابوهو كلو كلو .. وابوك زعلان في الحكاية دي
والله انا بحنس فيهو تلاتة ساعات . حتن قال لي خليهو اليجي . بس انا البيت بضيق على معاهو .. وما داير اشوفو قدام وشي .
يعني غالبو يرفع تلفون يسأل من صحة ابوهو .. ويراضيهو ويعتذر
من زعل ابوهو .. غايتو ياشمشي اخوك ده جنس شوامتو مالاقتني . راسو اقوى من الصبة حقة العتبة دي .
قلت ليها طيب وين الطيب اخوي ؟
قالت لي الطيب مرق بجي هسي .. مالك ؟ قلت ليها اصبري بس عندي معاهو موضوع .. وانتظرت لمن جا الطيب.. وابوي ماجا لسع المهم اتغدينا انا والطيب سوا من يد امي .. والاكل من يد الوالدة ليهو طعم مختلف . بقيت بتكلم مع الطيب اخوي .. قلت ليهو انا داير اكلفك بي مهمة مافي زول بقدر عليها غيرك ..
اخوك صالح حاصل عليهو كيت كيت .. وانا ماقادر امشي جبرة عشان اتقصى الحقايق .. لازم تمشي تشوف لي الحاصل شنو بي شطارتك وفهمك .. الزول ده بضيع مننا ونحن نتفرج ..
الطيب قال لي مستحيل صالح اخوي يكون كدا .. قلت ليهو انت شفتو متين ؟ لمن يجيك بعدين شوفو.. واتكلم معاهو لو اقتنعت بي كلامي . اضرب تلفون واديني رايك .. ولو لقيتو طبيعي انسى الموضوع ..
اتونست مع اخواتي . واتخارجت مشيت على بيتي الفاضي . والله لمن وصلت البيت وفتحت الباب بالمفتاح لقيت البيت ده كئيب . وشكلو حزين .. زي الخرابة .. سبحان الله نادية كانت عاملة في البيت ده روح غريبة .. انا في اللحظة اشتقت ليها شديد والله ..
دخلت الحمام وغيرت هدومي.. وجيت اخدت لي رقدة .. وشلت التلفون طلعت رقمها وداير اضرب ليها .. اترددت شوية وضربت ليها تاني .. الجرس ده دق لامن وقف براهو ماردت .. قلت يمكن تكون بعيدة من التلفون .. النجرب تاني .. وجربت تاني وتالت ورابع .. مافي رد .. قلت اجرب المرة الاخيرة لقيتو مقفول .. ياساتر ..والله المراة دي معناها الشايلاهو معاي تقيل .. ياربي بكون في شنو مثلا؟؟ قلت يازول اقوم اصلي المغرب وامرق كدي على جماعتي الفي الفرن .. اصلا مافي موضوع ..
المسجد جمب البيت شديد ..مشيت اصلي . انافي الصلاة تلفوني ضرب .. عفستو بي يدي كدا .. صمت .. لمن طلعت من الصلاة عاينت لقيتها دي نادية ضربت لي ..
سريع عملت استعادة الرقم ودقيتلها.. والتلفون في اضاني وانا مارق من الجامع .. بلبس في شباشبي .. والجرس في اصاني ولسع مافتحت الخط .. لامن قطع .. تاني ضربت ليها .. ردت مشيت البيت طوالي عشان اتكلم معاها بي مزاج .. واحاول اقول ليها كلمات حلوات .. عشان تخلي قوة الراس دي ..
دخلتا البيت ورقدت في السرير.. وانا بتكلم معاها .. كيفك يانادية ..
ماشفتي البيت بعدك كيف كئيب وشكلو حزين ..
وانا قاعد براي ومالقيت زول عمل لي الاكل ..سكتت مسافة .
وقالت اولا انا اسفة انتبهت اخيرا انك بتكون في الصلاة ..ولا ماكنت ضربت ليك في الوكت ده .. بعدين انا والله انت بتضرب لي والتلفون كان صامت مجدوع في الدولاب مع هدومي ..
وانا رجعت ليك عشان اقول ليك كلام محدد ..وياريت تفهمني يا شمس الدين .. انا ماعايزاك تضرب لي تاني .. لاني ربما اساسا ما افتح ليك الخط . ... وانا ماعايزة اسمعك كلام انت مابتستاهلو . فانا بشوف احسن الناس تفترق بالمعروف.. مافي داعي للزعل والاحراج ..
انا طالبة منك طلب واحد بس .. حاول رسل لي ورقتي بي سرعة ..
قلت ليها يا نادية استهدي بالله عليك ..وسيبي الكميرا الخفية البتعملي فيها دي ؟
قالت لي كميرا خفية بتاعة بتاعة شنو؟ يا شمس الدين؟ حصل انا غشيت عليك ؟ حصل يوم هددتك باني ح افارقك؟
انت ماعارف انو الطلاق مافيهو هظار ولعب؟ انا عارفة كدا .
بس لو سمحت تاني ماتضرب لي لاني ماعارفة اقدر اضبط اعصابي ولالا ..
ودعتك الله مع السلامة .. بعدين اسمع .. تاني لو دقيت لي مابرد ليك .. خليك عارف عشان ماتتعب ..
وقفلت الخط من دون ماتودعني حتى .. وصوتا متغير واسلوبها في الكلام .. دي عين شنو دي ياناس ..
دخلت التلفون ولبست شباشبي وقمت مرقت على جماعتي في الفرن
وداخل في هم وغم لايعلم بيهو الا الله .. واكتر شي محيرني بس المراة دي مالا؟
ومشيت قعدت قعدتي ديك لغاية اخر الليل ..وغشيت المحطة اتعشيت وجيت بيتي وقمتا باكر الصباح على الشغل ..
تاني يوم يازول اتصل على الطيب اخوي .. وقال لي ياشمس الدين صالح جاء البيت ..
قلت ليهو اها لقيتو كيف ؟ زي ماقلت ليك ولا كلامي ماصح؟ ..
قال لي يا شمس الدين صالح ده ما طبيعي نهائي .. ودي حالة بتاعة
زول البنقو وانا بعرفا .. اخو صاحبي بشرب يوميا .. نفس شكل صالح ده وطريقة تصرفاتو ..
صالح ما محتاج نمشي نفتش بي وراهو يا شمس الدين ..صالح ده بلفها بلفها .. والله ادق عليهو القسم ..
طبعا" انا مقتنع بي كلام الطيب لي درجة فوق الحد الحد المعقول ..لكن داير تكون عندي بينة ودليل عشان ما اتكلم ساي ..
قلت ليهو يا الطيب اخوي انت مابتعرف اكتر مني .. انا ما مقتنع بالكلام ده .. وعشان نحن مانظلم الزول ده ساي لازم نتأكد .. عشان وكت نكون متأكدين بنقدر نتصرف ..مانقعد نتهم في الزول ساي بدون دليل .
قال لي والله ياشمش الدين دي ما دايراالا دليل ..لكن انا الليلة بمشي واجيب لك الدليل والبرهان ..
قلت ليهو حتجيب الدليل ده كيف.. قال اصبر ..
اها يازول الطيب المسلط .. اتاريهو عندو صاحبو ساكن في جبرة قال ليهو دايرك تمشي للناس ديل في محلهم.. وتقول ليهم انك داير تشتري .. ووتقعد معاهم وتشري منهم .. شالو تلفون نوكيا نوع جديد كدا ..من صاحبهم ساكن اركويت . وقال ليهو تصور ناس القعدة ..التلفون نوكيا .. بصور الزول فيديو عديل .. جايبنو من اوروبا ولا وين ماعارف . الوكت داك طبعا التلفون الفيهو كميرا ده بكون مميز خلي يصور فيديو ..
نحن كنا ناس 3310 ساااي ..
اها المهم صاحبو المسلط مشى للجماعة في البيت وصورهم وسجل المقطع صورة وصوت .. قعدة القمار والدخاخين التصوير ما واضح لانو الواطة بالليل .. لكن صالح اخوي ظاهر في الفيديو ..
..انا اول مرة اشوف لي تلفون بصور فيديو .. سبحان الله غايتو كنت مخلوع .
المهم يا زول نحن بقى عندنا الدليل القاطع للشك.. انو صالح اخوي صطلجي كبير.. ياخي الزول ده في الفيديو ببخبخ السجارة دي بخبيخ معلمين . معناها الحيوان طول فترتو البمشيها لي جبرة دي هو قاعد يتسطل .. عشان كدي اتغير من راسو لي كرعيهو ..
اها بقينا نتشاور انا والطيب اخوي في الموضوع ده .. قال لي طوالي نكلم ابوي بالموضوع ده عشان يحسم الحكاية دي .. قلت ليهو انت غبي ؟ والله ابوك يطين الموضوع زيادة انت عارف انو السبب الاساسي لي حالة صالح اخوي دي ..عشان ابوي طردو من البيت وشتمو ونبذو .. وانت عارفو زول حساس واحمق .. طوالي مشى في طريق الغلط ..
وهسي لو كلمناهو ماحيقدر يعمل ليهو حاجة غير ما يطردو تاني ..
وصالح مافرقت معاهو .. بطلع من البيت وبمشي لي اصحابو ديل والمرة دي يسكن معاهم هم . ولابجي حايم على جيهتي ..
الطيب قال لي طيب نعمل شنو؟ قلت ليهو نتلكم معاهو براهو براحة كدا ونوريهو اننا كشفناك ونوريهو انو في فيديو مصور انت فيهو بتشرب في المخدرات .. ولو ما اقتنع نخوفو انو الفيديو ممكن يصل ابوي .. او يصل الحكومة او اي حاجة .. ماعارف والله يا الطيب انا مخي كابس كلو كلو ..
قال لي طيب نحن لازم نتصرف بي سرعة مخك الكابس ده ماينفع في الحالة دي ..
انت هسي امشي ارتاح في البيت وانا بكرة بقعد مع اصحابي الاتنين ديل واشوف انا عايز اعمل شنو؟
ومرت الايام ونحن ماقادرين نعمل اي حاجة مع صالح ولاقادرين نتكلم معاهو.. وانا من يوم فاتت نادية تاني لاجاني ولا اتصلت عليهو ولا لاقيتو ..
اها بعد اسبوع من الفيديو ده .. الانا شفتو والفيدو طبعا" محفوظ في تلفون الولد المن اركويت ..
اها بعد اسبوع جاني الطيب اخوي في البيت قال لي .ياشمس الدين صالح اخوي ده وضعو بقى لايحتمل .. ياخي الزول ده بتصرف تصرفات اصلا مامعقولة ولا منطقية .. الزولة حالتو اتاخرت جدا جدا .. قلت ليهو مالو في شنو احكي لي ..
قال لي الزول ده اول حاجه بتكلم قدام ابوي كلام فارغ .. وبحوم في البيت بي ملابس داخلية قدام اخواتو وامو .. وماعندو اي احترام ولاحرمة .. الزول ده روحو انطمست .. الزول ده كان عايش في بيتك كيف؟ وقاعد يتصرف قدام مرتك كدا برضو ؟
قلت ليهو ابدا والله غايتو في بيتي ماحصل شفت عليهو تصرف ماياهو ..
لكن الزول ده مادام بقى كدي انا هسي بشيل هدومي وبمشي معاك البيت .. والفترة دي بقعد معاكم هناك .. واشوف الزول ده .. والله العظيم نمسكو ندقو دقة الكلب الاكل الدريش ..
قال لي انا ذاتي قلت كدا .. الزول ده يا شمس الدين ماعندو حل غير نمسكو ندقو ونكتفو ونقفلو في غرفة ولاحمام ولامصيبة ..
انا بصراحة ارتحت لي كلام الطيب.. وفكرتو بتاعة الدقة دي .. لي سبب .. لاني من الكلام ده طوالي ختيت في راسي .. انو تصرفات
صالح اخوي هي السبب الطفشت مرتي من البيت ..
وقررنا انا والطيب نكلم ابوي .. لانو ابوي من زمان داير لي صالح الدقة دي .. وركبنا ومشينا اول حاجة حلو كوكو شترينا عكازين وحبال للربيط ومشينا على البيت ..
الى اللقاء ..
VOUS LISEZ
أجنحة بلا ريش ... طارق اللبيب
Fiction généraleتدور أحداث القصة بلسان شمس الدين احمد الذي يبلغ من العمر 28 سنة .. تحصل على شهادة بكلوريوس من اداب الاسلامية . يعيش مه زوجته نادية في منزل مستقل عن أسرته .. تدور احداث القصة من السابع من عام 2002م .. و زي ما قال شمس الدين نحن كنا عايشين في احسن حا...
